1, 2. (a) Ua faapefea ona faataunuuina le Isaia 60:22 i lenei taimi o le iʻuga? (e) O le ā le manaʻoga ua iai i le taimi lenei i le vaega faalelalolagi o le faalapotopotoga a Ieova?

“O LE a avea lē e toʻaitiiti ma toʻaafe, e avea foʻi lē e faatauvaa ma se atunuu malosi.” (Isa. 60:22) Ua faataunuuina na upu faavaloaga i nei aso e gata ai. A o faagasolo le tausaga faaleauaunaga i le 2015, e 8,220,105 tagata talaʻi o le Malo o loo faia so latou sao i le talaʻiga i le lalolagi aoao. O le vaega mulimuli o lenā valoaga e aafia ai Kerisiano taʻitoʻatasi uma, auā ua fetalai lo tatou Tamā o i le lagi: “O aʻu o Ieova ou te faavave ona fai i ona aso.” E tai pei i tatou o se pasese o loo i totonu o se taavale o loo faasolo ina saoasaoa, ua tatou mātauina le televave o le galuega o le faia o soo. O le ā la tatou tali atu i lenā faatelega? Po o tatou faia le mea sili i le avea ai ma tagata talaʻi maelega o le Malo? O le toʻatele o uso ma tuafāfine, o loo talosaga ina ia auauna o ni paeonia sauatoa po o ni paeonia lagolago. Pe e tatou te lē lagona le fiafia i le toʻatele ua tali mai i le valaaulia ina ia auauna i vaipanoa o loo telē ai le manaʻoga, po o le faia o se sao i isi vala o le auaunaga?

² Ae i le taimi e tasi, ua tatou vaaia foʻi le matuā manaʻomia o nisi ʻaugalulue. E pe ā ma le 2,000 faapotopotoga e faavaeina i tausaga taʻitasi. Pe afai e toʻalima toeaina e auauna i faapotopotoga  fou taʻitasi, atonu la e manaʻomia ni auauna o le faiva se 10,000 ina ia agavaa e auauna o ni toeaina i tausaga taʻitasi. O lona uiga, e tatau ona ausia e le faitau afe o uso agavaa manaʻomia ina ia avea ai o ni auauna o le faiva. E tusa foʻi po o i tatou o ni uso po o ni tuafāfine, ae o loo “tele pea mea e fai i le galuega a le Alii.”—1 Kori. 15:58.

3, 4. O ā ni sini faaleagaga e mafai ona e faatutūina?

³ Faitau le 1 Timoteo 3:1. O le veape Eleni ua faaliliuina “aapa atu,” e uiga atu i le aapa atu i se mea e faigatā ona e āu i ai. O le faaaogāina o lenei upu, na faamatilatila ai e le aposetolo o Paulo e manaʻomia ni taumafaiga ina ia agaʻigaʻi ai i luma faaleagaga. Seʻi manatu i se uso o loo mafaufau i lona lumanaʻi i le faapotopotoga. Atonu e lē o avea o ia i le taimi lenei o se auauna o le faiva, peitaʻi ua ia iloa e manaʻomia ona ia atiaʻe uiga faaleagaga. Muamua, e taumafai o ia ina ia agavaa e avea o se auauna o le faiva. Ae a o faagasolo taimi, e faamoemoe o ia e ausia agavaa faaleagaga e avea ai o se toeaina. I nei vala taʻitasi, e galue mamafa o ia e ausia agavaa faaleagaga ina ia taulimaina ai tiute tauave faaopoopo i le faapotopotoga.

⁴ I se tulaga talitutusa, e tatau i uso ma tuafāfine e faanaunau e auauna o ni paeonia, tagata Peteli, pe e tauofo mo le fausiaina o Maota mo Sauniga, ona fai a latou taumafaiga ina ia ausia ai o latou sini. Seʻi o tatou iloiloina le auala ua faalaeiauina ai e le Afioga a le Atua i tatou, ina ia agaʻigaʻi i luma i le tapuaʻiga moni.

5. E faapefea ona faaaogā e talavou lo latou malosi i le auaunaga o le Malo?

⁵ O loo maua e talavou le malosi e manaʻomia e faia ai le tele o mea i le auaunaga iā Ieova. (Faitau le Faataoto 20:29.) O nisi talavou o loo auauna i le Peteli, i le lomia ma le tuufaatasia o Tusi Paia ma lomiga faale-Tusi Paia. O le toʻatele o uso ma tuafāfine talavou o loo faia so latou sao i le fausiaina ma le tausiaina o Maota mo Sauniga. Pe a oo mai foʻi mala faalenatura, e fesoasoani atu foʻi talavou i Molimau ua lava le poto masani i le faia o galuega fesoasoani. E lē gata i lea, o le toʻatele o talavou paeonia o loo fesoasoani e faalauiloa atu le tala lelei i vaipanoa e tautatala i isi gagana.

6-8. (a) Na faapefea ona suia le vaaiga a se tasi o talavou i le auaunaga i le Atua, ma o le ā le iʻuga? (e) E faapefea ona tatou ʻtofo ma iloa ai e lelei Ieova’?

⁶ E mautinoa e te talisapaia le tāua o le auauna ma le lotoatoa i le Atua. Ae e faapefea pe afai e oo iā te oe faalogona sa oo i se uso e igoa iā Aaron? E ui na ia ola aʻe i se aiga Kerisiano, ae na ia taʻutino mai: “Sa leai soʻu fiafia i sauniga ma talaʻiga.” Sa ia manaʻo e maua le olioli i le auaunaga i le Atua, ae sa ia taumānatu po o le ā le māfuaaga e lē fiafia ai. O le ā sa ia faia?

⁷ Sa taumafai loa Aaron e tausisi i se faasologa faaleagaga e aofia ai le faitauina o le Tusi Paia, sauniuni ma faia ni sao i sauniga. Sa amata foʻi ona ia tatalo e lē aunoa. A o faalolotoina lona alofa mo Ieova, na amata ona ia agaʻigaʻi i luma faaleagaga. Talu mai lenā taimi, sa fiafia Aaron i le auaunaga paeonia, galulue ma isi i galuega fesoasoani i taimi o mala faalenatura, ma talaʻi atu i se atunuu ese. Ua auauna nei Aaron i le Peteli ma ua avea o ia ma toeaina. O le ā sona manatu i le ala sa ia uia? “Ua ou ʻtofo ma iloa ai e lelei Ieova.’ O lana faamanuia ua matuā lagona ai le lototalisapaia ma uunaʻia ai aʻu e faalautele atu laʻu auaunaga, ma maua ai le tele o faamanuiaga.”

⁸ Na pese le faisalamo: “O i latou e saʻili iā Ieova, e leai se mea lelei e matitiva ai i  latou.” (Faitau le Salamo 34:8-10.) E mautinoa, e faamalieina e Ieova manaʻoga o i latou e auauna ma le maelega iā te ia. Ua tatou ʻtofo’ moni ma “iloa ai e lelei Ieova” a o tatou faia le mea sili i lana auaunaga. Pe a tatou tapuaʻi atoatoa iā Ieova, o le a tatou maua le fiafia e lē mafaatusalia.

9, 10. Aiseā e tāua ai ona tatou “faatalitali ma le onosaʻi”?

⁹ Ia “faatalitali ma le onosaʻi” a o e taumafai e ausia ou sini. (Mika 7:7) E lagolagoina pea e Ieova ana auauna faamaoni, e ui e na te faatagaina i latou e faatalitali mo sina taimi mo faaeaga po o le suia o tulaga o mea. Na ia folafola iā Aperaamo o le a ia maua sona atalii, peitaʻi na manaʻomia ona faaalia e Aperaamo le faatuatua ma le onosaʻi. (Epe. 6:12-15) E ui na faatalitali Aperaamo mo le tele o tausaga i le fanau mai o Isaako, ae e leʻi lotovaivai ai o ia. Na faamalieina e Ieova lona manaʻo.—Kene. 15:3, 4; 21:5.

¹⁰ E lē faigofie le faatalitali. (Faata. 13:12) O le a tatou lagona le matuā lotovaivai pe a mafaufau pea i mea e leʻi taulau ai. Nai lo o lea, e atamai le faaaogā o o tatou taimi ina ia ausia ai nisi agavaa faaleagaga. Seʻi o tatou iloiloina ni vala se tolu e faia ai faapea.

11. O ā uiga faaleagaga e mafai ona tatou atiaʻe, ma aiseā e tāua ai na uiga?

¹¹ Ia atiaʻe uiga faaleagaga. O le faitauina o le Afioga a le Atua ma manatunatu loloto i ai, e mafai ona tatou atiaʻe ai le atamai, tofā mamao, faamasinotonu, poto, utaga loloto ma le mafaufau lelei. O na uiga e tāua tele mo i latou o loo taʻimua i le tapuaʻiga moni. (Faata. 1:1-4; Tito 1:7-9) A o tatou faitauina foʻi lomiga faale-Tusi Paia, e mafai ai ona  tatou malamalama i le silafaga a le Atua i le tele o mataupu. I aso taʻitasi e tatou te fesagaʻia ai luʻi i vala e pei o faafiafiaga, laʻei ma teuga, faasoasoaina o tupe, ma le maua o faiā lelei ma isi. O le faatatau o mea ua tatou aʻoaʻoina mai i le Tusi Paia, e mafai ona tatou faia ai filifiliga e faafiafiaina ai Ieova.

12. E faapefea ona faamaonia atu e sui o le faapotopotoga lo latou maufaatuatuaina?

¹² Ia avea ma sē e maufaatuatuaina. E tusa po o i tatou o ni uso po o ni tuafāfine, e manaʻomia ona tatou faia le mea sili e faataunuu ai o tatou tofiga faatiokarate. I le avea ai o Neemia ma kovana, na manaʻomia ona ia tofiaina nisi o tagata o le Atua e faataunuuina tiute tauave. O ai na ia tofiaina? Na ia faaaogāina i latou e matataʻu i le Atua, faamaoni, ma maufaatuatuaina. (Nee. 7:2; 13:12, 13) I aso nei, o le mea foʻi lea e “manaʻomia mai i auauna pule, o lo latou faamaoni.” (1 Kori. 4:2) E lē mafai ona natiaina galuega lelei.—Faitau le 1 Timoteo 5:25.

13. E faapefea ona e mulimuli i le faaaʻoaʻoga a Iosefa pe a feutagaʻi isi ma oe i se auala e lē tonu?

¹³ Ia faamamāina oe e Ieova. O le ā e mafai ona e faia pe a feutagaʻi isi ma oe i se auala e lē tonu? Atonu e mafai ona e vave faasaʻo le mataupu. Ae i nisi taimi, o lou taumafai malosi e taʻutonuina oe e faateteleina ai le faafitauli. E leʻi lelei le auala na feutagaʻi ai uso o Iosefa ma Iosefa, peitaʻi e na te leʻi teulotoina le ita. Mulimuli ane, sa tuuaʻia sesē o ia, ma sa faafalepuipuiina i se auala lē tonu. Peitaʻi, na ia faatagaina Ieova e taʻitaʻia o ia i na taimi faigatā. O le ā le iʻuga? Ua faapea mai le Salamo 105:19: “Na faamamāina ai o ia i le afioga a Ieova.” Na agavaa Iosefa i se tofiga faapitoa ina ua māeʻa na tofotofoga. (Kene. 41:37-44; 45:4-8) A o e feagai ma faafitauli faigatā, ia tatalo mo le atamai, gaoioi ma tautala i se auala agamalu, ma taulaʻi atu i le Atua mo le malosi. E mautinoa o le a fesoasoani Ieova iā te oe.—Faitau le 1 Peteru 5:10.

14, 15. (a) Aiseā e tatau ai ona tatou “uaʻi totoʻa” atu i le auala e tatou te talaʻi ai? (e) E faapefea ona fetuunaʻi le auala e te talaʻi ai? (Tagaʻi i le ata i luga aʻe o le matua, ma le pusa “ Pe E te Lotomalie e Faataʻitaʻi se Isi Auala?”)

¹⁴ Na uunaʻia e Paulo Timoteo: “Ia toʻaga pea e faitau i luma o tagata, ia apoapoaʻi atu ma aʻoaʻo atu seʻia ou alu atu. Ia uaʻi totoʻa iā te oe lava ma lau aʻoaʻo atu.” (1 Timo. 4:13, 16) Na avea Timoteo i le taimi lea ma tagata talaʻi tomai o le Malo. Ae na pau le auala na faaleleia ai lana faiva, pe afai e “uaʻi totoʻa” i lana aʻoaʻo atu. E leʻi manatu o ia o le a tali mai tagata i taimi uma i lana auala masani e aʻoaʻo ai. Na manaʻomia ona fetuunaʻi lana auala e aʻoaʻo ai e fua i manaʻoga o tagata, ina ia mafai ona pāʻia o latou loto. O le mea foʻi lenā e manaʻomia ona tatou faia i le avea ai ma ni tagata talaʻi o le Malo.

¹⁵ E masani ona tatou lē maua tagata i o latou aiga pe a talaʻi mai i lea fale i lea fale. I nisi vaipanoa e lē mafai ona oo atu i nisi o fale e mautotogi ai tagata. Pe afai e tupu le mea lenā i le tou oganuu, aiseā e te lē taumafai ai e faataʻitaʻi nisi auala e talaʻi ai le tala lelei?

16. E faapefea ona faamaonia le aogā o le molimau atu i nofoaga faitele?

¹⁶ O le molimau atu i nofoaga faitele o se tasi o auala sili e faalauiloa atu ai le tala lelei. O le toʻatele o Molimau ua taulau manuia ma maua iʻuga lelei i lenei galuega. E latou te faatulaga se taimi e talanoa ai i tagata i nofoaga e faatali ai pasi ma nofoaafi, o maketi, paka, ma isi nofoaga faitele. E mafai ona amata ma le faautauta e se Molimau se talanoaga ma se tagata e ala i le faia o se tala e faatatau i se tala fou, faamālō atu i lana fanau, pe fesili atu foʻi e faatatau i lana  galuega. A o faagasolo le talanoaga, e mafai e le tagata talaʻi ona faaaofia ai se manatu faale-Tusi Paia ma fesili ai mo sona manatu. O le tali mai a le tagata e masani ona faaauauina ai se talanoaga faale-Tusi Paia.

17, 18. (a) E faapefea ona e maua le toʻa e molimau atu ai i nofoaga faitele? (e) Aiseā e aogā ai iā te oe le agaga sa iā Tavita pe a e auai i le faiva?

¹⁷ Pe afai o se luʻi iā te oe le molimau atu i nofoaga faitele, aua le faavaivai. O Eddie o se paeonia i le aai o Niu Ioka, sa faatalatū o ia e talanoa atu i tagata i nofoaga faitele. Ae a o faagasolo taimi, na amata ona ia maua le toʻa. O le ā na fesoasoani iā te ia? Ua ia faapea mai: “I taimi o tapuaʻiga a le aiga, e ma te faia ai ma laʻu avā saʻiliʻiliga o tali o teteega ma manatu o tagata. E ma te fesili foʻi i isi Molimau mo ni o latou manatu.” I le taimi lenei, o le vaisū a Eli le molimau atu i nofoaga faitele.

¹⁸ A o faasolo ina e maua le tomai ma le toʻa e talaʻi atu ai le tala lelei, o le a mātaulia lou agaʻigaʻi i luma faaleagaga. (Faitau le 1 Timoteo 4:15.) E lē gata i lea, e mautinoa o le a e faamamaluina lo tatou Tamā i le lagi, e pei o Tavita o lē na pese: “Ou te vivii atu iā Ieova i taimi uma; e lē aunoa foʻi ona viiga i loʻu gutu. E mitamita loʻu loto iā Ieova; e faalogo ai o ē e agamalu ma olioli ai i latou.” (Sala. 34:1, 2) Atonu o lau faiva o le a aufaatasi mai ai nisi tagata agamalu i le tapuaʻiga moni.

19. Aiseā e tatau ai ona fiafia auauna faamaoni a Ieova e tusa po o ola i lalo o tulaga faigatā?

¹⁹ Na pese foʻi Tavita: “Ieova e, e faaneenee atu iā te oe au galuega uma, e vivii atu foʻi iā te oe ou tagata faamaoni. E talatalanoa i latou i le mamalu o lou malo, ma taʻutaʻu atu e uiga i lou mana tele, ina ia faailoa atu i le fanau a tagata ana galuega mamana ma le matagofie o le mamalu o lona malo.” (Sala. 145:10-12) O na upu ua faaleo mai ai faalogona o Molimau faamaoni uma a Ieova. Ae faapefea pe afai ua faatapulaa lau faiva ona o maʻi o le tino ma le tulaga matua? Ia manatua, o taimi uma e te faailoa atu ai le tala lelei i isi ma ē o loo tausia oe, o lenā ua faamamaluina le Atua i lau auaunaga paia. Pe afai ua faafalepuipui oe ona o lou faatuatua, atonu e mafai ona e talanoa e faatatau i le upu moni pe a talafeagai ma tulaga o mea, ma e faafiafiaina ai le finagalo o Ieova. (Faata. 27:11) O le tulaga foʻi lenā pe afai o loo e iai i se aiga e eseese tapuaʻiga, ae o loo e tausisi pea i lau faasologa faaleagaga. (1 Pete. 3:1-4) E oo lava i lalo o tulaga faigatā, e mafai ona e vivii atu iā Ieova ma agaʻigaʻi i luma faaleagaga.

20, 21. E faapefea ona avea oe ma faamanuiaga i isi, pe a tele galuega e te faia i le faalapotopotoga a Ieova?

²⁰ E mautinoa o le a faamanuia Ieova iā te oe pe a faaauau ona e agaʻigaʻi i luma faaleagaga. Atonu o le faia o ni suiga lāiti i lau faasologa ma lou olaga, e mafai ai ona faia sou sao tele i le faailoa atu o upu moni tautele a le Atua iā i latou o loo manaʻomia le faamoemoe. E lē gata i lea, o lou agaʻigaʻi i luma faaleagaga ma lou ola faataulaga, e mafai ona maua ai e ou uso talitonu le tele o faamanuiaga. O au taumafaiga lotomaulalo foʻi i le faapotopotoga, o le a latou faaalia atu ai iā te oe le alofa ma le lototalisapaia, ma o le a lagolagoina oe e i latou e alolofa iā Ieova.

²¹ E tusa po ua tele tausaga pe na o ni nai masina foʻi talu ona tatou olioli i le auaunaga iā Ieova, e mafai uma ona tatou agaʻigaʻi i luma i lana tapuaʻiga. Ae e faapefea ona fesoasoani Kerisiano matutua faaleagaga i ē e fou ina ia agaʻigaʻi i luma faaleagaga? O le mataupu lenā o le a iloiloina i le suʻesuʻega o loo mulimuli mai.