O LE pili o le thorny devil (Moloch horridus) lea e maua i Ausetalia, e mitiia e lona paʻu le susū mai i puao, le susū o le ʻea, ma le susū mai i le oneone. Pe a uma, ona faaalu atu lea o le vai agaʻi i lona gutu ina ia inu ai. E faapefea ona tupu lenei mea? Atonu e māfua ona o le mataʻina o lona paʻu.

Ia Mātau: O le paʻu o le thorny devil e ufitia i una. E manatu nisi saienitisi, o le susū po o le sau lea e toʻa i nei una, e sisina ifo i le paʻu o le pili i mea e tai pei o ni alāvai ia o loo i va o una. O nei mea e tai pei o ni alāvai, e fesootaʻi uma ma e oo uma atu i pito o le gutu o le thorny devil.

Ae e faapefea i le thorny devil ona aumaia i luga nei vai mai i ona vae ma faasolo atu i lona tino ma faaalu atu i lona gutu, ae e tatau i le malosiaga o le kalave ona aumaia i lalo le vai? E faapefea foʻi ona maua e le thorny devil le vai pe afai e olo solo lona manava i mea o loo susū?

E manatu tagata suʻesuʻe ua latou iloa le auala ua mafai ai e lenei pili ona faia faapea. E sisina ifo le vai i le paʻu o le pili i mea e tai pei o ni alāvai ia o loo i va o una. Pe a uma, ona ulu atu lea o na vai i totonu o le tino o le pili e ala i ni pū ninii, ma oo atu i nisi foʻi mea e tai pei o ni alāvai i totonu o lona tino. O le auala o loo faia aʻe ai nei mea e tai pei o ni alāvai o loo i totonu o le tino, e mataʻina tele ma e mafai ai ona oo atu i luga le vai i ni avanoa va iti, e aunoa ma le aafia i le malosiaga o le kalave. O lea, e tai pei le paʻu o le thorny devil o se omomi.

Ua taʻua e Janine Benyus, o le peresitene o le Biomimicry Institute, o le iai o ni mea faatekinolosi e mitiia le susū, e mafai ai ona fesoasoani i nisi o tagata atamamai, ina ia maua se auala e aveese ai le susū mai i le ʻea, ina ia atili ai ona mālū fale tetele ma maua ai foʻi vai e aogā mo le fofoga taumafa.

O le ā sou manatu? Pe na teʻi lava ua iai le paʻu o le thorny devil lea e mitiia le susū? Pe na foafoaina?