E TĀUA ma tautele la tatou faiva. Ae e lē o tagata uma e tatou te feiloaʻi i ai e malamalama i lenei tulaga. E tusa lava pe fiafia tagata i le Tusi Paia, ae ua manatu nisi e lē manaʻomia ona suʻesuʻe le Tusi Paia ma i tatou.

Seʻi fai Gavin ma faataʻitaʻiga. Na auai o ia i sauniga i le Maota mo Sauniga, ae e leʻi manaʻo e fai sana suʻesuʻega faale-Tusi Paia. Na faamatala mai e Gavin e itiiti lava sona iloa i le Tusi Paia, ae e leʻi manaʻo e iloa e nisi. Na fefe o ia ina neʻi talosagaina e auai i se tapuaʻiga, ma e leʻi manaʻo e faasesēina o ia. O le ā sou manatu? Pe sa mafai ona maua e Gavin le fesoasoani? Ia mafaufau i aafiaga lelei o aʻoaʻoga a le Tusi Paia i se tagata. Na fetalai atu Ieova i tagata Isaraelu: “O aʻu upu e sinasina e pei o le sau, e pei o le timu maamaa i luga o le mutia.” (Teu. 31:19, 30; 32:2) Seʻi o tatou aʻoaʻoina ni mea e faatatau i le sau, ma faatusatusa i ai la tatou faiva ina ia mafai ona tatou fesoasoani i “ituaiga uma o tagata.”—1 Timo. 2:3, 4.

O le sau e mālū. O le sau e maua mai pe a faasolosolo ona liua le susū o le ʻea i ni matāua o le vai. Na faapefea ona “sinasina e pei o le sau” afioga a Ieova? Na ia fetalai atu i ona tagata i se auala agalelei, mālū ma alofa. E tatou te faaaʻoaʻo iā te ia pe a tatou faaaloalo i talitonuga o isi. E tatou te faalaeiauina i latou ia fefulisaʻi o latou manatu ma faia a latou lava faaiʻuga. Pe a tatou faaalia le naunau iā i latou, o le a atili naunau ai tagata e faalogo i mea ua tatou fai atu ai, ma o le a taulau manuia ai la tatou faiva.

O le sau e faafouina ai. O la tatou faiva o le a faafouina ai tagata pe afai e tatou te mafaufau i auala eseese, e fesoasoani iā i latou e aʻoaʻoina ai le upu moni. Na ofo atu e Chris iā Gavin se suʻesuʻega faale-Tusi Paia. Peitaʻi, e na te leʻi tauanauina o ia e talia se suʻesuʻega. Nai lo o lea, na ia taumafai e saʻili ni auala eseese e maua ai e Gavin le toʻa a o la suʻesuʻeina le Tusi Paia. Na taʻu atu e Chris iā Gavin e iai se feʻau tāua o loo faamatalaina i le Tusi Paia, ma o le aʻoaʻoina e faatatau i lea feʻau o le a fesoasoani iā te ia e atili malamalama ai i sauniga. Na toe faamatala atu e Chris e faapea, o valoaga a le Tusi Paia na faatalitonuina ai o ia i le moni o le Tusi Paia. O le iʻuga, na tele a la talanoaga e faatatau i auala na faataunuuina ai valoaga. O nei talanoaga na faafouina ai Gavin ma iʻu ai ina taliaina se suʻesuʻega faale-Tusi Paia.

O le sau e tāua mo le ola. I Isaraelu i le vaitau vevela ma mamago ai mea, e ono leai se timu mo nai masina. A leai la le susū lea e maua mai i le sau, o le a mamago ma pepē laau. Na valoia e Ieova o le a iai le oge i o tatou aso, lea o le a galala ai tagata i le “fia faalogologo i afioga a Ieova.” (Amo. 8:11) Na ia folafola mai o le a pei ē faauuina o le “sau mai iā Ieova,” a o latou talaʻia le tala lelei o le Malo ma e lagolagoina i latou e “isi mamoe.” (Mika 5:7; Ioa. 10:16) O le feʻau o loo tatou talaʻia, o se vaega lea o le sauniuniga a Ieova ia avatu le ola mo ē o loo galala mo le upu moni. Pe e tatou te faatāuaina lenei feʻau?

O le sau o se faamanuiaga mai iā Ieova. (Teu. 33:13) O la tatou faiva, e mafai ona avea o se faamanuiaga iā i latou e talilelei mai. O le suʻesuʻega faale-Tusi Paia o se faamanuiaga mo Gavin, auā na fesoasoani iā te ia e maua ai tali o ana fesili uma. Na vave ona ia agaʻigaʻi i luma, papatiso, ma o loo olioli i le taimi lenei i le talaʻia o le tala lelei o le Malo, faatasi ma lava avā o Joyce.

O le faatusatusa o la tatou galuega talaʻi i le sau, e fesoasoani foʻi iā i tatou e malamalama ai e tāua a tatou taumafaiga taʻitoʻatasi i le faiva. E faapefea? E itiiti le aogā o matāua taʻitasi o le vai, ae o le faitau miliona o matāua e faasūsūina ai le eleele. I se tulaga talitutusa, o taumafaiga a le tagata lava ia i le faiva e foliga mai e faatauvaa i lana vaai. Peitaʻi, pe a tuufaatasi taumafaiga a le faitau miliona o auauna a Ieova, ua avatu ai se molimau i “atunuu uma.” (Mata. 24:14) Po o avea la tatou faiva o se faamanuiaga mai iā Ieova mo isi? Ioe, o la tatou feʻau e pei o le sau, e mālū, e faafouina ai, ma e tāua mo le ola!