“Ua outou lafoaʻia poloaʻiga a le Atua, a ua outou taofimau i tū masani a tagata.”​—Mareko 7:8.

LE MANATU O LE TUSI PAIA

E iai i tagata se faanaunauga mo “mea faaleagaga,” lea e mafai ona faamalieina e ala i le tapuaʻi i le Atua. (Mataio 5:3) O le taumafai o tagata e faamalie lenā faanaunauga, ua latou faatū ai le tele o lotu eseese e faavae i o latou lava manatu, ae e lē o manatu o le Atua.

O se faataʻitaʻiga, o loo faapea mai le Tusi Paia e tusa ai o se vaega faalelotu na iai i le uluaʻi senituri: “Ua latou maelega i le Atua; ae e lē tusa ai ma le poto saʻo; ona o lo latou lē iloaina o le amiotonu a le Atua a ua latou saʻili e faatū la latou lava amiotonu, ua latou lē gauaʻi ai i le amiotonu a le Atua.” (Roma 10:2, 3) I se tulaga talitutusa, e tele lotu i aso nei “ua faavae a latou aʻoaʻoga i mataupu a tagata.”​—Mareko 7:7.

“Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou.”​—Eperu 10:24, 25.

LE MANATU O LE TUSI PAIA

O loo taʻua i le Eperu 10:25 le fuaitau “aua neʻi tuulafoaʻiina le faapotopotoina o i tatou.” O na upu e iloa ai e finagalo le Atua i ona tagata e faapotopoto o se vaega, ina ia tapuaʻi atu iā te ia. Ae pe e tatau ona tofu le tagata ma lona manatu e uiga i le Atua ma mea e na te faafinagaloina? E leai. O loo taʻua i le Tusi Paia o i latou e tapuaʻi atu i le auala e faafinagaloina e le Atua, e ao ona ʻautasi i a latou upu’ ma ʻautasi i manatu ma mafaufauga.’ (1 Korinito 1:10) E ao ona faamaopoopoina i latou i ni faapotopotoga, ma e “alolofa i le ʻauuso atoa” i le lalolagi aoao. (1 Peteru 2:17; 1 Korinito 11:16) E faafiafiaina le Atua pe a tatou tapuaʻi atu iā te ia i se auala maopoopo ma autasi.

“O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”​—Ioane 13:35.

LE MANATU O LE TUSI PAIA

Ina ia faataʻitaʻi le auala e iloa ai le lotu moni, ua faapea mai le Tusi Paia: “Tou te iloa i latou i o latou fua. Pe e mafai ea e tagata ona tau mai fua o le vine mai laau tuitui, po o fua o le mati mai laau talatala?” (Mataio 7:16) E lē tau avea oe o sē e suʻesuʻe i laau ina ia e iloa ai le eseesega o le mati mai i le laau talatala. E faapena foʻi ona lē tau avea oe o sē e suʻesuʻe ma atamai i lotu, ina ia e iloa ai le lotu moni mai i lotu sesē. O ā nisi o fua po o ni vala e iloa ai le lotu moni?

• E aʻoaʻo atu e le lotu moni le upu moni o loo i le Afioga a le Atua. (Ioane 4:24; 17:17) E lē faavae a latou aʻoaʻoga i manatu o tagata.

• O le lotu moni e fesoasoani i tagata e iloa le Atua, atoa ai ma lona suafa o Ieova.​—Ioane 17:3, 6.

• O le lotu moni e uaʻi atu i le Malo o le Atua e na o le pau lea o le faamoemoe mo tagata, ae e lē o malo faaletagata.​—Mataio 10:7; 24:14.

• O le lotu moni e faaalia le alofa lē manatu faapito. (Ioane 13:35) E latou te aʻoaʻo tagata ia faaaloalo i so o se tagata, faaaogā o latou taimi ma alāmanuia e fesoasoani ai i isi, ma e lē auai i faigātaua ma isi atunuu.​—Mika 4:1-4.

• O le lotu moni e aafia ai le auala e ola ai, ae e lē na o se mea e tau ina fai. E ōgatusa gaoioiga a tagata o le tapuaʻiga moni ma mea o loo latou talaʻia.​—Roma 2:21; 1 Ioane 3:18.

O loo taumafai malosi Molimau a Ieova o ē ua lomia lenei mekasini, e faamamalu le Atua i le auala e tautatala ma amioaʻi ai. Pe e te fia auai i se tasi o a latou sauniga ina ia e faamaonia ai lenā tulaga?