Ua Taatele le Lē Faamaoni

O Danny * e faigaluega i se kamupani telē mo fefaatauaʻiga o oloa i Hong Kong. A o asiasi atu i se fale faigaluega e gaosi ai oloa e sapalai ai la latou kamupani, sa ia faailoa atu lona popolega pe e mafai e lenei kamupani ona ausia tapulaa e manaʻomia, ina ia gaosia ai oloa mo lana kamupani. Mulimuli ane, a o faiʻaiga i lenā afiafi, na tuu atu ai e le pule o lenā fale gaosi oloa se teutusi iā Danny. Na ia maua ai i totonu se tupe e faitau sefulu afe tālā, o ni tupe e aumai i ni auala faatogafalea—e tutusa ma le aofaʻi o lona totogi i le tausaga.

● E toʻatele tagata ua tupu ai lenei mea e pei ona oo iā Danny. I le lalolagi aoao, ua matuā faatuputupulaʻia ai le lē faamaoni. Mo se faaaʻoaʻoga, ua faaalia i pepa o faamatalaga o faamasinoga, i le va o le tausaga 2001 ma le 2007, na totogiina ai e se falegaosimea telē i Siamani le 1.4 piliona tālā, i auala faatogafalea ina ia maua ai ni konekarate.

E ui i le toe teuteuina o tulafono i faamasinoga talu ai nei e faatatau i ni faiga taufaavalea tautupe, peitaʻi i lona tulaga aoao, e foliga mai o loo faasolo ina faateteleina le lē faamaoni. I se suʻesuʻega i le 2010 a le Transparency International (Vaega Tetee i Faiga Piʻopiʻo Faapisinisi), ua latou iloa ai “ua matuā faateteleina nei faiga piʻopiʻo i le tolu tausaga ua mavae.”

Aiseā ua faateteleina ai le lē faamaoni? Pe e aogā le faamaoni? Afai o lea, e faapefea ona aogā? E mafai faapefea ona fesoasoani le Tusi Paia iā i tatou?

[Faaopoopoga i lalo]