Ua Fesili Mai Talavou

Po o Maʻua ua na o se Uō pe e Iai Nisi Faalogona e Sili Atu? Vaega 1

PE NA IAI SE TAGATA PATINO NA E MAFAUFAU I AI INA UA E FAITAU I LE ULUTALA O LOO I LUGA?

IOE → FAITAU NEI LOA I LE MATAUPU LENEI. ATONU E SILI ATU ONA E MANAʻOMIA NAI LO O LE MEA O E MANATU I AI.

LEAI → FAITAU PEA LE MATAUPU LENEI. O LE A FESOASOANI IĀ TE OE INA IA E FAAMAUTINOA AI, O LOO TALAFEAGAI LE LUA FAIGĀUŌ MA LE ISI ITUPĀ MA E LĒ O IAI NI FAAFITAULI.

Faailoga le faamatalaga o loo mulimuli mai i le saʻo po o le sesē:

E lē tatau ona faia ni aʻu uō o le isi itupā, seʻi vaganā ua ou nofosauni mo se faigāuō mautū o le a iʻu ina faaipoipo.

․․․․․ SAʻO ․․․․․ SESĒ

Iloilo: E ui e leʻi fuafua Iesu e faaipoipo, ae na iai ni ana uō o le isi itupā. (Mataio 12:46-50, Luka 8:1-3) E mautinoa sa faapena foʻi le tauleʻaleʻa nofofua o Timoteo, auā na taʻu atu i ai e le aposetolo o Paulo ia feutagaʻi ma “fafine lāiti e pei o ni [ona] tuafāfine i le amio mamā.”—1 Timoteo 5:1,  2.

Atonu na mātauina e Paulo sa asiasi solo Timoteo i le tele o faapotopotoga, ma o le a feiloaʻi ai ma le toʻatele o tamaʻitaʻi talavou. (Mareko 10:29, 30) Po o se mea sesē le faifaimea faatasi o Timoteo ma i latou? E leai. Ae talu ai e leʻi mafaufau Timoteo e faaipoipo i lenā taimi, sa manaʻomia la ona ia faataatia ni tapulaa ina ia leai ni ona uiga alofa fetosinaaʻi, ma ia mautinoa e lē o faatafai atu i na fafine lāiti pe taaloalo foʻi i o latou faalogona.—Luka 6:31.

Ae e faapefea oe? Po ua e sauni moni e faaipoipo?

Afai IOE ⇨ O au faauōga ma isi o le isi itupā, atonu e iʻu ai ina e maua sē e avea ma au paaga i le olaga atoa.—Faataoto 18:22; 31:10.

Afai LEAI ⇨ E tatau ona e faataatia ni tapulaa. (Ieremia 17:9) E faigofie ona fai atu nai lo o le faatino, a ea? O le mea moni lenā! Ua faapea mai Nia *o se tamaʻitaʻi e 18 tausaga: “E lē faigofie ona tausia se mafutaga e faapea ua na o se uō. E lē faigofie ona iloa po o ā tapulaa e faataatia.”

Aiseā e tatau ai lava ona iai ni tapulaa? Auā a leai, e mautinoa o le a iʻu ina e mafatia pe mafatia foʻi isi. Seʻi iloilo pe aiseā.

 LE MEA MONI: Pe afai e te ova māfana atu a o leʻi nofosauni mo se faiā mautū, o le a iai se tasi e mafatia. Ua faapea mai Kelli o se tamaʻitaʻi e 19 tausaga: “E faalua ona tupu lenā mea iā te aʻu. O se tasi o taimi na iai ni oʻu faalogona i se tama, ae o le isi taimi, na iai faalogona o le tama iā te aʻu. I na taimi e lua, na iai se tasi na mafatia, ma o loo afāina ai pea oʻu faalogona e oo mai i le aso nei.”

Ia mafaufau i mea nei:

● O ā tulaga e talafeagai ai ona e faamasani i tagata o le isi itupā? O ā tulaga e lelei ona e ʻalofia?

● Aiseā e lē atamai ai ona e taulaʻi atu ma faifaimea faatasi pea ma se tagata e toʻatasi i taimi uma? O le ā le mea atonu o le a mafaufau i ai lenā tagata? O le ā atonu o le a e mafaufau i ai?

“E iai taimi ou te faaʻoleʻole ai iā te aʻu ma faapea ifo, ʻSe ua na o maʻua o se uō. E pei lava o soʻu tuagane.’ Ae ina ua ou iloa ua uaʻi atu o ia i se isi teine, sa ou lagona le tigā, ma manatu e na o aʻu lava e tatau ona faifaimea faatasi ma ia.”—Denise.

Ua faapea mai le Tusi Paia: “O le tagata mafaufau e iloa atu le mala ma ʻalofia, a o le tagata e lē faaaogā le mafaufau e alu atu pea ma mulimuli ane toe salamō.”—Faataoto 22:3, Good News Translation.

 LE MEA MONI: Pe afai e te ova māfana atu a o leʻi sauni mo se faiā mautū, o le a motusia la se faigāuō lelei. Na faapea mai Kati o se teine e 16 tausaga: “Sa iai se tama e masani ona ma text. E leʻi umi ae amata loa ona ia faatafai mai ma na toetoe o aso uma e ma te text ai. I le isi la aso, na ia taʻu mai ai ua matuā fia uō lava iā te aʻu. Ae o le faafitauli, e matuā leai lava ni oʻu faalogona alofa fetosinaaʻi mo ia. Ina ua ou taʻu atu i ai oʻu lagona, na seāseā loa ona ma toe talanoa, ma na iʻu ina uma ai loa ma le ma faauōga.”

Ia mafaufau i mea nei:

● O ai na mafatia i le mea na tupu iā Kati, ma aiseā? Pe sa ono mafai e Kati po o le tama ona ʻalofia le tulaga leaga na iʻu i ai? Afai o lea, e faapefea?

● Pe a text, o ā ni auala e mafai e se tasi ona faia e aunoa ma lona iloa, ua ia avatu le manatu sesē i le isi o loo manaʻo i se faigāuō e sili atu i lo o le tau ina avea ma se uō?

O nisi taimi ou te taumafai lava ia aua neʻi faaaluina se taimi ma se tama. E mafai ona avea tama o ni uō lelei, ae ou te lē manaʻo e faaleagaina lenā faiā e ala i le iai o ni faalogona e lē talafeagai.”—Laura.

Ua faapea mai le Tusi Paia: “O le tagata e iai le utaga mamao, e na te iloilo lelei ona laasaga.”—Faataoto 14:15.

O le manatu autū: E lē sesē le auaufaatasi ma isi o le isi itupā. Ae afai e te leʻi sauni mo se faiā mautū lea e iʻu ai i se faaipoipoga, e tatau la ona faataatia ni tapulaa.

I LE ISI MATAUPU E SOSOO AI “UA FESILI MAI TALAVOU” . . .

O le aafia i le tulaga taufaalogona a o leʻi sauni mo se faiā mautū, e mafai ona faaleagaina ai lou talaaga—iloilo pe faapefea.

E maua nisi mataupu faa-Peretania o le faasologa, “Ua Fesili Mai Talavou” i le Initaneti i le www.watchtower.org/ype

[Faaopoopoga i lalo]

[Pusa i le itulau 30]

O Le Ā O Le A E Faia?

TALA MONI: “Sa ou text i saʻu uō pe tusa ma le afe maila [silia i le 1,500 km] le mamao o le mea e nofo ai. Atonu pe e faatasi i le vaiaso ona ma text. E leʻi iai ni oʻu faanaunauga alofa fetosinaaʻi iā te ia, ma ou te leʻi manatu e fia uō o ia iā te aʻu. Ae i se tasi aso, na lafo mai ai sana text e faapea: ʻHey darling! Ua ou misia lava oe. O ā au mea o fai?’ Sa ou matuā teʻi lava! Sa ou fai i ai na ou manatu i le ma mafutaga o maʻua ua na o se uō, ma e leʻi iai ni oʻu faanaunauga alofa fetosinaaʻi iā te ia. Na toe text mai iā te aʻu, ʻE ā la.’ Ma e leʻi toe text mai lava iā te aʻu.”—Ianeta.

● Pe afai e te lē o sauni mo se faiā mautū pe e te lē o mafaufau foʻi i se tulaga faapena, o le a faapefea ona e tali atu pe a e maua se text e pei o lea na maua e Ianeta?

● Pe afai o oe o se tama, pe e te manatu e talafeagai text na lafo atu iā Ianeta? Aiseā e sesē pe e lē sesē ai foʻi?

● I lou manatu, pe e sili atu ona aafia faalogona pe a text nai lo o le talanoa faafesagaʻi? Aiseā e sesē pe e lē sesē ai foʻi?

[Pusa i le itulau 31]

AISEĀ E LĒ FESILI ATU AI I OU MĀTUA?

Fesili i ou mātua i ni o la manatu e uiga i fesili tāua o loo i lenei mataupu. Pe e ese o la manatu mai i ou manatu? Afai o lea, e faapefea? O ā ni aogā e te maua mai i o la manatu?—Faataoto 11:14.

[Pusa i le itulau 31]

TALA A ISI TALAVOU

Iosua​—O le tele o le taimi e te faaaluina ma se tagata e toʻatasi, o le tele foʻi lenā o le a e tosina atu ai iā te ia.

Natasha​—Afai o lou faanaunauga ua na o se uō, ae e te lua faifaimea faatasi ma lenā tagata e toʻatasi i taimi uma, o le a mapuna aʻe la ni lagona alofa fetosinaaʻi i se tasi o oulua, po o oulua uma foʻi.

Kelsey​—E tusa lava pe na lua amata mai ua na o se uō, e faigofie lava ona suia faalogona pe afai e te lua faifaimea faatasi i le tele o taimi. E mafai ona avea se tasi ua na o se uō, ae e manaʻomia ona taʻumatuaina ma faautauta.

[Ata i le itulau 30]

O le aafia i le tulaga taufaalogona a o leʻi sauni mo se faiā mautū e iʻu ai ina mafatia