1-3. (a) E faapefea ona faaalia e Kerisiano e latou te naunau e faapotopoto faatasi? (Tagaʻi i le ata i luga aʻe o le matua.) (e) O le ā o le a tatou iloiloina i lenei mataupu?

INA ua 17 tausaga o Corinna na puʻea faapagota ai lona tinā, ma auina atu i se nofoaga mamao o faasalaga. Mulimuli ane, na aveesea foʻi Corinna mai i lona aiga ma auina atu i le faitau afe o maila i Siberia. O i inā sa ia galue ai i se faatoʻaga ma faia o ia e pei o se pologa. O nisi taimi sa faamalosia ai o ia e galue i fafo i le maʻatiʻati o le malūlū ae e lē lava ni ona ofu māfanafana. E ui i lea, na filifili Corinna ma se isi tuafafine e la te faia le mea sili e tuua ai le faatoʻaga ae ō i le sauniga.

² Na faapea mai Corinna: “Na ma tuua le faatoʻaga i le afiafi ma savavali mo le 25 kilomita (15 maila) e puʻe le nofoaafi. Na alu ese le nofoaafi i le lua i le vaveao, ma e ono itula na alu ai, ona ma toe savavali lea mo le isi sefulu kilomita (ono maila) i le nofoaga e faia ai sauniga.” Na matuā fiafia Corinna ina ua mafai ona ō. Na ia faapea mai: “Na matou suʻesuʻeina Le Olomatamata ma usuina pese o le Malo i le sauniga. O se mea na matuā faalaeiauina ma faamalosia ai lo ma faatuatua.” Ina ua mavae aso e  tolu, na toe foʻi nei tuafāfine i le faatoʻaga e aunoa ma le iloaina e lē e vaaia le faatoʻaga na ō ese i laʻua.

³ E masani ona tulimataʻia e tagata o Ieova le potopoto faatasi. O se faaaʻoaʻoga, na naunau uluaʻi Kerisiano e potopoto faatasi e tapuaʻi iā Ieova, ma na iai pea i le malumalu i lea aso ma lea aso. (Galu. 2:46) E mautinoa e te tulimataʻia foʻi le auai i sauniga. Ae e pei o isi uso ma tuafāfine, atonu e faigatā ona e auai e lē aunoa i sauniga. Atonu e manaʻomia ona e faigaluega mo le tele o itula, pe e tele foʻi au mea e fai, pe e lagona lou vaivai i taimi uma. O lea, o le ā e fesoasoani iā i tatou ia tatou faia le mea sili ina ia auai i sauniga? ^[1] E faapefea ona tatou faalaeiauina a tatou tagata aʻoga ma isi ia auai e lē aunoa i sauniga? O le a faamatalaina i lenei mataupu māfuaaga e auai ai i sauniga: (1) E lelei mo i tatou. (2) E fesoasoani ai i isi. (3) E faafiafiaina ai le finagalo o Ieova. ^[2]

4. E faapefea i sauniga ona fesoasoani iā i tatou e aʻoaʻo ai e faatatau iā Ieova?

⁴ O sauniga e aʻoaʻo ai i tatou. E fesoasoani sauniga uma ia aʻoaʻoina atili ai i tatou e uiga iā Ieova. O se faaaʻoaʻoga, o le tele o faapotopotoga na latou suʻesuʻeina talu ai nei le tusi Faalatalata Atu iā Ieova, i Suʻesuʻega Faale-Tusi Paia a le Faapotopotoga. O ā ni ou faalogona ina ua tatou talanoaina uiga o Ieova, ma faalogo atu i faalogona o ou uso e faatatau iā te Ia? E mautinoa na atili ai ona e alofa iā Ieova. I sauniga, e aʻoaʻoina atili ai foʻi i tatou e faatatau i le Tusi Paia, e ala i le uaʻi totoʻa atu i lauga ma faataʻitaʻiga, ma faalogologo lelei a o faitauina le Tusi Paia. (Nee. 8:8) Ia manatunatu i le tele o mea e tatou te aʻoaʻoina i vaiaso uma pe a tatou sauniuni mo le faitauga Tusi Paia, ma faalogologo atu i mea ua aʻoaʻoina e isi.

5. E faapefea ona fesoasoani sauniga iā te oe e faatatau mea ua e aʻoaʻoina mai i le Tusi Paia, ma faaleleia le auala e te talaʻi ai?

⁵ O sauniga, e aʻoaʻoina ai i tatou e faatatauina i o tatou olaga mea ua tatou aʻoaʻoina mai i le Tusi Paia. (1 Tesa. 4:9, 10) O se faaaʻoaʻoga, pe na e auai i se Suʻesuʻega o Le Olomatamata na uunaʻia ai oe ia tele au galuega e fai i le auaunaga iā Ieova, faaleleia ai au tatalo pe faamagalo atu i se uso po o se tuafafine? O le sauniga amata o le vaiaso, e aʻoaʻoina ai i tatou i le auala e talaʻi atu ai le tala lelei, ma fesoasoani i isi e malamalama i upu moni o le Tusi Paia.—Mata. 28:19, 20.

6. Ua faapefea ona fesoasoani sauniga e faalaeiauina ma faamalosia ai i tatou?

⁶ O sauniga e faalaeiau ai i tatou. O loo taumafai le lalolagi a Satani e faavaivaia lo tatou faatuatua, ma lofitūina ai i tatou i popolega lea e tatou te lagona ai le lotovaivai. Ae ua faalaeiauina ma faamalosia i tatou i sauniga e faaauau ona auauna iā Ieova. (Faitau le Galuega 15:30-32.) E masani ona tatou talanoaina le auala ua faataunuu ai valoaga a le Tusi Paia. E fesoasoani lea iā i tatou e mautinoa ai o le a taunuu moni lava folafolaga a Ieova i le lumanaʻi. E faalaeiau i tatou e o tatou uso e ala i a latou lauga, o tali, ma viivii atu iā Ieova e ala i le pepese mai i o latou loto. (1 Kori. 14:26) Pe a tatou talanoa ma i latou i le taimi a o leʻi amataina po ua uma foʻi sauniga, e faafouina i tatou ona o loo manatu mamafa mai le toʻatele o a tatou uō.—1 Kori. 16:17, 18.

7. Aiseā e matuā tāua ai le auai i a tatou sauniga?

⁷ O sauniga e tatou te maua ai le fesoasoani a le agaga paia o le Atua. E faaaogā e Iesu lenei agaga paia e taʻitaʻia ai faapotopotoga. O lea, na ia fetalai mai iā i tatou: “Inā faalogo mai ia i mea ua fai mai  ai le agaga i faapotopotoga.” (Faaa. 2:7) E mafai ona fesoasoani le agaga paia iā i tatou e teena ai faaosoosoga ma talaʻi atu ma le lototele. E fesoasoani foʻi iā i tatou e faia faaiʻuga lelei. O le māfuaaga lea, e tatau ai ona tatou faia le mea sili e auai i sauniga ma maua ai le fesoasoani a le agaga paia o le Atua.

8. E faapefea i lo tatou auai, o a tatou tali, ma pese i sauniga ona fesoasoani i o tatou uso? (Tagaʻi i le pusa “ E Masani Ona Faaleleia Ona Faalogona pe a Uma le Sauniga.”)

⁸ O sauniga e maua ai le avanoa e faaalia ai le alofa i o tatou uso ma tuafāfine. O loo tauivi le toʻatele i a tatou faapotopotoga ma tulaga e sili ona faigatā. Na tusi le aposetolo o Paulo: “Ia tatou manatunatu foʻi le tasi i le isi.” (Epe. 10:24, 25) E mafai ona tatou faaalia le manatu mamafa i o tatou uso, e ala i le potopoto faatasi ina ia faalaeiau le tasi i le isi. Pe a auai i sauniga, e faaalia ai lo tatou mananaʻo e faatasitasi ma o tatou uso, talanoa ma i latou, ma faaalia ai le naunau i o latou faalogona. E tatou te faalaeiauina foʻi i latou i a tatou tali ma le pepese mai i o tatou loto.—Kolo. 3:16.

9, 10. (a) Faamatala le auala e fesoasoani ai le fetalaiga a Iesu i le Ioane 10:16, ina ia iloa le tāua o le potopoto faatasi ma o tatou uso. (e) O le ā se aafiaga o le auai e lē aunoa i sauniga i ē ua teena e o latou aiga?

⁹ O le auai i sauniga e tatou te fesoasoani ai i le autasi o le faapotopotoga. (Faitau le Ioane 10:16.) Na faatusa e Iesu o ia i se leoleo mamoe ae faatusa ona soo i se lafu mamoe. Seʻi mafaufau: Pe afai o loo i luga o le mauga ni mamoe se lua, o le isi lua o loo i le vanu, ma le isi mamoe o loo i se isi nofoaga, pe e taʻua na mamoe e lima o se lafu mamoe? E leai, auā e tatau ona aai faatasi se lafu mamoe, ma mulimuli i se leoleo mamoe. I se tulaga talitutusa, e lē tatau ona tatou taumamao ese mai i o tatou uso e ala i le lē auai i sauniga. E manaʻomia ona tatou potopoto faatasi ina ia avea ma vaega o le “lafu e tasi,” ma mulimuli i le “leoleo mamoe e toʻatasi.”

¹⁰ E fesoasoani sauniga e tatou te autasi ai o se aiga māfana. (Sala. 133:1) Ua teena nisi o le faapotopotoga e o latou aiga, e pei o latou mātua, uso po o tuafāfine. Na folafola atu e Iesu o le a maua ni o latou aiga e alolofa iā i latou, ma tausia i latou. (Mare. 10:29, 30) Pe afai e te auai e lē aunoa i sauniga, e ono avea oe o se tamā, tinā, uso, po o se tuafafine i se tasi o le faapotopotoga. Pe a tatou mafaufau i lenā tulaga, o le a tatou faia ai le mea sili e auai i sauniga uma.

11. E faapefea i le auai i sauniga ona tatou avatu ai le mea e ono ma tatau iā Ieova?

¹¹ O sauniga e tatou te avatu ai le mea e ono ma tatau iā Ieova. Talu ai na ia foafoaina i tatou, ua tatau ai ona tatou faafetai, faamamaluina ma viia o ia. (Faitau le Faaaliga 7:12.) E tatou te faia faapea pe a tatou tatalo iā Ieova, usuina ona viiga, ma talanoa e faatatau iā te ia i sauniga. Maʻeu se avanoa matagofie ua tatou maua i vaiaso uma e tapuaʻi atu ai iā Ieova!

12. O ā faalogona o Ieova pe a tatou usiusitaʻi i lana faatonuga ia auai i sauniga?

¹² Na foafoaina i tatou e Ieova ma e tatau ona tatou usitaʻi iā te ia. Na ia faatonuina i tatou ia faapotopoto faatasi pea, aemaise lava ua tatou latalata atu i le iʻuga. E faafiafiaina le finagalo o Ieova pe a tatou usitaʻi i lenā faatonuga. (1 Ioa. 3:22) E na te silafia tatou te naunau ia auai i sauniga, ma faatāuaina a tatou taumafaiga ina ia auai.—Epe. 6:10.

13, 14. E faapefea ona tatou mafuta vavalalata iā Ieova ma Iesu i a tatou sauniga?

¹³ O le auai i sauniga, ua faailoa atu ai iā Ieova e tatou te fia mafuta vavalalata atu iā te ia ma lona Alo. E tatou te suʻesuʻeina le Tusi Paia i sauniga ma aʻoaʻoina ai i tatou e Ieova i le mea e ao ona fai ma le auala e ola ai. (Isa. 30:20, 21) E oo lava iā i latou e lē auauna iā Ieova e latou te iloaina o loo taʻitaʻia i tatou e le Atua pe a auai i sauniga. (1 Kori. 14:23-25) E taʻitaʻia e Ieova a tatou sauniga e ala i lona agaga paia, o mea la e tatou te aʻoaʻoina mai ai e mai iā Ieova. O lea, pe a tatou auai i sauniga, e tatou te faalogologo i mea o fetalai mai ai Ieova, lagona le tele o lona alofa iā i tatou, ma mafuta vavalalata atu iā te ia.

¹⁴ Na fetalai mai Iesu o le Ulu o le faapotopotoga: “A faapotopoto ai se toʻalua po o se toʻatolu i loʻu igoa, ou te iai faatasi ma i latou.” (Mata. 18:20) Ua faapea mai foʻi le Tusi Paia “o loo savali [Iesu] i le ogatotonu” o faapotopotoga. (Faaa. 1:20–2:1) E manino mai o loo faatasi ma i tatou Iesu ma Ieova ma faamalosia i tatou i taimi o sauniga. O le ā sou manatu i faalogona o Ieova pe a silasila mai o loo e faia le mea sili, e mafuta vavalalata atu ai iā te ia ma lona Alo?

15. E faapefea i le auai i sauniga ona faailoa ai i le Atua e tatou te naunau e usiusitaʻi iā te ia?

¹⁵ O le auai i sauniga ua faailoa atu ai iā Ieova, e tatou te naunau e usiusitaʻi iā te ia. E lē faamalosia e Ieova i tatou e faia le mea ua ia fetalai mai ai. (Isa. 43:23) Pe a tatou filifili e usiusitaʻi i lana faatonuga e auai i sauniga, ua faailoa atu ai lo tatou alofa iā te ia, ma e tatou te talitonu e iā te ia le aiā e faatonutonu ai i tatou. (Roma 6:17) O se faaaʻoaʻoga, o le ā e tatou te faia pe a faatalitalia i tatou e lo tatou pule e galulue ovataimi, ma fai ai ma masani le misia o sauniga? Atonu foʻi e faapea mai faigāmalo afai e faapotopoto faatasi nisi e tapuaʻi iā Ieova, o le a faasala tupe, falepuipui pe faasalaina i se isi mea e sili atu ona leaga. Ae o nisi taimi e tatou te naunau e fai isi mea nai lo o le auai i sauniga. I nei tulaga taʻitasi, e tatau ona tatou filifili po o le ā le mea e fai. (Galu. 5:29) Peitaʻi, o taimi uma e tatou te filifili ai e usitaʻi iā Ieova, e tatou te faafiafiaina lona finagalo.—Faata. 27:11.

16, 17. (a) E faapefea ona tatou iloa na matuā tāua sauniga i Kerisiano i le uluaʻi senituri? (e) O ā faalogona o George Gangas e faatatau i sauniga faa-Kerisiano?

¹⁶ Sa faatasitasi pea e lē aunoa Kerisiano ina ia tapuaʻi iā Ieova, ina ua mavae ona potopoto faatasi i le Penetekoso i le 33 T.A. ʻUa faaauau ona latou uaʻi atu i aʻoaʻoga a le  ʻauaposetolo, ma ua iai pea i le malumalu i lea aso ma lea aso.’ (Galu. 2:42, 46) E leʻi taofia ai lo latou potopoto faatasi e ui na sauāina i latou e le faigāmalo a Roma, ma taʻitaʻi lotu Iutaia. E ui e leʻi faigofie, ae na latou faia le mea sili ina ia potopoto faatasi ai pea.

¹⁷ Ua mātua lotofaafetai foʻi auauna a Ieova i aso nei i sauniga ma latou olioli e auai ai. Na faapea mai George Gangas, o sē na avea ma sui o le Vaega Pule mo le silia i le 22 tausaga: “O le potopoto faatasi ma uso o se tasi lea o mea e sili ona fiafia ai i le olaga ma o le puna o faalaeiauga. Ou te manaʻo e muamua i le Maota o le Malo ma mulimuli foʻi ona alu ese mai ai pe a talafeagai. Ou te matuā lagona le fiafia pe a ou talanoa atu i tagata o le Atua. Pe a ou faatasi ma i latou, e tai pei o loo oʻu faatasi ma loʻu aiga i le parataiso faaleagaga.” Na ia toe faaopoopo mai: “O loʻu faanaunauga moni o le auai lea i sauniga.”

18. O ā ni ou faalogona e faatatau i sauniga, ma o le ā ua e maumauaʻi e fai?

¹⁸ Pe e faapena ou faalogona e faatatau i le tapuaʻi iā Ieova? Afai o lenā, ia faia le mea sili e potopoto faatasi ai ma uso i sauniga e ui i tulaga faigatā. Ia faailoa atu iā Ieova ou lagona e pei o le tupu o Tavita, o lē na faapea mai: “Ieova e, ou te fiafia i le fale o loo e afio ai.”—Sala. 26:8.