E pe ā ma le 3,500 tausaga ua mavae, na fetalai atu ai Ieova le Atua i ona tagata tapuaʻi i le mea e tatau ona fai ina ia maua ai se lumanaʻi saogalemu: “Ou te tuuina atu le ola ma le oti i ou luma, o le manuia ma le malaia; ma ia e filifili i le ola ina ia e ola ai pea, o oe ma lau fanau.”​—Teuteronome 30:19.

Ina ia maua se lumanaʻi matagofie, na tatau i na tagata ona faia se filifiliga saʻo. O le filifiliga foʻi lenā e mafai ona tatou faia i aso nei. O loo faailoa mai i le Tusi Paia le auala e filifili ai se lumanaʻi saogalemu: “E ala i le alofa iā Ieova lou Atua, e ala i le faalogo i lona siʻufofoga.”​—Teuteronome 30:20.

AʻOAʻO MAI I LE TUSI PAIA: Ina ia e alofa iā Ieova, e tatau ona e aʻoaʻoina muamua mea e uiga iā te ia mai i le Tusi Paia. Pe a e faia faapea, o le a e iloa ai o ia o se Atua alofa ma e finagalo o ia i le mea e sili ona lelei mo oe. Ua ia valaaulia oe e tatalo atu iā te ia ona ʻo loo manatu mamafa mai o ia iā te oe.’ (1 Peteru 5:7) Ua folafola mai e le Tusi Paia, pe a e faia taumafaiga e mafuta vavalalata atu iā te ia, o le a ʻmafuta vavalalata mai o ia iā te oe.’​—Iakopo 4:8.

FAATATAU MEA UA E AʻOAʻOINA: O le faalogo i le Atua e uiga atu i le mulimuli i ana taʻiala atamai o loo i le Tusi Paia. Pe a e faia faapea ona “manuia ai lea o ou ala, ma e gaoioi ai ma le poto.”​—Iosua 1:8.