“Ua ou lē mautonu, ma ua ou matuā ifo toʻele; ua ou fesavaliaʻi solo ma le faanoanoa i le aso atoa.”​—Salamo 38:6.

TALA A TAGATA SUʻESUʻE

E lagona e tagata le faanoanoa mai lea taimi i lea taimi, ae o mafatiaga o le mafaufau o se tulaga e faaauau pea ma e lē sologa lelei ai le olaga o se tagata. E lelei ona mātau, e lē o tagata atamamai uma e iloa le eseesega o le tagata e faanoanoa ma le tagata e lotovaivai. Ae e talafeagai ona faapea atu, e feagai nisi tagata ma faalogona lē lelei faatasi ai ma faalogona o le lē aogā, faapea faalogona o le nofosala naʻuā.

LE MANATU O LE TUSI PAIA

O loo taʻua i le Tusi Paia tane ma fafine na feagai ma faalogona lē lelei. Na ʻmatuā tigā le loto’ o Hana, o se faaupuga e faamatala ai lagona o le “loto momomo” ma “le matuā mafatia o le loto.” (1 Samuelu 1:10) O lagona matuā mafatia o le perofeta o Elia, na ia tatalo ai i le Atua e aveese lona ola.​—1 Tupu 19:4.

Na faatonuina Kerisiano i le uluaʻi senituri ina ia “faamāfanafana i ē mafatia.” (1 Tesalonia 5:14) I se tasi lomifefiloi, o loo faasino atu le faaupuga “ē mafatia” iā i latou “e lofitūina i popolega o le olaga mo sina taimi.” O lea, na feagai foʻi tane ma fafine faamaoni i le uluaʻi senituri ma faalogona o le lotovaivai.

“O loo ōi faatasi pea ma tigā faatasi foafoaga uma.”​—Roma 8:22.

LE MANATU O LE TUSI PAIA

O loo taʻua i le Tusi Paia o faamaʻi o āuga ia o le agasala a le uluaʻi ulugalii. Ua faapea mai le Salamo 51:5: “Na fanaua aʻu i le amioleaga ma le tigā, na afuafua foʻi aʻu i le manava o loʻu tinā i le agasala.” O loo taʻua foʻi i le Roma 5:12: “E pei ona oo mai o le agasala i le lalolagi ona o le tagata e toʻatasi [o le uluaʻi tagata o Atamu], o le oti foʻi ona o le agasala, ona oo mai ai lea o le oti i tagata uma auā ua agasala uma lava.” Ua tuufaasolo mai iā i tatou le tulaga lē lelei atoatoa ona na tatou tupuga uma mai iā Atamu. O lea, e leai se isi o i tatou e sao mai i maʻi. O le māfuaaga lea ua faapea mai ai le Roma 8:22, “o loo ōi faatasi pea ma tigā faatasi foafoaga uma.” Peitaʻi, o loo taʻua foʻi i le Tusi Paia se faamoemoe e lē mafai e se fomaʻi ona aumaia—o le folafolaga a le Atua e faatatau i se lalolagi fou filemu, e lē toe iai se maʻi, e aofia ai ma le lotovaivai.​—Faaaliga 21:4.

“E latalata mai Ieova iā i latou o ē e loto momomo; ma e faaola e ia i latou o ē ua loto nutimomoia.”​—Salamo 34:18.

AISEĀ E TĀUA AI

E lē o taimi uma e mafai ai ona e pulea le tulaga o mea ua iai, ma e iai taimi e oo ai faafitauli iā te oe. (Failauga 9:11, 12) Peitaʻi, e iai mea e mafai ona fesoasoani iā te oe ina ia aua neʻi lofitūina ai oe i faalogona lē lelei.

LE MANATU O LE TUSI PAIA

O loo faailoa mai i le Tusi Paia, e manaʻomia e tagata mamaʻi se fomaʻi. (Luka 5:31) Pe afai o loo e aafia i se maʻi tugā, e atamai le saʻilia o se togafitiga faafomaʻi. O loo faamamafa mai foʻi i le Tusi Paia le tāua o tatalo. O se faataʻitaʻiga, ua faapea mai le Salamo 55:22: “Ia tuuina atu iā Ieova ou popolega uma, o ia lava e na te tausia oe. E na te lē tuua lava le tagata amiotonu ia tautevateva.” O le tatalo e lē na o se auala e faaleleia ai ou faalogona. E pau lea o le auala e fesootaʻi ai ma Ieova le Atua o lē e ʻlatalata mai iā i latou o ē e loto momomo.’​—Salamo 34:18.

E iai foʻi aogā o le talatalanoa i sau uō mamae. (Faataoto 17:17) Na faapea mai Daniela o se tasi o Molimau a Ieova: “Na faalaeiauina aʻu e se tasi o uso talitonu ina ia talanoa atu e faatatau i oʻu faalogona o le lotovaivai. E ui i le tele o tausaga sa ou taumafai e ʻalofia le sasaa atu o oʻu faafitauli, ae na ou iloa mulimuli ane o le mea tonu lea sa tatau ona ou faia. Na ou lagona le fiafia ina ua uma la ma talanoaga ua toʻafilemu oʻu faalogona.”