I LE lalolagi aoao i le tausaga ua mavae, e faitau afe uso na tofia e avea o ni toeaina ma auauna o le faiva i faapotopotoga a Molimau a Ieova. Pe afai o oe o se tasi o na uso peleina, e mautinoa la lou olioli i lou faaeaga fou mo le auaunaga.

O le mea moni, atonu e te lagona foʻi sina popole. Ua faapea mai Jason o se toeaina talavou: “Ina ua faatoʻā tofia aʻu, na faapopoleina aʻu i le matuā tele o tiute tauave e ao ona fai.” Na lagona foʻi e Mose ma Ieremia le lē agavaa ina ua maua o la tofiga fou mai iā Ieova. (Eso. 4:10; Iere. 1:6) Pe afai o faapena ou faalogona, e faapefea ona e manumalo ai ma faaauau ona e agaʻigaʻi i luma? Ia mātau le faaaʻoaʻoga a le soo Kerisiano o Timoteo.​—Galu. 16:1-3.

E foliga mai a o toeitiiti atoa le 20 tausaga o Timoteo pe sili teisi atu foʻi, na valaaulia ai o ia e le aposetolo o Paulo e la te faimalaga faatasi. I le amataga, atonu e leʻi iai iā Timoteo le lagona mautinoa, ma atonu sa faatalatū o ia e faatino lona tofiga fou ona o lona tulaga talavou. (1 Timo. 4:11, 12; 2 Timo. 1:1, 2, 7) Peitaʻi i le 10 tausaga mulimuli ane, na mafai ona faailoa atu e Paulo i le faapotopotoga i Filipi: ʻUa ou faamoemoe i le Alii o Iesu e vave auina atu Timoteo iā te outou, auā e lē o iā te aʻu se tasi e mafaufau lelei e pei o ia.’​—Fili. 2:19, 20.

O ā itu na mataʻina ai le tulaga o Timoteo o se toeaina? Ia mātau lesona e ono e mafai ona e aʻoaʻoina mai i lana faaaʻoaʻoga.

1. Na manatu mamafa o ia i tagata. Na faailoa atu e Paulo i uso i Filipi: “O [Timoteo] o lē e manatu mamafa iā te outou.” (Fili. 2:20) Ioe, na manatu mamafa Timoteo i tagata. Na naunau moni o ia i lo latou lelei faaleagaga, ma na lotomalie e galue mamafa e fesoasoani iā i latou.

Ia aua neʻi pei i tatou o se ave pasi e pau le mea e popole ai o le taimi e taunuu ai le pasi, ae e lē popole i tagata faatali pasi. Ua sili atu i le 20 tausaga o avea William o se toeaina maufaatuatuaina. O lana fautuaga lenei mo uso faatoʻā tofia: “Ia alolofa i le ʻauuso. Ia uaʻi atu i o latou manaʻoga nai lo o le tau ina faamaopoopo o mea fai i le faapotopotoga.”

2. Na ia faamuamua mea faaleagaga. Na taʻua e Paulo le eseesega o le faaaʻoaʻoga a Timoteo mai i isi, ina ua ia faapea mai: “Ua saʻili e isi uma o latou lava lelei, ae lē o mea e faatatau iā Keriso Iesu.” (Fili. 2:21) Na tusia e Paulo lenei tusi a o iai i Roma, ma na ia mātauina na faaalu e uso i inā lo latou malosi mo le saʻilia o o latou lava lelei. E latou te leʻi maelega i galuega faaleagaga. Ae e leʻi faapena Timoteo. Ina ua tulaʻi mai avanoa e faalauiloa atu ai le tala lelei, na naunau o ia e pei o Isaia o lē na tali atu: “O aʻu lenei! Inā auina atu ia aʻu.”​—Isa. 6:8.

E faapefea ona e faapaleni mataupu e patino iā te oe ma ou tiute tauave faaleagaga? Muamua, ia faatulaga le mea e sili ona tāua. Na timaʻi mai Paulo: “Ia outou faamautinoa o mea e sili ona tāua.” (Fili. 1:10) O lea, ia e faatāua mea e tāua iā Ieova. Lua, ia faafaigofie lou olaga. Ia aveese ni mea pe tuu ni gaoioiga o loo faamaʻimau  ai lou taimi ma lou malosi. Na apoapoaʻi atu Paulo iā Timoteo: “Ia sola ese mai i tuʻinanauga masani o talavou, a ia tausisi i le amiotonu, le faatuatua, le alofa, le filemu.”​—2 Timo. 2:22.

3. Na galue mamafa o ia i le auaunaga paia. Na faamanatu atu e Paulo i Kerisiano i Filipi: ʻUa outou iloa le faamaoniga ua tuuina mai e Timoteo e faatatau iā te ia lava, i le pei o se atalii ma lona tamā, na ma pologa faatasi i le talaʻia o le tala lelei.’ (Fili. 2:22) O Timoteo e lē o se tagata paiē. Na galue malosi o ia a o faatasi ma Paulo ma na atili māfana ai la laʻua faiā.

O loo tele pea galuega i le faalapotopotoga a le Atua i aso nei. O na galuega e faamalieina moni ai ma e atili ai ona e māfana i ou uso ma tuafāfine. O lea, ʻia tele pea mea e te faia i le galuega a le Alii.’​—1 Kori. 15:58.

4. Na ia faatatau mea na ia aʻoaʻoina. Na tusi atu Paulo iā Timoteo: “Ua e mulimulituʻi i aʻu aʻoaʻoga, o loʻu olaga, o loʻu sini, o loʻu faatuatua, o loʻu faapalepale, o loʻu alofa, o loʻu tumau.” (2 Timo. 3:10) Talu ai na faatatau e Timoteo mea na ia aʻoaʻoina, na agavaa ai la o ia e faatino isi tiute tauave tāua.​—1 Kori. 4:17.

Po o iai se uso taʻumatuaina e faufautua iā te oe i le itu faaleagaga? Pe afai e leai, aiseā e te lē saʻilia ai se uso faapena? Ua faapea mai Tom o se uso ua tele tausaga o auauna o se toeaina: “Na iai se toeaina taʻumatuaina na naunau mai iā te aʻu ma saunia mai ni toleniga e sili ona lelei. Na ou fesili i ai e lē aunoa mo ni fautuaga ma na ou faatatauina ana fautuaga. O lenā mea na vave ai ona ou atiaʻe le uiga mautinoa.”

5. Na faaauau ona ia aʻoaʻoina o ia lava. Na apoapoaʻi atu Paulo iā Timoteo: “Ia aʻoaʻo oe lava ia fai ma ou sini le faamaoni i le Atua.” (1 Timo. 4:7) E manaʻomia e se tagata taalo sona faiaʻoga, peitaʻi e tatau foʻi i le tagata taalo ona toleni o ia lava. Na ʻaiʻoi atu Paulo iā Timoteo: “Ia toʻaga pea e faitau i luma o tagata, ia apoapoaʻi atu ma aʻoaʻo atu seʻia ou alu atu. . . . Ia manatunatu i nei mea; ia naunau i ai, ina ia iloa ai e tagata uma lou agaʻigaʻi i luma.”​—1 Timo. 4:13-15.

E tatau foʻi ona faaauau ona e faaleleia ou tomai. Ia avea pea oe o se tagata aʻoga e filigā ma faamasani i taʻiala fou mai i le faalapotopotoga. Ia ʻalofia foʻi le soona mautinoa naʻuā ma e manatu ai e mafai lava ona e taulima so o se mataupu e tulaʻi mai e aunoa ma ni au saʻiliʻiliga, ona ua tele lou poto masani. Ina ia faaaʻoaʻo iā Timoteo, “ia uaʻi totoʻa iā te oe lava ma lau aʻoaʻo atu.”​—1 Timo. 4:16.

6. Na faalagolago o ia i le agaga o Ieova. A o mafaufau Paulo i le faiva a Timoteo, na ia faamanatu atu iā te ia: “Ia e tausia lenei mea tāua na tuuina atu iā te oe, e ala i le agaga paia lea e i totonu iā i tatou.” (2 Timo. 1:14) Ina ia tausia e Timoteo le faiva na tuuina atu iā te ia, na tatau ona faalagolago atu o ia i le agaga o le Atua.

Ua mātauina e Donald o se uso ua tele tausaga o auauna o se toeaina: “E tatau i uso tofia ona faatāua la latou faiā ma le Atua. O uso e faia faapea o le a ʻfaateleina lo latou malosi.’ Pe afai e latou te tatalo atu mo le agaga o le Atua ma atiaʻe le fua o le agaga, o le a avea i latou ma faamanuiaga mo le ʻauuso.”​—Sala. 84:7; 1 Pete. 4:11.

O se mea e matuā faalaeiauina ai le vaaia o uso faatoʻā tofia e pei o oe, o loo agaʻigaʻi i luma faaleagaga. Ua faapea mai Jason lea na taʻua i le amataga: “Talu ona avea aʻu o se toeaina, e anoanoaʻi mea ua ou aʻoaʻoina ma ua atiaʻe ai loʻu lagona mautinoa. O lea ua ou matuā olioli ai i loʻu tofiga ma vaai i ai o se faaeaga matagofie!”

Po o le a faaauau ona e agaʻigaʻi i luma faaleagaga? Ia fai ma ou sini le aʻoaʻoina o lesona mai iā Timoteo. O le faia faapea, o le a avea ai foʻi oe ma faamanuiaga mo tagata o le Atua.