1. O ā aogā o le talanoa i auala na tatou maua ai “le upu moni”?

 “NA FAAPEFEA ona e maua le upu moni?” E mautinoa e tele taimi na e taliina ai lenā fesili. O se tasi lenā o fesili e muamua lava fesiligia ai oe e se uso po o se tuafafine, pe a manaʻo e iloa lelei oe. E tatou te fiafia e iloa le auala na aʻoaʻoina ai e o tatou uso ma tuafāfine Ieova ma alolofa iā te ia, ma e tatou te fiafia e faailoa atu iā i latou le māfuaaga e tatou te fiafia ai i le upu moni. (Roma 1:11) O le faia faapea, ua faamanatu mai ai iā i tatou le tāua o le upu moni. Ua tatou maumauaʻi ai foʻi e ʻsavavali pea i le upu moni,’ pe ola i se auala e maua ai faamanuiaga a Ieova ma lona finagalo malie.​—3 Ioa. 4.

2. O le ā o le a tatou talanoaina i lenei suʻesuʻega?

² O le a talanoaina i lenei suʻesuʻega nisi o māfuaaga e tatou te fiafia ai i le upu moni, ma le auala e faaalia ai pea lo tatou fiafia mo lenei meaalofa tautele. E mautinoa o le a faalolotoina e lenei suʻesuʻega lou talisapaia o mea ua faia e Ieova, ina ia tosina mai ai i tatou i le upu moni. (Ioa. 6:44) O le a faamalosia ai foʻi lo tatou faanaunauga e faasoa atu i isi le upu moni.

3. O le ā le māfuaaga e sili ona tāua e tatou te fiafia ai i le upu moni?

³ E tele māfuaaga e tatou te fiafia ai i le upu moni. O le māfuaaga e sili ona tāua, ona e tatou te alolofa iā Ieova le Atua,  le Puna o le upu moni. Ua tatou iloa mai i lana Afioga le Tusi Paia, e lē gata o ia o Lē e ona le malosi uma lava na faia le lagi ma le lalolagi, ae o ia foʻi o lo tatou Tamā alofa i le lagi e alofa faapelepele iā i tatou. (1 Pete. 5:7) Ua tatou iloa o lo tatou Atua “e alofa mutimutivale ma alofa fua, e telegese lona toʻasā ae e tele lona alofa faamaoni ma fai mea moni.” (Eso. 34:6) E fiafia foʻi i le faamasinogatonu. (Isa. 61:8) E tigā lona finagalo pe a silasila mai o loo tatou mafatia, ma e nofosauni ma naunau o ia e faamuta mafatiaga uma, i lana taimi atofaina. (Iere. 29:11) E tatou te tulimataʻia lenā taimi. E lētioa a tatou alolofa tele iā Ieova!

4-5. Aiseā na faatusa ai e le aposetolo o Paulo lo tatou faamoemoe i se taula?

⁴ O le ā le isi māfuaaga e tatou te fiafia ai i le upu moni? E tatou te maua ai le tele o aogā. O se faataʻitaʻiga, e aofia i upu moni o le Tusi Paia lo tatou faamoemoe mo le lumanaʻi. Ina ia faataʻitaʻi le tāua o lenā faamoemoe, na tusi le aposetolo o Paulo: “O lenei faamoemoe ua iā i tatou, ua avea o se taula i o tatou ola, e mautinoa ma mausalī.” (Epe. 6:19) E pei lava ona taofia e se taula se vaa, e faapena foʻi ona faatumauina i tatou e le faamoemoe o loo i le Tusi Paia, pe a feagai ma faigatā i le olaga.

⁵ I lenei mau, na talanoa ai Paulo e faatatau i le faamoemoe o Kerisiano faauuina, o ē o le a ola i le lagi. Ae e faatatau atu foʻi ana upu i Kerisiano o ē e faamoemoe e ola e faavavau i le parataiso i le lalolagi. (Ioa. 3:16) O lea la, o le aʻoaʻoina e faatatau i le faamoemoe o le ola e faavavau, ua tatou maua ai se fuafuaga aogā o o tatou olaga.

6-7. Na faapefea ona aogā iā Yvonne le aʻoaʻoina o le upu moni e faatatau i le lumanaʻi?

⁶ Seʻi mātau se mea na tupu i se tuafafine e igoa iā Yvonne. E leʻi ola aʻe o ia i le upu moni, ma a o laʻitiiti na fefe i le oti. E lē galo iā te ia se fuaiupu na faitau ai i se tusi e faapea: “E iai le aso o le a tatou feoti ai.” Na ia faapea atili mai: “O lenā faaupuga e leʻi mafai ai ona ou moe i le pō, ona sa ou mafaufau pea i le lumanaʻi. Na ou mafaufau ʻe tatau ona iai ni mea lelei e tutupu i le olaga.’ ʻPe e iai se fuafuaga aogā o loʻu olaga?’ Ou te leʻi fia oti!”

⁷ Mulimuli ane ina ua avea Yvonne ma talavou, na ia feiloaʻi ai ma Molimau a Ieova. Na ia faapea mai: “Na amata ona ou talitonu i le faamoemoe e mafai ona ou ola e faavavau i se lalolagi parataiso.” Na faapefea ona aogā i lo tatou tuafafine le aʻoaʻoina o le upu moni? Na ia toe faapea mai: “Ua mafai ona ou moe lelei i le pō, ona ou te lē o toe popole i le lumanaʻi ma le oti.” E mautinoa e tāua tele le upu moni iā Yvonne, ma na matuā faamalieina o ia i le faasoa atu i isi o lona faamoemoe i le lumanaʻi.​—1 Timo. 4:16.

8-9. (a) I se tasi o talafaatusa a Iesu, o le ā le tāua i se tamāloa o le oloa na ia mauaina? (e) O le ā le tāua o le upu moni iā te oe?

⁸ E aofia foʻi i upu moni o le Tusi Paia le tala lelei e uiga i le Malo o le Atua. Na faatusaina e Iesu le upu moni o le Malo i se oloa ua natia. Na fetalai Iesu i le Mataio 13:44: “Ua faatusaina le malo o le lagi i le oloa ua natia i le fanua, na maua e se tagata ma nanā ai; ae ona o lona olioli na alu ai loa o ia ma faatau atu ana mea uma, ma faatau mai ai lenā fanua.” Ia mātau, e leʻi saʻilia e le tamāloa le oloa. Ae ina ua ia mauaina, na ia faia faataulaga e tele ina ia avea ai ma ana meatotino. O le mea moni, na ia faatauina atu mea uma na iā te ia. Aiseā? Na ia iloa le tāua tele o lenā oloa, lea e sili atu nai lo o so o se mea lava na ia faataulagaina.

⁹ Pe e faapena ou faalogona e faatatau i le upu moni? O le mea mautinoa lenā! E tatou te  iloa e leai se mea e ofo mai e lenei lalolagi, e mafai ona faatusatusa i ai le olioli e tatou te maua mai i le auaunaga iā Ieova i le taimi lenei, ma le faamoemoe o le ola e faavavau i le lumanaʻi i le pulega o le Malo. E sili atu ona tāua le faaeaga ua tatou maua o le iai o se faiā vavalalata ma Ieova, nai lo o so o se faataulaga e tatou te faia. O le mea sili e tatou te olioli ai, o le ʻmatuā faafiafiaina o ia.’​—Kolo. 1:10.

10-11. O le ā na uunaʻia ai Michael e suia lona olaga?

¹⁰ E toʻatele i tatou ua faia faataulaga tetele ina ia maua ai le finagalo malie o Ieova. O nisi ua tuua galuega e lelei totogi. O nisi ua lē toe saʻilia le tele o le ʻoa. A o nisi ua suia atoatoa le auala e ola ai, ina ua latou aʻoaʻoina e faatatau iā Ieova. O le mea lenā na faia e Michael. E leʻi ola aʻe o ia i le upu moni. Na toleni o ia i le karate a o talavou. Na ia faapea mai: “Na ou naunau e faamalositino ina ia faatumauina ai pea loʻu malosi. E iai taimi ou te manatu ai e leai se isi e mafai ona faatoʻilaloina aʻu.” Ae ina ua amata ona ia suʻesuʻeina le Tusi Paia, na ia iloa ai le silafaga a Ieova i faiga sauā. (Sala. 11:5) Na ia faapea mai e faatatau i le ulugalii na latou suʻesuʻe: “E la te leʻi faapea mai e tatau ona tuu le karate, ae na faaauau pea ona la aʻoaʻoina aʻu i upu moni o le Tusi Paia.”

¹¹ O le tele o mea na aʻoaʻoina e Michael e faatatau iā Ieova, o le tele foʻi lenā o le tuputupu aʻe o lona alofa mo Ia. Na matuā pāʻia lona loto i le alofa mutimutivale o Ieova i ona tagata tapuaʻi. Na oo ina iloa e Michael, e manaʻomia ona ia faia ni suiga. Na ia faapea mai: “Na ou iloa o le tuu o le karate, o se filifiliga lea na sili ona faigatā ona ou faia. Ae na ou iloa foʻi, o le a faafiafiaina ai le finagalo o Ieova, ma na ou mautinoa e sili atu le auauna iā te ia nai lo o so o se mea na ou faataulagaina.” Na talisapaia e Michael le tāua o le upu moni, ma na uunaʻia ai o ia e faia suiga tetele i lona olaga.​—Iako. 1:25.

12-13. Na faapefea ona fesoasoani upu moni o le Tusi Paia iā Mayli?

¹² Ua faamatilatila i le Tusi Paia le tāua o le upu moni, e ala i le faatusaina i se molī o loo susulu atu i le pogisa. (Sala. 119:105; Efe. 5:8) Na matuā talisapaia e Mayli mai i Azerbaijan le tāua o le upu moni o loo i le Afioga a le Atua. Na ola aʻe o ia i se aiga e eseese tapuaʻiga a ona mātua. O lona tamā o se Musalimi, ae o lona tinā e lotu Iutaia. Na ia faapea mai: “E ui ina ou talitonu e iai moni le Atua, ae e iai mataupu sa faigatā ona ou malamalama i ai. Sa ou taumānatu: ʻAiseā na faia ai e le Atua tagata, ma o le ā le aogā o le mafatia o se tasi i lona olaga atoa, ae e uma ane e susunu e faavavau i le afi i seoli?’ Ua faapea mai tagata e tutupu mea uma ona o le finagalo o le Atua, o lea na ou taumānatu ai: ʻPe e faapogaia e le Atua faafitauli o tagata, ona silasila mai lea ma le fiafia a o mafatia tagata?’”

¹³ Na faaauau pea ona saʻili Mayli mo tali o ana fesili. O lea na ia talia ai se suʻesuʻega faale-Tusi Paia, ma avea loa ma Molimau a Ieova. Na ia faapea mai: “Na suia atoa loʻu manatu e faatatau i le olaga, ona o aʻoaʻoga maufaatuatuaina i le Tusi Paia. Ua ou lagona le toʻafilemu ona o aʻoaʻoga mai i le Afioga a le Atua.” I le pei o Mayli, ia tatou vivii uma atu iā Ieova “o lē na valaauina [i tatou] mai i le pōuliuli i lona malamalama ofoofogia.”​—1 Pete. 2:9.

14. E faapefea ona faateleina lo tatou fiafia i le upu moni? (Tagaʻi foʻi i le pusa “ Nisi Faatusatusaga.”)

¹⁴ O nisi na o faaaʻoaʻoga e faataʻitaʻi mai ai le tāua o le upu moni. E mautinoa e tele isi faaaʻoaʻoga o loo e manatua. Aiseā e lē faia ai ni au lava saʻiliʻiliga i nisi māfuaaga e tatau  ai ona tatou fiafia i le upu moni? O le tele o lo tatou fiafia i le upu moni, o le tele foʻi lenā o lo tatou saʻilia o auala e faaalia ai lo tatou fiafia i ai.

15. O le ā se tasi o auala e faaalia ai lo tatou fiafia i le upu moni?

¹⁵ E tatou te faaalia le fiafia i le upu moni, e ala i le suʻesuʻe e lē aunoa i le Tusi Paia ma lomiga faale-Tusi Paia. Po o le ā lava le umi talu ona tatou iai i le upu moni, ae e tele pea mea e ao ona tatou aʻoaʻoina. O le manatu lenei na taʻua i le uluaʻi kopi o lenei mekasini: “O le upu moni, ua pei o se tamaʻi fugālaau o loo iai i le vaomatua, lea ua siʻosiʻomia ma ua toetoe lava tineia ona o le tutupu tetele aʻe o vao o aʻoaʻoga sesē. Afai e te fia suʻeina, e tatau la ona e matuā mataalia. . . . Afai e te fia mauaina, e tatau ona e matuā galue ma le punouaʻi. Aua le maliegofie i sina fugālaau e tasi po o ni nai vala o le upu moni. . . . Ia aoaoina pea, ia saʻiliʻili atu pea.” Ioe, o le suʻesuʻeina o le Tusi Paia o se galuega fitā, ae o se gaoioiga e matuā tāua lava.

16. O le ā se auala aogā o loo e faaaogāina e suʻesuʻe ai le Tusi Paia? (Faataoto 2:4-6)

¹⁶ E lē o i tatou uma e fiafia e faitau ma suʻesuʻe.  Ae ua valaaulia i tatou e Ieova e “saʻili pea” ma ʻsuʻesuʻe pea,’ ina ia faalolotoina ai lo tatou malamalama i le upu moni. (Faitau le Faataoto 2:4-6.) E tatou te maua pea aogā, pe a faia na taumafaiga. Na taʻua e Corey, pe a fai lana faitauga Tusi Paia e uaʻi atu i se fuaiupu e tasi i le taimi e tasi. Na ia faapea mai: “Ou te faitauina faaopoopoga pito i lalo, suʻe mau faasino, ma faia nisi saʻiliʻiliga. . . . E tele mea ou te aʻoaʻoina mai i lenā auala.” Po o le ā lava le auala e tatou te faaaogāina, ae e faaalia lo tatou talisapaia o le upu moni, pe a faaalu se taimi ma fai taumafaiga e suʻesuʻe ai.​—Sala. 1:1-3.

17. O le ā e uiga i ai le ola e ōgatusa ma le upu moni? (Iakopo 1:25)

¹⁷ O le mea moni, ua tatou iloa e lē lava le tau ina suʻesuʻeina o le upu moni. O lea, ina ia maua atoatoa aogā, e tatau ona tatou ola e ōgatusa ma le upu moni, po o le faatatau o mea ua tatou aʻoaʻoina i o tatou olaga. E na o le pau lenā o le auala e aumaia ai e le upu moni le fiafia moni iā i tatou. (Faitau le Iakopo 1:25.) E faapefea ona faamautinoa o loo tatou ola e ōgatusa ma le upu moni? Na fautuaina e se uso le iloilo e le tagata o ia lava, ina ia iloa ai vala o le olaga o loo tatou agaʻigaʻi ai i luma ma vala e manaʻomia ona faaleleia. Na faamatala e le aposetolo o Paulo lenā manatu e faapea: “Po o le ā lava le tele o lo tatou agaʻigaʻi i luma, ae seʻi o tatou faaauau ona savavali ma le maopoopo e tusa ma lea lava masani.”​—Fili. 3:16.

18. Aiseā e tatou te faia ai le mea sili e ʻsavavali ai pea i le upu moni’?

¹⁸ Seʻi manatu i aogā o lo tatou faia o le mea sili e ʻsavavali ai pea i le upu moni’! E lē gata e faaleleia ai o tatou lava olaga, ae e faafiafiaina ai foʻi Ieova ma o tatou uso ma tuafāfine. (Faata. 27:11; 3 Ioa. 4) O māfuaaga sili na e tatou te fiafia ai i le upu moni, ma ola ai e ōgatusa ma le upu moni.