“Ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.”​—Mataio 5:28.

MĀFUAAGA E TĀUA AI

Ua matuā taatele ata matagā taufeusuaʻiga i le taimi lenei. Afai e te manaʻo e faafiafia le Atua ma maua se olaga fiafia, e manaʻomia la ona e iloa po o ā ona faalogona i ata matagā taufeusuaʻiga.

MANATU O LE TUSI PAIA

E lē o taʻua patino mai i le Tusi Paia ata matagā taufeusuaʻiga. Peitaʻi, e tele mataupu silisili o le Tusi Paia e taʻusalaina ai na faiga.

O se faataʻitaʻiga, o loo taʻua manino i le Tusi Paia le lapataʻiga e faapea, pe a “vaavaai pea” se tane ua uma ona faaipoipo i se isi fafine e lē o sana paaga faaipoipo, ma naunau e fia feusuaʻi ma ia, e mafai ona iʻu atu ai i le mulilua. O lenei mataupu silisili e faatatau atu i ē ua faaipoipo po o ē o loo nofofua foʻi, ae o loo “vaavaai pea” i ata matagā taufeusuaʻiga ma naunau e faia feusuaʻiga. O na ituaiga o uiga e tigā ai le finagalo o le Atua.

“O le mea lea, ia fasiotia tuʻinanauga i o outou itutino, o le faitaaga, o amioga lē mamā, le tuʻinanau i feusuaʻiga, o tuʻinanauga leaga ma le manaʻo tele.”​—Kolose 3:5.

 MANATU O TAGATA

E manatu nisi tagata suʻesuʻe, e leai se fesootaʻiga o le matamata i ata matagā taufeusuaʻiga ma le faia o feusuaʻiga lē mamā. O lea, pe e afāina la le matamata i ata matagā?

MANATU O LE TUSI PAIA

O loo taʻua i le Tusi Paia “tausuaga matagā,” o ni amioga e lē talafeagai ma e lē mamā. (Efeso 5:3, 4) Pe e lē sili atu la ona afāina ata matagā taufeusuaʻiga? O ata matagā i aso nei, ua faaalia mai ai ni gaoioiga moni o le mulilua, tauatane, ma isi lava amioga lē mamā. O le mea moni, o le faanaunau e matamata i ata matagā taufeusuaʻiga, e sili atu ona tigā ai le finagalo o le Atua nai lo o tausuaga matagā.

O loo tumau pea ona manatu tagata suʻesuʻe, e lē faapea a matamata i ata matagā taufeusuaʻiga, ona faia ai lea o feusuaʻiga lē mamā. Ae o loo taʻua manino i le Tusi Paia, o le matamata i ata matagā e faaleagaina ai le itu faaleagaga, ma e matuā inosia e le Atua. O le lapataʻiga lenei a le Tusi Paia: ʻO le mea lea, ia fasiotia tuʻinanauga i o outou itutino, o le faitaaga, ma le tuʻinanau i feusuaʻiga.’ (Kolose 3:5) O ē o loo matamata i ata matagā taufeusuaʻiga, e latou te lē o naunau e fasiotia o latou tuʻinanauga i feusuaʻiga, ae ua na ona faateteleina ai.

“Ia saʻili i le lelei ae e lē o le leaga, . . . ia ʻinoʻino i le leaga ae naunau i le lelei.”​—Amosa 5:14, 15.

MANATU O LE TUSI PAIA

O loo taʻua i le Tusi Paia nisi sa tuua a latou masaniga leaga e pei o le faia o feusuaʻiga lē mamā, onā, ma le gaoi. (1 Korinito 6:9-11) E faapefea? O lo latou faatatauina o le atamai mai le Tusi Paia, na uunaʻia ai i latou e ʻinoʻino i le leaga.

E mafai ona e ʻinoʻino i ata matagā taufeusuaʻiga, pe a e mafaufau i iʻuga leaga o le a e oo i ai. Ua iloa mai i suʻesuʻega a le Utah State University, o ē e matamata i ata matagā taufeusuaʻiga, ua oo i latou i “mafatiaga, faaesea mai i tagata, leaga faiā ma isi,” faapea ma isi lava iʻuga faanoanoa. Ae o le aafiaga sili ona leaga, o le lē maua ai lea o se faiā lelei ma le Atua, o Lē na foafoaina i tatou.

E mafai ona fesoasoani le Tusi Paia iā i tatou ina ia fiafia e faia le mea lelei. O le faitau pea i le Tusi Paia, o le a tatou fiafia ai e faaleleia lo tatou tulaga tau amio. O lenā fiafia, o le a fesoasoani ai iā i tatou e tetee atu i ata matagā taufeusuaʻiga, ma maua ai le lagona lea sa iai i le faisalamo e faapea: “Ou te lē tuu i oʻu luma se mea e lē aogā.”​—Salamo 101:3.