O LOO taufaavāvā atu Tavita i le solo a fitafita o loo agaʻi mai i le itu o loo alu atu i ai. Ua matuā fefefe fitafita a o tamomoʻe ese mai i le taua. Aiseā ua fefefe ai? Atonu e tele taimi o faalogo atu Tavita o loo latou taʻuina ma le fefefe se igoa. O le igoa o se tagata, o loo tū mai ma le taufaamataʻu i se fanua laugatasi, ma atonu o le tagata aupito i tino ese lea ua vaai i ai Tavita.

O ia lea o Koliata! Ua iloa nei e Tavita le māfuaaga o le fefefe o fitafita, ona e matuā tino ese lenei tagata. E tusa lava pe e lē faia lona ofutau, ae atonu e sili atu lona mamafa nai lo o ni tamāloloa lapopoʻa se toʻalua. Peitaʻi ua faaaupegaina lelei o ia, e matuā malosi, ma o se toa e tomai. Ua valaau mai e Koliata lana luʻi. Seʻi mafaufau i le leotele ma le paū o lona siʻuleo, a o faifai mai i le ʻautau a Isaraelu ma lo latou tupu o Saulo. Na ia luʻia so o se tagata e alu atu e la te tau, ina ia iloa ai po o ai le itu e manumalo.—1 Samuelu 17:4-10.

Ua matuā palaaai Isaraelu ma le tupu o Saulo. Ua iloa e Tavita ua silia ma le masina talu ona faifai mai Koliata! E leʻi maua lava se iʻuga o le taua a Filisitia ma Isaraelu, peitaʻi o loo faaauau ona faifai mai Koliata i aso taʻitasi. Ua matuā lē fiafia Tavita. Pagā se luma pe a mafaufau i le palaaai o le tupu o Isaraelu ma ana fitafita, ia e aofia ai uso matutua e toʻatolu o Tavita! I le mafaufau o Tavita, e lē gata ua faifai lenei tagata faapaupau o Koliata i le ʻautau a Isaraelu, ae o le itu e sili ai ona leaga, ua ia faifai i le Atua o Isaraelu, o Ieova! Peitaʻi, o le ā le mea e mafai ona fai e lenei talavou o Tavita? O le ā e tatou te aʻoaʻoina mai i le faatuatua o Tavita?—1 Samuelu 17:11-14.

Seʻi o tatou toe foʻi i se taimi i le tele o masina ua mavae. Ua amata ona taupogipogi a o leoleo e Tavita mamoe a lona tamā i se mauga e lata i Peteleema. O ia o se alii talavou aulelei, e mata manaia ma enaena lona paʻu. I taimi toʻafilemu, e na te faaaogā lona taimi avanoa e tātā ai lana kitara. Na iai se aafiaga iā te ia o le matagofie o foafoaga a le Atua. Na fiafia o ia e faaalu le tele o le taimi e aʻo ai lana musika, ma na faasolo ina faaleleia ai lona tomai o se fai musika. Peitaʻi, i se tasi afiafi, na aami faavave ai o ia e lona tamā e sau.—1 Samuelu 16:12.

E taunuu atu Tavita o loo talanoa lona tamā o Iese ma se toeaina matua. O ia lea o le perofeta faamaoni o Samuelu. Na auina atu o ia e Ieova e faauu se tasi o atalii o Iese e avea ma tupu e sosoo ai o Isaraelu! Ua uma ona vaai Samuelu i uso matutua e toʻafitu o Tavita, peitaʻi na faailoa manino atu e Ieova iā Samuelu e leai se tasi o i latou ua Ia filifilia. Ae ina ua taunuu Tavita, na fetalai atu Ieova iā Samuelu: “Faauu iā te ia, auā o ia lava lenā!” Na tatala e Samuelu le fagu nifo o loo iai se suāuu faapitoa, ma liligi i le ulu o Tavita i luma o ona uso matutua. Na suia le olaga o Tavita ina ua faauuina. Ua taʻua i le Tusi Paia: “Ua amata ai i lea aso ona osofia Tavita e le agaga o Ieova.”—1 Samuelu 16:1, 5-13.

Pe na amata ai ona faanaunau Tavita i le tulaga tautupu? E leai, na lotomalie o ia e faatali pea i le taʻitaʻiga a le agaga o Ieova, ina ia faailoa mai le taimi e na te tauave ai nisi tiute tāua. I lenā taimi,  na faaauau pea o ia i lana galuega faatauvaa o se leoleo mamoe. Na ia faia lenei galuega ma le lotoatoa ma le lototele. E lua taimi na lamatia ai le lafu a lona tamā, ona o se leona ma se pea. E leʻi tūtū mamao mai Tavita ma taumafai e tuli ese nei manufeʻai, nai lo o lea na ia fasimate nei manufeʻai ina ia puipuia ai mamoe a lona tamā. I na taimi uma e lua, e na o ia lava na fasimateina nei manufeʻai o le vao!—1 Samuelu 17:34-36; Isaia 31:4.

Na toe maua foʻi e Tavita se isi poloaʻiga. Na faalogo le tupu o Saulo i le talaaga o Tavita. E ui lava o loo avea Saulo ma toa malosi, ae o lona teena o faatonuga a Ieova ua ia lē toe maua ai Lona finagalo malie. Ua aveese e Ieova lona agaga mai iā Saulo. O lea, ua masani ai nei ona iai le agaga leaga iā te ia, ma ua oo ai lagona lotoa, masalosalo ma le sauā iā te ia. Pe a oo iā Saulo le agaga leaga, e na o le musika lava e mafai ona faatoʻafilemuina o ia. Na iloa e nisi auauna a Saulo le talaaga o Tavita o se fai musika ma o se tagata tau. O lea, na poloaʻia ai Tavita e alu atu i luma o le tupu, ma avea ai o ia o se fai musika i le maota o Saulo, ma o sē foʻi e aveina mea tau.—1 Samuelu 15:26-29; 16:14-23.

E tele lesona e mafai ona aʻoaʻoina mai i le faatuatua o Tavita i nei tulaga, aemaise lava i talavou. Mātau, na ia faaalu le tele o lona taimi avanoa e faia ai ni gaoioiga e vavalalata atu ai iā Ieova. Na ia onosaʻi foʻi e aʻoaʻoina ni tomai aogā e faigofie ona maua ai sana galuega. Ae e sili atu i lenā, na ia tali atu i le taʻitaʻiga a le agaga o Ieova. Maʻeu ni lesona tāua mo i tatou e faaaʻoaʻo i ai!—Failauga 12:1.

A o auauna Tavita iā Saulo, sa fai ma alu o ia i lona aiga ina ia leoleo mamoe, ma o nisi taimi e alu mo se taimi umi. O se tasi o na taimi, na auina atu ai e Iese Tavita ina ia alu e vaai po o ā mai ona uso matutua e toʻatolu o loo iai i le ʻautau a Saulo. Sa usitaʻi Tavita ma alu ma ave ni meaʻai ma ona uso, ma agaʻi atu i laufanua laugatasi o Ele. Ina ua taunuu, sa lē fiafia o ia ona o le mea o loo tupu i le taua e pei ona faamatalaina i le amataga o lenei mataupu. O loo faafesagaʻi itu taua e lua ma e va i le vanu.—1 Samuelu 17:1-3, 15-19.

E leʻi talia e Tavita lea tulaga. E faapefea i le itu taua a le Atua soifua o Ieova ona sosola ese ona o le fefefe i lenei tagata faapaupau? Na vaai Tavita i faifaiga a Koliata o se faifaiga tuusaʻo iā Ieova. O lea, na amata ai ona talanoa atu ma le naunau o ia i fitafita e faatatau i le faatoʻilaloina o Koliata. E leʻi umi ae logotala le uso aupito i matua o Tavita o Eliapo i tala a Tavita. Na ia matuā aʻoaʻia lona uso laʻitiiti ma tuuaʻia o ia e pau le māfuaaga na alu atu ai, o le fia matamata i le taua. Ae na tali atu Tavita: “O le ā laʻu mea ua fai? E na o loʻu fesili atu lava.” Ua faaauau ona ia tautala atu ma le mautinoa e faatatau i le faatoʻilaloina o Koliata, seʻia oo ina faailoa atu e se isi lea tala iā Saulo. Ua poloaʻia e le tupu Tavita ina ia alu atu i ona luma.—1 Samuelu 17:23-31.

Ua fai atu e Tavita i le tupu nei upu faalaeiau e faatatau iā Koliata: “Aua neʻi vaivai le loto o se tasi.” Ua lotovaivai Saulo ma lana ʻau ona o Koliata. Atonu na latou faia le mea sesē masani o le faatusatusa o i latou i lenā tagata tino ese, ma mafaufau e gata lo latou uumi i le fatafata o lea tagata. Ua latou manatu e vave ma faigofie ona faatoʻilalo  i latou e Koliata. Peitaʻi e leʻi mafaufau faapena Tavita. O le a tatou iloa mulimuli ane, e matuā ese le auala na mafaufau ai Tavita i le faafitauli. O lea na ia faapea atu ai, o le a alu e tau ma Koliata.—1 Samuelu 17:32.

Na tetee atu Saulo: “E lē mafai ona e alu e te tau ma lenei Filisitia, auā o oe o le tamaitiiti, a o ia o le tagata tau mai lava a o laʻitiiti.” Pe e moni e laʻitiiti Tavita? E leai, ae sa laʻitiiti tele e auai i se ʻautau ma atonu foʻi sa foliga laʻitiiti o ia. Peitaʻi ua lauiloa Tavita o sē e tau ma le lototele, ma o ia o se talavou i lea taimi.—1 Samuelu 16:18; 17:33.

Na faatalitonu e Tavita Saulo, e ala i le faamatala atu o le mea na tupu i le leona ma le pea. Pe na gugutu Tavita? E leai, na iloa e Tavita le pogai na mafai ona ia fasimate ai na manufeʻai. Ua faapea atu o ia: “O Ieova na laveaʻia aʻu mai i lima o le leona ma lima o le pea, o ia foʻi e na te laveaʻia aʻu mai i lima o lenei Filisitia.” Ua talitonu Saulo ma faapea atu: “Inā alu ia, tau ina ia faatasi Ieova iā te oe.”—1 Samuelu 17:37.

Pe e te manaʻo e pei lou faatuatua o le faatuatua o Tavita? Mātau, sa moni le faatuatua o Tavita. Na faatuatua o ia i lona Atua ona o mea na ia iloa ma mea na tutupu iā te ia. Na ia iloa o Ieova o Lē e alofa e puipuia ma tausia ana folafolaga. Afai e tatou te fia maua lea ituaiga o faatuatua, e manaʻomia ona faaauau ona tatou aʻoaʻo e faatatau i le Atua o le Tusi Paia. A o tatou ola e tusa ai ma mea ua tatou aʻoaʻoina, o le a tatou maua ai iʻuga lelei e faamalosia ai lo tatou faatuatua.—Eperu 11:1.

Na taumafai Saulo e faaofu Tavita i lona ofutau. E tai pei lenā ofutau o le ofutau o Koliata, o le vaega pito i luga o le ofutau e fai i fasi ʻapamemea, ma o le auala e faatulaga ai na fasi apamemea, e tai pei o le faatulagaina o una o iʻa. Na taumafai Tavita e gaoioi a o ofu le ofutau telē ma mamafa, ma ia iloa ai e mamafa tele mo ia. E leʻi toleniina o ia o se fitafita, o le pogai lea e lē masani ai i se ofutau, aemaise le ofutau o Saulo, o lē e sili ona umī i Isaraelu. (1 Samuelu 9:2) Ua ia aveese le ofutau ma filifili e fai ona ofu masani, o ofu o se leoleo mamoe ua faaauupegaina e puipui le lafu.—1 Samuelu 17:38-40.

Ua ave e Tavita lona tootoo leoleo mamoe, se ato i lona tauau ma se maatā. Atonu e faatauvaa le maatā ae o se auupega malosi. O lea maatā e iai se vaega e tuu ai le maa i le ogatotonu o ni fusi uumi e lua e fai mai i paʻu o manu, ma o se auupega e fetaui lelei mo se leoleo mamoe. Ua ia tuuina se maa i le maatā, ua faataavili saosaoa i luga aʻe o lona ulu, ona faamamulu lea o le isi fusi o le maatā, ma lele saʻo atu ai le maa i le mea e taulaʻi atu i ai. O le aogā tele o lenei auupega, na māfua ai ona faaaogā i nisi taimi e ʻautau le ʻau velo maatā.

Ua iai uma auupega a Tavita ma ua faanatinati atu e faafetaui lona fili. Seʻi o tatou faaata tatalo faatauanau a Tavita, a o punou ifo i le ālia ua pē e aumai ni tamaʻi maa lamolemole se lima. Ua tamoʻe atu nei o ia i le mea o loo fai ai le taua!

Ina ua iloa mai e Koliata lē e la te tau, o le ā lona manatu sa iai? Ua taʻua e faapea: “Ona ia ʻinoʻino ai lea iā te ia, auā o ia o se tamaitiiti ma e lanu enaena lona paʻu, e aulelei foʻi o ia.” Ua valaau mai Koliata: “Po o aʻu ea o se taʻifau ua e sau ai ma le tootoo?” E mautinoa na iloa mai e Koliata le tootoo a Tavita ae e leʻi iloa mai le maatā. Ua ia fetuu Tavita i igoa o atua o Filisitia, ma tautō e na te avatu le tino o lenei tagata inosia e fafaga ai manufelelei ma manu o le fanua.—1 Samuelu 17:41-44.

E oo mai lava i aso nei, o loo avea pea le tali a Tavita o se faamaoniga mataʻina o le faatuatua. Seʻi faaata le valaau atu a lenei tama talavou iā Koliata: “E te sau iā te aʻu ma le pelu, ma tao e lua, ae ou te alu atu iā te oe i le suafa o Ieova o ʻau, o le Atua o itu taua a Isaraelu, o lē ua e faifai i ai.” Na iloa e Tavita e faatauvaa le malosi o le tagata ma ana auupega. Na faaalia e Koliata le lē faaaloalo iā Ieova le Atua, ma o le a tali mai i ai Ieova. E pei ona taʻua e Tavita, “e iā Ieova le taua.”—1 Samuelu 17:45-47.

Na iloa lelei e Tavita le telē o le tino o Koliata ma ana auupega. Peitaʻi e leʻi faataga e Tavita na mea e faalotovaivaia ai o ia. E na te leʻi faia le mea sesē na faia e Saulo ma lana ʻautau. E leʻi faatusatusa e  Tavita o ia iā Koliata. Nai lo o lea, na ia faatusatusa Koliata ma Ieova. O le umī o Koliata e iva ma le ʻafa futu (2.9 mita), e umī mamao atu i isi tagata. Ae o le ā lona maualuga pe a faatusatusa atu i le Pule Silisili Ese o le aoao o mea? I le silafaga a le Atua, e pei lava Koliata o isi tagata e tai pei o ni iniseti. Ae ua sauni nei Ieova e faaumatia Koliata.

Ua tamoʻe atu Tavita e faafetaui lona fili, ua tago i lana ato e aumai se maa. Ua ia tuu le maa i lana maatā, ma faataavili saosaoa i luga aʻe o lona ulu seʻia oo ina faalogoina le taavili o le maatā. Ua agaʻi mai Koliata iā Tavita, atonu o loo mulimuli mai i tua o lē o loo aveina lana talita. O le umī tele o Koliata, na faigatā ai i le tagata sa aveina lana talita ona tuu i luga le talita ina ia puipuia ai le ulu o lenei tagata tino ese. Ae o le vaega tonu lenā o loo taulaʻi i ai Tavita.—1 Samuelu 17:41.

Ua faamamulu e Tavita le maa. Seʻi faata le leai o se mea na gasē a o lelea tonu atu le maa i le mea na taʻi i ai. Na faamautinoa e Ieova e tasi lava le maa e sasau e Tavita. Ua tau tonu lava le maa i le mea na taulaʻi i ai, ua goto i le muaulu o Koliata. Ua paʻū faō Koliata! Ua gatete lē na aveina lana talita ma sola ese. Ua savali atu Tavita, ua seʻi ese le pelu a Koliata, ma vavaeese ai le ulu o lenei tagata tino ese.—1 Samuelu 17:48-51.

Mulimuli ane, ua toe lototetele Saulo ma ana fitafita. Ua latou alalaga ma le lototetele ma tuliloa le ʻautau a Filisitia. Na taunuu le tala a Tavita na fai atu iā Koliata: ʻE tuuina mai lava e Ieova outou i o matou lima.’—1 Samuelu 17:47, 52, 53.

I aso nei, e lē o toe auai auauna a le Atua i ni taua. (Mataio 26:52) Peitaʻi, e ao ona tatou faaaʻoaʻo i le faatuatua o Tavita. I le pei o ia, e manaʻomia ona moni Ieova iā i tatou, ua na o ia le Atua e auauna ma matataʻu i ai. E iai taimi atonu ua matuā faigatā o tatou faafitauli, ae pe a fua atu i le mana e lē gata mai o Ieova, o se mea noa o tatou faafitauli. Pe afai e tatou te filifilia Ieova e avea ma o tatou Atua, ma faatuatua iā te ia e pei ona faia e Tavita, e leai la se luʻi po o se faafitauli e faavaivaia i tatou. E mafai e le mana o Ieova ona faatoʻilaloina so o se mea.