Sa Ou Fiafia i Faiga Sauā

Ua Faamatalaina e Salvador Garza

A O OʻU laʻitiiti, sa ou fiafia i faiga sauā ma faamisa i so o se tagata e faaita mai iā te aʻu. Na mātauina aʻu e se tagata fusu lauiloa, ma ia aʻoaʻoina loa aʻu i le fusu. Sa ou malaga solo i le Iunaite Setete o se tagata fusu faapolofesa. Mulimuli ane, na avea aʻu ma se leoleo e puipuia se tagata e auai i se kegi.

Na ou fiafia pea i faiga sauā e ui ua ou faaipoipo ma ua toʻaono laʻu fanau. I lenā taimi, sa ou pule i se fale kalapu, ma e ui na taumafai tagata e fasiotia aʻu i le tele o taimi, ae ou te leʻi fefe ai. I se tasi o taimi, na ou fanaina ni tamāloloa se toʻalua ma manunuʻa ai. Sa matou fuafua foʻi ma nisi o aʻu uō e ave faamalosia se faipule lauiloa. Peitaʻi, na iloa e leoleo la matou fuafuaga ma faafalepuipui ai aʻu. Ina ua maua e leoleo isi o le matou kegi, sa fai ni taugā fana ma fasiotia uma ai aʻu uō. Na ou fiafia ua ou sao mai ona sa ou iai i le falepuipui i lenā taimi!

I ni tausaga mulimuli ane, na faasaʻoloto ai aʻu ma maua saʻu galuega. I se tasi aso, a o oʻu alu atu i le fale mai i le galuega, na faafuaseʻi ona matuā tigā loʻu ulu ma lē mafai ai ona ou toe gaoioi. Sa ou matuā popole ma tatalo mo se fesoasoani. Na suʻesuʻe laʻu avā o Dolores ma Molimau a Ieova, ma na faapea mai e iai le suafa o le Atua, o Ieova. (Salamo 83:18) O lea, na ou tatalo patino atu ai loa iā te ia.

Ina ua ou malosi, na faalaeiauina aʻu e Dolores e ma te auai i sauniga a Molimau a Ieova. Na maligi oʻu loimata i le agalelei ma le naunau moni na faaalia mai e Molimau iā te aʻu. O le iʻuga, na ou suʻesuʻeina le Tusi Paia ma suia atoa ai loʻu manatu e uiga i le olaga. Na ou fiafia i mea na ou aʻoaʻoina.

Na umi se taimi na aʻoaʻoina ai aʻu ia pulea loʻu ita. Mo se faataʻitaʻiga, a o ma galulue ma laʻu uō o Antonio i le talaʻiga, na ma feiloaʻi ai i se tamāloa na tautala lē mafaufau mai iā i maʻua. Na ou matuā ita tele ma oso atu i le tamāloa. Peitaʻi, na taofi aʻu e Antonio ma faatepa aʻu i le auala na onosaia ai e Iesu tauemuga ma le faileagaina e tagata. Na tusi le aposetolo o Peteru o lē na galulue soosootauʻau ma Iesu: “Ina ua upuleagaina o ia, e leʻi toe fai atu e ia ni upuleaga.” (1 Peteru 2:23) Na pāʻia loʻu loto i na upu.

Pe a ou toe mafaufau i suiga na ou faia i le tele o tausaga, ou te talisapaia e lē aunoa le agaga paia o Ieova, lea ua fesoasoani i lo matou aiga e faaalia le pulea totino ma faatupu le filemu moni. (Kalatia 5:22, 23) Ua matou fiafia faatasi ma loʻu aiga ma olioli i se olaga filemu. E sili atu i lenā, ua avea aʻu ma tagata talaʻi faataimi atoa, e fesoasoani i isi ia maua le filemu o le Atua.

[Ata i le itulau 9]

O le suʻesuʻeina o le Tusi Paia na fesoasoani iā Salvador e maua ai le filemu