1. Na faapefea ona faaalia e ni Molimau a Ieova se toʻatolu le faamaoni iā Ieova?

SEʻI faaāta vaaiga nei e faatatau i ni Molimau a Ieova se toʻatolu. (1) Ua faatonu e le faiaʻoga le vasega atoa o loo iai ma se teineitiiti Molimau a Ieova, ina ia latou auai i se aso faamanatu. E iloa e le teineitiiti e lē fiafia le Atua i lea aso faamanatu, ma ua ia faapea atu ma le faaaloalo e lē faia ai sana vaega. (2) A o talaʻi atu se alii talavou e matamuli mai i lea fale i lea fale, na ia iloa ai o le fale e sosoo ai e nofo ai se tamaitiiti e la te aʻoʻoga faatasi, lea e masani ona ula i Molimau a Ieova. Peitaʻi, ua ia alu atu pea ma tuʻituʻi i le faitotoʻa. (3) Ua faatonuina e se pule se tamā o loo galue malosi e tausia lona aiga, ina ia faia se gaoioiga lē faamaoni. E ui lava e ono faamālōlō ai o ia mai i lana galuega, ae na ia faapea atu i lona pule e tatau ona ia faamaoni ma usitaʻia tulafono, ona o le mea lenā e finagalo i ai le Atua.​—Roma 13:1-4; Epe. 13:18.

2. O ā fesili o le a tatou talanoaina, ma aiseā?

² E tele uiga e te ono mātauina mai i na vaaiga, e pei o le lototele ma le faia o le mea tonu. Ae o se tasi o uiga na matuā matilatila ese mai ai, o le faamaoni lea iā Ieova, lea na faaalia e i latou nei e toʻatolu. E latou te leʻi mananaʻo e solia tapulaa a le Atua, ma o le faamaoni na uunaʻia ai i latou ina ia faia faapea. E mautinoa le mitamita o Ieova iā i latou taʻitoʻatasi, ona o le faaalia o lenā uiga. E tatou te mananaʻo foʻi e mitamita lo tatou Tamā i le lagi iā i tatou. O lea, seʻi o tatou talanoaina fesili nei: O le ā le faamaoni? Aiseā e manaʻomia ai ona tatou faaalia le faamaoni? E faapefea ona faamalosia i tatou ina ia faatumauina pea lo tatou faamaoni i nei taimi faigatā?

3. (a) E faapefea ona faaalia e auauna a le Atua le faamaoni? (e) O ā faaaʻoaʻoga e mafai ona fesoasoani iā i tatou ina ia malamalama ai i le uiga o le faamaoni?

³ E faapefea ona faaalia e auauna a le Atua le faamaoni? E ala i le alofa ma le lotoatoa iā Ieova, lea e leai se mea e mafai ona aveesea. O le iʻuga, o le a latou faia ai i taimi uma mea e fiafia i ai Lona finagalo. Seʻi mātau nisi o faamatalaga i le auala e faaaogā ai i le Tusi Paia le upu faamaoni. I le Tusi Paia, o le uiga o le upu “faamaoni” o le atoatoa, po o le matuā lelei. O se faaaʻoaʻoga, na faatonuina i le Tulafono tagata Isaraelu ina ia faaaogā manu e matuā lelei, e ofoina atu ai taulaga iā Ieova. (Levi. 22:21, 22) E leʻi faataga ona latou ofoina atu se manu e lē atoa vaega o lona tino, pe maua foʻi i se maʻi. Na tāua iā Ieova le ofoina atu o se manu e matuā lelei pe e atoatoa. (Mala. 1:6-9) Ua tatou iloa mai ai le tāua iā Ieova o se mea e atoatoa pe e matuā lelei. Pe a tatou faatauina mai se fualaau ʻaina, o se tusi, po o se meafaigaluega, e tatou te lē mananaʻo i se mea e leaga pe e lē atoa foʻi ona vaega. Nai lo o lea, e tatou te mananaʻo i se mea e atoatoa pe e matuā lelei. O faalogona foʻi na o Ieova pe a tatou faaalia atu le alofa ma le faamaoni iā te ia, e tatau ona atoatoa pe e matuā lelei.

4. (a) Aiseā e mafai ai e se tagata lē lelei atoatoa ona faaalia le faamaoni? (e) E tusa ai ma le Salamo 103:12-14, o le ā se mea e lē faatalitalia e Ieova mai iā i tatou?

⁴ Pe e tatau la ona tatou manatu e tatau ona tatou lelei atoatoa, ina ia mafai ai ona tatou faaalia le faamaoni? Atonu e tatou te popole ona e tatou te lē lelei atoatoa, ma sesē i le tele o taimi. Seʻi o tatou tilofaʻia ni māfuaaga se lua e lē tatau ai ona iā i tatou lenā manatu. Muamua, e lē uaʻi mai Ieova i o tatou masei. Ua taʻua i le Salamo 130:3, “Ioa e, ana faapea e te mātaulia mea sesē, Ieova e, o ai sē e mafai ona tū atu i ou luma?” E silafia e Ieova o i tatou o ni tagata e lē lelei atoatoa ma agasala, ma e na te faamagaloina atoatoa i tatou. (Sala. 86:5) Lua, e silafia e Ieova mea e gata ai lo tatou malosi, ma e na te lē faatalitalia i tatou e faia se mea e tatou te lē gafatia. (Faitau le Salamo 103:12-14.) E faapefea la ona tatou atoatoa ma matuā lelei i le silafaga a Ieova?

5. Aiseā e manaʻomia ai e auauna a Ieova le alofa ina ia latou faaalia ai le faamaoni?

⁵ E manaʻomia e auauna a Ieova le alofa, ina ia mafai ai ona latou faaalia le faamaoni. E tatau ona atoatoa ma lē maluelue lo tatou alofa ma lo tatou faamaoni i lo tatou Tamā i le lagi. Pe a faapena le malosi o lo tatou alofa, e mafai lava ona tatou faamaoni e tusa pe e tofotofoina i tatou. (1 No. 28:9; Mata. 22:37) Seʻi toe mafaufau i Molimau a Ieova e toʻatolu sa taʻua i le amataga. Pe na māfua ona lē faia se vaega a le teineitiiti i le aso faamanatu, ona o lona lē fiafia i meafai a le aʻoga? Pe na manaʻo le alii talavou ina ia faamāsiasi o ia e le tamaitiiti lea e la te aʻoʻoga faatasi? Pe na manaʻo le tamā tausi aiga e faamālōlō o ia mai i lana galuega? E mautinoa e lē o le tulaga lenā. Nai lo o lea, na latou iloa e tonu tapulaa a Ieova, ma na latou taulaʻi atu i le faafiafiaina o lo latou Tamā i le lagi. O lo latou alofa mo ia na uunaʻia ai i latou ina ia saʻili muamua i le taʻitaʻiga a Ieova, a o leʻi faia ni a latou filifiliga. O le faia faapea, ua faamaonia ai lo latou faamaoni.

6. (a) Aiseā e manaʻomia ai le faamaoni? (e) Na faapefea ona lē taulau Atamu ma Eva i le faaalia o le faamaoni?

⁶ Aiseā e manaʻomia ai ona tatou faaalia le faamaoni? Talu ai na luʻia e Satani Ieova, ma ua ia luʻia foʻi oe. Na liua e lenā agelu fouvale o ia lava e avea ma Satani po o “Lē e Tetee” i le faatoʻaga o Etena. Na ia taʻuleagaina le  suafa paia o Ieova, e ala i le faapea mai o ia o se Pule sauā, manatu faapito, ma lē faamaoni. Ae e faanoanoa, ona na lagolagoina e Atamu ma Eva Satani ma fouvale ai iā Ieova. (Kene. 3:1-6) E tele avanoa sa la maua i le faatoʻaga o Etena e faamalosia ai lo la alofa mo Ieova. Peitaʻi, ina ua luʻia e Satani Ieova, e leʻi atoatoa pe malosi lo la alofa mo Ia. O lea na tulaʻi mai ai se isi fesili: Pe e mafai ea ona tumau faamaoni tagata iā Ieova le Atua ona o lo latou alolofa mo ia? I se isi faaupuga, pe e mafai e tagata ona faaalia le faamaoni? Na lāgā lenā fesili i le vaitaimi o Iopu.

7. E tusa ai ma le Iopu 1:8-11, o ā faalogona o Ieova e faatatau i le faamaoni o Iopu, ae o ā faalogona o Satani?

⁷ Na ola Iopu i le vaitaimi sa nonofo ai tagata Isaraelu i Aikupito. E leʻi iai se isi e pei o ia i le faaalia o le faamaoni. E moni o ia o se tagata e lē lelei atoatoa ma faia mea sesē e pei o i tatou. Peitaʻi, na alofa Ieova iā Iopu ona o lona faamaoni. E foliga mai ua leva ona faifai Satani iā Ieova e faatatau i le faamaoni o tagata. O lea, na faauaʻi atu ai e Ieova Satani iā Iopu. O le auala na ola ai Iopu, na matuā faamaonia atu ai le pepelo o Satani. O lea, na naunau ai lava Satani e tofotofoina le faamaoni o Iopu. Na maufaatuatuaina e Ieova lana uō o Iopu, ma Ia faatagaina ai Satani e tofotofoina o ia.​—Faitau le Iopu 1:8-11.

8. O ā auala na osofaʻia ai e Satani Iopu?

⁸ E sauā Satani ma o ia o se fasioti tagata. Na ia aveesea le tamaoaiga o Iopu, fasiotia ana auauna, ma faaleagaina lona talaaga. Na ia osofaʻia foʻi le aiga o Iopu ma fasiotia ai lana fanau pele e toʻasefulu. Ona sosoo ai lea ma lona osofaʻia o Iopu e ala i le taia o ia i se maʻi papala leaga, e amata mai i ona alofivae e oo i lona  tumuaʻi. Na mafatia le avā a Iopu ma lofitūina i le faanoanoa, ma na ia tauanauina Iopu ina ia faifai i le Atua ma oti ai. Na manaʻo foʻi Iopu e oo le oti iā te ia, ae na ia taofimau pea i lona faamaoni. O lea, na faaaogā ai e Satani se isi auala e osofaʻia ai Iopu, e ala mai lea i ana aumea e toʻatolu. O taimi uma na latou asiasi atu ai iā Iopu, e latou te leʻi fai atu ni upu faamāfanafana. Nai lo o lea, na latou matuā faitioina o ia, ma tuuaʻia le Atua mo ona mafatiaga. Na latou faapea atu foʻi, e lē tāua iā Ieova lona faamaoni. Na oo lava ina latou taʻua Iopu o se tagata amioleaga, ma ua tatau ai ona oo mea leaga iā te ia.​—Iopu 1:13-22; 2:7-11; 15:4, 5; 22:3-6; 25:4-6.

9. E ui i le tele o faigatā, ae o le ā e leʻi faia e Iopu?

⁹ O le ā le auala na tali atu ai Iopu i na osofaʻiga? O ia o se tagata e lē lelei atoatoa. O lea, na ia matuā aʻoaʻia ana ʻaufaamāfanafana pepelo, ma taʻutino mai na ia faia ni faaupuga soonafai. Na ia taʻuamiotonuina o ia lava nai lo o le Atua. (Iopu 6:3; 13:4, 5; 32:2; 34:5) Peitaʻi, e ui lava na matuā faigatā tofotofoga na ia fesagaʻia, ae e leʻi fulitua ai o ia iā Ieova le Atua. E leʻi manaʻo Iopu e talitonu i tala pepelo a ana aumea e toʻatolu. Na ia faapea mai: “Ia mamao lava iā te aʻu ona ou taʻua outou e amiotonu! Seʻia oo lava i loʻu oti, ou te lē aveesea loʻu faamaoni!” (Iopu 27:5) Ua faamaonia mai i nei upu le maumauaʻi o Iopu e taofimau pea i lona faamaoni, e tusa lava po o le ā e tupu. E mafai foʻi ona tatou faia faapea.

10. E faapefea ona tatou aafia i le luʻi na lāgā e Satani e faatatau iā Iopu?

¹⁰ E faapefea ona tatou aafia i le luʻi na lāgā e Satani e faatatau iā Iopu? E peiseaʻī na faapea mai Satani, e tatou te lē alolofa moni iā Ieova le Atua, ma e tatou te aafia loa i faafitauli e tatou te lē toe auauna iā te ia. E lē gata i lea, e tatou te lē taofimau i lo tatou faamaoni. (Iopu 2:4, 5; Faaa. 12:10) Faamata o ā ni ou faalogona i na tuuaʻiga? E lē taumatea e te lagona le tigā. Peitaʻi, seʻi mafaufau i le manatu lenei: O loo faataga e Ieova Satani e tofotofoina lou faamaoni. O le maufaatuatuaina e Ieova o oe, ua ia tuuina mai ai le avanoa matagofie e te taofimau ai i lou faamaoni, ma faamaonia le pepelo o Satani. E mautinoa e Ieova e mafai ona e taofimau i lou faamaoni, ma ua ia folafola mai o le a ia fesoasoani iā te oe ina ia faia faapea. (Epe. 13:6) O se matuā faaeaga le maufaatuatuaina o oe e le Pule Silisili Ese o le aoao o mea! O lea, ua manino mai le māfuaaga e matuā tāua ai lou faamaoni. E mafai ai ona tatou faamaonia pepelo a Satani, faapaia le suafa o lo tatou Tamā, ma lagolagoina lana pule silisili ese. E faapefea ona tatou taofimau pea i lo tatou faamaoni?

11. O le ā ua tatou aʻoaʻoina e faatatau iā Iopu?

¹¹ Ua faateteleina osofaʻiga a Satani i nei “aso e gata ai” ua sili ona faigatā. (2 Timo. 3:1) E faapefea la ona faamalosia i tatou ina ia faatumauina pea lo tatou faamaoni? E tele lesona e tatou te aʻoaʻoina mai iā Iopu. A o leʻi taitai feagai ma tofotofoga, na iai se talaaga lelei o le faamaoni o Iopu iā Ieova. E tolu lesona e mafai ona tatou aʻoaʻoina mai iā Iopu, i le auala e faamalosia ai i tatou ina ia faatumauina pea lo tatou faamaoni.

12. (a) E pei ona taʻua i le Iopu 26:7, 8, 14, na faapefea ona atiaʻe e Iopu le mataʻu ma le migao iā Ieova? (e) E mafai faapefea ona tatou atiaʻe le mataʻu i le Atua?

¹² Na faamalosia e Iopu lona alofa mo Ieova e ala i le atiaʻe o le mataʻu iā te Ia. Na faaalu e Iopu se taimi e manatunatu loloto ai i le ofoofogia o foafoaga a Ieova. (Faitau le Iopu 26:7, 8, 14.) Na maofa o ia ina ua mafaufau i le lalolagi, le lagi, o ao, ma le faititili, ae na ia malamalama e itiiti lava mea ua ia iloa e faatatau i mea uma na foafoaina e Ieova. Na  ia faatāuaina foʻi fetalaiga a Ieova, e ala i le faapea mai: “Ua ou tausia foʻi upu a lona fofoga.” (Iopu 23:12) O le mataʻu ma le migao o Iopu iā Ieova, na uunaʻia ai o ia ina ia alofa i lona Tamā ma faafiafia lona finagalo. O le iʻuga, na matuā faamalosia ai Iopu e taofimau pea i lona faamaoni. O le mea foʻi lenā e manaʻomia ona tatou faia. Ua tele atu mea ua tatou iloa e faatatau i foafoaga ofoofogia a Ieova, nai lo o tagata i taimi o Iopu. Ua tatou maua foʻi le Tusi Paia atoa lea ua tatou aʻoaʻoina ai e faatatau iā Ieova. O nei mea uma e mafai ona atiaʻe ai lo tatou mataʻu i le Atua. O lo tatou mataʻu ma le migao iā Ieova, o le a uunaʻia ai i tatou ina ia alolofa ma usiusitaʻi iā te ia, ma faamalosia ai lo tatou faanaunauga ina ia taofimau pea i lo tatou faamaoni.​—Iopu 28:28.

13-14. (a) E pei ona taʻua i le Iopu 31:1, na faapefea ona faaalia e Iopu le usiusitaʻi? (e) E faapefea ona tatou mulimuli i le faaaʻoaʻoga a Iopu?

¹³  Na faamalosia Iopu ina ia taofimau pea i lona faamaoni e ala i le usiusitaʻi. Na iloa e Iopu ina ia mafai ona ia faaalia le faamaoni, e manaʻomia ona ia usitaʻi iā Ieova. O so o se gaoioiga o le usiusitaʻi e faamalosia ai i tatou ina ia faatumauina pea lo tatou faamaoni. Na taumafai malosi Iopu ina ia usitaʻi i le Atua i so o se vala o lona olaga. O se faataʻitaʻiga, na faaeteete o ia i le auala e feutagaʻi ai ma le isi itupā. (Faitau le Iopu 31:1.) Talu ai o ia o se tane faaipoipo, na ia iloa e lē tatau ona iai ni ona lagona fetosinaaʻi i se isi fafine e ese mai i lana avā. Ua tatou ola i se lalolagi ua matuā tumu i faaosoosoga e faia amioga lē mamā. Po o le a tatou faaaʻoaʻo iā Iopu e ala i le lē soona uaʻi atu i se tasi e lē o sa tatou paaga faaipoipo? Po o le a tatou ʻalofia foʻi le matamata i so o se ata matagā taufeusuaʻiga? (Mata. 5:28) Pe a tatou faaalia le amio pulea i aso taʻitasi, o le a faamalosia ai i tatou ina ia taofimau pea i lo tatou faamaoni.

¹⁴ Na usitaʻi foʻi Iopu iā Ieova i le auala na ia vaai ai i meafaitino. Na malamalama Iopu pe  afai e tuu lona faatuatuaga i ana meafaitino, atonu o le a ia faia ai se agasala ma faasalaina ai o ia. (Iopu 31:24, 25, 28) O loo tatou ola i se lalolagi e pupū i meafaitino. Pe a tatou usitaʻia fautuaga a le Tusi Paia ma atiaʻe se vaaiga paleni i tupe ma meafaitino, o le a faamalosia ai i tatou ina ia taofimau pea i lo tatou faamaoni.​—Faata. 30:8, 9; Mata. 6:19-21.

15. (a) O le ā se mea na faamoemoe i ai Iopu na mafai ai ona ia taofimau pea i lona faamaoni? (e) Aiseā e tāua ai lo tatou manatuaina pea o le faamoemoe ua folafola mai e Ieova?

¹⁵ Na taofimau pea Iopu i lona faamaoni e ala i le taulaʻi atu i le faamoemoe, o le a tauia o ia e le Atua. Na talitonu Iopu e tāua i le Atua lona faaalia o le faamaoni. (Iopu 31:6) E ui lava i tofotofoga na ia fesagaʻia, ae na mautinoa e Iopu o le a tauia o ia e Ieova. O lenā mautinoa na fesoasoani iā te ia ina ia taofimau ai pea i lona faamaoni. O le fiafia o le finagalo o Ieova i le faamaoni o Iopu, na ia matuā faamanuiaina ai Iopu e ui i lona tulaga lē lelei atoatoa. (Iopu 42:12-17; Iako. 5:11) O le a tele atu foʻi isi faamanuiaga o le a maua e Iopu i le lumanaʻi. Pe e malosi faapena lou mautinoa o le a tauia e Ieova lou faamaoni? E lē sui lava lo tatou Atua. (Mala. 3:6) Pe a tatou manatua e tāua iā Ieova lo tatou faamaoni, o le a tatou teulotoina ai lo tatou faamoemoe matagofie i le lumanaʻi.​—1 Tesa. 5:8, 9.

16. O le ā e tatau ona tatou maumauaʻi e fai?

¹⁶ Tau ina ia e taofimau pea i lou faamaoni! Atonu e iai taimi e te manatu ai e na o oe o loo faaalia le faamaoni. Peitaʻi, e lē na o oe, ae o loo iai foʻi le isi faitau miliona i le lalolagi aoao o loo taofimau i lo latou faamaoni. O le a faitaulia faatasi foʻi oe ma tane ma fafine o le faatuatua i taimi ua teʻa na taofimau pea i lo latou faamaoni, e ui i faamataʻuga o le a fasiotia i latou. (Epe. 11:36-38; 12:1) Seʻi o tatou maumauaʻi e pei o Iopu o lē na faapea mai: “Ou te lē aveesea loʻu faamaoni!” O lea, tau ina ia tatou faamamaluina pea Ieova e ala i lo tatou faaalia o le faamaoni.