1. O le ā e fesoasoani iā i tatou ina ia fiafia e suʻesuʻe valoaga o le Tusi Paia?

 UA FAAPEA mai Ben lea na taʻua i le mataupu ua mavae, “E ese loʻu fiafia e suʻesuʻe valoaga o le Tusi Paia.” Po o ou lagona foʻi na? Pe e te manatu ua faigatā tele ona malamalama i valoaga? Atonu e lē o iā te oe foʻi se faanaunauga e suʻesuʻe ai valoaga. Peitaʻi, pe a e malamalama i le māfuaaga na faaaofia ai e Ieova valoaga i le Tusi Paia, atonu o le a suia ai ou lagona.

2. O ā manatu o le a talanoaina i lenei mataupu?

² O le a talanoaina i lenei mataupu māfuaaga e tatau ai ona tatou suʻesuʻeina valoaga o le Tusi Paia, ma le auala e faia ai faapea. O le a iloiloina foʻi valoaga e lua o loo i le tusi o Tanielu, ma pe e faapefea ona aogā iā i tatou pe a malamalama i na valoaga.

3. O le ā e manaʻomia ona tatou faia ina ia malamalama ai i valoaga o le Tusi Paia?

³ Ina ia malamalama i valoaga o le Tusi Paia, e manaʻomia ona tatou fesili atu mo se fesoasoani. O se faataʻitaʻiga, seʻi faapea o loo oulua malaga ma sau uō i se vaipanoa e te lē masani ai, ae e masani lelei lau uō i lenā vaipanoa. E iloa lelei e lau uō auala ma magāala. E mautinoa lou fiafia ona o loo oulua ō faatasi ma lau uō. E pei Ieova o lenā uō lotofesoasoani, ua ia silafia lelei lo tatou lumanaʻi. O lea, ina ia malamalama i valoaga o le Tusi Paia, e tatau ona tatou talosaga atu ma le lotomaulalo mo le fesoasoani a Ieova.​—Tani. 2:28; 2 Pete. 1:19, 20.

4. Aiseā na faamautinoa ai e Ieova e faamauina valoaga i lana Afioga? (Ieremia 29:11) (Tagaʻi foʻi i le ata.)

⁴ E pei Ieova o se matua alofa, e finagalo o ia ina ia maua e lana fanau se lumanaʻi fiafia. (Faitau le Ieremia 29:11.) Ae e ese mai i mātua faaletagata, e mafai e Ieova ona valoia ma le saʻo mea o le a tutupu i le lumanaʻi. Na ia faamautinoa e faamauina  valoaga i lana Afioga, ina ia mafai ona tatou iloa e faatatau i ni mea iloga a o leʻi tutupu. (Isa. 46:10) O lea o valoaga o le Tusi Paia, o ni meaalofa mai i lo tatou Tamā i le lagi. Ae e faapefea ona e mautinoa o le a taunuu moni lava valoaga o le Tusi Paia?

5. O le ā e aʻoaʻoina e talavou mai i le mea na tupu iā Max?

⁵ I le aʻoga, e masani ona iai faatasi a tatou talavou ma i latou e lē faatāuaina le Tusi Paia. O a latou faamatalaga ma amioga, e mafai ona masalosalo ai a tatou talavou pe e moni mea ua aʻoaʻoina ai i latou. Mātau le mea na tupu i se uso e igoa iā Max. Ua ia faapea mai, “A o oʻu talavou, na amata ai ona ou masalosalo po o le tapuaʻiga moni lea o loo aʻoaʻoina ai aʻu e oʻu mātua ma pe e moni o le Tusi Paia o le Afioga a le Atua.” O le ā na faia e ona mātua? Ua ia faapea mai, “E ui lava na ou iloa na la popole, ae na lelei lava le auala na la tali mai ai.” Na faaaogā e mātua o Max le Tusi Paia e tali ai ana fesili. Ae na iai foʻi le gaoioiga na faia e Max. Ua ia faapea mai, “Na ou suʻesuʻeina valoaga o le Tusi Paia ina ia aogā mo aʻu lava ia, ma na ou faasoa atu i isi talavou i le faapotopotoga mea na ou aʻoaʻoina.” O le ā le iʻuga? Ua faapea mai Max, “Na ou mautinoa ai loa, o le Tusi Paia o le Afioga a le Atua!”

6. O le ā e manaʻomia ona e faia pe a iai ni ou masalosaloga, ma aiseā?

⁶ I le pei o Max, pe afai ua amata ona e masalosalo pe e moni aʻoaʻoga a le Tusi Paia, aua e te lotovaivai. Peitaʻi, e manaʻomia ona fai sau gaoioiga. E pei le masalosalo o se ʻele. Pe a lē vave ona faia i ai se gaoioiga, o le a faasolosolo ona faaleagaina ai se mea tāua. Ina ia aveese ni masalosaloga e pei o se ʻele lea e ono faavaivaia ai lou faatuatua, ia fesili ifo, ʻPe ou te talitonu i le faamatalaga a le Tusi Paia e faatatau i le lumanaʻi?’ Pe afai e te lē mautinoa, e manaʻomia ona e suʻesuʻeina valoaga o le Tusi Paia ua faataunuuina. E faapefea ona e faia lenā mea?

7. Na faapefea ona avea Tanielu o se faaaʻoaʻoga lelei i le auala e suʻesuʻe ai valoaga? (Tanielu 12:10) (Tagaʻi foʻi i le ata.)

⁷ O Tanielu o se faaaʻoaʻoga lelei i le auala e suʻesuʻe ai valoaga. Na saʻo le uunaʻiga na ia suʻesuʻeina ai valoaga, ina ia mafai ai ona ia maua le malamalamaga saʻo. Na lotomaulalo foʻi Tanielu ma iloa e tuuina mai e Ieova le malamalama iā i latou e iai se faiā ma Ia ma tausia ana tapulaa. (Tani. 2:27, 28; faitau le Tanielu 12:10.) Na iloa le lotomaulalo o Tanielu e ala i le faalagolago iā Ieova mo le fesoasoani. (Tani. 2:18) O Tanielu foʻi o se tagata na suʻesuʻe ma le māeʻaeʻa. Na ia matuā suʻesuʻeina Tusitusiga Paia na iai i lenā taimi. (Iere. 25:11, 12; Tani. 9:2) E faapefea ona e faaaʻoaʻo iā Tanielu?

8. Aiseā e suʻesuʻe ai e nisi valoaga o le Tusi Paia, ae o le ā e tatau ona tatou faia?

⁸ Ia saʻo le uunaʻiga. Pe e māfua ona e suʻesuʻeina valoaga o le Tusi Paia, ona e te manaʻo e maua le malamalamaga saʻo? Pe afai o lea, o le a fesoasoani Ieova iā te oe. (Ioa. 4:23, 24; 14:16, 17) Peitaʻi, e iai isi māfuaaga e suʻesuʻe ai e tagata valoaga. E taumafai nisi e suʻe ni  faamaoniga ina ia faapea ai o le Tusi Paia e lē o le Afioga a le Atua. Pe a faia faapea, e latou te manatu ai e mafai ona latou faia a latou lava tapulaa i le mea saʻo ma le mea sesē ma ola i se olaga tuufau. Peitaʻi, e manaʻomia ona saʻo le uunaʻiga e tatou te suʻesuʻeina ai valoaga. E lē gata i lea, e iai se uiga tāua e manaʻomia ina ia malamalama ai i valoaga o le Tusi Paia.

9. O le ā le uiga e manaʻomia ina ia malamalama ai i valoaga o le Tusi Paia? Ia faamatala.

⁹ Ia lotomaulalo. Ua folafola mai e Ieova e na te fesoasoani i ē e lotomaulalo. (Iako. 4:6) O lea, e manaʻomia ai ona tatou talosaga atu mo lana fesoasoani ina ia malamalama ai i valoaga o le Tusi Paia. E tatau foʻi ona tatou talia lana fesoasoani e ala mai i le pologa faamaoni, ina ia tatou maua meaʻai faaleagaga i le taimi tatau. (Luka 12:42) Ona o Ieova o le Atua e fai mea maopoopo, e na o le pologa faamaoni ua ia faaaogāina e fesoasoani iā i tatou ina ia malamalama ai i upu moni o loo i lana Afioga.​—1 Kori. 14:33; Efe. 4:4-6.

10. O le ā e te aʻoaʻoina mai i le faaaʻoaʻoga a Esther?

¹⁰ Ia suʻesuʻe ma le māeʻaeʻa. Ia amata i le suʻesuʻeina o se valoaga e te fiafia i ai. O le mea lenā na faia e Esther lea na taʻua i le mataupu ua mavae. Na fiafia o ia e suʻesuʻe valoaga e faatatau i le afio mai o le Mesia. Ua ia faapea mai, “I le 15 o oʻu tausaga na ou saʻiliʻili ai mo ni faamaoniga, o nei valoaga na tusia a o leʻi afio mai Iesu i le lalolagi.” Na faatalitonuina Esther i mea na ia aʻoaʻoina e faatatau i Tusi Tāʻai o le Sami Mate. Na ia faapea mai, “O nisi o na mea na tusia a o leʻi soifua mai le Keriso. O lona uiga o valoaga na tusia ai e mai i le Atua.” Na taʻutino mai Esther, “E tele taimi na manaʻomia ai ona ou faitau i na valoaga ina ia ou malamalama ai.” Ae na ia lagona le fiafia ona o ana taumafaiga na fai. O le suʻesuʻeina ma le māeʻaeʻa e Esther o le tele o valoaga o le Tusi Paia ua mafai ai ona ia faapea mai, “Na ou talitonu ai e moni ma faamaoni le Tusi Paia!”

11. O ā aogā o le malamalama i valoaga o le Tusi Paia?

¹¹ Pe a tatou vaaia le faataunuuga o nisi o valoaga o le Tusi Paia, e tatou te matuā maufaatuatuaina ai Ieova ma le auala ua ia taʻitaʻia ai i tatou. E lē gata i lea, ua fesoasoani valoaga o le Tusi Paia iā i tatou e faatumauina ai se vaaiga mautinoa e faatatau i le lumanaʻi, e tusa lava po o ā faigatā o loo tatou fesagaʻia i le taimi lenei. Seʻi o tatou talanoaina ni valoaga se lua na faamauina e Tanielu ua faataunuuina i aso nei. Pe a tatou malamalama i na valoaga, o le a mafai ai ona tatou faia ni filifiliga atamai.

12. O le ā ua faaata mai e vae o le faatagata lea e faia aʻe i ʻle uʻamea ua fefiloi faatasi ma le omea ua vaivai’? (Tanielu 2:41-43)

¹² Faitau le Tanielu 2:41-43. I le miti na faamatalaina e Tanielu mo le tupu o Nepukanesa, na vaaia ai e le tupu vae o le faatagata ua faia aʻe i ʻle uʻamea ua fefiloi faatasi ma le omea ua vaivai.’ Pe a faatusatusa lenei valoaga i isi valoaga o loo i tusi o Tanielu ma le Faaaliga, ua mafai ona tatou iloa mai ai o loo  faaata mai e vae o le faatagata le Malo Malosi o le Lalolagi o Amerika ma Peretania, lea o loo pule i le taimi lenei. Ua faamatalaina e Tanielu lenei malo malosi o le lalolagi e faapea, ʻo le a iai le vaega malosi o lea malo ma e iai foʻi le vaega e vaivai.’ Aiseā e faapea atu ai e iai le vaega e vaivai? Talu ai e faavaivaia lona malosi e pei o le uʻamea, e tagata lautele o loo faaata mai e le omea ua vaivai. b

13. O ā manatu tāua e tatou te aʻoaʻoina mai i lenei valoaga?

¹³ E tele ni manatu tāua e tatou te aʻoaʻoina mai i le faamatalaga a Tanielu e faatatau i le faatagata, aemaise lava vae o le faatagata. Muamua, e tele auala ua faaalia ai e le Malo Malosi o le Lalolagi o Amerika ma Peretania le mataʻutia o lona malosi. O se faataʻitaʻiga, e telē lona sao na faia lea na iʻu ai i le manumalo i le Taua Muamua a le Lalolagi ma le Taua Lona Lua a le Lalolagi. Peitaʻi, ua faaitiitia le malosi o lana pulega ma o le a faaauau pea ona faaitiitia lenā malosi ona o le fevaevaeaʻi o ona tagatānuu. Lua, o le malo malosi mulimuli lava lea e pulea le lalolagi, a o leʻi faaumatia e le Malo o le Atua malo uma faaletagata. E ui lava atonu e iai taimi e taumafai ai isi malo e faatoʻilaloina le Malo Malosi o le Lalolagi o Amerika ma Peretania, ae e lē mafai ona latou manumalo ai. E faamaonia lenā manatu talu ai o le a nutililiia e “le maa” lea e faaata mai e le Malo o le Atua, vae o le faatagata lea e faaata mai e le Malo Malosi o le Lalolagi o Amerika ma Peretania.​—Tani. 2:34, 35, 44, 45.

14. E faapefea i le malamalama i le valoaga e faatatau i vae o le faatagata, ona fesoasoani i le faia o filifiliga atamai?

¹⁴ Pe e te talitonu ua faataunuuina le valoaga a Tanielu e faatatau i vae o le faatagata lea e faia aʻe i le uʻamea ma le omea? Pe afai o lea, o le a aafia ai le auala e te ola ai. O le a e lē pupū ai i le saʻilia o meafaitino ona ua toeitiiti faaumatia lenei lalolagi. (Luka 12:16-21; 1 Ioa. 2:15-17) O le malamalama i lenei valoaga, o le a fesoasoani foʻi iā te oe e iloa ai le tāua o le galuega talaʻi ma le aʻoaʻo atu. (Mata. 6:33; 28:18-20) Pe a uma ona e suʻesuʻeina lenei valoaga, ia fesili ifo, ʻPo o atagia atu i aʻu filifiliga ou te matuā mautinoa ua toeitiiti faaumatia e le Malo o le Atua malo uma faaletagata?’

15. O ai e faasino i ai “le tupu o le itu i mātū” ma “le tupu o le itu i saute” i aso nei? (Tanielu 11:40)

¹⁵ Faitau le Tanielu 11:40. O loo faamatalaina e le Tanielu mataupu e 11, ni tupu se toʻalua po o ni malo faapolotiki o loo tauivi po o ai e avea ma malo malosi o le lalolagi. Pe a faatusatusa lenei valoaga ma isi valoaga o le Tusi Paia, ua mafai ona tatou iloa mai ai o “le tupu o le itu i mātū” e faasino atu iā Rusia ma malo o loo lagolagoina o ia, ae o “le tupu o le itu i saute” e faasino atu i le Malo Malosi o le Lalolagi o Amerika ma Peretania. c

16. O ā luʻi ua feagai ma i latou o loo ola i atunuu o loo pulea e “le tupu o le itu i mātū”?

¹⁶ Ua feagai tagata o le Atua o loo ola i atunuu o loo pulea e “le tupu o le itu i mātū,” ma sauāga tuusaʻo mai i lenā tupu. O nisi o o tatou uso ua sasaina ma faafalepuipuiina ona o lo latou faatuatua. Nai lo o le faalotovaivaia ai o o tatou uso, ae o sauāga ua faapogaia e “le tupu o le itu i mātū” ua atili faamalosia ai lo latou faatuatua. Aiseā? Talu ai ua iloa e o tatou uso, o le sauāina o tagata o le Atua ua faataunuuina ai valoaga na taʻua e  Tanielu. d (Tani. 11:41) O le iloaina o lenā manatu, e fesoasoani e faamalosia ai pea lo tatou faamoemoe ma faamaoni pea iā Ieova.

17. O ā tofotofoga ua feagai ma tagata o le Atua o loo ola i atunuu o loo pulea e “le tupu o le itu i saute”?

¹⁷ I taimi ua teʻa, na faapogaia foʻi e “le tupu o le itu i saute” sauāga tuusaʻo i tagata o Ieova. O se faataʻitaʻiga, i le Taua Muamua a le Lalolagi ma le Taua Lona Lua a le Lalolagi na faafalepuipuiina ai le toʻatele o o tatou uso ona o le lē auai i taua, ma na tutuliesea foʻi mai i aʻoga nisi o fanau ona o le lē faʻalo i le fuʻa. Ae i tausaga lata mai nei, na feagai ai tagata o Ieova o loo nonofo i atunuu o loo pulea e le tupu o le itu i saute ma tofotofoga e iloagatā, lea e luʻia ai lo latou faamaoni i le Malo o le Atua. O se faataʻitaʻiga, i taimi o faigāpalota e ono faaosoosoina se Kerisiano po o lē fea le vaega faaupufai po o le sui tauvā e na te lagolagoina. E ui e lē palota, ae i lona mafaufau ma lona loto e sili atu le isi vaega faaupufai i lo o le isi. E tāua tele lo tatou solitū i mataupu faapolotiki e lē gata i gaoioiga, ae  faapea foʻi i o tatou mafaufauga ma faalogona!​—Ioa. 15:18, 19; 18:36.

18. E faapefea ona tatou tali atu i le tautūleiga i le vā o “le tupu o le itu i mātū” ma “le tupu o le itu i saute”? (Tagaʻi foʻi i le ata.)

¹⁸ O i latou e lē talitonu i valoaga o le Tusi Paia, atonu o le a matuā atuatuvale pe a latou vaaia “le tupu o le itu i saute” ma “le tupu o le itu i mātū” o auai “i se tautūleiga i o la seu.” (Tani. 11:40, fpl.) E matuā tele meatau faaniukilia o loo iai i nei tupu e faaumatia ai mea uma o loo i le lalolagi. Ae e tatou te iloa e lē faatagaina e Ieova lenā mea e tupu. (Isa. 45:18) O lea nai lo o le faapopoleina ai o i tatou, ae o le tautūleiga i le vā o “le tupu o le itu i mātū” ma “le tupu o le itu i saute” ua atili faamalosia ai lo tatou faatuatua. Ua faamautinoa ai ua lata mai le iʻuga o lenei faiga o mea.

19. O le ā e tatau ona tatou iloa e faatatau i valoaga o le Tusi Paia?

¹⁹ E tatou te lē iloa po o le a faapefea ona faataunuuina nisi o valoaga o le Tusi Paia. E oo lava i le perofeta o Tanielu, e leʻi malamalama o ia i le uiga o mea uma na ia tusia. (Tani. 12:8, 9) Ae o lo tatou lē malamalama atoatoa i le auala e faataunuu ai se valoaga, e lē faapea ai o le a lē faataunuuina. E mautinoa e mafai ona tatou maufaatuatuaina Ieova, o le a ia faailoa mai mea e manaʻomia ona tatou iloa i le taimi tonu e pei ona ia faia i aso ua mavae.​—Amo. 3:7.

20. O ā valoaga mataʻina o le Tusi Paia ua toeitiiti faataunuuina, ma o le ā e tatau ona faaauau ona tatou faia?

²⁰ O le a faia se faalauiloaga “ua filemu ma saogalemu.” (1 Tesa. 5:3) Ona osofaʻia lea e malo faapolotiki o lotu sesē ma faaumatia. (Faaa. 17:16, 17) Ona sosoo ai lea ma le osofaʻia o tagata o le Atua. (Eseki. 38:18, 19) Ona faaiʻuina lea i le taua o Amaketo. (Faaa. 16:14, 16) Ua tatou mautinoa ua toeitiiti ona faataunuuina lea o nei mea uma. O lea, ia faaauau ona tatou faaalia le lototalisapaia i lo tatou Tamā alofa i le lagi, e ala i le suʻesuʻeina o valoaga o le Tusi Paia ma fesoasoani i isi e faia foʻi faapea.