Ioe, e iai agelu leaga. O le ā lo latou amataga mai? Ia manatua na foafoaina e le Atua agelu ma tuu i ai le meaalofa o le saʻolotoga e filifili ai. Ae e leʻi umi talu ona foafoaina le uluaʻi tane ma le fafine o Atamu ma Eva, na faaaogāsesē ai e se tasi o foafoaga agaga lelei atoatoa le saʻolotoga e filifili ai, e ala i lona faatupuina o se fouvalega. Na taulau o ia i le uunaʻia o Atamu ma Eva e fouvale iā Ieova. (Kenese 3:1-7; Faaaliga 12:9) E lē o taʻua patino mai i le Tusi Paia le igoa o lenei foafoaga agaga, po o lona tulaga foʻi i le lagi a o leʻi fouvale. Ae ina ua fouvale, na talafeagai ai ona taʻua o ia i le Tusi Paia o Satani o lona uiga o “Lē e Tetee,” ma le Tiapolo o lona uiga o “Lē e Taufaaleaga.”​—Mataio 4:8-11.

E faanoanoa ona e leʻi gata ai i lenā taimi le fouvalega. I aso o Noa e leʻi iloa po o le ā le tele o agelu na “tuua le mea na latou nonofo ai,” i le aiga faalelagi o le Atua. Na ō mai i le lalolagi ma liutino i tagata ina ia ola i ni olaga lē mamā, o se mea e matuā ese mai i le māfuaaga na foafoaina ai i latou.​—Iuta 6; Kenese 6:1-4; 1 Peteru 3:19, 20.

O le ā na tupu i na agelu leaga? Ina ua aumaia e le Atua se Lolo e faamamāina ai le lalolagi, na toe liua e nei agelu o latou tino i tino agaga ma toe foʻi atu i lo latou nofoaga i le lagi. Peitaʻi e leʻi faatagaina e Ieova nei agelu agasala e toe foʻi atu i “lo latou tulaga na iai muamua.” Nai lo o lea na ia tuuina i latou i se tulaga e sili ona maulalo e taʻua o Tatara, o se mea e “matuā pogisa [faaleagaga].” (Iuta 6; 2 Peteru 2:4) O nei temoni ua tuu atu i latou e pulea e Satani le Tiapolo, le “pule o temoni,” o lē ʻe fai ma liua o ia lava e avea ma agelu o le malamalama.’​—Mataio 12:24; 2 Korinito 11:14.

Ua aʻoaʻoina i le Tusi Paia o le Malo faa-Mesia o le Atua, o se pulega faalelagi na faavaeina i le 1914. * Na sosoo mai ai i lenā mea tāua na tupu, le aveesea o Satani ma ana temoni mai i le lagi ae lafo mai i le lalolagi. O le sasao faaafi o le amioleaga ma amioga lē mamā i le lalolagi, o faamaoniga ia o a latou taaʻiga leaga ma mataʻutia.​—Faaaliga 12:9-12.

Peitaʻi o le faateteleina o amioga lē mamā ma le amioleaga, ua faamaonia ai ua lata le taimi e faamuta ai a latou pulega leaga. E lē o toe umi ona lē mafai lea ona toe faia se gaoioiga a nei foafoaga agaga leaga. Pe a māeʻa le pulega o le Malo o le Atua i le lalolagi parataiso mo le afe tausaga, ona toe tatala mai lea o nei foafoaga agaga leaga mo se taimi puupuu, ina ia tofotofoina tagata mo le taimi mulimuli. Mulimuli ane, ona faaumatia aʻiaʻi lea o i latou e faavavau.​—Mataio 25:41; Faaaliga 20:1-3, 7-10.