Le Tusi Paia​—O Se Tusi o Valoaga e Saʻo Aʻiaʻi

Vaega 3

“Ua Ma Maua le Mesia”

I lenei mataupu faasolo e valu vaega, o le a talanoaina ai i le Ala Mai! se vala mataʻina o le Tusi Paia—o valoaga. O le a fesoasoani mataupu iā te oe ina ia taliina ai fesili nei: Po o valoaga o le Tusi Paia ua na o ni tusitusiga a ni tagata atamamai? Pe e faamaonia na faagaeeina e le Atua nei valoaga? E matou te valaaulia oe ia iloilo faamaoniga.

 I LE tele o senituri a o leʻi fanau mai Iesu, na valoia e perofeta Eperu le afio mai o le Mesia, o lona uiga i le gagana Eperu o “Lē ua Faauuina.” Na taʻua e na perofeta faamatalaga maʻoti e uiga i le soifuaga o le Mesia i le lumanaʻi—e aofia ai lona gafa, le nofoaga ma le taimi e aliaʻe mai ai ma mea o le a tutupu iā te ia.

Na talitonu Kerisiano i le uluaʻi senituri T.A. o nei valoaga sa faataunuuina iā Iesu. Sa tutusa lo latou manatu ma le soo o Aneterea o lē na fai atu i lona uso o Simona: “Ua ma maua le Mesia.” (Ioane 1:40, 41) Pe na saʻo lenā manatu? Mai i le tele o valoaga e uiga i le Mesia, seʻi o tatou vāai i ni valoaga se fā, ma iloilo faamaoniga o nei valoaga taʻitasi.

Valoaga 1: “E nofo o ia i le nofoālii tautupu o Tavita.”—Isaia 9:7, “Knox.”

Faataunuuga: E amata le Evagelia a Mataio i upu nei: “O le tusi o le gafa o Iesu Keriso, o le atalii o Tavita, o le atalii o Aperaamo.” Ona amata mai lea e Mataio o le gafa o Iesu mai iā Tavita, e pei foʻi ona faamatalaina e le tusitala o le Evagelia a Luka.—Mataio 1:1-16; Luka 3:23-38.

Faamaoniga mai talafaasolopito:

● Ua taʻua i tusitusiga a Josephus, o le tusitala Iutaia o talafaasolopito, sa maua i fale mataaga mo tagata lautele ia faamaumauga o gafa o aiga Iutaia. Sa faaleagaina na faamaumauga i le 70 T.A. ina ua faatamaʻia Ierusalema. Peitaʻi a o leʻi faatamaʻia Ierusalema, sa lauiloa i le lautele o Iesu e tupuga mai iā Tavita. (Mataio 9:27; 20:30; 21:9) Pe ana faapea e sesē lenā manatu, semanū e fesiligia e so o se tasi pe faapea mai foʻi e lē saʻo. Peitaʻi, e leai ni faamaoniga e iloa ai sa iai se tasi na faia faapea.

Valoaga 2: “O oe, Peteleema Efarata e, o lē e sili ona itiiti ma e lē aofia i le faitau afe o Iuta, e tupu mai iā te oe mo aʻu o lē o le a avea ma pule i Isaraelu.”—Mika 5:2.

Faataunuuga: Sa fanau Iesu i Peteleema. Ina ua poloaʻia e Kaisara Aokuso se tusigāigoa, sa usitaʻi loa Iosefa le tamāfai o Iesu, ma alu atu mai i Nasareta agaʻi i “Iutaia [Iuta], i le aai o Tavita ua taʻua o Peteleema, auā o ia o se tasi o le aiga o Tavita, ina ia tusia o la igoa faatasi ma Maria.” A o iai i inā, na “fanaua e [Maria] lana tama tama” o Iesu.—Luka 2:1-7.

 Faamaoniga mai talafaasolopito:

● Ua faamaonia mai i suʻesuʻega o toega o mea i le eleele, sa faia e tagata Roma tusigāigoa i Sasaʻe Tutotonu ina ia aoina ai lafoga ma faamauina igoa mo le auaunaga faavaegāʻau. O le faamaoniga o se tasi o na tusigāigoa, na maua i se poloaʻiga a le kovana Roma o Aikupito na faia i le 104 T.A. O loo iai se kopi o lenā poloaʻiga i le Faletusi o Peretania, e faitauina faapea: “Ona o lea ua oo mai le taimi mo le tusigāigoa, ua talafeagai ai ona faamalosia i latou uma o loo nonofo ese mai i o latou itumalo po o le ā lava le māfuaaga, ia toe foʻi i o latou aiga, e lē gata ina ia faataunuu le poloaʻiga masani o le tusigāigoa, ae ina ia matuā toʻaʻaga foʻi e galueaʻiina o latou fanua.”

● E fanau mai Iesu e lua aai i Isaraelu e taʻu o Peteleema. O le tasi sa i le itu i mātū e lata i Nasareta, ae o le isi lea sa taʻua o Efarata, sa lata i Ierusalema i Iuta. (Kenese 35:19) Na fanau Iesu i Efarata, e pei lava ona valoia e Mika i le pe tusa o le valu senituri muamua atu.

Valoaga 3: “E amata mai i le alu atu o le poloaʻiga e toe fausia ma toe atiina aʻe Ierusalema seʻia oo atu i le Mesia le Taʻitaʻi, e fitu vaiaso atoa foʻi ma vaiaso e ono sefulu lua.”—Tanielu 9:25.

Faataunuuga: O le vaitaimi na taʻua i le valoaga a Tanielu e 69 vaiaso, o lona uiga e 69 faatele i le 7 tausaga, e maua ai tausaga e 483. Na amata le toe fausiaina o Ierusalema i le 455 T.L.M. E pei ona valoia, e 483 tausaga (69 vaiaso o tausaga) mulimuli ane, i le 29 T.A. ina ua papatiso Iesu ma faauuina i le agaga paia o le Atua, na avea ai o ia ma Lē ua Faauuina po o le Mesia. *—Luka 3:21, 22.

Faamaoniga mai talafaasolopito:

● I le amatamataga o le uluaʻi senituri T.A., sa “faatalitali tagata” i le taunuu mai o le Mesia. (Luka 3:15) Na tusi le tagata aʻoga Iutaia o Abba Hillel Silver, i lana tusi A History of Messianic Speculation in Israel e faapea, i le vaitaimi a o leʻi faaumatia Ierusalema, “sa faatalitalia e tagata uma ua lē o toe umi ona aliaʻe mai lea o le Mesia.” Na ia taʻua foʻi “sa faatalitalia le Mesia i le amatamataga o le uluaʻi senituri.” Na tusi o ia sa faatalitali tagata Iutaia e fua i “mea na latou malamalama o le a tutupu i lenā taimi.”

Valoaga 4: “O le a fai foʻi lona tuugamau faatasi ma tagata amioleaga, e faatasi ma tagata mauʻoa pe a maliu o ia.”—Isaia 53:9.

Faataunuuga: Sa fasiotia Iesu faatasi ma ni tagata solitulafono e toʻalua, ma na tuu o ia i se tuugamau na vaneina i le papa e le tagata mauʻoa o Iosefa o Arimataia.—Mataio 27:38, 57-60; Ioane 19:38.

Faamaoniga mai talafaasolopito:

● Na faamaonia e le toʻatele o tusitala anamua e lē o ni Kerisiano, e aofia ai le tusitala o le talafaasolopito Iutaia o Josephus, ma le tusitala o le talafaasolopito Roma o Tacitus, e faapea na fasiotia Iesu o se tagata solitulafono.

● Na maua i suʻesuʻega i toega o mea i le eleele i Palesitina, ni tuugamau o loo iai ni potu e vane i totonu o papa. Talu ai sa iai nei ituaiga tuugamau, sa faigofie la i se tagata mauʻoa e pei o Iosefa o Arimataia, ona maua se tuugamau e tuu ai Iesu.

Ua na o ni nai valoaga nei o le tele o valoaga e uiga i le Mesia na faataunuuina iā Iesu. E manino mai e leai se tasi e mafai ona faapea mai e leʻi faataunuuina na valoaga. O le faataunuuina moni o nei valoaga, ua faamalosia ai lo tatou faatuatua e faapea o le Atua na pogai mai ai, ma o le a ia aumaia faamanuiaga uma na valoia o le a ala mai i le Mesia, mo tagata usiusitaʻi.

I le mataupu e sosoo ai o lenei mataupu faasolo, o le a talanoaina ai le fesili faatupu manatu lenei: Pe afai e moni o Iesu o le Mesia na folafolaina mai, aiseā la na lotomalie ai o ia e puapuaga ma maliu?

[Faaopoopoga i lalo]

[Siata/Ata i le itulau 10]

(Tagaʻi i le lomiga mo le ata atoa)

FAASOLOGA O VALOAGA E FĀ E UIGA I LE MESIA

1 E tupuga mai le Mesia i le tupu o Tavita

1070 T.L.M.

Avea Tavita ma tupu o Isaraelu uma

607 T.L.M.

Faaumatia e Papelonia Ierusalema

455 T.L.M.

Avatu le poloaʻiga ia toe faaleleia ma toe fausia Ierusalema

2 O le a fanau mai le Mesia i Peteleema i Iuta

2 T.L.M.

Fanau Iesu i Peteleema i Iuta i le gafa o Tavita

3 O le a afio mai le Mesia pe a mavae tausaga e 483 talu ona avatu le poloaʻiga ia toe fausia Ierusalema

29 T.A.

Papatiso ma faauuina Iesu e avea ma Mesia

4 O le a maliu le Mesia faatasi ma tagata agasala ma tanu faatasi ma ē mauʻoa

33 T.A.

Maliu Iesu faatasi ma tagata solitulafono ma tanu faatasi ma ē mauʻoa