Ua faamatalaina le tigā alofa e faapea, “o le tomai lea e iloa ai faalogona o le isi tagata pe e malamalama foʻi i ai e ala i le faaāta i le mafaufau pe e faapeʻī le tulaga o lenā tagata.” Na taʻua e se tagata atamai i mataupu tau i le mafaufau o Dr. Rick Hanson e faapea, “na tatou fananau mai ma le tomai e faaalia le tigā alofa.”

IA MĀTAU: Aiseā ua iai iā i tatou le tomai e faaalia ai le tigā alofa, o se uiga e lē maua i se isi lava meafaiola? Ua taʻua i le Tusi Paia na faia e le Atua le tagata i lona faatusa. (Kenese 1:26) Ua faia i tatou i le faatusa o le Atua i se uiga e faapea, e mafai ona tatou faaatagia atu ona uiga. O lea, pe a uunaʻia e le tigā alofa tagata manatu mamafa e fesoasoani atu i isi, ua latou faaatagia atu foʻi la le tigā alofa o Lē na foafoaina mea, o Ieova le Atua.​—Faataoto 14:31.

E tigā alofa mai le Atua ma e lē fiafia lona finagalo pe a silasila mai o loo tatou mafatia. Na taʻua i le Tusi Paia “na mafatia o ia i taimi o o latou mafatiaga,” ina ua faapologaina tagata Isaraelu anamua i Aikupito faapea tausaga faigatā e 40 i le toafa. (Isaia 63:9) Mātau, e leʻi tau ina silasila mai le Atua i o latou mafatiaga ae na ia mafatia foʻi. Na ia fetalai e faapea: “Ua ou iloa puapuaga o loo mafatia ai i latou.”(Esoto 3:7) Na toe fetalai foʻi o ia, “O lē e paʻi atu iā te outou, ua paʻi o ia i le ʻiʻoimata o loʻu lava mata.” (Sakaria 2:8) Pe a faatigā mai nisi iā i tatou, e tigā foʻi lona finagalo.

E ui e ono iai o tatou lagona nofosala ma manatu e lē tatau ona tigā alofa mai le Atua, ae ua faamautinoa mai e le Tusi Paia “e sili atu le Atua i o tatou loto, e na te silafia foʻi mea uma lava.” (1 Ioane 3:19, 20) E sili atu ona malamalama le Atua iā i tatou nai lo o i tatou lava. E malamalama lelei foʻi o ia i o tatou tulaga, manatu, faalogona ma e tigā alofa mai o ia iā i tatou.

 Ua faamautinoa mai e le Tusi Paia

• ʻE te valaau atu ona tali mai lea o Ieova; e te alaga atu mo se fesoasoani, ona faapea mai lea o ia, ʻO aʻu lenei!’’​—ISAIA 58:9.

• “ʻAuā ua ou iloa lelei manatu ua ou manatu ai iā te outou,’ ua fetalai mai ai Ieova, ʻo manatu o le filemu ae e lē o le malaia, ma ia avatu iā te outou se lumanaʻi ma se faamoemoe. E tou te valaau mai lava iā te aʻu, ma ō mai ma tatalo mai iā te aʻu, ona ou faalogo atu ai lea iā te outou.’”​—IEREMIA 29:11, 12.

• “Ia e utuina oʻu loimata i lau fagupaʻu. Pe e lē o iai ea i lau tusi?”​—SALAMO 56:8.

Pe e mafai i le iloaina e tigā alofa mai le Atua ona fesoasoani iā i tatou a o feagai ma faigatā? Mātau le faaaʻoaʻoga a Maria:

“Na ou lagona e faigatā ma lē tonu le olaga ina ua ou tofo i le matuā tigā o le maliu o laʻu tama tama e 18 tausaga, ina ua tauivi ma le kanesa mo le lua tausaga. Sa ou matuā ita iā Ieova ona o le lē taofia o lenei maʻi ma faamālōlō o ia!

“I le ono tausaga mulimuli ane, na faalogologo mai ai se uō i le faapotopotoga e alofa ma agamalu, a o faamatala atu oʻu faalogona e lē alofa mai Ieova iā te aʻu. Na ia faalogologo mai mo le tele o itula e aunoa ma sana tala, ona ia sii mai lea o se mau na pāʻia ai loʻu loto, o le 1 Ioane 3:19, 20, lea e faapea mai: ʻE sili atu le Atua i o tatou loto, e na te silafia foʻi mea uma lava.’ Na ia faamatala mai foʻi e malamalama Ieova i o tatou mafatiaga.

“E ui i lea, na faigatā ona aveese loʻu ita. Ae na ou faitau i le Salamo 94:19, lea e faapea mai: ʻIna ua tele popolega o loʻu loto, na fiafia loʻu loto ona o au faamāfanafanaga.’ Na ou lagona e pei na tusia lenei mau mo aʻu. Na iʻu ina ou maua le faamāfanafanaga i le talanoa atu iā Ieova e faatatau i loʻu mafatiaga ona na ou iloa e faafofoga ma e malamalama mai o ia.”

Maʻeu se faamāfanafanaga i le iloaina e malamalama le Atua iā i tatou ma e na te faaalia le tigā alofa! Ae aiseā la ua tele ai mafatiaga? Pe e māfua ona faasala i tatou e le Atua ona o a tatou mea sesē? Po o le a faaiʻuina e le Atua mafatiaga uma? O le a taliina nei fesili i le mataupu o loo sosoo mai.