O SE meaalofa mataʻina e tatau ona uunaʻia ai i tatou e faaalia le lotofaafetai. Na faamatilatila e Iesu lenā lesona, ina ua uma ona ia faamālōlōina ni tamāloloa se toʻasefulu sa maua i se maʻi tugā e leʻi iai se vaifofō i lenā taimi. Na “toe foʻi mai” se tasi o lenā toʻasefulu ma “vivii leotele atu i le Atua.” Na fetalai Iesu: “Na faamamāina le toʻasefulu, a ea? A o fea la o iai le isi toʻaiva?” (Luka 17:12-17) O le ā le lesona? E vave ona galo iā i tatou mea lelei e faia e isi mo i tatou.

E leai se meaalofa e tutusa ma le togiola. O le meaalofa silisili lea ua foaʻiina mai. O le ā la le auala e tatau ona e tali atu ai i le mea ua faia e le Atua mo oe?

• Ia iloa Lē na foaʻiina mai le meaalofa. E lē otometi ona maua e tagata uma le ola e faavavau ona o le togiola, auā na taʻua e Iesu i lana tatalo i le Atua: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.” (Ioane 17:3) Pe afai e faamatala atu e se tasi na laveaʻiina oe e se tamāloa a o e laʻitiiti, pe e te lē fia iloa atili e faatatau i lenā tagata, faapea le māfuaaga na ia laveaʻiina ai oe? E finagalo Ieova le Atua o lē na saunia le meaalofa  faasaoola o le togiola, ina ia e iloa o ia ma mafuta vavalalata atu foʻi iā te ia. Ua augani mai le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.”—Iakopo 4:8.

• Ia faaalia le faatuatua i le togiola. “O lē e faatuatua i le Alo e maua e ia le ola e faavavau.” (Ioane 3:36) O le ā le uiga o le faaalia o le faatuatua? O le faaalia o le faatuatua i le togiola, e manaʻomia ai ni gaoioiga. (Iakopo 2:17) O ā na gaoioiga? E faatoʻā avea se meaalofa ma au meatotino, pe afai e te aapa atu i ai ma talia. I se tulaga talitutusa, e tatau ona e aapa atu i le togiola ma talia. E faapefea? Ia aʻoaʻoina le auala e finagalo le Atua e te ola ai, ona gaoioi lea e ōgatusa ma lenā auala. * Ia tatalo i le Atua mo le faamagaloga ma ia maua se lotofuatiaifo mamā. Ia faalatalata atu iā te ia ma le mautinoa atoatoa, o le a maua e i latou uma e faaalia le faatuatua i le togiola se lumanaʻi filemu, malupuipuia ma faatamaoaigaina e faavavau.—Eperu 11:1.

• Ia auai i le Faamanatuga o le maliu o Iesu. Na faavaeina e Iesu se sauniga e faia i tausaga taʻitasi, e faamanatu mai ai iā i tatou le sauniuniga o le togiola. Na ia fetalai e faatatau i le faamanatuina o lenā aso e faapea: “Ia faia pea lenei mea e fai ma faamanatuga iā te aʻu.” (Luka 22:19) O le a faamanatuina e Molimau a Ieova le maliu o Iesu i le Aso Lua, Aperila 11, 2017 pe a goto le lā. E pe ā ma le itula le umi o le sauniga, lea e aofia ai se lauga e faamatalaina ai le tāua o le maliu o Iesu, ma le auala o le a maua ai aogā i le taimi lenei faapea le lumanaʻi. I le tausaga ua mavae, pe tusa ma le 20 miliona i latou na auai i le faamanatuga i le lalolagi atoa. E matou te valaaulia ma le māfana oe ina ia tatou auai faatasi, e tali atu ai i le meaalofa silisili a le Atua.