UA FAAFUASEʻI ona paʻū se tasi i lalo ma ua lē iloa se mea. Ua faamalō lona tino ma ua amata ona tetete. Pe a e iloa e maua lenā tagata i le maʻi māliu, e iai gaoioiga e mafai ona e faia e fesoasoani ai iā te ia a o leʻi taunuu atu fomaʻi. Seʻi o tatou iloiloina nisi o faamatalaga moni e faatatau i lenei maʻi e leai se vaifofō.

O le ā le maʻi māliu? O lenei maʻi e māfua mai i se faalētonu i le mafaufau lea e iʻu atu ai i le faamalō ma le tetete o le tino (seizure). E masani lava e itiiti ma le lima minute le umi e oso ai lenei maʻi. O le tulaga o loo faamatalaina i le amataga o le mataupu e taʻua o le grand mal seizure.

O le ā le māfuaaga o le seizure? E talitonu tagata suʻesuʻe e māfua lenei maʻi pe a lē lelei le gasologa o sela o le faiʻai. E lē o iloa lava pe aiseā e māfua ai lenei tulaga.

O le ā e tatau ona ou faia pe a ou vaaia se tasi o oso le maʻi māliu? Ua faapea mai le The Encyclopedia of the Brain and Brain Disorders: ʻE tatau ona faatali seʻi teʻa le tete o le tagata ma aua le faalavelave i ai, i le taimi e tasi, ia faamautinoa e lē o iai lea tagata i se tulaga lamatia ma o loo mafai pea ona mānava.’ O loo taʻua atili foʻi i le tusi: “E tatau ona vili se taavale falemaʻi pe a sili atu ma le lima minute o oso pea le maʻi māliu o le tagata, po ua toe oso foʻi le maʻi, ma ua lē iloa e le tagata se mea pe a mavae ni nai minute.”

E faapefea ona ou fesoasoani i se tasi a o oso lona maʻi māliu? Tuu se mea vaivai i lalo o lona ulu ma aveese ni mea maamaʻai o loo i ona autafa. Pe a teʻa lona maʻi, ia faatafa o ia e pei ona faaalia i le siata o loo i le isi itulau.

O le ā le gaoioiga e tatau ona ou faia pe a toe teʻi mai le tagata? Muamua, ia faamautinoa iā te ia o loo lelei mea uma. Ona fesoasoani lea iā te ia e tu i luga ma taʻitaʻi atu i se nofoaga e mafai ona mālōlō lelei ai. O le toʻatele o tagata e lagona le lē mautonu ma le fia moe pe a teʻa lona maʻi māliu. Peitaʻi, o nisi e vave ona toe malolosi ma toe faaauau galuega sa faia a o leʻi oso le maʻi.

Po o tagata uma e maua i le maʻi māliu e paʻuʻū ma tetete? E leai. O nisi e faafuaseʻi lava ona suia a latou gaoioiga e pei o ni tagata ua lē sagatonu o latou mafaufau, e aunoa ma le paʻuʻū i lalo. Ua taʻua lenei mea o le petit mal seizure po o le absence seizure, lea e lē umi se taimi e tupu ai ma e leai ni aafiaga tumau.  O nisi e aafia i le prolonged petit mal seizure lea e umi se taimi e tupu ai. Pe a tupu lenā mea, e masani lava ona fealualuaʻi le tagata, faifai solo lona ofu, pe sui ana gaoioiga. Pe a teʻa lona maʻi māliu, e ono lagona e le tagata le niniva.

Faamata o ā ni faalogona o tagata e maua i le maʻi māliu? O le toʻatele o tagata e maua i lenei maʻi, e tauivi ma faalogona o le popole po o afea ma o fea foʻi e toe oso ai lona maʻi. Ina ia ʻalofia le māsiasi, atonu e latou te ʻalofia mea e tumutumu ai tagata.

E faapefea ona ou faalaeiau i se tasi e maua i le maʻi māliu? Faalaeiau o ia ina ia aua neʻi taofiofia ona faalogona. Ia faalogologo lelei. Fesili i ai po o le ā le gaoioiga e na te manaʻo e te faia pe a toe oso lona maʻi. Talu ai o le toʻatele o i latou e maua i lenei maʻi e lē avetaavale, e manaia ae faaaogā lau taavale e feaveaʻi ai o ia, pe e te fesoasoani foʻi i le faia o ni galuega mo ia.

Pe faamata e mafai ona foʻia lenei maʻi? E iai vala e faatuputeleina ai lenei maʻi, e pei o le tele o mea e popole ai ma le lē lava o le mālōlō. O lea, e faalaeiauina ai e tagata atamamai i latou e maua i lenei maʻi ina ia lava le mālōlō ma toʻaga e faamalositino, ina ia faaitiitia ai le popole. I nisi tulaga, e iai le aogā o fualaau i le faaitiitia o lenei maʻi.