O LE fitu o tausaga o Susana na amata ai ona ia fesiligia le Atua, ina ua pipili lana uō o Al e iva tausaga, ma ola ai i totonu o se masini e faagaoioia lana mānava. Iā Ianuari 6, 2013, na faamatala ai e Susana i le mekasini The New York Times le tulaga na oo iā te ia.

Ina ua uma ona asiasi atu Susana iā Al i le falemaʻi, sa fesili Susana i lona tinā: “Aiseā ua faia ai e le Atua lenei mea i se tamaitiiti laʻitiiti?”

Na tali atu le tinā o Susana: “Atonu e fai mai le faifeʻau e iai ni māfuaaga ua faia ai faapea e le Atua, ae ou te lē iloa po o ā na māfuaaga.”

I le lua tausaga mulimuli ane, i le 1954, na faia ai e Jonas Salk se tui puipuia mo le maʻi pipili, ma na manatu le tinā o Susana atonu na fesoasoani le Atua i saʻiliʻiliga a Jonas.

Na faapea atu Susana: “Sa tatau la ona leva ona fesoasoani le Atua i fomaʻi, semanū e faapenei e lē o tuuina Al i totonu o se masini e faagaoioi ai lana mānava.”

Na taaofaʻi e Susana le mea atoa na tupu iā te ia a o laʻitiiti ina ua tusi e faapea: ʻE na o le valu tausaga mulimuli ane ae oti Al. O i inā na ou talitonu ai loa e leai se Atua, ma e leʻi mafai ona suia loʻu mafaufau.’

I le pei o Susana, e toʻatele tagata ua feagai pe vāaitino i mafatiaga, ae e lē o mafai ona maua ni tali faamalieloto i a latou fesili e faatatau i le Atua. O nisi ua talitonu e leai se Atua, a o isi atonu e latou te lē o matuā teena le iai o se Atua, ae ua masalosalo pe e iai moni o ia.

O tagata e lē talitonu e iai se Atua ma ē e masalosalo i le iai o se Atua, e lē faapea ua latou matuā lē malamalama e faatatau i lotu. Ua māfua ona latou lē faatuatua i le Atua ona o mea na tutupu iā i latou i lotu. E latou te ono manatu e lē o mafai e faalapotopotoga faalelotu ona taliina fesili tāua o le olaga. O ā na fesili? O le mea moni, o fesili foʻi na o loo tuufesili ai ē e faapea mai e faatuatua i le Atua. Seʻi o tatou iloilo fesili e tolu e fia fesili ai le toʻatele o tagata i le Atua pe a maua se avanoa, faapea tali o loo taʻu mai i le Tusi Paia.

Māfuaaga o le fesili

E manatu le toʻatele ʻe tatau i se Atua alofa ona taofia mafatiaga o loo tutupu i le olaga.’

IA MAFAUFAU I AI: E iai masaniga ma aganuu a tagata mai i isi atunuu atonu e ese pe e faateʻia ai oe. E faigofie foʻi ona sesē o tatou manatu e faatatau i a latou gaoioiga. O se faaaʻoaʻoga, o isi aganuu e manatu o le pulatoʻa atu o le tasi i le isi, o se faailoga o le faamaoni. Ae o isi aganuu o se lē faaaloalo lenei faiga. Peitaʻi, e leai se māfuaaga o le a faapea atu ai e sesē na faiga. E pau le mea e manaʻomia, o lo tatou malamalama e faatatau i na aganuu.

I se tulaga talitutusa, e faapena foʻi le malamalama e faatatau i le Atua. E manatu le toʻatele o le iai o mafatiaga ua faamaonia ai e lē o iai se Atua. Ae o ē ua malamalama i le māfuaaga ua lē taofia ai e le Atua mafatiaga, ua latou mautinoa o loo iai le Atua.

LE MANATU O LE TUSI PAIA: E ese mamao manatu ma ala o le Atua mai iā i tatou. (Isaia 55:8, 9) O lea, atonu i le taimi muamua e ese iā i tatou mea e faia e le Atua, ma māfuaaga e faatali ai o ia a o leʻi faia se gaoioiga.

I le taimi e tasi, e lē o fautua mai le Tusi Paia ia tatou talia manatu sesē e pei o le manatu e faapea, “e lē mailoa auala e gaoioi ai le Atua.” Nai lo o lea, o loo faalaeiau i tatou ia aʻoaʻoina atili e faatatau i le Atua, ina ia malamalama ai i māfuaaga ma taimi e gaoioi ai o ia. * O le a atili ai foʻi ona tatou mafuta vavalalata atu iā te ia.—Iakopo 4:8.

Māfuaaga o le fesili

Atonu e faapea mai nisi: ʻPe afai e fiafia le Atua i le faamaoni, e lē tatau la ona iai ni faiga piʻopiʻo i ē e faapea mai e tapuaʻi iā te ia.’

IA MAFAUFAU I AI: Seʻi faapea ua teena e se atalii le tausiga lelei a lona tamā, ae tuua lona aiga ma ola i se olaga leaga. E ui lava e lē fiafia le tamā, ae e na te lē taofia lona atalii mai i lana filifiliga. Pe e talafeagai i ē e mulimuli ane feiloaʻi i le atalii ona manatu e leaga lona tamā, pe e faapea mai foʻi e leai sona tamā? O le mea moni e leai! I se tulaga talitutusa, o le iai o faiga piʻopiʻo i lotu, ua faamaonia mai ai e lē taofia e le Atua tagata mai i le filifili e i latou lava o le auala e ola ai.

LE MANATU O LE TUSI PAIA: E inosia e le Atua faiga piʻopiʻo i lotu. (Ieremia 7:29-31; 32:35) Peitaʻi, e na te lē o taofia tagata mai i le faia o la latou lava filifiliga saʻoloto. O le toʻatele o ē e faapea mai e talitonu i le Atua, ua filifili e mulimuli i talitonuga faalotu e faavae mai i manatu o tagata, ma faatū a latou lava tapulaa tau amio.—Mataio 15:7-9.

Peitaʻi, o le tapuaʻiga e talia e le Atua, e lē iai ni faiga piʻopiʻo. * Na fetalai Iesu i le Ioane 13:35: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” O lenei alofa e lē tatau ona faatagāfai. (Roma 12:9) O le tele o lotu e lē o mafai ona ola e tusa ai ma lenei tapulaa. O se faaaʻoaʻoga, i le taua a tagata Rwanda i le 1994, e faitau sefulu afe tagata lotu na toe fasiotia tagata o a latou lava lotu ona e mai i isi ituaiga. Peitaʻi e ese mai ai Molimau a Ieova. E latou te leʻi auai i nei fasiotiga tagata, ma o le toʻatele o i latou sa puipuia o latou tagata tapuaʻi ma isi, ma tuua o latou ola i ni tulaga lamatia ina ia faia ai faapea. O na gaoioiga lē manatu faapito ua faamaonia ai e mafai ona ʻalofia faiga piʻopiʻo i lotu.

Māfuaaga o le fesili

E ono tomānatu nisi: ʻAiseā e feola ai tagata mo na o le 80 pe 90 tausaga ona feoti lea? O le ā le māfuaaga e tatou te feola ai mo lenā taimi puupuu?’

IA MAFAUFAU I AI: O le toʻatele o ē e lē talitonu i le Atua, e latou te iloa e ao ona talia le manatu e faatatau i le lavelave ma le maopoopo o mea i le lagi ma le lalolagi. E latou te ioe na faia lo tatou paneta, faapea isi paneta ma le masina, i le auala talafeagai ina ia faatumauina ai le ola i le lalolagi. Ua latou taʻua e faapea, e talafeagai lelei tulafono o le natura ia e pulea ai mea i le vateatea, ma afai e iai sina suiga i na tulafono o le natura, o le a lē mafai ona tumau le ola i le lalolagi.

LE MANATU O LE TUSI PAIA: Ua manatu le toʻatele e leai se Atua ona o le puupuu o tausaga e tatou te feola ai. Peitaʻi, o mea i le lagi ma le lalolagi, ua lava lea e faamaonia ai e iai Lē na foafoaina mea uma. (Roma 1:20) E iai le fuafuaga na ia faia ai nei mea, ma e fesootaʻi atu le māfuaaga ua tatou iai i inei i lenā fuafuaga. Na faia e le Atua tagata ina ia ola e faavavau i le lalolagi, ma e na te lē o faagaloina lenā fuafuaga.—Salamo 37:11, 29; Isaia 55:11.

O mea i le lagi ma le lalolagi, ua tatou iloa ai o loo soifua le Atua ma malamalama ai i nisi o ona uiga. Peitaʻi, e lē o le auala lenā e finagalo le Atua ia tatou iloa ai lana fuafuaga. Ina ia tatou iloa le fuafuaga a le Atua ma le māfuaaga ua tatou iai i inei, e manaʻomia ona fesootaʻi mai le Atua iā i tatou. O loo fesootaʻi mai o ia e ala mai i faaupuga faigofie ma tuusaʻo o loo i le Tusi Paia. * E fiafia Molimau a Ieova e valaaulia oe ia iloilo tali o loo taʻua i le Tusi Paia.