E UI lava i le lē usiusitaʻi o o tatou uluaʻi mātua ma tuufaasolo mai ai le agasala ma le oti i tagata, ae e leʻi suia ai lava le fuafuaga a le Atua. O loo faamautinoa mai pea i lana Afioga le Tusi Paia, e lē suia lava lana fuafuaga mo le fanau a tagata.

• “E fai lava le lalolagi mo ē e amiotonu, e nonofo ai pea i latou e oo i le faavavau.”​—Salamo 37:29.

• “O le a faaumatia e ia le oti e faavavau, o le a soloiesea foʻi e le Alii Pule Silisili Ese o Ieova loimata mai i mata uma.” ​—Isaia 25:8.

• “Ona faaumatia lea o le fili mulimuli, o le oti lea.”​—1 Korinito 15:26.

• “E lē toe iai se oti, po o se faanoanoa, po o se tagiauē, e lē toe iai foʻi se tigā.”​—Faaaliga 21:4.

O le a faapefea ona “faaumatia” e le Atua le oti? E pei ona taʻua muamua, o loo faailoa manino mai i le Tusi Paia, o ʻē e amiotonu o le a ola e faavavau.’ Ae o loo taʻua ai foʻi, “e leai se tagata e amiotonu i le lalolagi e na te faia pea le mea lelei ma e lē agasala.” (Failauga 7:20) O lea ina ia faaumatia la le oti, po o lona uiga e lē tatau ona toe tausia tapulaa a le Atua? E leai! E lē mafai ona ia faia faapea, ona e lē mafai ona “tala pepelo” le Atua. (Tito 1:2) O le ā la o le a faia e le Atua ina ia faataunuu ai lana fuafuaga alofa mo tagata?

Na saunia e Ieova se sauniuniga alofa ina ia laveaʻia ai tagata mai i le oti, e ala i le totogi o le togiola. O le fuafuaga autū o le togiola, o se tau e totogi e tutusa lelei ma le tau o le mea ua faaleagaina po o le faamalieina o mea e manaʻomia e le faamasinogatonu. Talu ai ua agasala uma tagata ma ua aafia i le faasalaga o le oti, ua moni ai le manatu o le Tusi Paia: “E leai se tasi o i latou e mafai ona laveaʻi i lona uso, e lē mafai foʻi ona avatu i le Atua se togiola mo ia; (E matuā telē le tau o le togiola o o latou ola. Ua lē mafaia lava e oo i le faavavau).”​—Salamo 49:7, 8.

Pe a oti se tagata lē lelei atoatoa, o le totogi lenā o ana agasala, ma e lē mafai ona ia laveaʻia o ia lava, pe e totogi foʻi agasala a le isi tagata. (Roma 6:7) E tatou te manaʻomia se tagata lelei atoatoa ma e lē agasala, e ofoina mai lona ola mo a tatou agasala ae e lē mo ia.​—Eperu 10:1-4.

O le mea lenā na finagalo le Atua o le a ia faia. Na ia foaʻi mai lona Alo o Iesu i le lalolagi o se tagata lelei atoatoa, ma e leai se agasala. (1 Peteru 2:22) Na sau Iesu ina ia “foaʻi atu lona ola e fai ma togiola e sui aʻi tagata e toʻatele.” (Mareko 10:45) Na maliu o ia ina ia totogi a tatou agasala ma saʻoloto ai mai i le oti.​—Ioane 3:16.

O le faataunuuga o valoaga o le Tusi Paia i aso nei ua tatou ola ai i “aso e sili ona faigatā.” Ua faamaonia ai o loo tatou ola i “aso e gata ai” o lenei faiga amioleaga o mea. (2 Timoteo 3:1) O le a faaiʻuina aso e gata ai “i le aso faamasino ma le faaumatiaga o tagata faalēmataʻu.” (2 Peteru 3:3, 7) Peitaʻi, o le a faasaoina mai i lenā faaumatiaga i latou e alolofa i le Atua ma maua le faamanuiaga o le “ola e faavavau.”​—Mataio 25:46.

O le a maua e le faitau miliona o tagata le avanoa e ola ai e faavavau pe a toe faatutūina mai. Na faatinoina e Iesu le toetū ina ua asiasi i le aai o  Naina. Na “tigā alofa o ia” i se fafine ua oti lana tane ina ua maliu lana tama ma na ia toe faatūina o ia. E na o le pau lea o le tama a lenei fafine. (Luka 7:11-15) Na tusi le aposetolo o Paulo: “Ou te faamoemoe foʻi i le Atua . . . e toetutū mai tagata amiotonu ma tagata amiolētonu.” O lenei faamoemoe mautinoa ua faataʻitaʻi mai ai le alofa o le Atua mo tagata.​—Galuega 24:15.

E faitau piliona i latou o loo tulimataʻia le ola e faavavau. O loo taʻua i le Tusi Paia: “E fai lava le lalolagi mo ē e amiotonu. E nonofo ai pea i latou e oo i le faavavau.” (Salamo 37:29) O le a latou maua le fiafia ma faalaeiauina i le vaai atu a o faataunuuina upu a le aposetolo o Paulo, na tusia i le 2,000 tausaga ua mavae: “Le oti e, o fea o iai lou manumalo? Le oti e, o fea o iai lou tui?” (1 Korinito 15:55) O le a faaumatia le fili mataʻutia o le oti!