Pe na Teʻi Lava ua Iai?

Le Isu o le Elefane

● Ua gaosia e tagata suʻesuʻe se lima e alu i le masini e iai se tomai e faigofie ona femilosaʻi. Ua faapea mai lē e faauluulu i ai le kamupani e saunia ma fuafuaina nei masini, o lenei masini fou “e sili atu lona aogā nai lo o so o se mea e maua i fale faigaluega e gaosi ai masini otometi.” O le ā le pogai o lo latou faanaunauga? Ua ia taʻua, “Ona o le auala e gaoioi ai le isu o le elefane.”

Seʻi Iloilo: E tusa ma le 300  pauna [140 kg] le mamafa o le isu o se elefane, ma ua taʻua “o se mea e sili ona tāua ma aogā i le lalolagi.” O le isu o le elefane e tele ona aogā, e mafai ona mānava ai, mimiti ai se mea, gaoioi o se lima, pe mafai foʻi ona piki ai i luga ni nai mea ninii. E mafai ai foʻi ona sogisogi, inu, uu mai i luga se mea pe tagi foʻi i se leo telē!

Ae e lē na o le pau lenā. O loo iai i le isu o le elefane le pe ā ma le 40,000 o musele, lea e mafai ai ona fegaoioiaʻi i so o se itu. O le faaaogāina o le pito i luma o le isu, e mafai ai e le elefane ona piki i luga se tamaʻi tupe siliva. I le taimi e tasi, e faaaogā foʻi e le elefane lona isu e lifi ai i luga ni mea e pe ā ma le 600 pauna [270 kg] le mamafa!

Ua manatu tagata suʻesuʻe o le faataʻitaʻi i le fausaga ma mea e mafai ona fai e le isu o le elefane, o le a fesoasoani iā i latou e fausia ai ni masini e sili ona aogā mo aiga ma fale gaosimea. Ua taʻua atili e le faauluulu o le kamupani na taʻua muamua: “Ua matou fausiaina se ituaiga o masini fou ina ia fesoasoani i tagata, ma o le uluaʻi taimi lea ua mafai ai ona galulue faatasi tagata ma masini e aunoa ma ni lamatiaga.”

O le ā sou manatu? Pe na māfua ona iai le isu o le elefane ona o le faaevolusione? Pe na teʻi lava ua iai, pe na foafoaina?