I LE Aso Lulu, Ianuari 18, 2023, na maua ai se faasilasilaga faapitoa i le jw.org, e faailoa mai ai ua tofia uso o Gage Fleegle ma Jeffrey Winder e auauna o ni sui o le Vaega Pule o Molimau a Ieova. Ua leva ona auauna faamaoni nei uso iā Ieova.

Na tausia aʻe le uso o Fleegle i le itu i sisifo o Pennsylvania i le Iunaite Setete, e ni mātua e matataʻu i le Atua. A o talavou o ia, na siitia atu lona aiga i se tamaʻi aai i nuu maotua i le mea na telē ai le manaʻoga. E leʻi umi lava, ae papatisoina loa o ia iā Novema 20, 1988.

Na masani ona faalaeiauina le uso o Fleegle e ona mātua ina ia auai i le auaunaga faataimi atoa. E tele taimi na latou talimālō ai i ovasia matagaluega ma le ʻau Peteli i lo latou fale, ma na vaai le uso o Fleegle i le fiafia o nei uso ma tuafāfine. E leʻi umi talu ona ia papatiso, ae amata loa lana paeonia sauatoa iā Setema 1, 1989. I le lua tausaga mulimuli ane, na ausia ai lona sini na faatū i le 12 o ona tausaga, o le auauna lea i le Peteli. Na amata lana auaunaga i le Peteli i Brooklyn iā Oketopa i le 1991.

E valu tausaga na galue ai le uso o Fleegle i le vaega e tuufaatasia ai tusi, ona tofia ai lea o ia i le Matagaluega o le Auaunaga. I lenā taimi, na ia auauna mo ni nai tausaga i se faapotopotoga e tautatala i le gagana Rusia. Na faaipoipo o ia i lana avā o Nadia i le 2006, ma na faatasi atu ai loa lana avā ma la galulue i le Peteli. Sa la auauna i se faapotopotoga i le gagana Potukali, ma ua silia i le sefulu tausaga talu ona la iai i se faapotopotoga i le gagana Sipaniolo. Ina ua mavae le tele o tausaga o galue le uso o Fleegle i le Matagaluega o le Auaunaga, ona tofia ai lea o ia i le Ofisa o le Komiti Tauaʻoaʻoga, ma mulimuli ane i le Ofisa o le Komiti o le Auaunaga. Iā Mati 2022, na tofia ai  o ia o se fesoasoani i le Komiti o le Auaunaga a le Vaega Pule.

Na ola aʻe le uso o Winder i Murrieta i Kalifonia i le Iunaite Setete. Na tausia aʻe o ia e ona mātua i le upu moni, ma na ia papatiso iā Mati 29, 1986. I le masina na sosoo ai, na amata ai lana paeonia lagolago. O lona fiafia tele i ai na ia manaʻo ai e faaauau lana paeonia lagolago, seʻia oo ina amata lana paeonia sauatoa iā Oketopa 1, 1986.

A o talavou le uso o Winder, na ia asiasi atu ai i ona uso matutua e toʻalua sa auauna i le Peteli i lenā taimi. O lenā asiasiga, na uunaʻia ai o ia e talosaga mo le Peteli pe a matua. Iā Me 1990, na valaaulia ai o ia e auauna i le Peteli i Wallkill.

E tele matagaluega eseese na galue ai le uso o Winder i le Peteli. E aofia ai le Matagaluega o le Faamamā, le Matagaluega o Faatoʻaga, ma le Ofisa o le Peteli. Na ia faaipoipo i lana avā o Angela i le 1997, ma la auauna faatasi ai i le Peteli talu mai lenā taimi. Na tofia i laʻua i Warwick i le 2014, lea na fesoasoani ai le uso o Winder i le galuega o le fausiaina o le ofisa ulu. I le 2016, na tofia ai i laʻua i le nofoaga mo Aʻoaʻoga a le Olomatamata i Patterson, ma na galue ai le uso o Winder i le Auaunaga mo Puʻegāleo ma Vitiō. I le fā tausaga mulimuli ane ai, na toe tofia ai i laʻua i Warwick, lea na galue ai le uso o Winder i le Ofisa o le Komiti o le ʻAufaigaluega. Iā Mati 2022, na tofia ai o ia o se fesoasoani i le Komiti o le ʻAufaigaluega a le Vaega Pule.

E tatou te tatalo o le a matuā faamanuia Ieova i nei “meaalofa i tagata,” a o faaauau ona la galulue mamafa mo manaʻoga o le Malo.—Efe. 4:8.