E lē galo iā te oe mea leaga e fai atu e lau paaga; ma e te teuloto ana upu soona lafo ma gaoioiga lē lelei. O le iʻuga, ua suia ai lou alofa i le ita faamoemoe. E foliga mai ua leai se isi mea e toe mafai, ua na o le nonofo ma se paaga e te lē alofa i ai, ma ua atili ai lou ita.

E ao ona e iloa e mafai lava ona toe faaleleia le tulaga o mea. Muamua, seʻi o tatou iloilo nisi o mea moni e faatatau i lenei uiga o le ita faamoemoe.

O le ita faamoemoe e faaleagaina ai se faaipoipoga. Aiseā? Talu ai e aveesea ai uiga lelei e faavae aʻe ai se faaipoipoga fiafia, e pei o le alofa, maufaatuatuaina, ma le faamaoni. O lea, o le ita faamoemoe o se faafitauli i le faaipoipoga, ae e lē tatau ona manatu i ai e māfua mai i nisi faafitauli i le faaipoipoga. O le māfuaaga lea ua fautua mai ai le Tusi Paia: “Ia tuu lo outou ita umi.”​—Efeso 4:31.

Pe a e ita faamoemoe, ua e faatigā iā te oe lava. O le pulea o oe e le ita faamoemoe, e tai pei o loo e tatuʻiina lou tino ae faatalitalia e tigā ai le isi tagata. Na tusi Mark Sichel i lana tusi Healing From Family Rifts: “Atonu o le tagata o lou aiga lea e te matuā ita i ai o loo fiafia, sologa lelei lona olaga, ma atonu e lē o popole foʻi i le mea o loo tupu.” O le ā le lesona? Fai mai Mark: “O le ita faamoemoe e tigā ai oe lava nai lo o le tagata o loo e ita i ai.”

E mafai ona e filifili pe e te ita faamoemoe pe e leai. E iai tagata e lē ioe i lenā manatu. E latou te faapea mai: ʻO loʻu toʻalua e māfua ai ona ou ita faamoemoe.’ O le faafitauli, ua latou tuuaʻia se mea e lē mafai ona pulea, e pei o gaoioiga a le isi tagata. Peitaʻi, ua taʻua i le Kalatia 6:4 se isi mea e mafai ona faia: “Ia taʻitasi le tagata ma faamaonia po o faapefea ana galuega.” E lē mafai ona tatou pulea faamatalaga ma gaoioiga a isi, ae e mafai ona pulea le auala e tatou te tali atu ai. O le ita faamoemoe, e lē o le tali lea i mea uma.

Aua le tuuaʻia isi. O le mea moni, e ese le faigofie o lou tuuaʻia o lau paaga. Ae ia manatua, o loo iā te oe le filifiliga pe e te ita faamoemoe pe e te faamagalo atu. E mafai ona e utagia le fautuaga a le Tusi Paia: “Aua neʻi goto le lā o tumau pea lo outou ita.” (Efeso 4:26) O le iai o se loto faamagalo o le a e taulima ai faafitauli i lau faaipoipoga ma se mafaufau lelei.​—Mataupu silisili o le Tusi Paia: Kolose 3:13.

Iloilo oe lava ma le faamaoni. Ua faailoa mai e le Tusi Paia, o nisi tagata e “itaitagofie” ma “e vave ona ita.” (Faataoto 29:22) Pe e faapena ou uiga? Ia fesili ifo: ʻPo ou te ita leaga? Po o aʻu o se tagata maitaita? Po ou te soona faamamafa ni mea lāiti?’ Ua faapea mai le Tusi Paia “o lē e tautala soo i se mataupu ua ia talepeina faauōga.” E faapena foʻi i se faaipoipoga. (Faataoto 17:9; Failauga 7:9) O lea, pe afai e te ita faamoemoe, ia fesili ifo: ʻPe e mafai ona ou faaalia le onosaʻi i laʻu paaga?’​—Mataupu silisili o le Tusi Paia: 1 Peteru 4:8.

Filifili mea e sili ona tāua. Ua faapea mai le Tusi Paia, e iai “le taimi e filemu ai ma le taimi e tautala ai.” (Failauga 3:7) E lē o taimi uma e manaʻomia ai ona e talanoa atu i lau paaga i se mea na tupu. Nai lo lea, e mafai lava ona e ʻfai ifo i lou loto i luga o lou moega, ma ia fifilemu.’ (Salamo 4:4) Ae pe a manaʻomia ona e talanoa atu i lau paaga i se mea e te lē o fiafia ai, e atamai lou faatali seʻi teʻa lou ita. Na faapea mai se avā e suafa iā Beatriz: “Ou te taumafai lava e faateʻa muamua loʻu ita. Mulimuli ane, o le a ou iloa ai e lē matuiā tele le mea sa ou ita ai, ma mafai loa ona ou talanoa atu i se auala faaaloalo.”​—Mataupu silisili o le Tusi Paia: Faataoto 19:11.

Ia iloa le uiga o le “faamagalo atu.” I le Tusi Paia, o le upu “faamagalo” e faaliliu mai i se upu i le uluaʻi gagana e uiga atu i le tuu ese o se mea. O lea, o le faamagalo atu e lē faapea ua e manatu māmā i le mea na tupu pe faafoliga atu e leai se mea na tupu. Nai lo lea, e uiga atu i le tuu ese o le mea na e ita ai, ma ia iloa o le iai o le uiga ita faamoemoe e iʻu atu ai i le faaleagaina o lou soifua mālōlōina ma lau faaipoipoga.