O Aʻoaʻoga Faale-Tusi Paia ua Faaleleia ai le Faitau ma le Tusitusi
“O le aiā tatau a se tagata le iloa faitau ma tusitusi, ma o se auala e mafai ona ia maua ai ni tomai, atiaʻe ai le ituaiga tagata e iai o ia faapea le auala e feagai ai ma isi.”—UNESCO. *
UA FAAALIA i lipoti e faapea, e silia i le 700 miliona tagata e taʻi 15 tausaga pe sili atu, e lē iloa faitau pe tusitusi. O le iʻuga, ua lē mafai e i latou nei ona aʻoaʻoina e faatatau i le tele o mea, e aofia ai tapulaa tau amio ma aʻoaʻoga faaleagaga o loo i le Tusi Paia, ia na “tusia e faatonu ai i tatou.” (Roma 15:4) O lea, i nisi o atunuu, ua tuufaatasia ai e Molimau a Ieova se toleniga e aʻoaʻo ai le faitau ma le tusitusi, e faaopoopo atu i la latou polokalame tau aʻoaʻoga faale-Tusi Paia. O nei mea uma e faia e aunoa ma se totogi. Po o taulau manuia lenei polokalame?
Seʻi manatu i galuega a Molimau a Ieova o loo faia i Mekisikō, o se atunuu e tautatala le toʻatele i le gagana Sipaniolo. Talu mai le tausaga 1946, ua aʻoaʻoina e Molimau le silia i le 152,000 o tagata ina ia iloa faitau ma tusitusi, ma o le toʻatele o nei tagata na mulimuli ane avea foʻi ma faiaʻoga. E tele tusi mai i le malo na avatu i Molimau a Ieova e faaalia ai le amanaʻia o la latou galuega. Na faapea mai se tasi o tusi: “E fiafia le Komiti o le Matagaluega o Aʻoga e faafetai ma faamālō atu i la outou fesoasoani, i le agaʻigaʻi i luma o la tatou Polokalame Tauaʻoaʻoga mo Tagata Matutua.”
Ua maua e tagata matutua ma talavou aogā mai i lenei polokalame e aʻoaʻo ai le faitau ma le tusitusi. O se faataʻitaʻiga, e 101 tausaga o Josefina ina ua auai i lenei polokalame, ma na iʻu ma le manuia ina ua mavae le lua tausaga.
E ui o le faa-Sipaniolo o le gagana autū i Mekisikō, ae e lē na o le pau lenā o le gagana na aʻoaʻoina i lenei polokalame. I le tausaga 2013, e iai nisi o tagatānuu moni e mai i ni ituaiga eseese se valu, na mafai ona fesoasoani i ai lenei polokalame ina ia iloa faitau ma tusitusi i a latou lava gagana.
O lea, o le iloa faitau ma tusitusi, e maua ai le avanoa e aʻoaʻoina le tele o mea fou. E sili atu i lenā, e mafai ai e ituaiga uma o tagata ona faitau le Tusi Paia, o se tusi na faagaeeina e le Atua ma e mafai ona faasaʻoloto ai tagata, mai i le faapologaina i faiga faataulāitu, aʻoaʻoga sesē a lotu, ma amioga lē lelei e tigā ai.—Ioane 8:32.
^ pala. 2 United Nations Educational, Scientific, and Cultural Organization.
E te Ono Fiafia Foʻi
MEA ILOGA O LO TATOU TALAFAASOLOPITO
Fesoasoani i Tagata o Atunuu ia Iloa Faitau ma Tusitusi
Ua viviia e tagata maualuluga o mālō le galuega o loo fai e Molimau a Ieova o le fesoasoani i tagata ia iloa faitau ma tusitusi.
