SUʻESUʻEGA 33
O Loo Leoleoina e Ieova Ona Tagata
“O fofoga o Ieova e faasaga iā i latou e matataʻu iā te ia.”—SALA. 33:18.
PESE 4 “O Ieova, o Loʻu Leoleo Mamoe”
AOTELEGA *
1. Aiseā na talosaga atu ai Iesu iā Ieova ina ia leoleo i ona soo?
I LE pō a o lumanaʻi le maliu o Iesu, na ia talosaga faapitoa atu ai iā Ieova lona Tamā i le lagi, ina ia leoleo i ona soo. (Ioa. 17:15, 20) O le mea moni, e leoleoina, tausia, ma puipuia pea e Ieova ona tagata. Peitaʻi, na silafia e Iesu o le a feagai ona soo ma teteega ogaoga mai iā Satani. Na ia silafia foʻi e latou te manaʻomia le fesoasoani a Ieova, ina ia tetee ai i osofaʻiga a le Tiapolo.
2. I le Salamo 33:18-20, aiseā e lē tatau ai ona tatou fefefe i faigatā o loo tatou fesagaʻia?
2 Ua fesagaʻia e Kerisiano moni i aso nei faafitauli mai i lenei faiga o mea a le lalolagi a Satani. O loo tatou fesagaʻia faigatā e faavaivaia ai i tatou, ma tofotofoina ai lo tatou faamaoni iā Ieova. Ae o le a tatou aʻoaʻoina i lenei mataupu, e leai se mea e tatou te fefefe ai. O loo leoleoina i tatou e Ieova. E na te silafia luʻi o loo tatou fesagaʻia, ma e nofosauni o ia e fesoasoani mai ina ia mafai ona tatou taulimaina na luʻi. Seʻi o tatou iloiloina ni faaaʻoaʻoga faale-Tusi Paia se lua, e iloa ai le auala o loo leoleoina ai e Ieova i “latou e matataʻu iā te ia.”—Faitau le Salamo 33:18-20.
PE A TATOU LAGONA LE TUUA TOʻATASI
3. O ā taimi e tatou te ono lagona ai le tuua toʻatasi?
3 E ui o i tatou o se vaega o le aiga toʻatele o tagata tapuaʻi o Ieova, ae e iai taimi e tatou te lagona ai le tuua toʻatasi. O se faataʻitaʻiga, atonu e lagona e talavou le tuua toʻatasi pe a faamatala atu o latou talitonuga i luma o se vasega i le aʻoga, pe siitia i se faapotopotoga fou. Atonu o nisi e lagona le faanoanoa pe tauivi ma faalogona lē lelei, ma manatu ai e na o i latou o loo tauivi ma na faalogona. E tatou te ono faatalatū e talanoa i isi e uiga i o tatou faalogona, ona e tatou te popole neʻi lē malamalama iā i tatou. E iai taimi e tatou te ono manatu ai, e leai se tasi e manatu mamafa mai. Po o le ā lava le māfuaaga e tatou te lagona ai le tuua toʻatasi, ae o na faalogona e tatou te ono lagona ai le leai o se faamoemoe ma le atuatuvale. Aiseā e lē finagalo ai Ieova e oo iā i tatou na faalogona?
4. Aiseā na faapea mai ai le perofeta o Elia: “E na o aʻu lava ua totoe”?
4 Seʻi manatu i le faaaʻoaʻoga a le tane faamaoni o Elia. E silia ma le 40 aso na fesolasolataʻi ai, ona o le fefe neʻi fasiotia o ia e Iesepela. (1 Tu. 19:1-9) Mulimuli ane a o iai na o ia i se ana, na ia faapea atu ai iā Ieova: “E na o aʻu lava [le perofeta] ua totoe.” (1 Tu. 19:10) Peitaʻi, e toʻa 100 isi perofeta na faasaoina e Opetaia. (1 Tu. 18:7, 13) Aiseā na lagona ai e Elia le tuua toʻatasi? Pe na manatu o ia ua maliliu uma perofeta na faasaoina e Opetaia? Pe na ia lagona le tuua toʻatasi ona e leʻi auai atu isi e latou te tapuaʻi faatasi iā Ieova, ina ua uma ona faamaonia e Ieova i le mauga o Karamelu o ia o le Atua moni? Pe na ia mafaufau e leai se tasi e malamalama i le tulaga lamatia na iai o ia pe manatu mamafa foʻi iā te ia? E lē o faamatalaina auʻiliʻili mai i le Tusi Paia faalogona o Elia. Peitaʻi, e tatou te mautinoa na malamalama Ieova i le māfuaaga na lagona ai e Elia le tuua toʻatasi, ma na ia silafia lelei le auala e fesoasoani ai iā te ia.
Pe a tatou lagona le tuua toʻatasi, o ā lesona faalaeiau e tatou te aʻoaʻoina mai i le auala na fesoasoani ai Ieova iā Elia? (Tagaʻi i le palakalafa e 5-6)
5. Na faapefea ona faamautinoa mai e Ieova iā Elia e leʻi tuua na o ia?
5 E tele auala na fesoasoani ai Ieova iā Elia. Na ia faalaeiauina Elia e talanoa atu iā te ia. E faalua ona ia fesili mai iā Elia: “O le ā lau mea lenā e fai i inā?” (1 Tu. 19:9, 13) I na taimi e lua, na faafofoga mai Ieova a o sasaa atu e Elia lona loto iā te ia. Na tali Ieova e ala i le faaali mai iā Elia o le malosi o Lona mana, ma o loo faatasi ma ia. Na faamautinoa mai foʻi e Ieova iā Elia, e toʻatele isi tagata o loo tapuaʻi atu iā te Ia. (1 Tu. 19:11, 12, 18) E lē taumatea na lagona e Elia le faafouina ina ua sasaa atu lona loto iā Ieova, ma faalogo atu i Lana tali mai. Na tuuina mai e Ieova iā Elia ni tofiga tāua. Na ia fetalai mai iā Elia e faauu Asaeli e fai ma tupu o Suria, faauu Ieʻu e fai ma tupu o Isaraelu, ma faauuina Elisaia e fai ma perofeta. (1 Tu. 19:15, 16) Na fesoasoani Ieova iā Elia ina ia taulaʻi atu i mea lelei, e ala i le tuuina i ai o na tofiga. Na faaaogā foʻi e Ieova Elisaia e avea ma uō vavalalata a Elia. E faapefea ona e maua le fesoasoani a Ieova pe a e lagona le tuua toʻatasi?
6. O ā mea e mafai ona e tatalo ai pe a e lagona le tuua toʻatasi? (Salamo 62:8)
6 Ua valaaulia oe e Ieova e tatalo atu iā te ia. E na te silafia faafitauli o loo e fesagaʻia, ma ua ia faamautinoa mai o le a ia faafofoga mai i au tatalo i so o se taimi. (1 Tesa. 5:17) E fiafia o ia e faafofoga mai i ona tagata tapuaʻi. (Faata. 15:8) O ā mea e mafai ona e tatalo ai pe a e lagona le tuua toʻatasi? Ia sasaa atu lou loto iā Ieova e pei ona faia e Elia. (Faitau le Salamo 62:8.) Ia faailoa atu iā te ia ou popolega ma ou faalogona. Ia talosaga iā Ieova e fesoasoani mai iā te oe e fesagaʻia na faalogona. O se faataʻitaʻiga, pe a e lagona le tuua toʻatasi ma le fefe pe a avatu se molimau i le aʻoga, ia talosaga atu iā Ieova e foaʻi mai iā te oe le lototele e faailoa atu ai ou talitonuga. E mafai foʻi ona e talosaga atu iā te ia mo le atamai e faamatala atu ai ma le faautauta ou talitonuga. (Luka 21:14, 15) Pe afai o loo e tauivi ma faalogona lē lelei, ia talosaga iā Ieova e fesoasoani atu iā te oe e talanoa i se Kerisiano taʻumatuaina. E mafai foʻi ona e talosaga iā Ieova e fesoasoani i le tagata o loo e talanoa i ai, ina ia faalogologo lelei ma malamalama i ou faalogona. O le sasaa atu o lou loto iā Ieova, iloa le auala o loo tali mai ai i au tatalo, ma talia le fesoasoani a isi, o le a tuuitiitia ai ou faalogona o le tuua toʻatasi.
Pe e te saʻilia auala e faalautele atu ai lau faiva ma galulue faatasi ma isi? (Tagaʻi i le palakalafa e 7)
7. O le ā e tatou te aʻoaʻoina mai i le faaaʻoaʻoga a Mauricio?
7 Ua tuuina mai e Ieova iā i tatou uma galuega aogā e fai. E tatou te mautinoa e silafia ma talisapaia e Ieova mea uma o loo tatou faia, ina ia faataunuuina ai o tatou faaeaga i le faapotopotoga ma le talaʻiga. (Sala. 110:3) E faapefea ona fesoasoani iā i tatou le pisi pea i lenā galuega pe a lagona le tuua toʻatasi? Seʻi iloilo le faaaʻoaʻoga a se uso talavou e igoa iā Mauricio. * E leʻi leva talu ona papatiso Mauricio, ae tuua loa e se tasi o ana uō vavalalata le upu moni. Na faapea mai Mauricio: “O le tuua e laʻu uō o Ieova, na oo ai iā te aʻu lagona lē mautinoa. Na ou taumānatu pe mafai ona faataunuu laʻu tautoga, ma avea ai pea aʻu o se vaega o le aiga o Ieova. Na ou lagona le tuua toʻatasi, ma ou manatu ai e leai se tasi e malamalama i oʻu faalogona.” O le ā na fesoasoani iā Mauricio? Na ia toe faapea mai: “Na faalautele atu laʻu faiva. Na fesoasoani lenā ia ou lē uaʻi ai iā te aʻu lava, ma oʻu faalogona lē lelei. Na ou lagona le fiafia ma tuuitiitia ai lagona o le tuua toʻatasi, a o matou galulue faatasi ma isi i le talaʻiga.” O le mea moni, e ui e lē o toe mafai ona tatou ō faatasi ma uso ma tuafāfine i le talaʻiga, ae ua faamalosia i tatou e ala i le auai faatasi ma i latou i isi vala o le talaʻiga, e pei o le tusiaina o tusi ma le molimau atu i le telefoni. O le ā se isi mea na fesoasoani iā Mauricio? Na ia faapea atili mai: “Na faaauau pea ona ou pisi i isi galuega i le faapotopotoga. Na tuu atoa loʻu loto i le sauniunia ma le faia o aʻu vaega i le aʻoga. O na tofiga na ou lagona ai le talisapaia o aʻu e Ieova ma isi.”
PE A LOFITŪINA I TATOU I TOFOTOFOGA OGAOGA
8. E faapefea ona tatou aafia i tofotofoga ogaoga?
8 E tatou te faatalitalia o le a tatou feagai ma tofotofoga i nei aso e gata ai. (2 Timo. 3:1) Peitaʻi, e ono faateʻia i tatou pe a tulaʻi mai tofotofoga e tatou te lē masani ai i le taimi e leʻi faatalitalia. Atonu e faafuaseʻi ona e feagai ma faafitauli tau tamaoaiga, se maʻi tugā, po o le maliu o se tasi e pele iā i tatou. I taimi faapena, e tatou te ono lagona ai le lotovaivai ma le lofitūina i popolega, aemaise lava pe a saputu mai luʻi i le taimi e tasi. Ia manatua o loo leoleoina i tatou e Ieova, ma o lana fesoasoani e mafai ai ona tatou fesagaʻia ma le mautinoa so o se tofotofoga.
9. Ia faamatala nisi o tofotofoga na feagai ma Iopu.
9 Seʻi mātau le faaaʻoaʻoga a le tane faamaoni o Iopu. Na oo iā te ia le tele o tofotofoga faigatā i se taimi puupuu. I le aso e tasi, na tutupu ai ni mea mataʻutia iā Iopu. Na mamate uma ana manu, fasiotia ana auauna, aemaise le maliliu o lana fanau pele. (Iopu 1:13-19) Na oo foʻi iā te ia se maʻi tigā ma leaga, a o feagai pea ma faalogona faavauvau. (Iopu 2:7) Na matuā leaga mea na tutupu iā Iopu. O lea na ia alaga ai: “Ua ou teena lea mea; ou te lē fia ola i aso uma.”—Iopu 7:16.
Na faamautinoa e Ieova iā Iopu lana tausiga alofa, e ala i le faailoa i ai o le tele o auala e na te tausia ai ana foafoaga (Tagaʻi i le palakalafa e 10)
10. Na faapefea ona saunia e Ieova mea na manaʻomia e Iopu e onosaia ai tofotofoga faigatā? (Tagaʻi i le ata i le faavaa.)
10 Na leoleoina e Ieova Iopu. O le alofa o Ieova iā Iopu, na ia foaʻi atu ai iā te ia mea e manaʻomia ina ia taulau ai i le onosaia o tofotofoga. Na faamanatu atu e Ieova iā Iopu, e lē mafaatusalia Lona atamai ma e na te tausia ma le alofa Ana foafoaga. Na ia faamatalaina foʻi le tele o meaola ofoofogia. (Iopu 38:1, 2; 39:9, 13, 19, 27; 40:15; 41:1, 2) Na faaaogā foʻi e Ieova se tane talavou faamaoni e igoa iā Eliu, e faamalosia ma faamāfanafana iā Iopu. Na faamautinoa atu e Eliu iā te ia, e tauia pea e Ieova ona tagata tapuaʻi pe a tumau. Ae na uunaʻia foʻi e Ieova Eliu e avatu ni fautuaga alofa iā Iopu. Na fesoasoani Eliu iā Iopu e taulaʻi i le mea e sili ona tāua, e ala i le faamanatu i ai o lona tulaga faatauvaa pe a faatusatusa i le tulaga o Ieova o Lē na foafoaina le vateatea. (Iopu 37:14) Na tuuina atu foʻi e Ieova se isi tofiga iā Iopu, o le tatalo lea mo ana aumea fai mea sesē e toʻatolu. (Iopu 42:8-10) E faapefea ona fesoasoani Ieova iā i tatou i aso nei pe a fesagaʻia tofotofoga faigatā?
11. O ā ni mau o le Tusi Paia e faamāfanafanaina ai i tatou pe a feagai ma tofotofoga?
11 E ui e lē talanoa tuusaʻo mai Ieova e pei ona sa talanoa ai iā Iopu, ae e talanoa mai o ia e ala i Lana Afioga le Tusi Paia. (Roma 15:4) E na te faamāfanafanaina i tatou e ala i le aumaia o se faamoemoe mo le lumanaʻi. Seʻi iloilo nisi o manatu mai i le Tusi Paia e mafai ona faamāfanafanaina ai i tatou pe a feagai ma luʻi. Ua faamautinoa mai e Ieova i le Tusi Paia, e leai se mea e mafai ona “faateʻaeseina i tatou mai i [lona] alofa,” e oo lava i tofotofoga faigatā. (Roma 8:38, 39) Ua ia faamautinoa mai foʻi, ʻe latalata o ia iā i latou uma e valaau atu iā te ia’ e ala i le tatalo. (Sala. 145:18) Ua faailoa mai e Ieova pe a tatou faalagolago iā te ia, e mafai ona tatou onosaia so o se luʻi ma maua le fiafia e ui ina tatou mafatia. (1 Kori. 10:13; Iako. 1:2, 12) Ua faamanatu mai foʻi e le Afioga a le Atua, e lē tumau ma e puupuu luʻi o loo tatou fesagaʻia, pe a faatusatusa atu i le taui e faavavau ua ia ofoina mai mo i tatou. (2 Kori. 4:16-18) Ua aumaia e Ieova iā i tatou se faamoemoe mautinoa, o le a ia aveesea le pogai o o tatou faafitauli uma, o Satani le Tiapolo ma i latou e faaaʻoaʻo i ona ala leaga. (Sala. 37:10) Po ua e taulotoina ni mau faamāfanafanaloto mai i le Tusi Paia, e fesoasoani iā te oe e onosaia ai tofotofoga i le lumanaʻi?
12. O le ā ua faatalitalia e Ieova i tatou e fai ina ia maua atoatoa ai aogā mai i lana Afioga?
12 E faatalitalia e Ieova i tatou e sema se taimi e suʻesuʻe ai e lē aunoa le Tusi Paia, ma mafaufau loloto i mea o loo tatou faitauina. Pe a tatou faatatauina mea ua tatou aʻoaʻoina, o le a faamalosia ai lo tatou faatuatua ma vavalalata atu ai i lo tatou Tamā i le lagi. O le faia faapea, o le a faamalosia ai i tatou e onosaia faafitauli. E foaʻi mai foʻi e Ieova lona agaga paia iā i latou e faalagolago i lana Afioga. E mafai e le agaga paia ona aumaia “le mana lea e sili atu i le malosi o tagata,” e tatou te onosaia ai so o se faafitauli.—2 Kori. 4:7-10.
13. E faapefea i meaʻai faaleagaga ua saunia e “le pologa faamaoni ma le faautauta” ona fesoasoani iā i tatou e onosaia ai faafitauli?
13 O le lagolagosua a Ieova, ua mafai ai e “le pologa faamaoni ma le faautauta” ona saunia le anoanoaʻi o lomiga, vitiō ma musika, e fesoasoani iā i tatou e atiaʻe ai se faatuatua malosi ma mataala ai faaleagaga. (Mata. 24:45) E tatau ona tatou faaaogā lelei na sauniuniga ua saunia i le taimi talafeagai. Na faailoa mai e se tuafafine mai i le Iunaite Setete lona talisapaia o nei meaʻai faaleagaga uma. Na ia faapea mai: “E tele taimi na tofotofoina ai loʻu faamaoni a o oʻu auauna iā Ieova mo le 40 tausaga.” E ogaoga faafitauli na fesagaʻia e lenei tuafafine. Na maliu le tamā o lona tinā ina ua soʻa lana taavale e se avetaavale onā, maliliu ona mātua i se maʻi tugā, ma e faalua ona aafia o ia i le kanesa. O le ā na fesoasoani iā te ia e onosaia ai na faafitauli? Na ia faapea mai: “Na tausia aʻu e Ieova i taimi uma. O meaʻai faaleagaga ua ia saunia e ala mai i le pologa faamaoni ma le faautauta, na fesoasoani iā te aʻu e tumau ai. O lea, na pei oʻu faalogona o Iopu o lē na faapea mai: ʻSeʻia oo lava i loʻu oti, ou te lē aveesea loʻu faamaoni!’”—Iopu 27:5.
E mafai faapefea ona avea i tatou ma faamanuiaga i isi i le faapotopotoga? (Tagaʻi i le palakalafa e 14)
14. E faapefea ona faaaogā e Ieova uso ma tuafāfine e lagolagosua iā i tatou i taimi faigatā? (1 Tesalonia 4:9)
14 Ua toleni e Ieova ona tagata ina ia faaalia le alofa, ma ia faamāfanafana le tasi i le isi i taimi faigatā. (2 Kori. 1:3, 4; faitau le 1 Tesalonia 4:9.) E pei o tatou uso ma tuafāfine o Eliu. E latou te naunau e fesoasoani mai ina ia tatou tumau faamaoni pe a feagai ma faigatā. (Galu. 14:22) O se faataʻitaʻiga, mātau le auala na faalaeiau ma fesoasoani ai le faapotopotoga iā Diane ia tumau ona malosi faaleagaga, ina ua aafia lana tane i se maʻi tugā. Na faapea mai o ia: “Na matuā faigatā lava lenā taimi, ae na ma lagonaina le fesoasoani a Ieova. Na matuā lagolagosua la matou faapotopotoga iā i maʻua. Na latou asiasi mai, vili mai, ma opo atu i maʻua, o mea na sa ma manaʻomia ina ia ma tumau ai. Talu ai ou te lē iloa aveina le taavale, na faamautinoa e uso ma tuafāfine ou te auai i sauniga ma talaʻiga pe a mafai.” Maʻeu se faamanuiaga o le avea ma vaega o se aiga alolofa faaleagaga!
TALISAPAIA LE TAUSIGA ALOFA A IEOVA
15. Aiseā e tatou te mautinoa ai e mafai ona tatou fesagaʻia faigatā?
15 E iai lava luʻi o le a fesagaʻia e i tatou uma. Ae e pei ona tatou talanoaina, e tatou te lē fesagaʻia na o i tatou na luʻi. O Ieova o se Tamā alofa, ma o loo ia leoleoina pea i tatou. O loo faatasi Ieova ma i tatou, ma e nofosauni e faafofoga mai pe a tatou ōle atu mo le fesoasoani, ma e naunau e lagolagosua iā i tatou. (Isa. 43:2) Ua tatou mautinoa e mafai ona tatou fesagaʻia so o se faigatā, ona ua ia saunia mai ma le agalelei mea uma e tatou te manaʻomia e tumau ai. Ua ia foaʻi mai meaalofa e pei o le tatalo, le Tusi Paia, le anoanoaʻi o meaʻai faaleagaga, ma se ʻauuso alolofa e fesoasoani iā i tatou i taimi faigatā.
16. E faapefea ona tatou maua pea le tausiga alofa a Ieova?
16 Maʻeu lo tatou lotofaafetai i le iai o so tatou Tamā i le lagi, o loo leoleoina i tatou! O lea, ʻua olioli ai o tatou loto iā te ia.’ (Sala. 33:21) E tatou te faailoa atu iā Ieova lo tatou talisapaia o lana tausiga alofa, e ala i le faaaogāina o ana sauniuniga uma mo i tatou. E manaʻomia foʻi ona faia la tatou vaega, ina ia tatou maua ai pea lenā tausiga alofa mai iā Ieova. O lona uiga, pe afai e faaauau ona tatou faia le mea sili e usiusitaʻi ai iā Ieova ma faia le mea e tonu i lana silafaga, o le a ia leoleoina i tatou e faavavau!—1 Pete. 3:12.
PESE 30 Loʻu Tamā, Loʻu Atua ma Laʻu Uō
^ E tatou te manaʻomia le fesoasoani a Ieova, ina ia foʻia ai faigatā o loo tatou fesagaʻia i aso nei. O le a faamautinoa mai i lenei mataupu o loo silasila mai Ieova i ona tagata. E na te silafia luʻi o loo fesagaʻia e tagata taʻitoʻatasi, ma e na te saunia le fesoasoani manaʻomia e foʻia ai na luʻi.
^ Ua suia nisi igoa.