I lenā tulaga e vaai le faapotopotoga i lana faaipoipoga muamua ua faamutaina ina ua toe faaipoipo lenā tamāloa. E vaai foʻi le faapotopotoga i le faaipoipoga fou ua aloaʻia. Seʻi o tatou iloiloina le fetalaiga a Iesu e faatatau i le tatalaina o faaipoipoga ma le toe faaipoipo, ina ia tatou malamalama ai i māfuaaga o lenei faaiʻuga.

Na faailoa mai e Iesu i le Mataio 19:9 le māfuaaga faale-Tusi Paia e faamuta ai se faaipoipoga. Na fetalai o ia: “Ai se tasi e faateʻa i lana avā ae e leʻi faitaaga lana avā, ma toe faaipoipo i se isi fafine, ua mulilua o ia.” Ua tatou aʻoaʻoina mai i upu a Iesu (1) e na o le pau le māfuaaga faale-Tusi Paia e tatala ai se faaipoipoga o le mulilua ma le (2) o se tamāloa e na te faateʻa i lana avā e aunoa ma lenā māfuaaga faale-Tusi Paia ae toe faaipoipo, ua mulilua o ia. a

Pe e uiga atu upu a Iesu, ua iai i se tamāloa e faia le mulilua ma tatala le faaipoipoga le saʻolotoga faale-Tusi Paia e toe faaipoipo ai? Leai. Pe a mulilua se paaga faaipoipo, e filifili le paaga e leai sana agasala pe e na te faamagaloina pe teena le paaga faimea sesē. Pe a teena o ia ma tatala faaletulafono le faaipoipoga, o lona uiga ua saʻoloto uma i laʻua e toe faaipoipo pe a uma ona tatala le faaipoipoga.

I le isi itu, atonu e manaʻo moni lava le paaga e leai sana agasala e faasao le faaipoipoga ma e lotomalie o ia e faamagalo lana paaga. Ae faapefea pe afai e teena e le paaga faimea sesē le faamagaloga a lana avā, ma faia e ia lava le tatalaina faaletulafono o le faaipoipoga? Talu ai ona e lotomalie le avā e faamagalo lana tane ma faasao le faaipoipoga, e lē saʻoloto faale-Tusi Paia la le tane e toe faaipoipo. Pe afai e manaʻo lava le tane e uia lenā ala e lē faale-Tusi Paia ma faaipoipo e ui e lē o iā te ia se saʻolotoga faale-Tusi Paia e faia faapea, ua ia toe faia le mulilua. O lea o le a toe taulimaina ai e se komiti faafaamasinoga le agasala matuiā a lenā tagata.​—1 Kori. 5:1, 2; 6:9, 10.

Pe afai e toe faaipoipo se tane e lē o iā te ia se saʻolotoga faale-Tusi Paia e faaipoipo ai, o le ā le vaaiga a le faapotopotoga i lana faaipoipoga muamua ma le faaipoipoga fou? Po o aogā pea le faaipoipoga muamua e tusa ai ma tapulaa a le Tusi Paia? Po o mafai pea ona faamagalo pe teena e le paaga e leʻi faimea sesē lana tane muamua? Po o se mulilua le faaipoipoga fou?

I le taimi ua teʻa na vaai le faapotopotoga i le faaipoipoga fou o se mulilua pe afai o loo soifua pea le paaga e leʻi faimea sesē, e leʻi toe faaipoipo ma e na te lē faia le faitaaga. Peitaʻi, e leʻi taʻua e Iesu le paaga e leʻi faia se mea sesē ina ua ia talanoaina le tatalaina o le faaipoipoga ma toe faaipoipo. Ae na ia faamatalaina mai, o se tane e na te faateʻa i lana avā e aunoa ma se māfuaaga faale-Tusi Paia ma toe faaipoipo, ua ia faia le mulilua. I lenā tulaga, o le tatalaina o le faaipoipoga ma le toe faaipoipo o le mulilua lenā iā Iesu, ma ua faamuta ai le faaipoipoga muamua.

Pe a faamuta le faaipoipoga ona ua tatala ma toe faaipoipo, ua lē toe mafai e le paaga e leʻi  faia se mea sesē ona filifili pe faamagalo pe teena lana tane muamua. O lea, ua lē toe avea ai o se avega mamafa i le avā le filifili pe faamagalo pe teena lana tane muamua. E lē gata i lea, e tusa pe maliu, toe faaipoipo pe faitaaga le paaga e leʻi faia se mea sesē, e lē suia ai le vaaiga a le faapotopotoga i le faaipoipoga fou. b

I le faataʻitaʻiga na talanoaina i luga, na faia e le tane le mulilua na māfua ai ona tatala le faaipoipoga. Ae faapefea pe afai e leʻi faia e le tane le mulilua ae ua ia tatalaina le faaipoipoga ma toe faaipoipo? E faapefea pe afai e leʻi faia e le tane le faitaaga a o leʻi tatalaina le faaipoipoga, ae na ia faia le faitaaga ina ua uma ona tatala le faaipoipoga ma toe faaipoipo e ui ina lotomalie lana avā e faamagalo? I na faataʻitaʻiga uma, o le tatalaina o le faaipoipoga ma toe faaipoipo, o le mulilua lava lenā ma ua faamuta ai le faaipoipoga muamua. O le faaipoipoga fou o se faiā ua faavaeina faaletulafono. E pei ona taʻua i Le Olomatamata faa-peretania o Novema  15, 1979 itu. 32, “ua iai nei lenā tane i se faaipoipoga fou, o lea la e lē faigofie ona ia faamutaina lenā faaipoipoga ma toe foʻi i lana avā muamua. Ua faamutaina le faaipoipoga muamua ina ua tatala, faia le mulilua ma toe faaipoipo.”

O lenei toe fetuunaʻiga i lo tatou malamalamaga e lē o faalēaogāina ai le paia o le faaipoipoga, pe faaitiitia ai le matuiā o le mulilua. O se tane e na te faateʻa i lana avā e aunoa ma se māfuaaga faale-Tusi Paia ma toe faaipoipo ae lē o iā te ia le saʻolotoga faale-Tusi Paia e faia ai faapea, e taulima e se komiti faafaamasinoga a le faapotopotoga lenā mataupu o se mulilua. (Pe afai o se Kerisiano le paaga faaipoipo fou, e taulima foʻi e se komiti faafaamasinoga lona tulaga o le faia o le mulilua.) E ui e lē vaai le faapotopotoga i le faaipoipoga fou o se mulilua, ae e lē mafai ona agavaa lenā tane mo faaeaga faapitoa i le faapotopotoga mo le tele o tausaga, seʻi vaganā ai ua umi se taimi ma ua galo i le faapotopotoga lona talaaga leaga po o le taʻuleagaina o le faapotopotoga i lana agasala. A o leʻi avatu i lenā tane so o se faaeaga i le auaunaga, e iloilo e toeaina le tulaga o le avā muamua lea na ia lē faamaoni ai ma tulaga o fanau lāiti atonu na tuulafoaʻia e lenā tane fai mea sesē.​—Mala. 2:14-16.

E mataʻutia āuga o le tatalaina o le faaipoipoga ma toe faaipoipo e aunoa ma se māfuaaga faale-Tusi Paia. O lea o se mea atamai i Kerisiano ona atiaʻe le silafaga a Ieova i le faatulagaga o le faaipoipoga, o se mea e paia.​—Fai. 5:4, 5; Epe. 13:4.