1. O ā mea lelei ua mafai ona faataunuuina e le toʻatele o talavou?

 E FAITAU afe Kerisiano talavou e papatiso i tausaga taʻitasi. Po ua e ausia lenā laasaga? Pe afai o lea, ua matuā faafiafiaina la ou uso ma tuafāfine faaleagaga faapea Ieova! (Faata. 27:11) Seʻi mafaufau i le tele o mea ua e faataunuuina. Atonu e tele tausaga na e suʻesuʻeina ai ma le maelega le Tusi Paia. O lea na e mautinoa ai, o le Tusi Paia o le Afioga a le Atua. Ae e sili atu i lenā, ua e iloa ai le Tusitala o le Tusi Paia, ma ua tuputupu aʻe ai lou alofa mo ia. O lenā alofa na uunaʻia ai oe e tuuina atu ma papatiso o se tasi o ana auauna. Maʻeu se filifiliga lelei ua e faia!

2. O le ā o le a tatou talanoaina i lenei mataupu?

 ² E mautinoa e tele mea na tofotofoina ai lou faatuatua, a o e agaʻigaʻi i luma mo le papatisoga. Ae o le a e fesagaʻia nisi tofotofoga a o e tuputupu aʻe. O le a taumafai Satani e faavaivaia lou alofa mo Ieova, ma taofia oe mai i le auauna iā te Ia. (Efe. 4:14) E lē tatau ona e faatagaina lenā mea e tupu. O le ā e fesoasoani iā te oe e tumau faamaoni ai iā Ieova, ma faataunuu lau tautoga o le tuuina atu? E tatau ona e agaʻigaʻi pea i luma pe “finafinau,” ina ia avea o se Kerisiano taʻumatuaina. (Epe. 6:1) E faapefea la ona e faia lenā mea?

3. E faapefea ona agaʻigaʻi i luma Kerisiano pe a uma ona papatiso?

³ Pe a uma ona tatou papatiso, e manaʻomia e i tatou uma ona mulimuli i le fautuaga a le aposetolo o Paulo na avatu i  Kerisiano i Efeso. Na ia faalaeiauina i latou ina ia ʻavea ma tagata matutua’ faaleagaga. (Efe. 4:13) I nisi faaupuga, ia agaʻigaʻi pea i luma faaleagaga. E mafai ona tatou malamalama i le uiga o le tala a Paulo, ina ua ia faatusatusaina le tuputupu aʻe faaleagaga i le tuputupu aʻe faaletino o se tamaitiiti. E fiafia ma mitamita mātua i se pepe fou faatoʻā fanau mai. Ae e lē mafai ona tumau ai pea o se pepe, auā e iai le taimi o le a aveesea ai ʻamioga faatamaitiiti.’ (1 Kori. 13:11) E faapena foʻi Kerisiano. Pe a uma ona papatiso, e tatau ona faaauau pea ona agaʻigaʻi i luma. Seʻi o tatou iloiloina nisi o manatu e fesoasoani iā i tatou e faia ai faapea.

4. O le ā e fesoasoani iā te oe e agaʻigaʻi ai i luma faaleagaga? Ia faamatala. (Filipi 1:9)

⁴ Ia faatuputeleina lou alofa mo Ieova. E lē taumatea e te alofa tele iā Ieova, ae e mafai ona faatuputeleina lou alofa mo ia. E faapefea? Ua faailoa mai e Paulo se tasi o auala, o loo taʻua i le Filipi 1:9. (Faitau.) Na tatalo Paulo ina “ia faatuputeleina” le alofa o le faapotopotoga i Filipi. Ioe, e mafai ona faatuputeleina lo tatou alofa. E mafai ona tatou faia faapea, e ala i le mauaina o le “poto saʻo ma le faautaga loloto.” O le tele o lo tatou iloaina lelei o Ieova, o le tele foʻi lenā o lo tatou alofa ma le talisapaia o ona uiga ma le auala e na te faia ai mea. O le a tuputupu aʻe ai lo tatou naunau e faafiafia o ia, ma tatou lē faia ai se mea e faatigā ai lona finagalo. E tatou te taumafai malosi e malamalama i lona finagalo, ma iloa le auala e lagolagoina ai.

5-6. E faapefea ona faatuputeleina lo tatou alofa mo Ieova? Ia faamatala.

⁵ E mafai ona faatuputeleina lo tatou alofa mo Ieova, e ala i le iloa lelei o lona Alo, o lē na faaataina atoatoa mai uiga o lona Tamā. (Epe. 1:3) O le auala sili e tatou te iloa lelei ai Iesu, o le suʻesuʻeina lea o tusi o Evagelia. Pe afai e leʻi avea ma au masaniga le faitauina o le Tusi Paia i aso taʻitasi, aiseā e lē amata ai loa? A o e faitauina tala e faatatau iā Iesu, ia uaʻi atu i ona uiga. Na fiafia tagata iā te ia, ma na ia opoina ma le alofa tamaiti i ona aao. (Mare. 10:13-16) Na faaleuō le auala na ia feutagaʻi ai ma ona soo, ma na faigofie ai ona latou taʻu atu iā te ia mea o loo i o latou loto. (Mata. 16:22) O le faia faapea, na faaaʻoaʻo ai Iesu i lona Tamā i le lagi. E faigofie foʻi ona talanoa atu tagata iā Ieova, ma e mafai ona tatou tatalo atu iā te ia. Pe a tatou tatalo, e mafai ona sasaa atu o tatou loto iā te ia. E tatou te mautinoa e na te lē taʻusalaina i tatou. E alofa ma e manatu mamafa o ia iā i tatou.​—1 Pete. 5:7.

⁶ Na alofa mutimutivale Iesu i tagata. Ua taʻua e le aposetolo o Mataio: “Ua silasila atu o ia i le motu o tagata, ona mutimutivale ai lea o lona alofa iā i latou, auā ua pei i latou o mamoe ua faamanuʻalia ma agaleagaina, ua leai so latou leoleo mamoe.” (Mata. 9:36) Ae o ā faalogona o Ieova? Na fetalai Iesu: “E faapena foʻi loʻu Tamā o i le lagi, e lē finagalo e faaumatia se tasi o i latou nei e faatauvaa.” (Mata. 18:14) Maʻeu le faamāfanafanaloto o na upu! O le tele o lo tatou iloa lelei o Iesu, o le faatuputeleina foʻi lenā o lo tatou alofa mo Ieova.

7. E faapefea ona fesoasoani iā te oe le faauō atu i Kerisiano taʻumatuaina?

⁷ E mafai foʻi ona faatuputeleina lo tatou alofa ma agaʻigaʻi i luma o se Kerisiano, e ala i le iloa lelei o uso ma tuafāfine taʻumatuaina i le faapotopotoga. Ia mātau le olioli o loo latou faaalia. E latou te lē salamō i la latou filifiliga e auauna iā Ieova. Ia fesili i ai i ni mea na tutupu i la latou auaunaga iā Ieova. Pe a e  faia ni filifiliga tāua, ia saʻili atu iā i latou mo ni fautuaga, auā “e iai le faaolataga i le toʻatele o faufautua.”​—Faata. 11:14.

8. O le ā e te faia pe a iai ni ou masalosaloga e faatatau i aʻoaʻoga a le Tusi Paia?

⁸ Ia foʻia ou masalosaloga. E pei ona taʻua i le  palakalafa e lua, o loo taumafai Satani e taofia oe mai i le agaʻigaʻi i luma faaleagaga. O se tasi o auala e na te faia ai faapea, o le taumafai lea e faatupu iā te oe masalosaloga e faatatau i nisi o aʻoaʻoga o le Tusi Paia. E ono taumafai nisi e faatalitonu oe i le aʻoaʻoga o le evolusione. Atonu e te leʻi mafaufau i lenā aʻoaʻoga a o e laʻitiiti. Ae i le taimi lenei ua e matua, e te ono feagai ma lenā aʻoaʻoga i le aʻoga. E foliga mai e talafeagai ma e ono faatalitonuina oe i mea o loo aʻoaʻoina e faiaʻoga, e lagolagoina ai le evolusione. Peitaʻi, atonu e latou te leʻi iloiloina faamaoniga o le iai o Sē na foafoaina mea. Ia manatua le mataupu silisili o loo taʻua i le Faataoto 18:17: ʻO lē e tautala muamua i lana mataupu, e foliga mai e saʻo o ia, seʻia oo ina sau le isi tagata ma suʻesuʻe auʻiliʻili o ia.’ Nai lo o le tau ina talia o mea e te faalogo ai i le aʻoga o ni mea moni, ia iloilo lelei upu moni o loo i le Afioga a le Atua, le Tusi Paia. Ia fai ni saʻiliʻiliga i a tatou lomiga. Talanoa i ou uso ma tuafāfine o ē na talitonu muamua i le evolusione. * Ia fesili i ai po o le ā na faatalitonuina ai i latou e iai Sē na foafoaina mea, e alofa iā i tatou. O na talanoaga faalaeiau e fesoasoani iā te oe e taulaʻi ai i le mea moni.

9. O le ā e te aʻoaʻoina mai i le mea na tupu iā Melissa?

⁹ Na matuā aogā i se tuafafine e igoa iā Melissa ana suʻesuʻega na fai e faatatau i le foafoaga. * Na ia faapea mai: “I le aʻoga, na aʻoaʻoina le evolusione i se auala e matuā faatalitonuina ai lava oe. I le taimi muamua, na ou fefe e fai ni aʻu saʻiliʻiliga ina neʻi faamaonia e moni na aʻoaʻoga. Ae na ou iloa, e lē finagalo Ieova e tatou te auauna atu iā te ia e aunoa ma ni faamaoniga. O lea na amata ai ona fai ni aʻu saʻiliʻiliga. Na ou faitauina le tusi, Is There a Creator Who Cares About You? ma polosiua Was Life Created? ma le The Origin of Life​—Five Questions Worth Asking. O le mea tonu lea na ou manaʻomia. Maʻimau pe ana vave ona ou faia faapea.”

10-11. O le ā e mafai ona fesoasoani iā te oe e tumau ai pea ona mamā tauamio? (1 Tesalonia 4:3, 4)

 ¹⁰ Ia teena amioga leaga. A o e talavou, e mafai ona malolosi ou faalogona taufeusuaʻiga, ma e ono faaosoosoina ai oe e faia feusuaʻiga lē mamā. E manaʻo Satani ia e lolo atu i ou tuʻinanauga. O le ā e fesoasoani iā te oe e tumau ai pea ona mamā tauamio? (Faitau le 1 Tesalonia 4:3, 4.) Ia faailoa atu ou faalogona iā Ieova e ala i le tatalo. Ia taʻu atu iā te ia ou faalogona moni ma tatalo atu iā te ia e faamalosia oe. (Mata. 6:13) Ia manatua, e finagalo Ieova e fesoasoani iā te oe ae e lē o le taʻusalaina o oe. (Sala. 103:13, 14) E mafai foʻi ona e saʻili atu i le Afioga a le Atua mo se fesoasoani. Na faigatā iā Melissa lea na taʻua muamua ona teena mafaufauga lē mamā. Na ia faapea mai: “Na fesoasoani iā te aʻu le faitauina o le Tusi Paia i aso taʻitasi, e teena ai na faanaunauga leaga. Na faamanatu mai ai iā te aʻu, o aʻu o se auauna a Ieova, ma ou te manaʻo e auauna iā te ia i loʻu olaga atoa.”​—Sala. 119:9.

¹¹ Aua e te taumafai e taulima na o oe ou faafitauli. Ae ia e talanoa i ou mātua e faatatau i mea o loo e fesagaʻia. E moni e lē faigofie ona talanoa i na ituaiga faafitauli, ae e tāua le faia faapea. Na faapea mai Melissa: “Na ou tatalo mo le lototele, ona ou talanoa lea i loʻu tamā e faatatau i oʻu faafitauli. Ina ua uma ona ou faia faapea, na ou lagona ai e pei ua matuu atu se avega. Na ou iloa na matuā fiafia Ieova iā te aʻu.”

12. E faapefea ona e faia filifiliga lelei?

¹² Ia taʻitaʻia e mataupu silisili o le Tusi Paia. O le a iai le taimi e te maua ai le tele o le saʻolotoga e faia ai au lava filifiliga. Peitaʻi, e itiiti lava mea o loo e iloa e faatatau i le olaga. E faapefea ona e ʻalofia le faia o se mea sesē e aafia ai le lua faauōga ma Ieova? (Faata. 22:3) Na faamatala mai e se tuafafine e igoa iā Kari le mea na fesoasoani iā te ia e faia ai filifiliga lelei. Na ia iloa e lē manaʻomia e Kerisiano taʻumatuaina se tulafono e taʻitaʻia ai vala uma o le olaga. Na ia faapea mai: “E manaʻomia ona ou malamalama i mataupu silisili o le Tusi Paia, nai lo o le tau ina iloa o tulafono.” Pe a faitau le Tusi Paia, ia fesili ifo: ʻO le ā ua taʻu mai e lenei mau e faatatau i le silafaga a Ieova i lea mataupu? Po o iai ni mataupu silisili i lenei mau, e mafai ona ou faaaogāina e faatonutonu ai aʻu amioga? Afai o lea, e faapefea ona aogā iā te aʻu pe a ou faatatauina na mataupu silisili?’ (Sala. 19:7; Isa. 48:17, 18) O le faitauina o le Tusi Paia ma mafaufau loloto i mataupu silisili o loo iai, o le a faigofie ai ona e faia filifiliga e faafiafiaina ai Ieova. A o faaauau ona e agaʻigaʻi i luma, o le a e iloa ai e lē manaʻomia se tulafono mo mea uma, ona o lea ua e malamalama i le silafaga a Ieova e faatatau i se mataupu.

13. O ā aafiaga o le iai o ni uō lelei? (Faataoto 13:20)

¹³ Ia filifili uō e alolofa iā Ieova. E pei ona taʻua muamua, e mafai ona matuā aafia lou tuputupu aʻe o se Kerisiano i uō e te filifilia. (Faitau le Faataoto 13:20.) E iai se tuafafine e igoa iā Sara, ma na iai le taimi na mou atu ai lona olioli. Ae e iai se mea na tupu na fesoasoani iā te ia e faasaʻo ai lana vaai. Na faapea mai Sara: “Na ou maua ni uō lelei i le taimi tonu na ou manaʻomia ai. Na iai se tuafafine talavou na ma suʻesuʻeina faatasi Le Olomatamata i vaiaso taʻitasi. Na fesoasoani mai se isi aʻu uō ina ia amata ona ou tali i le sauniga. O taaʻiga lelei a aʻu uō, na amata ai ona ou faatāuaina le faia o aʻu lava suʻesuʻega ma tatalo mai i le loto. Na amata foʻi ona ou atiaʻe se faiā māfana ma Ieova ma na ou toe maua ai le olioli.”

14. Na faapefea iā Julien ona maua ni uō lelei?

 ¹⁴ E faapefea ona e faauō atu iā i latou o loo avea ma faaaʻoaʻoga lelei? Ua faapea mai Julien lea ua auauna nei o se toeaina: “A o oʻu talavou, na ou maua ni uō lelei a o ou auai i le talaʻiga. Na maelega na uō, ma na latou fesoasoani iā te aʻu ia ou iloa le olioli e maua mai i le galuega talaʻi. O lea na amata ai ona avea ma oʻu sini le auaunaga faataimi atoa. Na ou iloa foʻi o le māfuaaga e leʻi tele ai ni aʻu uō lelei, ona e na o ē e matou te tupulaga na ou faauō i ai. Mulimuli ane, na maua foʻi ni aʻu uō lelei i le Peteli. Na fesoasoani a latou faaaʻoaʻoga, e faaleleia ai le auala e filifilia ai aʻu faafiafiaga ma ou vavalalata ai iā Ieova.”

15. O le ā le lapataʻiga na avatu e Paulo iā Timoteo e faatatau i uō? (2 Timoteo 2:20-22)

¹⁵ Ae e faapefea pe afai e te iloa se tasi i le faapotopotoga e lē o se aumea lelei iā te oe? Na iloa e Paulo e iai nisi i le faapotopotoga Kerisiano i le uluaʻi senituri e lē o ni tagata faaleagaga. O lea na ia lapataʻia ai Timoteo ina ia faamamao mai iā i latou na. (Faitau le 2 Timoteo 2:20-22.) E tautele la tatou faauōga ma Ieova. E lē tatau ona tatou faatagaina se tasi e faaleagaina lenā faiā ma lo tatou Tamā i le lagi, lea na tatou taumafai malosi e faamalosia.​—Sala. 26:4.

16. O ā sini e tatau ona e filifilia?

¹⁶ Ia faatutū ni sini aogā. Ia filifili sini e faamalosia ai oe, ma avea ai o se Kerisiano taʻumatuaina. (Efe. 3:16) O se faataʻitaʻiga, e te ono filifili e faaleleia lau masaniga o le faia o au lava suʻesuʻega ma le faitauina o le Tusi Paia. (Sala. 1:2, 3) Atonu e te iloa foʻi e manaʻomia ona e tatalo e lē aunoa ma ia uigā au tatalo. Atonu e manaʻomia foʻi ona faaalia le amio pulea i le filifilia o au faafiafiaga, ma le faaaogāina o lou taimi. (Efe. 5:15, 16) E faafiafiaina Ieova, pe a silasila mai o loo e galue mamafa ina ia agaʻigaʻi i luma faaleagaga.

17. E faapefea ona aogā iā te oe le fesoasoani i tagata?

¹⁷ O le fesoasoani i isi, e mafai ona avea ai oe o se Kerisiano taʻumatuaina. Na fetalai Iesu: “E sili le fiafia e maua i le foaʻi atu i lo o le talia mai.” (Galu. 20:35) O le a e maua le tele o aogā pe afai e te faaavanoa se taimi, ma faaaogā lou malosi o se talavou e fesoasoani ai i  isi. O se faaaʻoaʻoga, e mafai ona avea ma ou sini le fesoasoani i tagata matutua, ma i latou e lē lelei le soifua mālōlōina i lau faapotopotoga. Atonu e mafai ona e fesoasoani i le faia o nisi o a latou feʻau, pe faasino i ai le auala e faaaogā ai masini faaonapōnei. Pe afai o oe o se uso, ia fai ma ou sini le avea ma auauna o le faiva ina ia auauna ai i ou uso ma tuafāfine. (Fili. 2:4) E te faaalia foʻi le alofa iā i latou i fafo atu o le faapotopotoga, e ala i le faailoa atu i ai o le tala lelei o le Malo. (Mata. 9:36, 37) Pe afai e mafai, ia fai ma ou sini le auai i nisi vala o le auaunaga faataimi atoa.

18. E faapefea ona fesoasoani iā te oe le auaunaga faataimi atoa ina ia agaʻigaʻi ai i luma faaleagaga?

¹⁸ O le auaunaga faataimi atoa, e te maua ai le tele o avanoa e agaʻigaʻi ai i luma faaleagaga. O le avea ma paeonia e te ono maua ai le avanoa e auai ai i le Aʻoga mo Tagata Talaʻi o le Malo. E maua ai foʻi le avanoa e te auauna ai i le Peteli po o faugāfale. Na faapea mai se tuafafine paeonia talavou e igoa iā Kaitlyn: “O le faaalu o le taimi i le talaʻiga faatasi ma uso ma tuafāfine ua iai le poto masani, na fesoasoani tele iā te aʻu e tuputupu aʻe ai faaleagaga ina ua uma ona ou papatiso. O a latou faaaʻoaʻoga, na uunaʻia ai aʻu e faaloloto loʻu iloa o le Tusi Paia, ma faaleleia loʻu tomai o le aʻoaʻo atu.”

19. O ā faamanuiaga o le a e maua pe a faaauau ona e agaʻigaʻi i luma faaleagaga?

¹⁹ Pe a faaauau ona e agaʻigaʻi i luma faaleagaga, o le a e maua ai le tele o faamanuiaga. O le a e ʻalofia ai le faamaʻimau o lou talavou e saʻilia ai sini e leai se aogā. (1 Ioa. 2:17) E te ʻalofia ai foʻi le lototigā ona o filifiliga leaga e te faia. Ae o le a e maua le taulau manuia moni ma le fiafia. (Faata. 16:3) O lau faaaʻoaʻoga lelei o le a faalaeiauina ai ou uso ma tuafāfine o ē talavou ma ē matutua. (1 Timo. 4:12) Ae o le mea e sili ona tāua, o le a e olioli ai i le filemu ma le faamalieina, ona o le faafiafiaina o Ieova ma le iai o se faauōga vavalalata ma ia.​—Faata. 23:15, 16.