Ua talaʻia atu le tala lelei o le Malo o le Atua i le lalolagi atoa, e pei lava ona valoia e Iesu. (Mataio 24:14) I le tusi o Tanielu, o loo faamatala mai ai o lenei Malo o se pulega na faavaeina e le Atua. I le mataupu e 2 o lenā tusi, o loo faamatala mai ai le faasologa o pulega faaletagata po o faigāmalo, e amata mai i Papelonia anamua seʻia oo mai i o tatou aso. O loo valoia mai le mea o le a tupu i le lumanaʻi i le fuaiupu e 44 e faapea:

“O le a faatūina ai e le Atua o le lagi o le malo e lē faaumatia lava. O lea malo foʻi e lē tuuina atu i se isi nuu. O le a ia tuʻimomomoina ma faaumatia malo uma, ae e tumau lea malo e faavavau.”

O se tasi nei o valoaga mai i le tele o isi valoaga o le Tusi Paia, o loo folafola mai ai o le a suitulaga le Malo o le Atua i pulega faaletagata ma aumaia le tulaga saogalemu ma le maopoopo i tagata o le lalolagi. O le ā le ituaiga olaga o le a iai i lalo o le pulega o lenā Malo? O nisi nei o folafolaga matagofie o le a faataunuuina moni lava.

• E LĒ TOE IAI NI TAUA

  Salamo 46:9: “Ua ia [le Atua] faaiʻuina taua i tuluʻiga o le lalolagi. Ua ia gauia foʻi le ʻaufana ma vaevaeina le tao; ma ua ia susunuina i le afi o taavale toso.”

  Seʻi faaāta i lou mafaufau le ituaiga lalolagi o le a iai, pe ana faaaogā tupe ma tomai i vala e aogā i tagata nai lo o le fausia o auupega e fasiotia ai i latou. O le a faataunuuina moni lava lenā folafolaga e le Malo o le Atua.

• E LĒ TOE IAI NI MAʻI

  Isaia 33:24: “E lē fai mai foʻi se tasi ua nofo ai: ʻOu te maʻi.’”

  Seʻi mafaufau i se lalolagi o le a lē toe mafatia i le gasegase o le fatu, kanesa, malalia po o se isi lava maʻi. E lē toe manaʻomia foʻi ni falemaʻi po o ni vailaau mo togafitiga. O le a maua e i latou e nofoia le lalolagi i le lumanaʻi le soifua mālōlōina lelei atoatoa.

• E LĒ TOE IAI SE OGE

  Salamo 72:16: “O le a tele saito i le laueleele; o le a fau ma soloi i tumutumu o mauga.”

  O le a lava ma totoe meaʻai o le a saunia e le laueleele mo tagata uma lava. O le a lē toe iai sē e matelāina ma le lē lava o meataumafa.

• E LĒ TOE IAI SE TIGĀ, FAANOANOA, MA LE OTI

  Faaaliga 21:4: “E na te [o le Atua] soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”

   O lona uiga o le a maua le ola e faavavau ma le tulaga lelei atoatoa i se lalolagi parataiso. O folafolaga na a Lē na foafoaina mea, o Ieova le Atua.

Faamata e mafai ona taunuu moni lava na mea? E ui lava o le toʻatele o tagata e ioe o le olaga o loo folafola ma faamatalaina i le Tusi Paia o se mea e manaʻomia moni lava, ae ona o māfuaaga eseese ua manatu ai nisi e faigatā ona malamalama i le uiga o le ola e faavavau. E lē o se mea e faateʻia ai, ona e leai se tasi na ola muamua ai e mafai ona faamatalaina mai pe e faapeʻī lenā olaga.

Ona o le umi tele o faapologaina tagata i le agasala ma le oti, tauivi ma tigā, mafatiaga, ma tulaga faigatā, ua manatu ai le toʻatele o vala masani ia o le olaga. Ae e matuā ese lenā tulaga mai le finagalo o Ieova le Atua mo tagata.

Ina ia fesoasoani ia tatou mautinoa e faataunuuina ana folafolaga uma, na fetalai le Atua e tusa ai ma ana fetalaiga: “E lē foʻi fua mai iā te aʻu, ae e faia le mea ou te fiafia i ai, e taulau foʻi e tusa ma le mea na ou auina atu ai.”​—Isaia 55:11.

O loo faamatalaina Ieova i le Tusi Paia o le Atua “e lē mafai ona tala pepelo.” (Tito 1:2) Ona o lea ua ia folafolaina mai le tele o mea mataʻina mo le lumanaʻi, o se mea atamai la le iloiloina o fesili nei: Pe e mafai moni ona ola e faavavau tagata i se lalolagi Parataiso na folafolaina mai? O le ā e tatau ona tatou faia ina ia maua ai aogā mai i folafolaga a le Atua? I mataupu o loo soosoo mai, o le a e maua ai ni faamatalaga e fesoasoani iā te oe e tali ai fesili nei.