Na tusi al-Khwarizmi i le tāua o le faaaogā o tesimale, ma faamalamalama ma faalauiloa le metotia e faatatau i le auala e maua ai tali o fuaiupu faamatematika. Sa ia faamatala lenā metotia i lana tusi The Book of Restoring and Balancing. O le ulutala faa-Arapi o lenei tusi o le Kitab al-jabr wa’l-muqabala. O le upu al-jabr mai i lenā ulutala, e faavae mai ai le upu faa-Peretania o le algebra. Sa taʻua e se tusitala faasaienisi e igoa iā Ehsan Masood, o le algebra “o se metotia faamatematika e sili ona tāua na faia e se tasi, ma e lagolagoina ai vala uma o le faasaienisi.” *

Na tala ʻata se tusitala ma faapea mai: “E toʻatele augātupulaga o tamaiti o aʻoga maualuluga e manatu sa sili pe ana lē amataina e [al-Khwarizmi] lenei metotia.” E ui i lea, na taʻua e al-Khwarizmi, o le māfuaaga na ia faia ai, ina ia faamalamalama ai metotia e faafaigofie ai ona iloa le aofaʻiga o tupe e faaalu i faatauga, le vaevaeina o meatotino, fuaina o fanua ma isi mea faapena.

 I senituri mulimuli ane, na matuā viiviia ai al-Khwarizmi e tagata atamamai i le matematika mai i atunuu i Sisifo, e pei o Galileo ma Fibonacci, ona o lona faamalamalama ma le manino o le faaaogāina o fuaiupu matematika. O faamatalaga a al-Khwarizmi na amata ai isi suʻesuʻega atili i le algebra, arithmetic, ma le trigonometry. O le suʻesuʻega o le trigonometry, na mafai ai e tagata atamamai mai i Sasaʻe Tutotonu ona fuafua le piʻo o le ageli po o le telē o se itu o le tafatolu, ma faalautele ai suʻesuʻega i le vanimonimo. *

Na faia e i latou na faaaogāina suʻesuʻega a al-Khwarizmi, ni auala fou e faaaogā ai tesimale, ma amata ni metotia fou e iloa ai le telē ma le loloto o se mea. Na faaaogā e tagata tusiata ma le ʻaufaufale mai i Sasaʻe Tutotonu nei metotia, a o leʻi taitai ona faaaogā e tagata tusiata ma faufale mai itulagi i Sisifo, o ē na faatoʻā masani i na metotia i le vaitaimi o fetauaʻiga a lotu. Na toe foʻi tagata tusiata ma faufale mai i itulagi i Sisifo ma na tomai, ma na fesoasoani i ai tagata atamamai Musalimi na ave faatagataotauaina pe siitia atu i Sisifo.

A o faagasolo taimi, na faaliliu tusi a al-Khwarizmi i le gagana Latina. O le faimatematika Italia o Fibonacci (na soifua i le pe tusa o le 1170-1250), lea e iloa foʻi iā Leonardo mai i Pisa, na ia faasalalau atu i atunuu i Sisifo fuainumera Hindu-Arabic. Na aʻoaʻoina e Fibonacci nei metotia a o faimalaga solo i le Metitirani, ma mulimuli ane tusia lana tusi Book of Calculation.

E tele senituri faatoʻā lauiloa suʻesuʻega a al-Khwarizmi. Peitaʻi, i aso nei, ua avea ana metotia ma matematika e fesootaʻi i ai, ma poutū o le faasaienisi ma faatekinolosi, faapea fefaatauaʻiga ma faiga faapisinisi.