Aiseā e faanaunau ai tagata ina ia ola e faavavau? Ua taʻua i le Tusi Paia na tuuina e le Atua lenā faanaunauga i o tatou loto. (Failauga 3:11) O loo taʻua ai foʻi “o le Atua o le alofa lava ia.” (1 Ioane 4:8) Pe e talafeagai pe a faapea atu e lē taunuu lenā faanaunauga, a o lea na tuuina e se Atua alofa lenā faanaunauga iā i tatou?

O le mea moni, e leai se tasi o i tatou e fia oti. Ua faamatalaina i le Tusi Paia le oti o se “fili.” (1 Korinito 15:26) E tusa lava pe vave ona tatou feoti pe tuai foʻi, ae e tatou te iʻu lava i le oti. Ma ua toʻatele tagata ua fefefe pe a mafaufau i le oti. Po o le a iai se taimi o le a faaumatia ai lenei fili? Pe e mafai moni lava ona tupu lenā mea?

Pe e faateʻia oe i le iloaina e lē o se fuafuaga a le Atua ia oti le tagata? O loo iai i le tusi o Kenese faamaoniga o le fuafuaga a le Atua, ia ola e faavavau le tagata i le lalolagi. Na foafoaina e Ieova * le lalolagi ma mea uma o iai, ina ia ola ai e faavavau le tagata ma le fiafia. Ona ia faia lea o le uluaʻi tamāloa o Atamu ma tuu i le parataiso i le faatoʻaga i Etena. Mulimuli ane, “ua silasila atu le Atua i mea uma na ia faia, tagaʻi foʻi! ua matuā lelei lava.”​—Kenese 1:26, 31.

Na faia Atamu e lelei atoatoa. (Teuteronome  32:4) E oo foʻi iā Eva le avā a Atamu, na lelei atoatoa i le mafaufau ma le tino. Na fetalai atu Ieova iā i laʻua: “Ia fanafanau ma ia matuā faatoʻateleina, ia tumu ai le lalolagi ma ia galueaʻiina, ia pule i iʻa o le sami ma manufelelei o le lagi ma meaola uma e fetolofi i le laueleele.”​—Kenese 1:28.

Ina ia faatumuina le lalolagi i a la fanau, e manaʻomia ai se taimi umi. O le a fanauina e Eva ni fanau ma o le a fanauina e na fanau nisi fanau, seʻia oo ina tumu ai le lalolagi e pei ona fetalai mai ai le Atua. (Isaia 45:18) Pe e talafeagai pe a faapea atu na faia e Ieova lenā folafolaga iā Atamu ma Eva, pe afai na foafoaina i laʻua e na o la fanau, pe atonu ma fanau a la fanau e vāai i ai?

Ia mafaufau foʻi i le pule na tuuina atu iā Atamu e vaai ma faaigoa ai manu, e mautinoa e manaʻomia ai le tele o le taimi. (Kenese 2:19) Ae ina ia pule i manu, e manaʻomia se taimi umi e aʻoaʻoina ai e faatatau i na manu ma malamalama i le auala e tausia lelei ai.

O lea la, o le fetalaiga a Ieova ina ia faatumu le lalolagi ma pule i manu, ua faamaonia mai ai na foafoaina le uluaʻi ulugalii ina ia ola mo se taimi umi. O le mea moni, na ola Atamu mo se taimi umi.

O loo taʻua i le Tusi Paia se taimi na umi atu ai ona ola tagata nai lo o aso nei. O loo faapea mai: “O aso uma na ola ai Atamu, e iva selau tolu sefulu tausaga.” E iai foʻi isi tamāloloa na soifua i le silia ma le 900 tausaga e pei o Setu, Enosa, Keinano, Iareto ma Metusela. Na soifua uma nei tamāloloa a o leʻi oo mai le Lolo, ma e 600 tausaga o Noa a o leʻi oo i lenā taimi. (Kenese 5:5-27; 7:6; 9:29) Aiseā na umi ai le soifua o nei tamāloloa?

Na soifua aʻe nei tamāloloa e latalata i le taimi na lelei atoatoa ai Atamu ma Eva. Atonu o le māfuaaga lea na umi ai o latou ola. Ae e faapefea i le lelei atoatoa ona aafia ai le umi e tatou te ola ai? O le a faapefea ona faaumatia le oti? Ina ia maua le tali, e manaʻomia ona tatou iloa muamua le māfuaaga ua tatou ola matutua ai ma feoti.