1. O le ā le parataiso faaleagaga, ma o le ā e tatau ona tatou maumauaʻi e fai?

 O LOO iai se parataiso i le lalolagi i aso nei ua faatumulia i le faitau miliona o tagata e galulue mamafa i le faia o galuega lelei, ma o loo olioli i le filemu moni. E maumauaʻi i latou o loo iai i lenei parataiso e aua neʻi toe ō ese mai ai. E latou te mananaʻo foʻi e fesoasoani i le toʻatele o tagata e mafai ai, ina ia latou iai faatasi i lenei siʻomaga matagofie. O le ā lenā siʻomaga? O le parataiso faaleagaga. a

2. O le ā le tulaga e mataʻina ai le parataiso faaleagaga?

² O le mea e mataʻina ai, ona ua faavaeina e Ieova se siʻomaga e filemu ma autasi mo ona tagata, e ui o loo latou ola i se lalolagi amioleaga ma feʻainaʻi o loo pulea e Satani. (1 Ioa. 5:19; Faaa. 12:12) Ua silafia e lo tatou Atua alofa mafatiaga o loo tatou fesagaʻia ona o lenei faiga o mea, ma ua ia saunia le puipuiga e tatou te manaʻomia ina ia malolosi ai pea faaleagaga. Ua faamatalaina i le Tusi Paia le parataiso faaleagaga o se “sulufaʻiga” malupuipuia, ma o se “togālaau ua faasūsūina lelei.” (Isa. 4:6; 58:11) O le faamanuia a Ieova e mafai ai e i latou o loo ola i lenā parataiso ona lagona le fiafia ma le malupuipuia, e ui i nei aso e sili ona faigatā.—Isa. 54:14; 2 Timo. 3:1.

3. O le ā le faataunuuga muamua o le Isaia mataupu e 65?

³ Na faaaogā e Ieova le perofeta o Isaia e faamatala le ituaiga olaga o le a iai mo i latou e ola i le parataiso faaleagaga. O loo  taʻua lenā faamatalaga i le Isaia mataupu e 65, lea na iai lona faataunuuga muamua i le 537 T.L.M. O le taimi lenā na faasaʻoloto ai mai i Papelonia tagata Iutaia ua salamō, ma latou toe foʻi ai i lo latou atunuu. Na faamanuia e Ieova ona tagata ma fesoasoani iā i latou e toe faamatagofie le aai ua faatafunaina o Ierusalema, ma toe fausia le malumalu e avea ma nofoaga autū o le tapuaʻiga moni i Isaraelu.—Isa. 51:11; Saka. 8:3.

4. O le ā le faataunuuga i aso nei o le Isaia mataupu e 65?

⁴ Na amata le faataunuuga lona lua o le valoaga a Isaia i le 1919 T.A., ina ua faasaʻoloto tagata tapuaʻi o Ieova i aso nei mai iā Papelonia le Aai Tele. Ona amata loa lea ona faalautele atu le parataiso faaleagaga i le lalolagi atoa. Na faia aʻe le tele o faapotopotoga i tagata talaʻi maelega o le Malo, ma na latou faaalia uiga faaleagaga. O tane ma fafine sa faia amioga sauā ma faaalia uiga faamanu, ua “oofu i le tagata fou na foafoaina e tusa ma le finagalo o le Atua.” (Efe. 4:24) O le mea moni, o le tele o faamanuiaga na faamatalaina e Isaia, o le a faataunuuina moni lava i le lalolagi fou i le lumanaʻi. Peitaʻi, e tele foʻi faamanuiaga o loo tatou olioli ai i le taimi lenei. O lea, seʻi iloilo aogā e tatou te maua i le iai i le parataiso faaleagaga, ma pe aiseā e lē tatau ai ona tatou ō ese mai ai.

O AOGĀ O LE IAI I LE PARATAISO FAALEAGAGA

5. E tusa ai ma le Isaia 65:​13, o ā faamanuiaga o loo tatou mauaina i le parataiso faaleagaga?

⁵ Malosi ma faafouina ai. E telē se faaeseesega na faamatalaina i le valoaga a Isaia, e faatatau i le auala e ola ai i latou o loo iai i le parataiso faaleagaga, ma i latou e lē o iai i lenā parataiso. (Faitau le Isaia 65:13.) E anoanoaʻi sauniuniga ua aumai e Ieova e faamalie ai manaʻoga faaleagaga o ona tagata tapuaʻi. Ua tatou maua lona agaga paia, o lana Afioga tusia, ma le tele o meaʻai faaleagaga ina ia mafai ona tatou “aai, . . . feinu, . . . [ma] fiafia.” (Faatusatusa i le Faaaliga 22:17.) I se faaeseesega, o i latou e lē o iai i le parataiso faaleagaga, e latou te “fia aai . . . , fia feinu . . . , [ma] māsiasi.” O lea, e lē o faamalieina o latou manaʻoga faaleagaga.—Amo. 8:11.

6. O le ā le auala o loo faamatala ai i le Ioelu 2:​21-24 sauniuniga faaleagaga ua tatou maua, ma e faapefea ona aogā iā i tatou?

⁶ Na taʻua i le valoaga a Ioelu mea e masani ona faaaogā e fai ai meaʻai e pei o saito, uaina, ma le suāuu olive. O na mea e faaalia ai le aaomafola o Ieova i lona saunia o mea e manaʻomia e Ona tagata, e aofia ai meaʻai faaleagaga. (Ioe. 2:​21-24) E na te faia faapea e ala mai i le Tusi Paia, a tatou lomiga faale-Tusi Paia, o la tatou Upega tafaʻilagi, faapea sauniga, fonotaga, ma tauaofiaga. Pe a tatou faaaogāina nei sauniuniga faaleagaga i aso taʻitasi, o le a faateleina lo tatou malosi ma atili ai ona faafouina i tatou.

7. E faapefea ona tatou maua se ʻloto e lelei’? (Isaia 65:14)

⁷ Fiafia ma faamalieina. E ʻalalaga fiafia’ auauna a le Atua ona ua faatumulia i latou i le lototalisapaia. (Faitau le Isaia 65:14.) E tatou te maua se ʻloto e lelei’ mai i upu moni e faalaeiauina ai, o folafolaga faamāfanafanaloto o loo i le Afioga a le Atua, ma lo tatou faamoemoe mausalī e faavae i le taulaga togiola a Keriso. E tatou te matuā fiafia pe a fetufaaʻi ma o tatou uso ma tuafāfine e faatatau i na mea.—Sala. 34:8; 133:​1-3.

8. O ā uiga autū e lua e matilatila ai tagata o loo ola i le parataiso faaleagaga?

⁸ E lua ni uiga autū e matilatila ai tagata o loo ola i le parataiso faaleagaga, o le alofa  ma le autasi. O lenei ʻfusi e autasi ai,’ o se faaataga lea o le olaga o le a iai i le lalolagi fou, lea o le a faaalia ai e auauna a Ieova le alofa ma le autasi i se auala e sili atu nai lo o le taimi lenei. (Kolo. 3:14) A o leʻi avea se tasi o tuafafine ma Molimau a Ieova, e iai se mea na ia mātauina e faatatau i tagata o Ieova i le taimi muamua na latou feiloaʻi ai. Na ia faapea mai: ʻOu te leʻi iloa le auala e maua ai le fiafia, e oo lava i totonu o loʻu aiga. O le taimi muamua lava na ou vaaia ai o faaalia e se tasi le alofa moni, o Molimau a Ieova.’ O lea, o so o se tasi e manaʻo e maua le fiafia moni ma le faamalieina, e tatau ona iai i le parataiso faaleagaga. Po o le ā lava le vaaiga a le lalolagi i auauna a Ieova, ae ua tatou maua se talaaga lelei o le avea ma vaega o lona aiga i le aoao o mea.—Isa. 65:15.

9. E tusa ai ma le Isaia 65:​16, 17, o le ā o le a tupu i mafatiaga o tagata?

⁹ E lē popole ma e toʻafilemu. Ua faapea mai le Isaia 65:​14, o i latou e filifili e lē iai i le parataiso faaleagaga, o le a “tagiauē ona o le tigā o le loto, [ma] ōi foʻi ona o le matuā mafatia tele o le agaga.” Ae o le ā o le a tupu i mea o loo faapogaia ai faafitauli ma mafatiaga o tagata o le Atua? E lē o toe umi ona ʻfaagaloina lea ma natia ia mea mai i luma o le Atua.’ (Faitau le Isaia 65:​16, 17.) O le a aveesea e Ieova o tatou faafitauli, ma e iai le taimi o le a lē toe manatua ai tigā ona o na faafitauli.

10. Aiseā e te manatu ai o se faamanuiaga le aufaatasi ma uso ma tuafāfine? (Tagaʻi foʻi i le ata.)

¹⁰ E oo lava i le taimi lenei e tatou te lagona le toʻafilemu pe a auai i a tatou sauniga, lea e mafai ona faagalo ai mea e tatou te atuatuvale ai ona o lenei lalolagi amioleaga. E tatou te fesoasoani foʻi i o tatou uso ma tuafāfine, pe a tatou faaalia vala o le fua o le agaga o le Atua e pei o le alofa, olioli, filemu, agalelei, ma le agamalu. (Kala. 5:​22, 23) O se faamanuiaga lo tatou iai i le faalapotopotoga a le Atua. O i latou e tumau ona iai i le parataiso faaleagaga, o le a vaaia le faataunuuga atoatoa o le folafolaga a le Atua e faatatau i “le lagi fou ma le lalolagi fou.”

11. I le Isaia 65:​18, 19, o ā o tatou faalogona e tatau ona iai e faatatau i le parataiso faaleagaga na faavaeina e Ieova?

¹¹ Lotofaafetai ma olioli. Ua faamatala atili e Isaia le māfuaaga e tatau ai ona tatou “olioli ma fiafia” i le iai i le parataiso faaleagaga. Na faavaeina e Ieova lenei siʻomaga faaleagaga. (Faitau le Isaia 65:​18, 19.) O le māfuaaga lea ua ia faaaogāina ai i tatou e taʻitaʻi ese tagata mai i faalapotopotoga ua galala faaleagaga o lenei lalolagi, ae taʻitaʻiina mai i le parataiso  faaleagaga matagofie. E tatou te lagona le olioli ona o faamanuiaga o loo tatou maua i le iai i le upu moni, ma e uunaʻia ai i tatou e faailoa atu na faamanuiaga i isi.—Iere. 31:12.

12. O ā ou faalogona i folafolaga o loo faamatalaina i le Isaia 65:​20-24, ma aiseā?

¹² E tatou te lagona foʻi le lotofaafetai ma le olioli, ona o le faamoemoe ua tatou maua i le avea ai ma tagatānuu o le parataiso faaleagaga. Seʻi faaata mea uma o le a tatou vaaia ma faia i le lalolagi fou a le Atua. Ua folafola mai i le Tusi Paia: “O le a lē toe iai i lea mea se pepe . . . e ola mo na o ni nai aso, po o se toeaina e lē atoa ona aso.” “O le a [tatou] fausia fale ma nonofo ai; [ma] totō foʻi togāvine ma aai i ona fua.” “O le a [tatou] lē galulue fua” auā o le a “faamanuiaina [i tatou] e Ieova.” Ua ia folafola mai e tatou te maua se olaga e faamalieina e iai se fuafuaga. “A o [tatou] leʻi valaau [atu],” ua ia silafia manaʻoga o tagata taʻitoʻatasi ma “faamalie le manaʻo o meafaiola uma lava.”—Isa. 65:​20-24; Sala. 145:16.

13. Ua faapefea ona faamatalaina i le Isaia 65:25 suiga e faia e tagata i o latou olaga, pe a amata ona auauna iā Ieova?

¹³ Filemu ma malupuipuia. O le fesoasoani a le agaga o le Atua, ua mafai ai e le toʻatele na iai uiga faamanu ona faia suiga tetele i o latou olaga. (Faitau le Isaia 65:25.) Na latou faia taumafaiga uma e liaʻiese ai o latou uiga lē lelei. (Roma 12:2; Efe. 4:​22-24) O le mea moni, e lē lelei atoatoa tagata o le Atua, o lea, e tatou te faia pea mea sesē. Peitaʻi, ua autasia e Ieova “ituaiga uma o tagata” i le fusi o le alofa ma le filemu lea e lē mafai ona motusia. (Tito 2:11) O se vavega lenei mea, ma e na o le Atua lava e ona le malosi uma lava e mafai ona faataunuuina.

14. E faapefea i le mea na tupu i se uso ona faamaonia ai le moni o le Isaia 65:25?

¹⁴ Pe e mafai moni lava ona suia uiga o tagata? Seʻi mātau le mea na tupu i se alii talavou. E tele taimi na faafalepuipui ai o ia ma e oo ane i le 20 o ona tausaga, ua matuā aafia i faiga sauā ma amioga lē mamā. Na faafalepuipuiina o ia ona o le gaoia o taavale, osofaʻia o fale, ma isi soligatulafono matuiā. O ia o se tagata e faatupu misa. Ina ua ia faatoʻā aʻoaʻoina le upu moni mai i le Tusi Paia ma amata ona auai i sauniga, na ia talitonu ai ua iai se fuafuaga o lona olaga, o le tapuaʻi iā Ieova i le parataiso faaleagaga. Ina ua uma ona ia papatiso, na masani ona ia mafaufau i le auala e faatatau ai le Isaia 65:25 iā te ia. Na suia ona uiga sauā e pei o se leona, i uiga filemu e pei o se tamaʻi mamoe.

15. Aiseā e tatou te mananaʻo ai e valaaulia isi ia tatou iai faatasi i le parataiso faaleagaga, ma e faapefea ona tatou faia faapea?

¹⁵ O loo amata le Isaia 65:13 i se faalauiloaga e faapea: “O le mea lenei ua fetalai mai ai le Alii Pule Silisili Ese o Ieova.” Ae faaiʻu le fuaiupu e 25 i faaupuga nei: “Ua fetalai mai ai Ieova.” O so o se folafolaga lava e na te faia e mautinoa e faataunuuina. (Isa. 55:​10, 11) Ua iai nei le parataiso faaleagaga. Ua saunia e Ieova se ʻauuso e tutasi i le lalolagi aoao. Pe a tatou aufaatasi ma tagata o Ieova, e tatou te lagona le filemu ma le malupuipuia a o tatou ola ai i lenei lalolagi ua tumu i faiga sauā. (Sala. 72:7) O lea, e tatou te mananaʻo e fesoasoani i le toʻatele e mafai ai, ina ia avea foʻi i latou ma vaega o lo tatou ʻauuso Kerisiano. E tatou te faia faapea e ala i le uaʻi atu i le faia o isi ma soo.—Mata. 28:​19, 20.

E FAAPEFEA ONA TOSINA MAI ISI I LE PARATAISO FAALEAGAGA?

16. E faapefea ona tosina mai tagata i le parataiso faaleagaga?

¹⁶ O i tatou uma lava e iai se matafaioi tāua i le faamatagofieina o le parataiso faaleagaga.  E mafai ona tatou faataunuuina lenā matafaioi pe a tatou faaaʻoaʻo iā Ieova. E na te lē faamalosia tagata e ō mai i lana faalapotopotoga. Nai lo o lea, e na te “tosina” mai ma le agalelei tagata iā te ia. (Ioa. 6:44; Iere. 31:3) E faigofie ona tosina mai iā Ieova tagata lotofaamaoni, pe a aʻoaʻoina e faatatau i lona alofa ma ona uiga matagofie. E faapefea i o tatou uiga ma amioga lelei ona tosina mai ai tagata i le parataiso faaleagaga?

17. O le ā se tasi o auala e tatou te tosina mai ai isi i le parataiso faaleagaga?

¹⁷ O se tasi o auala e tatou te tosina mai ai isi i le parataiso faaleagaga, o le feutagaʻi lea ma o tatou uso tapuaʻi i se auala alofa ma agalelei. Na iai ni tagata lē talitonu atonu na auai i sauniga i Korinito anamua, ma na latou taʻutino mai: “E moni, ua iā te outou le Atua.” E tatou te mananaʻo foʻi ia faapena lagona o tagata fou e auai mai i a tatou sauniga. (1 Kori. 14:​24, 25; Saka. 8:23) O lea, ia faaauau ona tatou utagia le fautuaga ina ia “tausia pea le filemu.”—1 Tesa. 5:13.

18. O le ā e ono tosina mai ai tagata i la tatou faalapotopotoga?

¹⁸ E tatau ona tatou vaai i o tatou uso ma tuafāfine e pei o le auala e silasila ai Ieova iā i latou. E tatou te faia faapea e ala i le uaʻi atu i o latou uiga lelei ae e lē o o latou vaivaiga, lea ua toeitiiti ona lē toe iai lea. E mafai ona foʻia i se auala alofa so o se feeseeseaʻiga e tulaʻi mai, e ala i le faaauau ona ʻagalelei le tasi i le isi, ia māfana le alofa, ma ia fefaamagaloaʻi ma le lotoatoa.’ (Efe. 4:32) O lea, pe a tatou feutagaʻi ma o tatou uso ma tuafāfine i lenā auala agaalofa, o le a tosina mai ai isi i le parataiso faaleagaga. b

 IA TUMAU PEA I LE PARATAISO FAALEAGAGA

19. (a) E pei ona faaalia i le pusa “ Ua Latou Toe Foʻi Mai i le Parataiso Faaleagaga,” o ā faamatalaga a isi ua toe foʻi mai i le parataiso faaleagaga? (e) O le ā ua tatou maumauaʻi e fai? (Tagaʻi foʻi i le ata.)

¹⁹ E tatou te matuā talisapaia lo tatou parataiso faaleagaga. Ua sili atu ona matagofie ma faatuputeleina le parataiso faaleagaga i le taimi lenei. Tau ina ia faaauau ona tatou lotofaafetai mo le parataiso ua saunia e Ieova mo i tatou. O so o se tasi e manaʻo e lagona le faafouina, faamalieina, toʻafilemu, ma le malupuipuia, e tatau ona iai i le parataiso faaleagaga ma aua neʻi toe alu ese mai ai. Peitaʻi, ia faaeteete ona o loo taumafai malosi Satani e tataʻi ese i tatou mai i lenā parataiso. (1 Pete. 5:8; Faaa. 12:9) Aua lava neʻi o tatou tuua se avanoa e manumalo ai o ia. Seʻi o tatou maumauaʻi e puipuia le matagofie, mamā, ma le filemu o le parataiso faaleagaga.