SEʻI faaata i le mafaufau o loo e matamata i se vitiō e faatatau i se tagata taʻutaʻua e te fiafia i ai. E amata lenei vitiō i lona talaaga a o laʻitiiti, i ana lesona faamusika ma le auala na toleni ai. Ua amata ona faafiafia i koneseti, faimalaga i isi atunuu ma avea ai o sē e lauiloa i le lalolagi. E leʻi umi lava, ae faasolo loa ina matua lenei tagata ma e uma ifo le vitiō ua maliu.

O lenei vitiō e lē o se talafatu, ae o se tala moni o se tagata ua lē o toe iai. E tusa lava po o lenei tagata o se faimusika, se saienitisi, se tagata taalo po o se tagata lauiloa, ae tutusa uma lava le iʻuga e oo i ai. E tele mea lelei ua faia e tagata, ae seʻi mafaufau i le tele o isi mea lelei e mafai ona ia faia, pe ana leai le ola matua ma le oti.

Pagā le faanoanoa ona o le tulaga lava lea e tasi e oo iā i tatou uma lava. (Failauga 9:5) Po o ā lava a tatou taumafaiga, e lē mafai ona tatou ʻaloese mai i le aafia i le ola matua ma le oti. E lē gata i lea, atonu e tatou te aafia i se faalavelave faafuaseʻi po o se maʻi tigāina ma tatou feoti ai. E pei ona faamatalaina i le Tusi Paia, e tai pei i tatou o se puao e “aliali mai i sina taimi puupuu, ona toe mou atu lea.”​—Iakopo 4:14.

O nisi tagata e mafaufau ua leai se aogā o le olaga ma ua latou manatu ai, “seʻi o tatou aai la ma inu auā o a taeao e tatou te feoti ai.”(1 Korinito 15:32) Ae o le auala lea ua ola ai tagata ona ua latou iloa, e mafai ona latou feoti i so o se taimi ma e leai se faamoemoe mo le lumanaʻi. Peitaʻi e iai taimi e latou te tuufesili ai, aemaise lava pe a feagai se tasi ma tulaga faigatā, ʻPe e na o le pau lea o le olaga?’ O fea o le a e maua ai le tali?

O le toʻatele i aso nei ua latou saʻili atu i saienitisi. Ua maua e saienitisi ma fomaʻi nisi mea e mafai ona faaumiumi ai le ola o le tagata. O loo galulue pea nisi saienitisi ina ia faia faapea. Po o le ā lava le iʻuga o a latou saʻiliʻiliga, e tumau pea le fesili: Aiseā ua tatou ola matutua ai ma feoti? Po o le a faaumatia lo tatou fili o le oti? O le a talanoaina i le mataupu o loo sosoo mai nei manatu ma tali ai le fesili, pe e na o le pau lea o le olaga?