LE MANATU O LE TUSI PAIA
Mamā
Pe e tāua i le Atua lo tatou tumamā faaletino?
ʻSeʻi o tatou faamamā iā i tatou mai i mea uma e faaleagaina ai le tino ma le agaga.’—2 Korinito 7:1.
LE MANATU O LE TUSI PAIA
E alofa mai Lē na faia i tatou, ma e finagalo ia tatou maua le soifua mālōlōina lelei, ma se olaga umi ma fiafia. Na fetalai le Atua: “Ia tausia aʻu poloaʻiga i lou loto, auā e faaopoopo ai iā te oe o aso e tele, ma tausaga o lou olaga, e faaopoopo atu ai foʻi iā te oe le filemu.” (Faataoto 3:1, 2) Na faaalia le alofa o le Atua i tagata e ala i ana poloaʻiga na tuu atu i tagata Isaraelu, ia e aofia ai faatonuga maʻoti e faatatau i le tumamā. (Teuteronome 23:12-14) Ina ua usitaʻia e tagata Isaraelu na faatonuga talafeagai, sa lelei lo latou soifua mālōlōina ma puipuia mai i faamaʻi sa aafia ai isi nuu e pei o Aikupito, lea e leʻi mauaina le Tulafono a Mose.—Teuteronome 7:12, 15.
I aso foʻi nei, o tagata e ʻfaamamā iā i latou lava mai i mea uma e faaleagaina ai le tino,’ e pei o masaniga leaga e aofia ai le ulaula, le faaaogāsesēina o le ʻava malosi faapea vailaau ma fualaau faasāina, ua mafai ona latou ʻalofia le aafia i maʻi o le tino ma le mafaufau, faapea le maliliu a o leʻi taitai olaga. Talu ai o loo tatou iai faatasi foʻi ma isi tagata, o lea, o le usitaʻia o taʻiala a le Atua e faatatau i le tumamā, e faaalia ai lo tatou manatu mamafa i isi.—Mareko 12:30, 31.
Pe e tāua i le Atua le mamā tau amio ma le faaleagaga?
“Ia fasiotia tuʻinanauga i o outou itutino, o le faitaaga, o amioga lē mamā, le tuʻinanau i feusuaʻiga, o tuʻinanauga leaga ma le manaʻo tele, o le ifo i tupua lava lea. O mea uma na e oo mai ai le toʻasā o le Atua.”—Kolose 3:5, 6.
LE MANATU O LE TUSI PAIA
Na taʻua i le amataga ua fautuaina i tatou i le Tusi Paia, ia “faamamā iā i tatou mai i mea uma e faaleagaina ai le tino ma le agaga.” I aso o Iesu Keriso, e toʻatele tagata e aofia ai ma taʻitaʻi lotu Iutaia, sa matuā taumafai ia mamā faaletino ae e leʻi amanaʻia tapulaa faaleagaga ma tau amio. (Mareko 7:1-5) Peitaʻi na fetalai Iesu: ʻE leai se mea mai i fafo e alu atu i totonu o le tagata e mafai ona faaleagaina ai o ia, talu ai e ui atu i le manava ma toe alu atu i fafo o le tino.’ Na fetalai atili o ia: “O le mea e sau mai i totonu o le tagata, o le mea lea e faaleagaina ai le tagata; auā e sau mai i le loto o le tagata mafaufauga leaga: o le faitaaga, o le gaoi, o le fasioti tagata, o le mulilua, o le manaʻo tele, o le amioleaga, o le faaʻoleʻole, o le amio matagā, o le matauʻa, . . . ma le lē mafaufau. O nei mea leaga uma . . . e faaleagaina ai le tagata.”—Mareko 7:18-23.
Na taʻua e Iesu o tagata e matuā faatāua le tumamā faaletino, ae e lē amanaʻia tapulaa tau amio ma faaleagaga a le Atua, ua pei i latou o ipu e mamā mai tua ae e matuā palapalā totonu.—Mataio 23:25, 26.
Pe e talafeagai tapulaa a le Tusi Paia?
“O le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.”—1 Ioane 5:3.
LE MANATU O LE TUSI PAIA
Ua faapea mai le Mika 6:8: “O le ā foʻi se mea ua finagalo ai Ieova mai iā te oe, pe e lē o le faia o le mea ua tonu, ia fiafia i le agalelei, ma ia savavali ma lou Atua ma le faamaulalo?” E matuā talafeagai lenei talosaga. E finagalo foʻi Lē na faia i tatou ia usiusitaʻi atu iā te ia ona o le alofa. Pe a faia faapea, o le a tatou maua le fiafia. (Salamo 40:8) Pe a tatou sesē, e faamāfanafanaina i tatou i le alofa mutimutivale o le Atua. Ua taʻua i le Salamo 103:13, 14: “E pei ona alofa mutimutivale o le tamā i lana fanau, e faapea foʻi ona faaalia e Ieova le alofa mutimutivale iā i latou e matataʻu iā te ia. Auā ua silafia lelei e ia le mea na faia ai i tatou, ua ia manatua o le efuefu lava i tatou.” I se isi faaupuga, ua tatou nofo toʻilalo i o tatou vaivaiga ma le tulaga lē lelei atoatoa.
Pe a taaofaʻi, o tapulaa a le Atua e faatatau i le mamā faaletino, tau amio ma le faaleagaga, ua faaalia mai ai lona agalelei ma le alofa iā i tatou. Pe a tatou lotomalilie e usiusitaʻi i na tapulaa, e faaalia atu ai lo tatou atamamai ma le alolofa mo ia.
E te Ono Fiafia Foʻi
LE OLOMATAMATA
O le ā le Silafaga a le Atua i le Ulaula?
E lē o taʻua mai i le Tusi Paia le tapaa, o lea e faapefea ona tatou iloa?
LE OLOMATAMATA
E Mafai e le Tusi Paia Ona Suia Olaga
ALA MAI!
