Le Manatu o le Tusi Paia

Pe e Taʻutonuina le Tauatane ma le Tauafafine?

O LE faatinoina o le tauatane ma le tauafafine o se faiga ua faaauau ona talia i le tele o atunuu. Na talosaga se vaega o se lotu i le Iunaite Setete ina ia toe faaupu manatu o le Tusi Paia e faatatau i le tauatane ma le tauafafine, e tusa ai ma le “atamai faaonapōnei.” O se faifeʻau i Pasili o lē sa faaipoipo talu ai nei i le itupā lava e tasi, sa ia faalaeiauina foʻi le “toe iloiloina o le Tusi Paia,” ina ia talafeagai ma manatu faaonapōnei a lana ʻaulotu.

I le isi itu, o i latou e lē taliaina faiga faatauatane ma tauafafine, e masani ona faailogaina o ni tagata e ʻinoʻino pe e faailoga tagata. O le ā le manatu moni o le Tusi Paia e faatatau i le tauatane ma le tauafafine?

O le ā le Manatu o le Tusi Paia?

E lē o lagolagoina e le Tusi Paia le faailoga tagata faasaga i isi tagata. Peitaʻi, e manino le vaaiga i faiga faatauatane ma tauafafine.

“Aua lava neʻi lua momoe ma se tane e pei ona lua momoe ma se fafine. O se mea e matuā inosia lea.”—Levitiko 18:22.

I le avea ma vaega o le Tulafono a Mose, o lenei faasāsāaga o se tasi o tulafono i le tele o tulafono tau amio na avatu faapitoa i le nuu o Isaraelu. E ui i lea, ua faaalia i lea tulafono le silafaga a le Atua i faiga faatauatane ma tauafafine, e tusa lava po o tagata Iutaia pe e lē o ni Iutaia, ae ua faapea mai: “O se mea e matuā inosia lea.” Na faia e nuu na siʻomia Isaraelu faiga faatauatane ma tauafafine, mataifale, mulilua, ma isi faiga na faasā i le Tulafono. O lea, na silasila le Atua i na nuu o ni tagata e lē mamā. (Levitiko 18:24, 25) Pe na suia le vaaiga a le Tusi Paia i le vaitaimi o le Faa-Kerisiano? Iloilo mau o loo mulimuli mai:

“Ua tuu ai pea i latou e le Atua i o latou tuʻinanauga i feusuaʻiga e māsiasi ai, auā ua fesuiaʻi e fafine tū e masani ai, i tū e lē masani ai. E faapena foʻi tane, ua latou tuua tū e masani ai ma fafine, a ua mū i le tuʻinanau e feusuaʻi ma isi tane ma faia amioga matagā.”—Roma 1:26, 27.

Aiseā ua faamatalaina ai i le Tusi Paia le tauatane ma le tauafafine o ni tū e lē masani ai ma e matagā? Talu ai o loo aafia ai faiga tau feusuaʻiga lea e leʻi fuafuaina e Lē na faia i tatou. O faiga faatauatane ma tauafafine, e lē mafai ona fanauina mai ai ni fanau. O loo faatusa e le Tusi Paia faiga faatauatane ma tauafafine i gaoioiga a agelu fouvale lea ua avea nei ma temoni, o ē na feusuaʻi ma fafine a o leʻi oo mai le Lolo i aso o Noa. (Kenese 6:4; 19:4, 5; Iuta 6, 7) E silasila le Atua i na faiga o ni tū e lē masani ai.

Pe e Iai ni Vala e Taʻutonuina ai le Tauatane ma le Tauafafine?

E taumānatu nisi, ʻPe e avea sela faafanautama, siʻomaga, po o mea na tutupu i le olaga e pei o le faaleagaina i faiga taufeusuaʻiga, ma itu e taʻutonuina ai se tasi o loo iai faanaunauga faatauatane?’ E leai, e lē mafai. Manatu i le faaaʻoaʻoga lenei: Atonu e iai i se tagata le mea o loo taʻua e nisi o saienitisi, o le faanaunauga e sosolo i le toto i le faaaogāsesēina o le ʻava malosi, pe atonu foʻi na ola aʻe o ia i se aiga e masani i le inu ʻava malosi. E mautinoa, o le toʻatele o tagata e manatu alofa i se tagata o loo feagai ma na ituaiga o tulaga. Ae peitaʻi, e lē faapea ai o le a faalaeiau o ia e faaauau ona faaaogā sesē le ʻava malosi, pe lē taofia foʻi lana tauiviga i le faaaogāsesēina o le ʻava malosi, ona e faapea na fanau mai ma lenā faanaunauga pe ola aʻe i lenā ituaiga o siʻomaga.

I se tulaga talitutusa, e tusa lava pe e lē o taʻusalaina e le Tusi Paia i latou o loo tauivi  ma faanaunauga faatauatane ma tauafafine, ae e lē avea lenā ma mea e lolo atu ai i na faanaunauga, e tusa pe na fanau mai ma oe pe e māfua mai i nisi māfuaaga. (Roma 7:21-25; 1 Korinito 9:27) Nai lo lea, ua saunia e le Tusi Paia fesoasoani aogā ma faalaeiauga e fesoasoani i tagata taʻitoʻatasi, ina ia manumalo ai mai i le tau faasaga i faiga faatauatane ma tauafafine.

O le ā le Finagalo o le Atua i Ē e Iai Faanaunauga Faatauatane ma Tauafafine?

Ua faamautinoa mai i le Tusi Paia iā i tatou o le finagalo o le Atua, “ia faaolaina ituaiga uma o tagata, ma ia maua le poto saʻo i le upu moni.” (1 Timoteo 2:4) E ui ina taʻusalaina e le Tusi Paia faiga faatauatane ma tauafafine, ae e lē o fautuaina mai ia ʻinoʻino iā i latou o loo faia nei faiga.

E lē tatau ona suia i vai le silafaga a le Atua i na faiga. Ua taʻua manino i le Tusi Paia i le 1 Korinito 6:9, 10 e faapea, o “tane e momoe ma isi tane,” e aofia iā i latou o ē “e lē fai mo latou tofi le malo o le Atua.” Ae ua taʻua atili i le fuaiupu e 11 se manatu faamāfanafanaloto: “Sa faapena foʻi nisi o outou. A ua faamamāina outou ma faapaiaina, ma ua taʻuamiotonuina outou i le suafa o lo tatou Alii o Iesu Keriso, ma le agaga o lo tatou Atua.”

E manino mai, o i latou e mananaʻo moni e tapuaʻi i le Atua i ona ala, na talia ma le māfana i le uluaʻi faapotopotoga Kerisiano. E faapena foʻi ona moni i aso nei i tagata faamaoni uma o loo saʻilia le finagalo malie o le Atua—e lē i le toe faaupuina o le Tusi Paia—ae e ala i le ola e ōgatusa ma le Tusi Paia.

PO O E TAUMĀNATU EA I NISI TAIMI?

● O le ā le vaaiga a le Tusi Paia i faiga faatauatane ma tauafafine?—Roma 1:26, 27.

● Po o faapea mai le Tusi Paia o tagata o loo iai faanaunauga faatauatane ma tauafafine e lē tāua?—1 Timoteo 2:4.

● Pe e mafai ona faamamao ese mai i faiga faatauatane ma tauafafine?—1 Korinito 6:9-11.

[Ata i le itulau 23]

Pe e tatau ona toe faaupu le silafaga a le Atua i le tauatane ma le tauafafine?