Na siitia atu loʻu tamā mai i Siamani i Ausetalia i le 1949. Na alu e saʻili galuega i le mea o loo ʻeli ai le koale ma fale e gaosi ai le eletise, ma faamautū ai i vaega maotua o Victoria. O i inā na faaipoipo ai i loʻu tinā ma ou fanau ai i le 1953.

I nai tausaga mulimuli ane, na amata ai ona suʻesuʻe e loʻu tinā le Tusi Paia ma Molimau a Ieova, ma o loo oʻu manatua aʻoaʻoga a le Tusi Paia na ou aʻoaʻoina a o oʻu laʻitiiti. E leʻi fiafia loʻu tamā i lotu. Na matuā sauā o ia ma faamataʻu tagata ma na matuā fefe ai loʻu tinā. Peitaʻi na faaauau ona suʻesuʻe faalilolilo e loʻu tinā le Tusi Paia ma sa matuā fiafia i aʻoaʻoga o loo iai. Pe a leai loʻu tamā e na te faamatala mai iā i maʻua ma loʻu tuafafine mea na ia aʻoaʻoina. Sa ia faamatala mai se parataiso i le lalolagi i le lumanaʻi, ma le auala e maua ai le fiafia pe a ma mulimuli i tapulaa tau amio a le Tusi Paia.—Salamo 37:10, 29; Isaia 48:17.

O le 18 o oʻu tausaga na ou manaʻo ai ou te alu ese mai i lo matou aiga ona o le sauā o loʻu tamā. E ui na ou talitonu i mea na aʻoaʻo mai e loʻu tinā mai i le Tusi Paia, ae ou te leʻi faatāuaina. Ou te leʻi ola e tusa ma ia tapulaa. Na ou faigaluega o se fai eletise i le nofoaga na ʻeli ai le koale. Na ou faaipoipo i le 20 o oʻu tausaga. I le tolu tausaga mulimuli ane, na fanau ai la ma tama teine ulumatua, ma na ou toe manatunatu ai po o ā mea e tāua i le olaga. Na ou iloa e mafai ona fesoasoani le Tusi Paia i lo matou aiga, o lea na amata ai ona ou suʻesuʻeina le Tusi Paia ma Molimau a Ieova. Peitaʻi na matuā tetee laʻu avā i Molimau a Ieova. Ina ua ou auai i se tasi o a latou sauniga, na ia lapataʻia aʻu ou te filifili pe tuu laʻu suʻesuʻega pe alu ese mai i le aiga. Na ou lagona e leai se mea e mafai ona fai, ma na ou lolo atu i lona manaʻo ma lē toe fesootaʻi ai ma Molimau a Ieova. Mulimuli ane na ou lagona le salamō i loʻu lē faia o le mea na ou iloa e saʻo.

I se tasi aso na faaali mai ai e ē na matou faigaluega faatasi ni ata matagā taufeusuaʻiga. Sa ou fiafia i ai, ae i le taimi e tasi na ou ʻinoʻino i ai, ma na ou matuā lagona le taʻusalaina. Na ou manatua mea na ou aʻoaʻoina mai i le Tusi Paia, ma na ou talitonu o le a faasala aʻu e le Atua. Ae a o faaauau ma tele ata matagā taufeusuaʻiga ou te matamata ai, na suia laʻu vaaiga i ia ata. Na iʻu ina ou matuā fiafia i ai.

I le 20 tausaga na sosoo ai, na atili ai ona ou tafetafea ese mai i tapulaa na taumafai loʻu tinā e aʻoaʻo mai iā te aʻu. Na atagia atu  i oʻu uiga faaalia mea o loo fafaga ai loʻu mafaufau. Sa ou tautala i gagana masoā ma fiafia i tausuaga matagā, ma na sesē laʻu vaai e faatatau i feusuaʻiga. E ui na ma nonofo pea ma laʻu avā ae na iai foʻi isi fafine na matou faapouliuli. I se tasi aso na ou tilotilo ai i le faata ma faapea ifo: ʻOu te lē fiafia iā te oe.’ Na suia oʻu lagona faaaloalogia o aʻu lava, i lagona lē mamā.

Na muta la ma faaipoipoga ma ua leai se faamoemoe i le olaga. O lea na ou tatalo ai iā Ieova ma loʻu lotoatoa. Na toe faaauau laʻu suʻesuʻega o le Tusi Paia e ui ua 20 tausaga talu ona tuu. O le taimi foʻi lenā ua maliu loʻu tamā ma ua papatiso loʻu tinā o se Molimau a Ieova.

Na matuā telē le eseesega o loʻu olaga ma tapulaa maualuluga a le Tusi Paia. Ae i le taimi lea na ou maumauaʻi ia maua le filemu o le mafaufau lea o loo folafola mai i le Tusi Paia. Na ou taumafai malosi e pulea loʻu ita leaga ma le auala ou te tautala ai. Na ou filifili foʻi e lafoaʻi loʻu olaga lē mamā, lē toe taalo i taaloga faitupe, inu tele, ma lē toe gaoi mai i loʻu fale faigaluega.

Na matuā lē malamalama ē na matou faigaluega faatasi, pe aiseā ua oʻu manaʻo ai e fai ia suiga tetele. E tolu tausaga na latou taumafai ai pea ia ou toe foʻi i oʻu ala tuai. Afai ou te toe foʻi i tua e ala i le ita pe fai se upu masoā, e latou te feʻei ma fai mai: “Oi sole, ua toe foʻi a i tua le tama o Joe!” E ese loʻu tigā i na faamatalaga ma na ou lagona ai loʻu lē taulau.

Sa matuā tele ata matagā i le mea na ou faigaluega ai, e lē gata i masini faaonopōnei ae o ata lolomi foʻi. E masani ona fepasiaʻi solo e ē na matou faigaluega ata matagā i komepiuta, e pei foʻi ona ou faia muamua. Na ou taumafai e tuu lea masaniga leaga ae na taumafai ē na matou faigaluega e faia gaoioiga ou te toe foʻi ai i le olaga tuai. Na ou saʻili atu i lē na faia laʻu suʻesuʻega faale-Tusi Paia mo se fesoasoani ma ni faalaeiauga. Sa ia faalogologo mai ma le onosaʻi a o faamatala atu loʻu faafitauli. Sa ia faailoa mai iā te aʻu le auala ou te manumalo mai ai i lea masaniga, e ala i ni mau patino ma faalaeiau aʻu ia saʻili atu i le fesoasoani a Ieova e ala i le tatalo faatauanau.—Salamo 119:37.

I se tasi aso na ou taloina ai se fono ma ē na matou faigaluega faatasi. Ina ua potopoto mai na ou fai atu i ai e avatu se pia i ni tamāloloa se toʻalua na pulea e le ʻava malosi. Na feosofi mai le ʻaufaigaluega: “E lē mafai ona e faia lenā mea! O loo taumafai ia tamāloloa e tuu le pia!” Na ou faapea atu: “Ioe, e faapena foʻi aʻu.” Na amata mai ai i inā ona latou iloa loʻu tauivi e teena le matamata i ata matagā, ma na lē toe taumafai ai e faaoso aʻu e toe foʻi i ou ala tuai.

Mulimuli ane, o le fesoasoani a Ieova na mafai ai ona ou manumalo mai i le matamata i ata matagā. I le 1999, na ou papatiso ai o se Molimau a Ieova. Ou te lotofaafetai ona ua toe tuu mai se isi avanoa ou te ola ai i se olaga mamā ma fiafia.

O lea la ua ou malamalama i le māfuaaga e inosia ai e Ieova mea ia na ou fiafia i ai mo se taimi umi. I le avea o se Tamā alofa, na finagalo o ia e puipui aʻu mai i aafiaga leaga o ata matagā. Maʻeu le moni o upu i le Faataoto 3:5, 6! “Ia e faatuatua iā Ieova ma lou lotoatoa, ae aua le faalagolago i lou lava malamalama. Ia e manatua o ia i ou ala uma, ona ia faasaʻoina lea o ou ala.” O tapulaa o loo i le Tusi Paia e lē gata o se puipuiga ae e mautinoa e mafai ona taulau manuia ai.—Salamo 1:1-3.

Na ou lagona le lē mamā i le taimi ua mavae, a o lea ua ou faaaloalogia aʻu lava ma lagona le filemu o le mafaufau. Ua ou ola i se olaga mamā ma lagona le faamagaloga ma le fesoasoani a Ieova. I le 2000 na ou faaipoipo ai iā Karolin, o se tuafafine Kerisiano lalelei ma tausaafia, e alofa iā Ieova e pei foʻi o aʻu. E filemu lo ma aiga. E ma te lagona o se matuā faaeaga le avea ma vaega o se ʻauuso Kerisiano i le lalolagi aoao e mamā ma alolofa.