1. O fea na tatou maua ai le tomai e tautala ai?

 O LE tomai e tautala ai, o se meaalofa mai i lo tatou Atua alofa. O le taimi lava na uma ai ona foafoaina le uluaʻi tagata o Atamu, na ia faaaogāina ai lenei meaalofa e fesootaʻi atu ai i lona Tamā i le lagi. Na mafai foʻi ona ia faalautele atu upu e tautala ai, e ala i le faia o isi upu fou. Na faaaogā foʻi e Atamu lenā meaalofa e faaigoa ai manu uma, o se galuega na tuuina atu iā te ia. (Kene. 2:19) Ae maʻeu le faafiafiaina o ia ina ua talanoa atu mo le taimi muamua i se isi tagata, o lana avā lalelei o Eva!​—Kene. 2:22, 23.

2. Na faapefea ona faaaogā sesē le tautala i le taimi ua teʻa ma le taimi lenei?

² Na vave ona faaaogā sesē le meaalofa o le tautala. Na pepelo Satani le Tiapolo iā Eva, ma o lenā pepelo na māfua ai ona agasala ma lē lelei atoatoa ai tagata. (Kene. 3:1-4) Na faaaogā sesē e Atamu le meaalofa o le tautala, ina ua ia tuuaʻia Eva ma Ieova ona o lana agasala. (Kene. 3:12) Na pepelo Kaino iā Ieova ina ua uma ona ia fasiotia lona uso o Apelu. (Kene. 4:9) Mulimuli ane, na fatuina ai e Lameko o sē na tupuga mai iā Kaino se solo na faaalia ai faiga sauā i le taimi na ola ai. (Kene. 4:23, 24) Ae faapefea le tulaga o mea i aso nei? Ua tatou mātauina le fiafia o taʻitaʻi faapolotiki e faaaogā upu masoā i le lautele. E seāseā foʻi iai se ata tifaga e lē faaaogāina ai gagana masoā. E faalogo tamaiti aʻoga i gagana masoā i le aʻoga, ae faalogo tagata matutua i na gagana i fale faigaluega. E faanoanoa ona o le faaaogāina o gagana masoā, ua faailoa mai ai le matuā faaleagaina o tapulaa tauamio ma  le auala e tautatala ai, lea e tatou te vaaia i le lalolagi i aso nei.

3. O le ā le lamatiaga e tatau ona tatou faaeteete ai, ma o le ā o le a tatou iloiloina i lenei suʻesuʻega?

³ Pe a lē faaeteete, o le faalogo soo i gagana masoā e ono amata ai ona tatou tautatala i na gagana. Talu ai o i tatou o ni Kerisiano, e tatou te mananaʻo la e faafiafia Ieova, ma e sili atu mea e aofia ai nai lo le tau ina ʻalofia o le tautatala i gagana masoā. E tatou te mananaʻo e faaaogā lenei meaalofa mataʻina o le tautala e vivii ai i le Atua. I lenei suʻesuʻega, o le a tatou iloiloina ai auala e tatou te faia ai faapea (1) i le talaʻiga, (2) i sauniga a le faapotopotoga, ma le (3) i a tatou talanoaga i aso fai soo. Ae muamua seʻi o tatou iloiloina, pe aiseā e tāua ai iā Ieova le auala e tatou te tautatala ai.

4. I le Malaki 3:16, aiseā e tāua ai iā Ieova le auala e tatou te tautatala ai?

⁴ Faitau le Malaki 3:16. Pe e mafai ona e mafaufau i se māfuaaga ua tusia ai e Ieova i lana ʻtusi faamanatu,’ igoa o i latou e iloa i le auala e tautatala ai, e matataʻu ma manatunatu loloto i lona suafa? E faailoa mai i le auala e tatou te tautatala ai mea o loo i o tatou loto. Na fetalai Iesu: “O le tele o mea i le loto e tautala mai ai le gutu.” (Mata. 12:34) O mea e tatou te filifili e tautatala ai, e atagia ai le tele o lo tatou alofa mo Ieova. E finagalo Ieova ina ia maua e i latou e alolofa iā te ia le ola e faavavau i le lalolagi fou.

5. (a) O le ā le fesootaʻiga o la tatou tapuaʻiga ma le auala e tatou te tautatala ai? (e) E pei ona faailoa mai i le ata, o le ā e tatau ona tatou iloa i le auala e tatou te tautatala ai?

⁵ E faalagolago le talia e Ieova o la tatou tapuaʻiga, i le auala e tatou te tautatala ai. (Iako. 1:26) O nisi e lē alolofa i le Atua, e tautatala i se auala ita, inainā, faamaualuga ma mimita. (2 Timo. 3:1-5) E tatou te lē mananaʻo e pei o i latou. E tatou te naunau e faafiafia Ieova i le auala e tautatala ai. Ae pe e fiafia Ieova pe a agalelei le auala e tatou te tautatala ai i sauniga a le faapotopotoga po o le galuega talaʻi, ae e inainā ma lē alofa le auala e tautatala ai i o tatou aiga?​—1 Pete. 3:7.

6. O ā iʻuga lelei o le auala na tautala ai Kimberly?

 ⁶ Pe a faaaogā lelei le meaalofa o le tautala, ua faailoa atu ai o i tatou o tagata tapuaʻi o Ieova. E fesoasoani foʻi i o tatou tuaoi e iloa le ʻeseesega o lē o loo auauna i le Atua ma lē e lē o auauna iā te ia.’ (Mala. 3:18) Seʻi mātau le moni o lenei manatu i le mea na tupu i se tuafafine e igoa iā Kimberly. b Na galulue faatasi Kimberly ma se teineitiiti o lana vasega i se mataupu i le aʻoga. Ina ua uma ona la galulue i lenā mataupu, na mātauina ai e le teineitiiti le ese o Kimberly i isi tamaiti o le vasega. E na te lē faia tala o isi tamaiti ae ese le faalaeiau o le auala e talanoa ai, ma e lē tautala foʻi i upu masoā. Na fia iloa e lenā teineitiiti le māfuaaga e ese ai Kimberly. Mulimuli ane na manaʻo ai e fai sana suʻesuʻega faale-Tusi Paia. Maʻeu le faafiafiaina o Ieova pe a tatou tautatala i se auala e tosina mai ai tagata i le upu moni!

7. E faapefea ona e faaaogāina le meaalofa o le tautala mai le Atua?

⁷ E tatou te mananaʻo uma e tautatala i se auala e faamamaluina ai Ieova, ma vavalalata ai i o tatou uso ma tuafāfine. O lea, seʻi o tatou iloiloina nisi o auala aogā e mafai ona avea ai pea i tatou ma ʻfaaaʻoaʻoga i le tautala.’

8. O le ā le faaaʻoaʻoga na faataatia e Iesu mo i tatou i le auala na tautala ai i le galuega talaʻi?

⁸ Ia tautala ma le agalelei ma faaaloalo pe a faatigā mai se tasi. I le taimi o le faiva a Iesu, na tuuaʻia sesē ai o ia o se tagata inu tele, ʻai tele, o sē e auauna i le Tiapolo, e soli Sapati, ma e upuleaga i le Atua. (Mata. 11:19; 26:65; Luka 11:15; Ioa. 9:16) Ae e leʻi ita le auala na tali atu ai Iesu. E lē tatau foʻi ona tatou tali atu ma le ita pe a inainā mai se tagata iā i tatou. (1 Pete. 2:21-23) O le mea moni, e lē faigofie le faia faapea. (Iako. 3:2) O le ā e mafai ona fesoasoani iā i tatou?

9. O le ā e fesoasoani iā i tatou e pulea ai le auala e tatou te tautatala ai pe a talaʻi?

⁹ Ia taumafai e ʻalofia le tali atu ma le ita pe a tautala lē mafaufau mai se tagata iā i tatou. Na faapea mai se uso e igoa iā Sam, “Ou te taumafai e uaʻi atu i le manaʻomia ona faalogo o le tagata e ona le fale i le upu moni, ma le avanoa e mafai ai ona suia ona uiga.” O nisi taimi, e ita se tagata e ona le fale ona e sesē le taimi ua tatou ō atu ai. Pe a ita mai se tagata iā i tatou, e mafai ona tatou faia le mea na faia e se tuafafine e igoa iā Lucia. Ia fai se tatalo puupuu e talosaga ai le fesoasoani a Ieova ina ia tatou maua ai pea le toʻa, ma ʻalofia le tali atu i se auala lē agalelei ma lē faaaloalo.

10. I le 1 Timoteo 4:13, o le ā le sini e tatau ona iā i tatou?

 ¹⁰ Ia avea pea ma faiaʻoga tomai. O Timoteo o se Kerisiano agavaa i le aʻoaʻo atu, peitaʻi na manaʻomia ona faaleleia pea lana aʻoaʻo. (Faitau le 1 Timoteo 4:13.) E faapefea ona faaleleia pea o tatou tomai o ni faiaʻoga i le galuega talaʻi? E tatau ona tatou sauniuni lelei. E tatou te lotofaafetai ona o le tele o meafaigaluega ua fesoasoani iā i tatou, ina ia faaleleia ai pea o tatou tomai o ni faiaʻoga. E te maua aogā i le suʻesuʻeina o le polosiua, Ia Faaleleia Atili Lau Faitau ma le Aʻoaʻo Atu ma le “Toleniga mo le Faiva i le Fanua” o se vaega o le Polokalame mo le Sauniga o le Faiva ma le Olaga Faa-Kerisiano. Po o e faaaogāina lelei na meafaigaluega? Pe a tatou sauniuni lelei, o le a tuuitiitia ai lo tatou popole ma tautatala atu ai ma le mautinoa.

11. E faapefea ona avea isi Kerisiano ma faiaʻoga tomai?

¹¹ E mafai foʻi ona avea i tatou ma faiaʻoga tomai, e ala i le mātauina o tomai o isi i le faapotopotoga ma aʻoaʻo mai ai. Na fesili ifo Sam lea na taʻua muamua: Aiseā e avea ai isi Kerisiano ma faiaʻoga tomai? Na ia mātauina le auala e aʻoaʻo ai na Kerisiano ma taumafai e faaaʻoaʻo i a latou auala. Na uaʻi faapitoa atu le tuafafine o Talia i le auala e fai ai e failauga tomai a latou lauga i le lautele. O le faia faapea, na ia iloa ai le auala e faamatala ma fefulifulisaʻi ai i se mataupu e masani ona fesili ai tagata i le talaʻiga.

12. O ā luʻi e fesagaʻia e isi?

¹² E mafai ona tatou saosaolaumea uma i le sologa lelei o sauniga a le faapotopotoga, e ala i lo tatou usuina faatasi o pese ma fai ni tali ua saunia lelei. (Sala. 22:22) O se luʻi mo nisi le usuina o pese ma faia se tali i luma o tagata. Pe e faapena oe? Pe afai o lea, e te fia iloa la po o le ā na fesoasoani i isi ina ia foʻia ai le fefe.

13. O le ā e fesoasoani iā te oe ina ia pese ai mai le loto i sauniga?

¹³ Ia pese mai le loto. O le māfuaaga e sili ona tāua e tatou te pepese ai i sauniga, ina ia vivii ai iā Ieova. E manatu le tuafafine o Sara e lē o ia o se tagata e lelei tele i le pese, peitaʻi e manaʻo e pese ina ia vivii ai iā Ieova. Ina ia faia faapea, na fesoasoani iā te ia le faataʻitaʻi o le usuina o pese i le fale, e pei lava ona sauniuni mo isi vaega o le sauniga. E na te faataʻitaʻi le usuina o pese, ma taumafai e iloa le fesootaʻiga o upu o le pese ma le mataupu o le a talanoaina i le sauniga. Na ia faapea mai: “O le faia faapea, na fesoasoani ai iā te aʻu ina ia uaʻi atu i upu o le pese ae lē o loʻu leo.”

14. Pe a faigatā ona fai se tali i sauniga, o le ā e fesoasoani iā te oe?

¹⁴ Ia fai ma masani le fai o se tali. O le mea moni, e matuā faigatā lava i nisi ona faia lenā mea. Ua faapea mai Talia lea na taʻua muamua: “Ou te aafia i le matuā popole pe a faatasitasi  ma tagata, e ui na lē iloa mai e isi ona e toʻa le auala ou te tautala ai. O lea e matuā faigatā lava iā te aʻu ona tali i sauniga.” E ui i lea, e leʻi taofia ai le faia o tali a Talia i le sauniga. A o sauniuni mo le sauniga, e na te manatua pea o le tali muamua e tatau ona puupuu ma ia tali saʻo i le fesili. Na ia faapea mai: “O lona uiga la, e lelei pe a puupuu, faigofie ma maua le manatu tāua i laʻu tali, auā o le ituaiga tali lenā o loo manaʻo ai le fai suʻesuʻega.”

15. O le ā e tatau ona tatou manatuaina e faatatau i a tatou tali?

¹⁵ E oo foʻi i Kerisiano e lē matamumuli pe faigofie ona tali i sauniga, e faatalatū lava e fai se tali. Aiseā? Ua faapea mai se tuafafine e igoa iā Juliet: “O nisi taimi ou te faatalatū ai e tali, ona ou te popole e faigofie tele laʻu tali ma e lē lelei.” Ae ia manatua, e finagalo Ieova ia tatou faia le tali sili e tatou te mafaia. c E na te matuā talisapaia lo tatou maumauaʻi e vivii atu iā te ia i sauniga a le faapotopotoga, ma aua le faatagaina lo tatou popole e taofia ai i tatou.

16. O le ā le ituaiga tautala e tatau ona tatou ʻalofia?

¹⁶ Ia ʻalofia “upu masoā” uma. (Efe. 4:31) E pei ona taʻua i le amataga, e lē tautala se Kerisiano i ni upu masoā. Ae e iai ituaiga upu masoā e faigatā ona iloa e tatau ona tatou faaeteete ai. O se faataʻitaʻiga, e tatau ona faaeteete i le faia o faatusatusaga lē talafeagai pe a talanoa e faatatau i tagata mai isi aganuu, ituaiga ma atunuu e ō mai ai. E lē gata i lea, e tatou te lē mananaʻo e faatigā i isi e ala i le faia o faamatalaga tutui. Na taʻutino mai se uso: “E iai taimi na ou faia ai upu tutui ma lē mafaufau, na ou manatu e mālie ma e lē afāina, peitaʻi e lē logolelei na upu ma na tigā ai faalogona o isi. A o faagasolo tausaga, na fesoasoani malosi mai loʻu toʻalua e ala i le taʻu mai iā te aʻu pe a na o i maʻua, pe a ou faia se tala lē mafaufau na faatigā ai iā te ia ma isi.”

17. E tusa ai ma le Efeso 4:29, e faapefea ona tatou atiaʻe isi?

¹⁷ Ia tautala i se auala e atiaʻe ai isi. Ia vave ona faamālō atu i isi nai lo le faitio ma muimui. (Faitau le Efeso 4:29.) E tele mea na tatau ona lotofaafetai ai tagata Isaraelu, ae na fai ma a latou masani le faitio. E iai aafiaga leaga i isi o le agaga faitio. Atonu e te manatua le tala lē lelei na aumai e sipai e toʻasefulu, na māfua ai ona “muimui le fanauga a Isaraelu uma iā Mose ma Arona.” (Nu. 13:31–14:4) Ae pe a tatou faamālō atu o le a matuā fiafia ai tagata uma. E tatou te mautinoa na matuā faamalosia le afafine o Iefata e tumau  i lona tofiga, ona o le faamālō a ana uō teine. (Faama. 11:40) Na faapea mai Sara lea na taʻua muamua: “Pe a tatou faamālō atu, ua tatou faia ai se mea e lagona ai e isi le alofa o Ieova ma e iai lo latou tulaga i lana faalapotopotoga.” O lea, ia saʻili avanoa e faamālō atu ai mai le loto.

18. I le Salamo 15:1, 2, aiseā e tatau ai ona tatou tautatala faamaoni, ma o le ā e aofia ai?

¹⁸ Ia tautatala i upu moni. E lē mafai ona tatou faafiafiaina Ieova pe a tautatala i upu pepelo. E ʻinoʻino o ia i pepelo uma. (Faata. 6:16, 17) E ui e toʻatele tagata i aso nei e latou te manatu o le pepelo o se vaega masani o talanoaga, ae e tatou te ʻalofia ona e ʻinoʻino i ai Ieova. (Faitau le Salamo 15:1, 2.) E tatou te ʻalofia le faia o tala pepelo e faaleaga ai isi, ma e tatou te ʻalofia foʻi le faia ma le iloa o se tala pepelo e faasesē ai manatu o isi.

19. O le ā le isi lapataʻiga e tatau ona tatou manatua?

¹⁹ Ia ʻalofia le faasalalau atu o tala taufaaleaga. (Faata. 25:23; 2 Tesa. 3:11) Na faamatala e Juliet lea na taʻua muamua aafiaga o tala taufaaleaga iā te ia. Na faapea mai o ia: “O le faalogo i tala taufaaleaga e faavaivaia ai, ma māfua ai ona ou lē toe talitonuina le tagata o loo faia na tala. E faapefea ona ou iloa e na te lē o faaleagaina aʻu i se isi?” Pe a e mātauina ua amata ona fai ni tala taufaaleaga i se talanoaga, ia taumafai e sui i se talanoaga e atiaʻe ai.​—Kolo. 4:6.

20. O le ā ua tatou maumauaʻi e fai i la tatou tautala?

²⁰ Talu ai ua tatou ola i se lalolagi o loo taatele ai le faia o tala leaga, e tatau la ona tatou taumafai malosi ia faafiafia Ieova i a tatou tala. Ia manatua, o le tautala o se meaalofa mai iā Ieova, ma e tāua iā te ia le auala e tatou te faaaogāina ai. O le a ia faamanuia i a tatou taumafaiga faamaoni, ina ia faaaogā la tatou tautala i se auala lelei i le galuega talaʻi, i a tatou sauniga ma a tatou talanoaga i aso fai soo. Pe a faamutaina taaʻiga a lenei lalolagi amioleaga, o le a matuā faigofie ona faamamaluina Ieova i la tatou tautala. (Iuta 15) Ae i le taimi lenei, seʻi o tatou maumauaʻi e faafiafiaina Ieova i ʻupu a o tatou gutu.’​—Sala. 19:14.