1. Aiseā e tatou te manaʻomia ai le taʻitaʻiga a Ieova? Aumai se faataʻitaʻiga.

 SEʻI faapea ua e sē i totonu o se vaomatua. Ua lamatia lou ola i manufeʻai, o iniseti faalafuā, ma laau tuitui, pe e te ono paʻū foʻi i totonu o se lua. Maʻeu lou lotofaafetai pe a iai se tasi e iloa lelei lenā nofoaga ma mea e lamatia ai, ma fesoasoani iā te oe e ʻalofia na vaega! Ua pei lenei lalolagi o lenā vaomatua. Ua faatumulia i mea e lamatia ai lo tatou itu faaleagaga. Peitaʻi, o Ieova o Lē e sili ona lelei e taʻitaʻia i tatou. Ua ia taʻitaʻi ese i tatou mai i mea e lamatia ai, seʻia tatou taunuu atu i le ola e faavavau i le lalolagi fou.

2. E faapefea ona taʻitaʻia i tatou e Ieova?

² E faapefea ona taʻitaʻia i tatou e Ieova? O le auala autū ua ia faia ai faapea, e ala mai i lana Afioga le Tusi Paia. Peitaʻi, e na te faaaogāina foʻi tagata e taʻitaʻia i tatou. O se faataʻitaʻiga, ua ia faaaogāina “le pologa faamaoni ma le faautauta,” e saunia mai meaʻai faaleagaga e fesoasoani iā i tatou i le faia o filifiliga atamai. (Mata. 24:45) Ua faaaogā foʻi e Ieova isi tane agavaa e taʻitaʻia i tatou. O se faaaʻoaʻoga, ua saunia mai e ovasia matagaluega ma toeaina faalaeiauga ma faatonuga, e fesoasoani iā i tatou i taimi faigatā. Maʻeu lo tatou lotofaafetai mo taʻiala maufaatuatuaina ua tatou maua i nei taimi faigatā o aso e gata ai! Ua fesoasoani lea e tatou te maua ai pea le finagalo malie o Ieova, ma tumau ai i le ala i le ola.

3. O le ā o le a tatou iloiloina i lenei mataupu?

³ E iai lava taimi e faigatā ai ona tatou mulimuli i le taʻitaʻiga a Ieova, aemaise pe a auala mai i tane lē lelei atoatoa. Aiseā? Talu ai e ono feteenaʻi se taʻiala ma le mea e tatou te fiafia i ai. Pe atonu foʻi e tatou te manatu e lē atamai lenā taʻiala, ma tatou manatu ai e lē mai iā Ieova. I taimi faapena, e matuā manaʻomia ai ona tatou mautinoa o loo taʻitaʻia e  Ieova ona tagata, ma o le mulimuli i lana taʻitaʻiga e iʻu atu ai i faamanuiaga. O le a fesoasoani lenei mataupu e faamalosia ai lo tatou mautinoa e ala i le iloiloina, (1) o le auala na taʻitaʻia ai e Ieova ona tagata i taimi o le Tusi Paia, (2) le auala o loo ia taʻitaʻia ai i tatou i aso nei, ma le (3) o aogā e maua pe a tatou mulimuli pea i lana taʻitaʻiga.

LE AUALA NA TAʻITAʻIA AI E IEOVA LE NUU O ISARAELU

4-5. Na faapefea ona faailoa mai e Ieova na ia faaaogāina Mose e taʻitaʻia tagata Isaraelu? (Tagaʻi i le ata.)

⁴ Na tofia e Ieova Mose e taʻitaʻi ese Isaraelu mai i Aikupito, ma na Ia faailoa atu i tagata Isaraelu faamaoniga vaaia o lona taʻitaʻia o i latou e ala mai iā Mose. O se faataʻitaʻiga, na saunia e Ieova le ao faaniutū i le ao ma le afi faaniutū i le pō. (Eso. 13:21) Na mulimuli Mose i le ao, ma na taʻitaʻia atu ai le nuu o Isaraelu i le Sami Ulaula. Peitaʻi, na tuliloa atu i latou e ʻautau a Aikupito. O lea, na matuā fefefe ai tagata Isaraelu ma manatu o le a fasiotia i latou e tagata Aikupito. Na latou manatu sa lē tatau ona taʻitaʻia e Mose i latou i le Sami Ulaula. Peitaʻi, o le finagalo o Ieova na taʻitaʻia atu ai ona tagata i inā e ala iā Mose. (Eso. 14:2) Mulimuli ane, na laveaʻia i latou e le Atua i se auala e sili ona mataʻina.—Eso. 14:​26-28.

⁵ I le 40 tausaga mulimuli ane ai, na faaauau ona faalagolago Mose i le ao faaniutū e taʻitaʻia ai tagata o le Atua i le toafa. a E iai taimi na tuuina ai e Ieova le ao faaniutū i luga o le faleʻie o Mose, ma na iloa uma atu e tagata Isaraelu. (Eso. 33:​7, 9, 10) Na fetalai mai Ieova iā Mose i le ao faaniutū, ona ia faailoa atu lea o faatonuga a Ieova i tagata. (Sala. 99:7) Na iloa lelei e tagata Isaraelu faamaoniga o le faaaogāina e Ieova o Mose e taʻitaʻia i latou.

6. Na faapefea ona tali atu tagata Isaraelu i le taʻitaʻiga a Ieova? (Numera 14:​2, 10, 11)

⁶ E faanoanoa ona o le toʻatele o tagata Isaraelu, na latou teena faamaoniga manino o le faaaogāina e Ieova o Mose e taʻitaʻia i latou. (Faitau le Numera 14:​2, 10, 11.) Sa faaauau ona latou teena le taʻitaʻiga a Mose. O le iʻuga, e leʻi faatagaina ona ulu atu lenā tupulaga o tagata Isaraelu i le Nuu Folafolaina.—Nu. 14:30.

7. Aumai ni faaaʻoaʻoga o ē na mulimuli i le taʻitaʻiga a Ieova. (Numera 14:24) (Tagaʻi foʻi i le ata.)

⁷ Peitaʻi, na mulimuli isi tagata Isaraelu i le taʻitaʻiga a Ieova. O se faataʻitaʻiga, na silafia e Ieova ʻna mulimuli pea Kalepo ma lona lotoatoa iā te ia.’ (Faitau le Numera 14:24.) Na tauia o ia e le Atua, ma tuu atu iā te ia le avanoa e filifili ai le vaega e fia nofo ai i le laueleele o Kanana. (Iosua 14:​12-14) Na faataatia foʻi e le isi augātupulaga na sosoo ai o Isaraelu se faaaʻoaʻoga lelei, i le mulimuli i le taʻitaʻiga a Ieova. I le taimi na suitulaga ai Iosua iā Mose i le avea ma taʻitaʻi o Isaraelu, na “latou matuā faaaloalo ai iā Iosua i aso uma o lona ola.” (Iosua 4:14) O le iʻuga, na faamanuia Ieova iā i latou ma taʻitaʻia atu i latou i le Nuu Folafolaina.—Iosua 21:​43, 44.

8. Na faapefea ona taʻitaʻia e Ieova ona tagata i taimi o pulega a tupu? (Tagaʻi foʻi i le ata.)

⁸ I tausaga mulimuli ane, na tofia e Ieova faamasino e taʻitaʻia ona tagata. I taimi o pulega a tupu, na tofia e Ieova perofeta e taʻitaʻia lona nuu. Na mulimuli tupu faamaoni i fautuaga a perofeta. O se faaaʻoaʻoga, na  talia ma le lotomaulalo e le tupu o Tavita faasaʻoga mai i le perofeta o Natano. (2 Samu. 12:​7, 13; 1 No. 17:​3, 4) Na faalagolago le tupu o Iosefatu i le perofeta o Iaaseelu mo le taʻitaʻiga, ma na ia faalaeiau tagata o Iuta ina ia faatuatua i perofeta a le Atua. (2 No. 20:​14, 15, 20) I taimi na atuatuvale ai le tupu o Esekia, na ia fesili atu i le perofeta o Isaia mo le fesoasoani. (Isa. 37:​1-6) O taimi uma na mulimuli ai tupu i le taʻitaʻiga a Ieova, na ia faamanuia iā i latou ma na puipuia ai le nuu. (2 No. 20:​29, 30; 32:22) O lea, sa iloa lelei e tagata uma, na faaaogā e Ieova ana perofeta e taʻitaʻia ona tagata. Peitaʻi, sa teena e le toʻatele o tupu ma tagata perofeta a Ieova.—Iere. 35:​12-15.

LE AUALA NA TAʻITAʻIA AI E IEOVA ULUAʻI KERISIANO

9. O ai na faaaogā e Ieova e taʻitaʻia Kerisiano i le uluaʻi senituri? (Tagaʻi foʻi i le ata.)

⁹ Na faavaeina e Ieova le faapotopotoga Kerisiano i le uluaʻi senituri T.A. Na faapefea ona ia taʻitaʻia na Kerisiano? Na ia tofia Iesu e avea ma ulu o le faapotopotoga. (Efe. 5:23) Peitaʻi, e leʻi fesootaʻi tuusaʻo mai Iesu i soo taʻitoʻatasi. Na ia faaaogāina le ʻauaposetolo ma toeaina i Ierusalema e taʻimua. (Galu. 15:​1, 2) E lē gata i lea, na tofia toeaina e taʻimua i faapotopotoga.—1 Tesa. 5:12; Tito 1:5.

10. (a) Na faapefea ona tali atu le toʻatele o Kerisiano i le uluaʻi senituri i faatonuga na latou mauaina? (Galuega 15:​30, 31) (e) Aiseā na teena ai e nisi i taimi o le Tusi Paia tagata na faaaogā e Ieova e taʻitaʻia i latou? (Tagaʻi i le pusa “ Māfuaaga na Teena ai e Nisi Faamaoniga Manino.”)

¹⁰ Pe na talia e Kerisiano i le uluaʻi senituri le taʻitaʻiga? O le toʻatele o i latou na fiafia e talia faatonuga na latou mauaina, ma na ʻlatou olioli i faalaeiauga na maua mai ai.’ (Faitau le Galuega 15:​30, 31.) Ae e faapefea ona taʻitaʻia e Ieova ona tagata i aso nei?

LE AUALA UA TAʻITAʻIA AI E IEOVA I TATOU I ASO NEI

11. Aumai se faaaʻoaʻoga o le taʻitaʻia e Ieova o i latou o loo taʻimua i aso nei.

¹¹ O loo faaauau ona taʻitaʻia e Ieova ona tagata i aso nei, ma ua ia faia faapea e ala mai i le Tusi Paia ma lona Alo le ulu o le faapotopotoga. Ua tatou vaaia faamaoniga o le faaauau ona faaaogā e Ieova o tagata e saunia mai taʻitaʻiga. O se faataʻitaʻiga, seʻi manatu  i mea na tutupu ina ua mavae le 1870. Na amata ona iloa e Charles Taze Russell ma ana aumea, o le 1914 o le tausaga tāua lea e faavaeina ai le Malo o le Atua. (Tani. 4:​25, 26) Na latou maua lenā malamalamaga ona o a latou saʻiliʻiliga i valoaga o le Tusi Paia. E manino mai sa taʻitaʻia e Ieova a latou saʻiliʻiliga i le Tusi Paia. O mea na tutupu i le lalolagi i le 1914, na faamaonia ai ua amata ona pule le Malo o le Atua. Na amata ai i inā le Taua Muamua a le Lalolagi ona sosoo ai lea o faamaʻi, mafuiʻe, ma oge. (Luka 21:​10, 11) E mautinoa sa faaaogā e Ieova na tane Kerisiano e fesoasoani i ona tagata.

12-13. O ā faatulagaga na faateleina ai le galuega talaʻi ma le aʻoaʻo atu i le taimi o le Taua Lona Lua a le Lalolagi?

¹² Seʻi mātau foʻi le mea na tupu i le taimi o le Taua Lona Lua a le Lalolagi. O le suʻesuʻeina o le Faaaliga 17:​8, na iloa ai e uso taʻimua i le ofisa ulu e lē iʻu atu le taua iā Amaketo, ae e iʻu atu i se vaitaimi o le filemu lea o le a faateleina ai le galuega talaʻi. O lea, e iai se mea na fai i lenā taimi na foliga mai e lē talafeagai. Na faavaeina e le faalapotopotoga a Ieova le Kolisi Faale-Tusi Paia a le Olomatamata o Kiliata, b e toleni ai misionare e talaʻi ma aʻoaʻo atu i le lalolagi atoa. Na auina atu misionare i isi atunuu i le taimi o le taua. E lē gata i lea, na faatulaga e le pologa faamaoni le Aʻoga Faapitoa o le Faiva Faatiokarate, c ina ia toleni ai sui uma o le faapotopotoga e faaleleia la latou talaʻi ma le aʻoaʻo atu. O nei auala uma na sauniunia ai tagata o Ieova mo le galuega talaʻi.

¹³ Pe a toe tepa i tua, e tatou te mautinoa ai sa taʻitaʻia e Ieova ona tagata i lenā taimi faigatā. Talu mai le Taua Lona Lua a le Lalolagi, o loo maua e tagata o Ieova le saʻolotoga e faia ai le galuega talaʻi i le tele o atunuu. O le mea moni, ua matuā faatupulaʻia le galuega.

14. Aiseā e ao ai ona tatou maufaatuatuaina taʻiala mai i le faalapotopotoga a Ieova ma toeaina tofia? (Faaaliga 2:1) (Tagaʻi foʻi i le ata.)

 ¹⁴ I aso nei, o loo faaauau ona saʻili atu sui o le Vaega Pule iā Keriso mo le taʻitaʻiga. E latou te mananaʻo e atagia atu le silafaga a le Atua ma Keriso i taʻiala o loo latou avatu i le ʻauuso. E latou te faaaogāina ovasia matagaluega ma toeaina e saunia atu taʻiala i faapotopotoga, d ma o loo iai toeaina faauuina ma toeaina uma o le faapotopotoga i le “lima taumatau” o Keriso. (Faitau le Faaaliga 2:1.) O le mea moni, e lē lelei atoatoa nei toeaina ma e iai o latou masei. E iai taimi na faia ai e Mose ma Iosua mea sesē, ma e faapena foʻi le ʻauaposetolo. (Nu. 20:12; Iosua 9:​14, 15; Roma 3:23) E ui i lea, o loo faaauau ona taʻitaʻia lelei e Iesu le pologa faamaoni ma toeaina tofia, ma o le a ia faia pea faapea “seʻia oo i le taufaaiʻuiʻuga o le faiga o mea a le lalolagi.” (Mata. 28:20) O lea, ua iā i tatou māfuaaga uma e maufaatuatuaina ai lana taʻitaʻiga, e ala mai i ē ua ia tofia e taʻimua.

O AOGĀ O LE MULIMULI PEA I LE TAʻITAʻIGA A IEOVA

15-16. O le ā e te aʻoaʻoina mai i ē na mulimuli i le taʻitaʻiga a Ieova?

¹⁵ E tatou te maua faamanuiaga i le taimi lenei, pe a tatou mulimuli pea i le taʻitaʻiga a Ieova. O se faataʻitaʻiga, na faatatau e Andy ma Robyn le fautuaga ina ia faafaigofie o la olaga. (Epe. 13:5) O le iʻuga, na mafai ai ona la tauofo i galuega faufale. Ua faapea mai Robyn: “E masani ona ma nonofo i tamaʻi fale e leai ni umukuka. Sa ou faatauina ese atu foʻi le tele o aʻu mea puʻeata, o se mea sa ou fiafia e fai ma na ou matuā faanoanoa ai lava. Ae i le pei o Sara le avā a Aperaamo, na ou maumauaʻi e tuu na mea ae taulaʻi i le lumanaʻi.” (Epe. 11:15) O ā aogā na maua e lenei ulugalii ona o le la filifiliga na fai? Ua faapea mai Robyn: “Na ma lagona le faamalieina i le iloaina na foaʻiina atu iā Ieova mea uma na iā i maʻua. A o ma galulue i o ma faaeaga, na ma faaata le ituaiga olaga o le a iai i le lalolagi fou.” Ua faapea mai ma le mautinoa Andy: “Na matuā faamalieina i maʻua i le lagolagoina atoatoa o le Malo.”

¹⁶ O ā isi aogā e tatou te maua pe a mulimuli pea i le taʻitaʻiga a Ieova? Na filifili Marcia e faalautele lana auaunaga iā Ieova ina ua uma ona faauu mai i se aʻoga maualuga. (Mata. 6:33; Roma 12:11) Na ia faapea mai:  “Na maua laʻu sikolasipi mo le fā tausaga i se iunivesite. Peitaʻi, na ou manaʻo e tuliloa oʻu sini faaleagaga. O lea, na ou filifili ai e auai i se aʻoga e aʻoaʻo ai se matātā ina ia lagolago ai laʻu faiva. O se tasi lea o filifiliga e sili ona lelei na ou faia. O loo oʻu olioli nei i laʻu paeonia sauatoa, ma o le fetuutuunaʻi o laʻu galuega e mafai ai ona ou galue tausāvali i le Peteli ma olioli ai i isi faaeaga.”

17. O ā isi aogā o lo tatou mulimuli pea i le taʻitaʻiga a Ieova? (Isaia 48:​17, 18)

¹⁷ E iai taimi e tatou te maua ai fautuaga e puipuia ai i tatou mai i le manaʻo tele i meafaitino, ma isi mea e iʻu atu ai i le solia o tulafono a le Atua. Ua tatou maua foʻi aogā i le mulimuli i taʻiala ua saunia mai e Ieova. Ua tatou maua ai se lotofuatiaifo mamā, ma ʻalofia ai le popole i isi mea e lē tāua. (1 Timo. 6:​9, 10) O le iʻuga, ua faia ai ma le lotoatoa la tatou tapuaʻiga iā Ieova, lea e maua ai le olioli, filemu ma le faamalieina moni.—Faitau le Isaia 48:​17, 18.

18. Aiseā ua e maumauaʻi ai e mulimuli pea i le taʻitaʻiga a Ieova?

¹⁸ E mautinoa e faaauau ona faaaogā e Ieova tagata, e saunia mai taʻitaʻiga i le taimi o le puapuaga tele ma le Pulega i le Afe Tausaga. (Sala. 45:16) Po o le a faaauau ona tatou mulimuli i na taʻiala e tusa pe e ese mai i le mea e tatou te mananaʻo ai? E faalagolago lenā vala i le auala e tatou te tali atu ai i le taʻitaʻiga ua saunia mai e Ieova i le taimi lenei. O lea, ia tatou mulimuli pea i le taʻitaʻiga a Ieova, e aofia ai taʻiala ua saunia mai e tane ua tofia e leoleoina i tatou. (Isa. 32:​1, 2; Epe. 13:17) A o tatou faia faapea, ua tatou maufaatuatuaina atoatoa Ieova o Lē e taʻitaʻia ese i tatou mai i lamatiaga faaleagaga, ae taʻitaʻia atu i le ola e faavavau i le lalolagi fou.