O SE faafitauli e masani ai lea na feagai ma Falani ma Sione. Pe a feeseeseaʻi ni tagata se toʻalua, e masani lava ona feita ma tuuaʻia e le tasi le isi. Afai e lē foʻia lo la faafitauli, o le a lē toe lelei la laʻua faigāuō.

Atonu na e oo foʻi i se tulaga faapena. Afai o lea, e mautinoa e te lē fiafia i ai! O le mea moni, o le toʻatele o i tatou e mananaʻo e nonofo filemu ma a tatou uō ma tuaoi. E faapefea ona faataunuuina lenā tulaga e ui i feeseeseaʻiga e tulaʻi mai? Pe e mafai ona tuu ese o tatou uiga lē lelei, ae faamagalo atu i isi pe a faatigā mai? Pe e mafai ona foʻia o tatou feeseeseaʻiga i se auala filemu?

Seʻi o tatou iloilo le feeseeseaʻiga a Falani ma Sione. Na amata ona leaga la laʻua faigāuō ona o le sesē o laasaga sa la uia: (1) Sa lē fetuutuunaʻi Sione, (2) sa faaali atu le lē fiafia o Falani i se auala e ita ai Sione, (3) sa lē pulea uma lo laʻua ita (4) mumusu e ioe atu i le manatu o le isi.

Mulimuli ane, na avea i laʻua o ni ē fetuutuunaʻi. Na faagalo e nei tamāloloa le mea na tupu ae toe faaleleia la laʻua faiā. O le ā na fesoasoani iā i laʻua? Sa la faatatauina ni taʻiala aogā ia na fesoasoani i nisi faigāuō e onosaia ai taimi faigatā, ma atili faamalosia ai faigāuō.

O nei taʻiala e mai i le Tusi Paia, o se tusi e aupito i tele kopi ua tufatufaina atu. Ua faalaeiauina ai tagata ia atiaʻe uiga e pei o le faautauta, malamalama, agalelei, alofa ma le faapalepale, ina ia tausia ai le filemu ma foʻia ai faalogona tigā.​—Faataoto 14:29; 1 Korinito 13:4, 5.

O Falani ma Sione, ua na o ni faaaʻoaʻoga ia se lua e iloa ai e iai le mana  o le Tusi Paia e suia ai olaga. E tele isi faaaʻoaʻoga o tagata o ē ua lafoaʻia ni uiga leaga na matuā mauaa iā i latou. O se faataʻitaʻiga, ua mafai e Robert mai Ausetalia ona foʻia le ita sa mauaa iā te ia. Ua mafai foʻi e Nelson mai Timor-Leste ona pulea lona ita leaga, ma ua māfana la laʻua faigāuō ma se tasi na avea ma ona fili. Na faapefea ona fesoasoani le Tusi Paia iā Robert ma Nelson? Na faatalanoa e le Ala Mai! i laʻua mo ni o la manatu.

ROBERT, seʻi faamatala mai iā i matou lou olaga tuputupu aʻe.

Na ou ola aʻe i se aiga e lē fiafia. E ita leaga loʻu tamā ma e masani ona ia fasia aʻu. O nisi taimi e lava toto uma loʻu tino ma ou matapogia ai. O le iʻuga, na avea aʻu o sē e ita leaga ma sauā. A o oʻu talavou, na ou aʻoga ai mo le lua tausaga i se aʻoga lea e fesoasoani e toe suia amioga a tamaiti. Mulimuli ane, na ou faia se soligatulafono ma iʻu ai i le falepuipui mo ē faia solitulafono matuiā. Ina ua ou magalo, na ou siitia atu loa i Ausetalia e toe afua ai se isi taeao fou.

Pe na fesoasoani lou siitia ese e suia ai lou olaga?

E lē o loʻu siitia ese na suia ai loʻu olaga, ae o loʻu suʻesuʻeina o le Tusi Paia ma Molimau a Ieova. Peitaʻi, na ou tauivi pea e pulea loʻu ita, ma e masani ona ou lagona loʻu lē taulau ma le lē aogā. I se tasi aso, na ou manatunatu ai i le Faataoto 19:11: “O le tofā mamao o le tagata, e faagesegese ai lona ita, ma e matagofie foʻi lona lē manatua o le agaleaga.” O loʻu naunau ina ia maua lea tofā mamao, na ou manatunatu ai i āuga o aʻu upu, gaoioiga ma uiga. O le iʻuga, na amata ona ou maua le tofā mamao, onosaʻi, ma le loto faamagalo.

Seʻi taʻu mai se faataʻitaʻiga.

Na ou faia se mea ou te leʻi fuafuaina na ita ai se tasi o aʻu uō, ma sa ia soona lafo mai ni faamatalaga na ou matuā māsiasi ai. E ui i lea, na ou manatua le fautuaga a le Tusi Paia, “aua le taui atu le leaga i le leaga i se tasi,” ma na vave lava ona ou faatoese atu. (Roma 12:17) Ina ua teʻa lona ita, na ou talanoa atu iā te ia ma ou iloa ai o loo feagai o ia ma faafitauli i lona aiga. Na ma toe faalelei, ma na ia aumaia se meaalofa ma aʻu o se ofu faatimu manaia. Ou te lē fia mafaufau i se mea e ono tupu, pe ana oso aʻe loʻu ita.

E faapefea ona e taulima faafitauli i lou aiga?

E iai la maʻua tama tama e 20 ona tausaga, ma e iai o matou faafitauli e pei foʻi o isi aiga. Peitaʻi, e tele mea ua ou aʻoaʻoina mai i le Tusi Paia, e aofia ai le tāua o le fai atu, “ou te faamalie atu.” Maʻeu le logolelei o na upu pe a fai atu ma le faamaoni, ma e mafai ona foʻia ai feeseeseaʻiga.

NELSON, o oe o se tagata mata ʻataʻata ma faaleuō. Peitaʻi, na avea muamua oe o sē ita leaga. E saʻo?

Ioe! A o oʻu talavou, na ou auai i se vaega faapolotiki na agaia le malo. Na ou ita foʻi i le isi vaega faaupufai na tauvā e pulea lo matou itumalo. E lē gata i lea, sa ou aʻoaʻoina se isi ituaiga o karate, ma na ou fasia so o se isi ou te ita i ai.

O le ā na uunaʻia oe e faia ni suiga?

Na amata ona ou suʻesuʻe le Tusi Paia ma faatatau ana aʻoaʻoga. E lua ni mau na pāʻia ai loʻu loto. Muamua: “O mea uma tou te mananaʻo e faia mai e tagata iā te outou, ia faapea lava ona outou faia iā i latou.” (Mataio 7:12) Lua: “Ia e alofa atu i lou tuaoi e pei o oe lava iā te oe.” (Mataio 22:39) Na ou mātauina Molimau a Ieova ia sa aʻoaʻoina aʻu i le Tusi Paia, sa la faaalia lenā ituaiga alofa e tusa lava po o le ā lo latou ituaiga ma le lanu, ma na ou fia pei o i laʻua. Na ou taulau i le faia faapea ma na maofa ai aʻu uō sa iai muamua, ma e leʻi toe fefe se isi iā te aʻu.

Pe na iai se taimi na e lē taulau ai?

E iai, ae e lē o luma o tagata. Na faigatā ona pulea loʻu ita i le fale, ma e iai se taimi na ou fasia ai laʻu avā, ma na ou matuā salamō ai lava. Na ia agalelei ma faamagalo aʻu, ma o le mea lenā na ou maumauaʻi ai e pulea loʻu ita.

Na e fai mai ua lē toe fefe se isi iā te oe. E mafai ona e aumai se faataʻitaʻiga?

I se tasi aso, na ou feiloaʻi ai iā Augusto o se tagata e maualuga i le vaega faaupufai lea na ou taʻua muamua. I le taimi muamua, sa gaoioi o ia ma le faaeteete. Peitaʻi, na ou faafeiloaʻia ma le māfana o ia, talosaga i ai e faagalo o ma feeseeseaʻiga, ma valaaulia o ia i loʻu fale. Na ia talia laʻu valaaulia ma na maofa i suiga na ou faia, ma amata ai loa ona ia suʻesuʻe le Tusi Paia. O lea, e lē gata ua māfana la maʻua faigāuō, ae ua avea foʻi o ia ma oʻu uso faaleagaga.

E eseese māfuaaga o feeseeseaʻiga, ma e lē o tagata uma e tali lelei mai i au taumafaiga e tausia le filemu. O lea, ua fautua mai le Tusi Paia: “Afai e mafai iā te outou, ia nonofo filemu ma tagata uma.”​—Roma 12:18.

O i latou ia na taʻua i lenei mataupu, o ni faamaoniga vaaia ia o le aogā o le atamai o le Tusi Paia, ma e iai le mana e suia ai uiga leaga “ua matuā mautū,” pe afai e faataga lenā mana e galue iā i tatou. (2 Korinito 10:4) Ua taʻua i le Faataoto 3:17, 18 e faatatau i lenā atamai: “O ona ala o ala e matagofie, ma e filemu ona auala uma. O le laau foʻi o le ola iā i latou o ē e fetagofi atu i ai, ma e fiafia i latou o ē e pipii atu i ai.”

Pe e te fia maua atili le fiafia ma le filemu? Po o e faanaunau mo se faauōga e lē mafai ona muta pe a tulaʻi mai ni feeseeseaʻiga? Afai o lea, ia faataga le Tusi Paia e taʻitaʻia oe.