ʻE LĒ faatusalia taua i aso ua teʻa i tulaga faigatā ua tulaʻi mai i Europa i le taimi nei.’ O le auala lenā na faamatala ai e le Watch Tower o Setema 1, 1915, le taua muamua a le lalolagi lea na aafia ai le pe ā ma le 30 atunuu. Talu ai o nei fetauaʻiga, na taʻua ai e le Watch Tower: “Ua faafaigatā le auaunaga [o le Malo], aemaise lava i Siamani ma Falani.”

A o tulaʻi mai lenei taua i le lalolagi aoao, e leʻi malamalama atoatoa Tagata Aʻoga o le Tusi Paia e faatatau i le solitū faa-Kerisiano. Peitaʻi, na latou maumauaʻi e faalauiloa atu le tala lelei. O le manaʻo o Wilhelm Hildebrandt e faia sona sao i le galuega o le Malo, na ia otaina ai kopi o le sāvali The Bible Students Monthly i le faa-Falani. E leʻi sau o ia i Falani o se tagata talaʻi faataimi atoa (colporteur), ae o se fitafita Siamani. O ia o se fili i lana togiga, peitaʻi sa ia faailoa le feʻau o le filemu i tagata Falani na ia feiloaʻi i ai.

O tusi na lomia i le Watch Tower, na atagia mai ai o le toʻatele o Tagata Aʻoga o le Tusi Paia mai i Siamani, na latou faanaunau e faalauiloa atu le tala lelei o le Malo a o auai i vaegaʻau. Na lipotia e le uso o Lemke lea sa auai i le vaega o fuāvaa tau le fiafia o isi tagata e toʻalima sa iai i la latou vaega. Na ia tusi mai: “E ui sa ou iai i luga o lenei vaa, ae na fua mai lava laʻu auaunaga e viia ai Ieova.”

Na iai Georg Kayser i muaʻau o le taua o se fitafita, ae na toe foʻi mai ua avea ma auauna a le Atua moni. Na faapefea ona tupu lenā mea? Sa ia faitau i se lomiga a Tagata Aʻoga o le Tusi Paia. Na ia talia ma le lotoatoa upu moni o le Malo, ma lē toe tau ai. Peitaʻi, na faaauau lava ona ia faia isi galuega i le vaegaʻau. Na ia auauna ma le maelega o se paeonia mo le tele o tausaga ina ua māeʻa le taua.

E ui e leʻi malamalama atoatoa Tagata Aʻoga o le Tusi Paia e faatatau i le solitū, ae na matuā eseese o latou manatu ma gaoioiga mai i ē na lagolagoina le taua. A o lagolagoina e taʻitaʻi faapolotiki ma taʻitaʻi lotu le taua, sa tutū Tagata Aʻoga o le Tusi Paia mo le “Perenise o le Filemu.” (Isa. 9:6) E ui e  leʻi matuā solitū atoatoa nisi Kerisiano, peitaʻi e tutusa o latou faalogona ma le manatu na taʻua e Konrad Mörtter, o se Tagata Aʻoga o le Tusi Paia: “Na ou iloa manino mai i le Tusi Paia e lē tatau i se Kerisiano ona fasiotia se tagata.”—Eso. 20:13. *

E leʻi iai se tulafono a Siamani e faataga ai tagata e lē auai i vaegaʻau ona o o latou lotofuatiaifo. E ui i lea, e silia i le 20 Tagata Aʻoga o le Tusi Paia na teena lo latou faia o tiute faavaegāʻau. O nisi o i latou na manatu i ai ua faalētonu mafaufau e pei o Gustav Kujath, lea na tuuina i le falemaʻi mo tagata e faalētonu mafaufau, ma na tuiina ai vailaau. Na faafalepuipui foʻi Hans Hölterhoff ona o le teena o galuega uma e fesootaʻi i le taua. Na saisai e leoleo ona lima agaʻi i lona tino atoa seʻia oo ina pepē ona lima, ma lē toe lagona ai se mea. E leʻi mafai ona suia ai lona mafaufau, o lea na faafefe ai o ia e leoleo e ala i le faafoliga o le a fasiotia o ia. E ui i lea, na tumau faamaoni Hans a o faagasolo le taua.

O nisi uso na latou teena le tauaveina o meatau, ae na latou talosaga e faia isi galuega i le vaegaʻau. * O le mea lenā na faia e Johannes Rauthe, ma na auina atu o ia e galue i auala o nofoaafi. Na tofia Konrad Mörtter e galue i le falemaʻi, ae na galue Reinhold Weber o se tausimaʻi. Na faafetai August Krafzig ona e leʻi tau i le taua, ae na tofia o ia e vaaia ato. O nei Tagata Aʻoga o le Tusi Paia ma isi e pei o i latou, na maumauaʻi e auauna iā Ieova e faavae i lo latou malamalamaga e faatatau i le alofa iā Ieova ma le faamaoni iā te ia.

Na mātaʻitū e le malo Tagata Aʻoga o le Tusi Paia, ona o a latou gaoioiga i le taimi o le taua. I tausaga na mulimuli ane ai, na feagai ai Tagata Aʻoga o le Tusi Paia i Siamani ma le faitau afe o moliaga ona o la latou galuega talaʻi. O lea, na faatū ai e le ofisa o le lālā i Siamani se matagaluega tau tulafono i le Peteli i Magdeburg, ina ia fesoasoani iā i latou.

Na faasolosolo ona suia le malamalamaga o Molimau a Ieova e faatatau i le solitū faa-Kerisiano. I le taimi o le taua lona lua a le lalolagi, na latou solitū ai e ala i le matuā vavaeese mai i vaegaʻau. O lea na vaai ai tagata iā i latou o ni fili o Siamani, ma na matuā sauāina i latou. O le vala lenā o le a faamatala i faasologa o le mataupu “Mea Iloga o lo Tatou Talafaasolopito.”—Mea iloga o lo tatou talafaasolopito i Europa Tutotonu.