1-3. (a) O le ā le luʻi o loo fesagaʻia e talavou uma? Aumai se faataʻitaʻiga. (Tagaʻi i le ata i luga aʻe o le matua.) (e) E faapefea ona taulima e talavou Kerisiano lenā luʻi?

SEʻI faapea o le a e malaga atu i se taulaga mamao mo se fuafuaga tāua. E manaʻomia ona e alu i se pasi, ma e umi le faigāmalaga. Ae ina ua e oo atu i le fale faatali pasi, ua faapopoleina oe i le tumu o tagata ma le tele o pasi. Peitaʻi o le itu e lelei ai, ua mautū lau filifiliga, o le saʻilia lea o le pasi e alu saʻo i le nofoaga o loo e fia alu i ai. Pe afai e sesē le pasi e te alu ai, o le a e lē taunuu la i le nofoaga o loo e fia alu i ai.

² E ono faatusa talavou i ni tagata o loo faatali mo se pasi. I le pei o na tagata, o loo iai talavou i se faigāmalaga umi i lenei olaga. E iai taimi e faapopoleina ai i latou i le tele o avanoa e maua ma filifiliga e tatau ona fai. E ui i lea, e mafai e outou talavou ona faia ni filifiliga, pe afai e tou te iloa lelei mea e tou te mananaʻo e fai i le olaga. O le ā la e tatau ona outou faia?

³ O le a taliina lenā fesili i lenei mataupu, e ala i le faalaeiau o talavou ina ia taulaʻi atu o latou olaga i le faafiafiaina o Ieova.  O lona uiga ia faaaofia Ieova i a latou filifiliga e fai i vala uma o le olaga, e pei o tulaga tau aʻoaʻoga, galuega, tiute tauave i aiga, ma isi mea. E aofia ai foʻi le aapa atu i sini faaleagaga. E mafai e talavou o loo taulaʻi atu pea i le auaunaga iā Ieova, ona mautinoa o le a ia faamanuia i latou i ni olaga taulau manuia.​—Faitau le Faataoto 16:3.

4. O le ā o le a tatou iloiloina i lenei mataupu?

⁴ O se mea lelei le faatutū o sini faaleagaga a o lāiti le fanau. O le a tatou iloiloina māfuaaga e tolu e tāua ai le faia faapea. O le a faaalia i māfuaaga muamua e lua, o le galue ina ia ausia sini faaleagaga, o le a faamalosia ai le faiā a se tasi ma Ieova. Ae o le a faamatilatila mai i le māfuaaga lona tolu, aogā o le taumafai e ausia sini faaleagaga a o lāiti lava.

5. O le ā le māfuaaga autū e faatutū ai sini faaleagaga?

⁵ O le māfuaaga autū e faatutū ai sini faaleagaga, ina ia faailoa atu ai iā Ieova lo tatou lotofaafetai i lona alofa ma mea ua ia faia mo i tatou. Na taʻua e le faisalamo: “E lelei ona faafetai atu iā Ieova . . . Auā ua e faafiafia iā te aʻu, Ieova e, ona o lau galuega; ua ou alaga fiafia atu foʻi ona o galuega a ou aao.” (Sala. 92:1, 4) I le avea ai o oe o se talavou, ia mafaufau i mea uma ua foaʻi mai e Ieova mo oe. O lou ola, o le upu moni, le Tusi Paia, le faapotopotoga, ma lou faamoemoe matagofie mo le lumanaʻi. O le faamuamua o mea faaleagaga, o se tasi lea o auala e faaalia ai le lotofaafetai i le Atua mo na faamanuiaga, ma atili ai ona e vavalalata atu iā te ia.

6. (a) O le ā le aafiaga o sini faaleagaga i la tatou faiā ma Ieova? (e) O ā sini e mafai ona faataatitia a o lāiti lava?

⁶ O le māfuaaga lona lua, o le taimi lava e amata ai ona e galue ina ia ausia ou sini faaleagaga, ua amata foʻi ona e faia se talaaga o galuega lelei i le silafaga a Ieova. O le faia faapea, o le a atili ai ona e vavalalata atu iā te ia. Na faapea mai le aposetolo o Paulo: “E lē amiolētonu le Atua e na te lē faagalogalo ai la outou galuega, ma le alofa ua outou faaali mai i lona suafa.” (Epe. 6:10) E mafai e le fanau ona faataatitia ni sini faaleagaga a o lāiti lava. E na o le 10 tausaga o Christine ina ua ia filifili e faitau e lē aunoa talaaga o soifuaga o Molimau a Ieova faamaoni. E 12 tausaga o Toby ae ia faatū se sini o le faitau o le Tusi Paia atoa a o leʻi papatiso. E 11 tausaga o Maxim ae e 10 tausaga o lona tuafafine o Noemi ina ua la papatiso. Ina ua māeʻa lenā, ona la galulue lea ina ia ausia lo la sini o le auaunaga i le Peteli. Ina ia fesoasoani iā i laʻua e taulaʻi atu pea i lenā sini, na la faapipii i le puipui o le fale se pepa talosaga mo le auaunaga i le Peteli. Aiseā e te lē mafaufau ai i ni sini e tāua iā te oe, ona e galue lea ina ia ausia?​—Faitau le Filipi 1:10, 11.

7, 8. (a) E faapefea i le faatutū o sini ona faafaigofie ai le faia o filifiliga? (e) Aiseā na filifili ai se tasi talavou e lē auai i se iunivesite?

⁷ O le māfuaaga lona tolu e faatutū ai sini a o lāiti lava, ona o le tele o filifiliga e fai. E tatau i talavou ona faia ni filifiliga e faatatau i tulaga tau aʻoaʻoga, galuega, ma isi vala. O le faia o filifiliga e tai pei o le filifili po o le ā le auala saʻo pe a oo atu i se magāala. E faigofie ona e filifilia le auala saʻo e uia, pe afai e te iloa le nofoaga o loo e fia alu i ai. I se tulaga talitutusa, e faigofie ona e faia ni filifiliga lelei pe afai e te iloa po o ā ou sini. Ua faapea mai le Faataoto 21:5: “O fuafuaga a le tagata toʻaga e manuia ai o ia.” O le vave ona e faia o ni fuafuaga a o e laʻitiiti e ala i le faatutū o sini lelei, o le vave foʻi lenā ona e taulau manuia. O le tulaga lenā na oo iā Damaris ina ua manaʻomia ona ia faia se filifiliga tāua a o talavou.

⁸ Na māeʻa aʻoga a Damaris i le kolisi, ma na ia maua ni togi maualuluga. Sa mafai ona ia taliaina se avanoa faasikolasipi e ave ai lana faalōia i se iunivesite, peitaʻi na ia filifili e faigaluega i se faletupe. O le ā le māfuaaga?  Ua faapea mai o ia: “A o oʻu laʻitiiti na fai ai laʻu filifiliga ou te fia paeonia. O lona uiga e manaʻomia ona ou galue faavaitaimi. Na ono tele ni aʻu tupe e maua pe ana maua soʻu faailoga mai i se iunivesite i le faalōia, ae o lona uiga o le a faigatā ai ona saʻili saʻu galuega faavaitaimi.” Ua 20 nei tausaga o paeonia Damaris. Pe e manatu o ia e saʻo lona sini na faataatia ma le filifiliga na ia faia a o talavou? Ua ia faapea mai: “I laʻu galuega i le faletupe, e tele taimi e matou te feutagaʻi ai ma lōia. E latou te faia galuega na semanū ou te faia pe ana ave laʻu faalōia. E ui i lea, o le toʻatele o i latou e lē o fiafia i a latou galuega. O lea, o laʻu filifiliga ina ia paeonia na fesoasoani iā te aʻu e ʻalofia ai lagona lē fiafia i le galue ai i se galuega totogi, ae maua ai le fiafia e auauna iā Ieova mo le tele o tausaga.”

9. Aiseā e alagatatau ai ona avatu le faamālō i a tatou talavou?

⁹ E alagatatau ona avatu le faamālō māfana i le faitau afe o talavou i faapotopotoga i le lalolagi aoao. Ua latou faamuamua Ieova i o latou olaga ma taulaʻi atu i sini faaleagaga. Ua latou maua le tele o le fiafia ma taumafai e mulimuli i le taʻitaʻiga a Ieova i vala uma o le olaga. E aofia ai tulaga tau aʻoaʻoga, galuega, ma le olaga i le aiga. Na tusi Solomona: ʻIa e faatuatua iā Ieova ma lou lotoatoa. Ia e manatua o ia i ou ala uma, ona ia faasaʻoina lea o ou ala.’ (Faata. 3:5, 6) E tautele iā Ieova talavou i faapotopotoga Kerisiano, ma e alofa faapelepele iā i latou. E na te puipuia, taʻitaʻia, ma faamanuia iā i latou.

10. (a) Aiseā e tatau ai ona faamuamua le faiva i o tatou olaga? (e) E faapefea ona faaleleia le auala e tatou te molimau atu ai i isi?

¹⁰ O se talavou e taulaʻi atu lona olaga i le faafiafiaina o Ieova, e matuā uaʻi atu o ia i le faiva. Na faamamafa e Iesu Keriso le manatu lenei: ʻE ao ona muaʻi talaʻiina atu le tala lelei.’ (Mare. 13:10) Talu ai ua matuā faanatinati le galuega talaʻi, o lea e tatau ai ona faamuamua i o tatou olaga. Pe e mafai ona e faataatia se sini o le faatele o le taimi i le faiva? Pe e mafai ona e paeonia? Ae faapefea pe afai e lē tele sou fiafia e maua i le galuega talaʻi? E faapefea ona faaleleia le auala e te molimau atu ai i isi? O auala nei e lua e fesoasoani iā te oe: Ia sauniuni lelei, ma ia aua le fiu e faasoa atu i isi mea ua e aʻoaʻoina. E ono faateʻia oe i le tele o le fiafia e te maua pe a talaʻi atu i isi.

11, 12. (a) O le ā e mafai ona fai e talavou e sauniuni ai e avatu se molimau? (e) Na faapefea ona faaaogā e se talavou se avanoa e avatu ai se molimau i le aʻoga?

¹¹ E mafai ona amata au saʻiliʻiliga e ala i le suʻeina o tali i fesili e masani ona fai mai e tamaiti i le aʻoga e pei o le, “O le ā sou iloa, po o manatu mamafa mai le Atua i o tatou mafatiaga?” O loo iai i la tatou upega tafaʻilagi o le jw.org mataupu e fesoasoani i talavou i le auala e tali atu ai i lenā fesili. Tagaʻi i le AʻOAʻOGA A LE TUSI PAIA > TALAVOU > FESOASOANI MO SUʻESUʻEGA > O LE Ā LE AʻOAʻOGA MONI E UIGA I LE ATUA? (VAEGA 1) O i inā e te maua ai se fesoasoani mo suʻesuʻega ua faaulutalaina, “Po o Manatu Mamafa Mai le Atua i o Tatou Mafatiaga?” O le a fesoasoani lenā iā te oe e sauniuni ai se tali e tusa ai o lenā fesili. O loo aumaia ai mau e mafai ona e faaaogā pe a faamatala atu ou talitonuga, e pei o le Iakopo 1:13, Kenese 6:5, 6, ma le 1 Ioane 4:8. O le faaaogāina o na fesoasoani mo suʻesuʻega, o le a mafai ai ona e sauniuni lelei e avatu se tali i ni fesili e fai mai.​—Faitau le 1 Peteru 3:15.

¹² Pe a maua se avanoa, ia faalaeiau tamaiti tou te aʻoʻoga faatasi e tagaʻi i le jw.org. O le mea lenā sa faia e Luca. Sa talanoaina i le vasega le mataupu e faatatau i lotu eseese, ma na mātau e Luca i le tusi aʻoga ni manatu sesē e faatatau i Molimau a Ieova. E ui lava sa tau faatalatū o ia, ae na ia talosaga atu i le  faiaʻoga pe mafai ona ia faamatala atu māfuaaga e sesē ai na manatu, ma sa faataga o ia e le faiaʻoga. E lē gata sa faamatala atu e Luca ona talitonuga, ae na ia faaali atu foʻi i le vasega atoa la tatou upega tafaʻilagi. O lea na faapea atu ai loa le faiaʻoga i le vasega, o la latou meaaʻoga o le matamata lea i le vitiō o ata tusi, Tetee Atu i Ē Fia Malolosi ae Aua le Faamisa. Sa matuā fiafia Luca ona sa mafai ona ia avatu se molimau lelei.

13. Aiseā e lē tatau ai ona tatou faavaivai pe a tulaʻi mai faafitauli?

¹³ Aua e te lotovaivai e tusa pe e te feagai ma faigatā i nisi taimi. (2 Timo. 4:2) Pe a tulaʻi mai faafitauli, ia e galue pea ina ia ausia ou sini. O se faaaʻoaʻoga, ina ua 17 tausaga o Katharina na fai ma ona sini le talaʻi i tagata taʻitoʻatasi e latou te faigaluega faatasi. Na iai se tasi na faifai atu iā te ia i le tele o taimi, ae e leʻi faavaivai ai Katharina. O ana amioga lelei sa iai se aafiaga lelei i se isi tagata faigaluega e igoa iā Hans. O le iʻuga, na faitau Hans i a tatou lomiga, suʻesuʻe le Tusi Paia, ma papatisoina o ia. Ae o le taimi lenā ua ese le vaipanoa ua nofo ai Katharina, ma e na te leʻi iloa na mea na tutupu. I le 13 tausaga mulimuli ane a o auai Katharina ma lona aiga i se sauniga, na faateʻia o ia i le faasilasila mai o le latou failauga asiasi o Hans. Seʻi mafaufau i lona fiafia ona o lenei mea. Maʻeu le lelei o lenei iʻuga, ona e leʻi faavaivai Katharina i lona sini o le talaʻi atu lea i ē na latou faigaluega faatasi!

14, 15. (a) O le ā e tatau ona manatua e talavou pe a tulaʻi mai faaosoosoga? (e) O ā auala e mafai ona fesoasoani i talavou e tali atu ai i faaosoosoga?

¹⁴ O lenei mataupu ua faalaeiauina ai oe ina ia taulaʻi atu lou olaga i le auaunaga iā Ieova. O lona uiga ia faamuamua i lou olaga sini faaleagaga. Atonu o loo faamuamua e isi talavou e tou te tupulaga mea faafiafia o lenei olaga, ma e mautinoa e latou te mananaʻo ina ia e faia foʻi faapea. E iai le taimi e manaʻomia ai ona e faailoa atu iā i latou, e lē toe suia filifiliga ua uma ona e faia. Aua neʻi avea faaosoosoga mai i isi talavou e tosina ese ai oe mai i ou sini. Pe a toe mafaufau i le faataʻitaʻiga i le pasi lea na taʻua i le amataga, e te lē filifilia so o se pasi ona o loo e vaai atu e foliga mai e fiafia le pasese.

 ¹⁵ E tele auala e mafai ona e tali atu ai i faaosoosoga mai i isi talavou. O se faataʻitaʻiga, ia ʻalofia tulaga e faigofie ona faaosoosoina ai oe. (Faata. 22:3) Ia e mafaufau i iʻuga faanoanoa e oo i ai pe a e faataʻitaʻi i amioga lē lelei a isi. (Kala. 6:7) O se isi fesoasoani, o lou amanaʻia lea o le mea moni e te manaʻomia fautuaga. O le lotomaulalo, o le a faigofie ai ona e talia fautuaga mai i ou mātua ma ē taʻumatuaina faaleagaga i le faapotopotoga.​—Faitau le 1 Peteru 5:5, 6.

16. Ia faamatala se mea na tupu e iloa ai aogā o le lotomaulalo.

¹⁶ O le lotomaulalo na uunaʻia ai Christoph e talia fautuaga lelei. E leʻi umi talu ona papatiso o ia, ae amata loa ona toʻaga e toleni i se fale e fai ai faamalositino. Na tauanau o ia e isi talavou ina ia auai i la latou ʻautaalo. O lea, na ia talanoa atu ai i se toeaina e uiga i lea mataupu. Sa fai le toeaina iā Christoph, a o leʻi faia sana filifiliga ia mafaufau muamua i lamatiaga o le a oo i ai, e pei o le aafia lea i le uiga faatautavā. E ui i lea, sa auai pea Christoph i lenā ʻautaalo. E leʻi umi ae ia iloa le sauā ma le lē saogalemu o na taaloga. O lea na ia toe talanoa atu ai i isi toeaina, ma na latou avatu iā te ia fautuaga mai i le Tusi Paia. Na faapea mai Christoph: “Na auina mai e Ieova ni faufautua lelei, ma na ou faalogo iā te Ia, e ui na umi se taimi faatoʻā ou faia faapea.” Pe e te lotomaulalo e talia fautuaga aogā?

17, 18. (a) O le ā le finagalo o Ieova mo talavou i aso nei? (e) O le ā le tulaga faanoanoa e ono tulaʻi mai pe a avea se tasi ma tagata matua, ma e faapefea ona ʻalofia? Aumai se faaaʻoaʻoga.

¹⁷ Ua faapea mai le Failauga 11:9, “Le tauleʻaleʻa e [po o le tamaʻitaʻi e], inā olioli ia i lou talavou, ma ia fiafia lou loto i aso uma o lou [talavou].” O le mea moni e finagalo Ieova ina ia e olioli i lou olaga o se talavou. Na faamatilatila i lenei mataupu se tasi o auala e maua ai lenā olioli. Ia e taulaʻi atu pea i sini faaleagaga, e ala i le faaaofia o Ieova i au fuafuaga uma e fai. O le vave ona e faia faapea, o le vave foʻi lenā ona e mātauina o le taʻitaʻiga, puipuiga, ma faamanuiaga a Ieova. Ia mafaufau i fautuaga aogā uma e te maua i le Afioga a le Atua, ma ia faatatau le fautuaga lenei: “Ia e manatua o Lē e Sili na Foafoaina oe i aso o lou [talavou].”​—Fai. 12:1.

¹⁸ E vave ona tuputupu aʻe talavou ma avea ma tagata matutua. O le tulaga e faanoanoa ai, o le toʻatele e toe salamō i sini sa latou filifilia a o talavou, pe lagona foʻi le faanoanoa i le leai o ni sini. Peitaʻi, o talavou e taulaʻi atu pea i o latou sini faaleagaga i le taimi nei, o le a latou lagona le faamalieina moni pe a avea ma tagata matutua, ona o filifiliga sa latou faia a o talavou. O le tulaga lenā sa oo iā Mirjana, o sē sa talenia i taaloga a o talavou. Sa valaaulia o ia e tauvā i taaloga Olimepeka sa faia i le tau mālūlū. Ae na ia filifili e auai i le auaunaga faataimi atoa. Ua silia nei ma le 30 tausaga o loo iai pea Mirjana ma lana tane i le auaunaga faataimi atoa. Ua ia faapea mai: “O le tulaga taʻutaʻua, mamalu, malosi, ma ʻoa, o ni sini e lē tumau ma faatauvaa i lenei olaga. Ae o sini e sili ona lelei ma tumau, o le auauna lea i le Atua ma faia sou sao itiiti e fesoasoani ai i tagata i le itu faaleagaga.”

19. O ā aogā o le taulaʻi atu i sini faaleagaga a o talavou?

¹⁹ E alagatatau ona avatu le faamālō māfana i talavou i le faapotopotoga ona o le auala e latou te taulimaina ai nei luʻi, faapea le maumauaʻi ina ia taulaʻi atu o latou olaga e auauna iā Ieova. E faia faapea e talavou e ala i le aapa atu i sini faaleagaga, ma faamuamua le galuega talaʻi. E lē gata i lea, ua latou filifili e lē tosina ese i latou e lenei lalolagi. E mafai e talavou ona mautinoa e tauia a latou galuega mamafa. O loo latou maua le lagolagosua alofa a o latou uso ma tuafāfine, ma pe a tuuina atu a latou galuega iā Ieova, o le a matuā faatumauina a latou fuafuaga.