Na faapea mai se talavou e igoa iā Rosie, “Sa masani ona ou popole pe a mafaufau i mea e sili ona leaga e ono tutupu.” O ā ni mau faale-Tusi Paia na fesoasoani iā te ia? O se tasi o mau o le Mataio 6:34: “O lenei, ia aua neʻi outou popole mo le aso a taeao, auā e iai foʻi popolega o le aso a taeao. Auā e tofu lava le aso ma mea leaga e tutupu ai.” Na faapea mai Rosie na fesoasoani fetalaiga a Iesu iā te ia, ina ia lē toe popole ai e faatatau i ni mea e ono tutupu taeao. Na ia taʻua atili, “O lea ua iai mea ou te popole ai, ae a ou mafaufau i mea e leʻi tutupu ma atonu e lē tutupu, o le a atili ai ona ou popole.”

Na feagai pea Yasmine ma mafaufauga lē saʻo. Na ia taʻua: “O nisi taimi ou te tagi ai mo ni nai aso, ma e lē lelei saʻu moe i nisi o pō. O oʻu lagona ua pei e na o mafaufauga lē saʻo lava i taimi uma.” O le ā se mau faale-Tusi Paia na fesoasoani iā te ia? Na ia taʻua le 1 Peteru 5:7: “Ia taʻu atu o outou popolega uma iā te ia, auā o loo manatu mamafa mai o ia iā te outou.” Na faapea mai Yasmine: “A o faagasolo taimi na ou tatalo pea iā Ieova, ma na tali mai o ia i aʻu tatalo. Na peiseaʻī ua matuu ese atu se avega mamafa sa iā te aʻu. E ui lava e iai taimi e fai ma oso mai ai nei mafaufauga lē saʻo, ae o lea ua ou iloa le auala e taulima ai.”

Na taʻua e se talavou e igoa iā Isabella: “Na ou mafaufau o le faimeatuu o se mea e tuufaasolo ona e faapena foʻi loʻu tamā. Ou te tuu mea e sili ona tāua ina ia fai ai isi mea e lē tāua, e pei o le mālōlō pe matamata foʻi le TV. O le faimeatuu e lē o se masaniga lelei, ona e mafai ona faateleina ai le popole ma iʻu ai ina lē lelei ona fai se galuega.” O le mataupu silisili na fesoasoani iā te ia o le 2 Timoteo 2:15: “Ia e taumafai malosi e avea oe ma lē ua finagalo malie i ai le Atua, o se tagata faigaluega e leai se mea e mā ai.” Na faapea mai Isabella, “Ou te leʻi manaʻo e taʻuleagaina e Ieova aʻu galuega ona o loʻu faimeatuu.” Ua matuā telē lona suiga i lea tulaga.

E faapena foʻi le manatu o Kelsey: “Ou te tuu laʻu poloketi seʻi fai pe a lata i le taimi ua tatau ona māeʻa ai. O le māfuaaga lea ou te tagi ai i nisi taimi, e lē lelei saʻu moe, ma lagona le popole. E leʻi lelei lenā tulaga mo loʻu soifua mālōlōina.” Na maua e Kelsey le fesoasoani mai i le Faataoto 13:16: “O i latou uma e iai le utaga mamao e taʻitasi ma gaoioi ma le poto, a o lē ua valea o le a ia faasalalau atu lona faavalevalea.” Ina ua ia mafaufau loloto i lenei mau, sa ia aʻoaʻoina ai e faapea: “E atamai le gaoioi ma fuafua mamao. O lea ua iai saʻu api i luga o laʻu kesi e fuafua ai aʻu galuega, ma ua fesoasoani iā te aʻu e faatulaga lelei ai aʻu galuega ma ʻalofia ai le faimeatuu.”

Na taʻua e Kirsten, “Na tuua e loʻu toʻalua aʻu ma la ma fanau e toʻafā.” O le ā se mataupu silisili faale-Tusi Paia na fesoasoani iā te ia? O le Faataoto 17:17 lea e faapea mai: “O le uō moni e alofa i taimi uma, ma o ia o se uso ua fanau mo taimi o puapuaga.” Na saʻili Kirsten mo se fesoasoani mai i ē na auauna iā Ieova e pei foʻi ona ia faia. O ā fesoasoani na ia maua? Na ia faamatala mai, “E tele auala na fesoasoani mai ai aʻu uō iā te aʻu. Na tuu e nisi ni faatau o meaʻai ma fugālaau i luma o lo matou fale. E faatolu ona fesoasoani mai se vaega o tagata iā te aʻu ma laʻu fanau, ina ia siitia atu i se isi fale. Na fesoasoani mai foʻi se isi tagata ina ia maua saʻu galuega. Na fesoasoani mai pea aʻu uō.”

Na tauivi foʻi Delphine lea na taʻua muamua ma lagona tuua toʻatasi. O le toe mafaufau i ona faafitauli na ia faapea mai ai: “A ou vaai atu i isi tagata o loo ola fiafia ma nonofo faatasi, ou te lagona le tuua toʻatasi ma le faanoanoa.” O se tasi o mau na fesoasoani iā te ia o le Salamo 68:6: “Ua faia e le Atua se fale e nonofo ai i latou ua tuua toʻatasi.” Na ia faamatala mai: “Na ou iloa e lē o uiga atu lenei mau i se fale faaletino. Nai lo o lea, na mulimuli ane oʻu malamalama ai o loo ofo mai e le Atua se nofoaga faaleagaga, lea o loo maua ai le puipuiga ma le fesoasoani tau faalogona, mai i ē e alolofa iā Ieova. Ae na ou iloa foʻi, e lē mafai ona ou mafuta vavalalata atu i isi seʻi vaganā ua ou mafuta vavalalata atu iā Ieova. Na fesoasoani mai le Salamo 37:4 ina ia iloa ai lenā tulaga: ʻIa e matuā fiafia foʻi iā Ieova, ona foaʻi mai lea e ia o mea e manaʻo i ai lou loto.’”

Na faapea mai Delphine: “Na ou iloa mulimuli ane e manaʻomia ona iai sa maʻua faiā tumau ma Ieova. O ia o le Uō sili. O lea na ou faia ai se lisi o galuega e mafai ona matou faatasitasi ai ma isi, ma atiaʻe ai ni faiā vavalalata ma i latou e faavae mai i le alofa iā Ieova. Na aʻoaʻoina foʻi aʻu ia taulaʻi atu i uiga lelei o isi ma lē amanaʻia o latou vaivaiga.”

E moni e lē lelei atoatoa ē o loo auauna i le Atua. O loo tauivi Molimau a Ieova ma faafitauli o loo feagai foʻi ma isi. Peitaʻi, o taʻiala mai i le Tusi Paia e uunaʻia ai tagata e fesoasoani atu i isi i le tele e mafai ai. O se mea atamai le faauō atu iā i latou na. Ae pe e mafai ona fesoasoani mai mataupu silisili o le Tusi Paia i faafitauli e lē mafai ona foʻia i aso nei, e pei o le maʻi faaumiumi ma lagona faavauvau?