1-2. (a) Aiseā e lē faateʻia ai i tatou i le faigofie o le auala na faataatia e Iesu e faamanatu ai lona maliu? (e) O ā uiga o Iesu o le a tatou iloiloina?

PE E te manatua mea e faia i le Faamanatuga o le maliu o Keriso i tausaga taʻitasi? E lē taumatea o le toʻatele o i tatou e manatuaina mea e faia a o faagasolo le Talisuaga Afiafi a le Alii. Aiseā? Talu ai o se talisuaga e faigofie. Peitaʻi, o se faatasiga e tāua. O lea, e tatou te ono tomānatu, ʻAiseā ua faigofie ai lenei talisuaga?’

² A o faagasolo le faiva a Iesu i le lalolagi, na lauiloa o ia i le faigofie ma le manino o le auala na ia aʻoaʻo atu ai upu moni tāua. (Mata. 7:28, 29) Na ia faataatia foʻi se auala faigofie ma tāua e faamanatuina * ai lona maliu. Seʻi o tatou iloilo totoʻa lenei talisuaga ma nisi o faamatalaga a Iesu ma mea sa ia faia ai. O le a atili ai ona tatou talisapaia uiga na faaalia e Iesu e pei o le lotomaulalo, lototele, ma le alofa. O le a tatou tilofaʻia foʻi auala e faaaʻoaʻo ai iā te ia.

3. E tusa ma le Mataio 26:26-28, o ā mea na faaaogā e Iesu i le talisuaga o le Faamanatuga lea na ia faavaeina, ma o le ā na faaāta mai e nei mea?

³ Sa faavae e Iesu le Faamanatuga o lona maliu a o iai faatasi ma ona aposetolo faamaoni e toʻa 11. Na ia faaaogāina mea sa totoe mai i le tausamiga o le Paseka mo le Faamanatuga. (Faitau le Mataio 26:26-28.) Na ia faaaogā le areto e  lē faafefeteina ma le uaina sa iai. Na fetalai atu Iesu i ona aposetolo o na mea sa faaāta mai ai lona tino ma lona toto lelei atoatoa, lea ua toeitiiti ona ia ofoina atu lea e fai ma taulaga. Atonu e leʻi faateʻia le ʻauaposetolo i le faigofie o lenei talisuaga tāua ua faavaeina. Aiseā?

4. E faapefea i le fautuaga na avatu e Iesu iā Mareta, ona tatou malamalama ai i le māfuaaga na faigofie ai mea sa ia faaaogā mo le Faamanatuga?

⁴ I ni masina muamua atu i le tausaga lona tolu o le faiva a Iesu, na ia asiasi atu ai i le fale o ana uō mamae o Lasalo, Mareta, ma Maria. I lenā siʻomaga toʻafilemu, na amata ai ona ia aʻoaʻo atu. Na matuā popole Mareta i le saunia o se taumafataga tele mo la latou malo faaaloalogia. Na mātau e Iesu lenā tulaga, ma na ia faasaʻoina ma le agalelei Mareta e ala i le faapea atu, e lē manaʻomia ni tapenaga se tele. (Luka 10:40-42) Mulimuli ane ina ua toe o ni nai itula maliu Iesu, na ia faatatauina ai lana fautuaga sa fai atu iā Mareta. Na faigofie mea sa ia faaaogāina mo le Faamanatuga. O le ā ua tatou aʻoaʻoina mai i inei e faatatau iā Iesu?

5. O le ā se mea ua tatou aʻoaʻoina e faatatau iā Iesu, ona o le faigofie o le talisuaga mo le Faamanatuga, ma e faapefea ona fetaui lenā manatu ma le Filipi 2:5-8?

⁵ O so o se faamatalaga ma gaoioiga na faia e Iesu, na atagia mai ai lona lotomaulalo. E lē o se mea la e faateʻia ai lona faaalia o le matuā lotomaulalo i le pō mulimuli o lona soifuaga i le lalolagi. (Mata. 11:29) Na ia silafia o le a ia ofoina atu le taulaga e silisili ona tāua, ma o le a toe faatūina mai o ia e Ieova e avea o se tupu i le lagi. E ui i lea, e leʻi taumafai Iesu e faauaʻi mai isi iā te ia, e ala i le faia o ni tapenaga se tele mo le faamanatuina o lona maliu. Nai lo o lea, na ia faapea atu i ona soo ina ia faamanatuina lona maliu i tausaga taʻitasi, e ala i le faia o lea talisuaga faigofie. (Ioa. 13:15; 1 Kori. 11:23-25) O lea talisuaga ua faaalia ai, e lē faamaualuga Iesu. Maʻeu lo tatou lotofaafetai ona o se tasi o uiga matagofie o lo tatou Tupu i le lagi, o le lotomaulalo!​—Faitau le Filipi 2:5-8.

6. E faapefea ona tatou faaaʻoaʻo i le lotomaulalo o Iesu pe a tatou feagai ma faigatā?

⁶ E faapefea ona tatou faaaʻoaʻo i le lotomaulalo o Iesu? E ala i le faamuamua o manaʻoga o isi nai lo o i tatou. (Fili. 2:3, 4) Pe a toe mafaufau i le pō mulimuli o le soifuaga o Iesu i le lalolagi, na ia silafia ua toeitiiti ona ia tofo lea i se maliu tigā. Peitaʻi, na manatu mamafa o ia i manaʻoga o ona aposetolo faamaoni, o ē ua toeitiiti ona faavauvau lea ona o  lona maliu. O lea, na ia faaalu ai lenā pō e avatu ai faatonuga, faalaeiauga, ma faamautinoaga iā i latou. (Ioa. 14:25-31) Ioe, na faaalia e Iesu le lotomaulalo e ala i le faamuamua o manaʻoga o isi nai lo o ona lava manaʻoga. Maʻeu se faaaʻoaʻoga lelei mo i tatou!

7. Na faapefea ona faaalia e Iesu le matuā lototele ina ua uma ona ia faavaeina le Talisuaga Afiafi a le Alii?

⁷ Na faaalia e Iesu le matuā lototele ina ua uma ona ia faavaeina le Talisuaga Afiafi a le Alii. I le ā le itu? Na talia e Iesu le finagalo o lona Tamā mo ia, e ui lava sa ia iloa o le a fasiotia ai o ia ona o le tuuaʻia i le solitulafono matagā o le faiupu leaga i le Atua. (Mata. 26:65, 66; Luka 22:41, 42) Na tumau pea ma le faamaoni Iesu ina ia faamamaluina ai le suafa o Ieova, lagolagoina le pule silisili ese a le Atua, ma mafai ai e tagata ua faaalia le salamō ona maua le ola e faavavau. I le taimi e tasi, na sauniunia ai foʻi e Iesu ona soo mo mea ua toeitiiti ona latou fesagaʻia lea.

8. (a) O le ā na faailoa atu e Iesu i ona aposetolo faamaoni? (e) I tausaga mulimuli ane talu ona maliu Iesu, na faapefea ona faaalia e soo o Iesu sa latou mulimuli pea i lana faaaʻoaʻoga o le lototele?

⁸ Na faaalia foʻi e Iesu le lototele e ala i le taulaʻi atu i manaʻoga o ona aposetolo faamaoni nai lo o ona popolega. O le talisuaga faigofie na ia faavaeina ina ua ia faatulaʻi ese Iuta, o le a faamanatu atu ai i ē o le a avea ma ona soo faauuina aogā o lona toto na faamaligiina, ma o i latou o se vaega o le feagaiga fou. (1 Kori. 10:16, 17) Ina ia fesoasoani iā i latou e tumau ma le faamaoni ma maua le faaeaga e faatasi ai ma Iesu i le lagi, na faailoa atu e Iesu i ona soo mea o loo la faatalitalia ma lona Tamā mai iā i latou. (Ioa. 15:12-15) Na ia taʻua foʻi tulaga faigatā o le a oo iā i latou. Ona ia faalaeiauina lea o  i latou ina ia mulimuli i lana faaaʻoaʻoga, ma faapea atu “ia lototetele!” (Ioa. 16:1-4a, 33) I le tele o tausaga mulimuli ane, na mulimuli pea soo o Iesu i lana faaaʻoaʻoga o le faaalia o le agaga faataulaga ma le lototele. E ui lava sa oo ai mafatiaga iā i latou, ae na fesoasoani le tasi i le isi i so o se faafitauli na tulaʻi mai.​—Epe. 10:33, 34.

9. E faapefea ona tatou faaaʻoaʻo iā Iesu i le faaalia o le lototele?

⁹ O loo tatou mulimuli foʻi i le faaaʻoaʻoga a Iesu o le lototele i aso nei. O se faataʻitaʻiga, e manaʻomia le lototele ina ia fesoasoani ai i o tatou uso o loo sauāina ona o lo latou faatuatua. O isi taimi, atonu e faafalepuipuiina o tatou uso ona o ni faiga lē tonu. Pe a tutupu na mea, e tatau ona tatou faia taumafaiga uma e puipuia ai i latou, e aofia ai le tutū atu mo i latou. (Fili. 1:14; Epe. 13:19) E tatou te faaalia foʻi le lototele e ala i le faaauau pea ona talaʻi “ma le lototetele.” (Galu. 14:3) E pei o Iesu, e tatou te maumauaʻi e talaʻi atu le feʻau o le Malo, e tusa pe e tetee mai tagata ma sauāina i tatou. Peitaʻi, e iai taimi e tatou te lagona ai e pei ua mou atu lo tatou lototele. O le ā e mafai ona tatou faia?

10. I vaiaso a o lumanaʻi le Faamanatuga, o le ā e tatau ona tatou faia ma aiseā?

¹⁰ E mafai ona faamalosia lo tatou lototele, e ala i le manatunatu i le faamoemoe ua mafai ona tatou maua ona o le taulaga togiola a Keriso. (Ioa. 3:16; Efe. 1:7) I vaiaso a o lumanaʻi le Faamanatuga, ua tatou maua se avanoa faapitoa e faalolotoina ai lo tatou talisapaia o le togiola. O lea, ia fai lau faitauga Tusi Paia mo le Faamanatuga, ma manatunatu loloto i mea na tutupu a o lata ina maliu Iesu. Pe a tatou auai la i le Talisuaga Afiafi a le Alii, o le a tatou malamalama atoatoa i le tāua o le areto ma le uaina o le Faamanatuga, faapea mea ua faaāta mai ai. O lo tatou malamalama i le mea ua faia e Iesu ma Ieova mo i tatou, faapea  aogā e tatou te maua ai faatasi ma ē e pele iā i tatou, o le a matuā faamalosia ai lo tatou faamoemoe, ma uunaʻia ai i tatou ina ia tumau pea seʻia oo i le iʻuga.​—Epe. 12:3.

11-12. O ā mea ua tatou aʻoaʻoina e faatatau i le Talisuaga Afiafi a le Alii?

¹¹ E tele mea ua tatou aʻoaʻoina e faatatau i le Talisuaga Afiafi a le Alii. E lē gata ua faamanatu mai ai le tautele o le togiola, ae o uiga matagofie foʻi o Iesu o le lotomaulalo ma le lototele. E tatou te matuā lotofaafetai ona o le avea ai o Iesu ma o tatou Ositaulaga Sili i le lagi, o loo ia faaalia pea nei uiga ma ʻaiʻoi atu i le Atua mo i tatou. (Epe. 7:24, 25) Ina ia faaalia lo tatou lototalisapaia, e tatau ona tatou mulimuli ma le faamaoni i le auala na faatonuina i tatou e Iesu e faamanatuina ai lona maliu. (Luka 22:19, 20) E tatou te faamanatuina lona maliu i le aso e paʻū i ai Nisani 14, o le aso lea e sili ona tāua i le tausaga.

¹² E iai foʻi se isi uiga o Iesu e tatou te aʻoaʻoina mai i le faigofie o le auala na faia ai le Talisuaga Afiafi a le Alii. Na lauiloa o ia i lenā uiga a o soifua ai i le lalolagi. O lenā foʻi uiga na uunaʻia ai o ia ina ia maliu mo i tatou. O le ā lenā uiga?

13. E faapefea i le Ioane 15:9 ma le 1 Ioane 4:8-10 ona faamatala mai ai le alofa na faaalia e Ieova ma Iesu, ma o ai e mauaina ai aogā?

¹³ Na faaatagia atoatoa mai e Iesu le malosi o le alofa o Ieova mo i tatou i mea uma na ia faia. (Faitau le Ioane 15:9; 1 Ioane 4:8-10.) E sili atu i lenā, o le alofa o Iesu na uunaʻia ai o ia e maliu mo i tatou. E ala i lenā taulaga ua tatou maua uma ai aogā mai i le alofa na faaalia e Ieova ma lona Alo mo i tatou, e tusa po o i tatou o nisi o le ʻaufaauuina po o “isi mamoe.” (Ioa. 10:16; 1 Ioa. 2:2) Pe a manatunatu foʻi i mea na faaaogā mo le talisuaga o le Faamanatuga, ua faaalia mai ai le alofa ma le magafagafa o Iesu mo ona soo. I le ā le itu?

14. O le ā le auala na faaalia ai e Iesu le alofa i ona soo?

¹⁴ Na faaalia e Iesu le alofa mo ona soo faauuina, e ala i le faavaeina o se talisuaga e faigofie ona faamanatuina. A o faagasolo taimi, na tatau i na soo faauuina ona faamanatuina i tausaga taʻitasi le Faamanatuga, e ui i tulaga eseese na latou fesagaʻia e aofia ai le faafalepuipuiina o i latou. (Faaa. 2:10) Pe sa mafai ona latou usitaʻia lenā faatonuga? Ioe, sa mafai ona latou faia faapea.

15-16. Na faapefea ona faamanatuina e nisi le Talisuaga Afiafi a le Alii e ui i tulaga faigatā?

¹⁵ E oo mai lava i aso nei, o loo faia pea taumafaiga a Kerisiano moni ina ia faamanatuina le maliu o Iesu. Na latou faia taumafaiga uma ina ia mulimulituʻi i le auala sa faia ai le Talisuaga Afiafi a le Alii, e ui lava i tulaga faigatā i nisi taimi. O nisi nei o faaaʻoaʻoga. A o faafalepuipuiina le uso o Harold King i Saina, sa ia mafaufau i se auala e faamanatuina ai le maliu o Iesu. Na ia faaaogāina mea sa iai i totonu o le sela e saunia ai i se auala faalilolilo mea e faaaogā mo le Faamanatuga. Na ia tauina foʻi le aso e tatau ona paʻū ai le Faamanatuga. Ina ua oo i le aso o le Faamanatuga, ona ia usuina lea o se pese, faia se tatalo faapea se lauga faale-Tusi Paia.

¹⁶ O le isi faaaʻoaʻoga, o ni tuafāfine na faafalepuipuiina i se nofoaga o faasalaga mamafa a le ʻau Nasi a o faia le Taua Lona Lua a le Lalolagi. Na lamatia o latou ola ina ia faamanatuina le Talisuaga Afiafi a le Alii. Ae ona o le faigofie o mea sa faaaogā mo le Faamanatuga, sa mafai ai ona latou faia i se auala faalilolilo lea sauniga. Na latou faapea mai: “Sa matou tutū faataaliʻoliʻo, i le ogatotonu sa iai se tamaʻi laulau na ufiufi i se ʻie paʻepaʻe, ma sa iai i luga le uaina ma le areto. Sa faamalamalamaina totonu  o le potu i se molī gaʻo, ina neʻi faigofie ona mātaulia i matou ona o le molī eletise. . . . Na matou toe faailoaina atu ma le lotoatoa la matou tautoga i lo matou Tamā, ina ia faaaogā lo matou malosi mo le faapaiaina o Lona suafa paia.” Maʻeu le malosi o le faatuatua o nei tuafāfine! Maʻeu foʻi le alofa o Iesu mo i tatou, ua mafai ai ona tatou faamanatuina lona maliu e ui i tulaga faigatā!

17. O ā fesili e manaʻomia ona tatou fesili ifo ai iā i tatou lava?

¹⁷ A o latalata i le Faamanatuga, e manaʻomia ona tatou fesili ifo iā i tatou lava: ʻE faapefea ona ou mulimulituʻi i le faaaʻoaʻoga a Iesu i le auala e faaalia ai le alofa? Po ou te manatu mamafa i manaʻoga o oʻu uso tapuaʻi nai lo o oʻu lava manaʻoga? Po ou te faatalitalia ni mea se tele mai i oʻu uso ma tuafāfine, ma po o oʻu iloa le mea e gata ai lo latou mafai?’ Tau ina ia faaauau pea ona tatou faaaʻoaʻo iā Iesu, ma “ia tigā alofa le tasi i le isi.”​—1 Pete. 3:8.

18-19. (a) O le ā ua tatou mautinoa i ai? (e) O le ā ua e maumauaʻi e fai?

¹⁸ E lē o toe umi ona muta lea o le faamanatuina o le maliu o Keriso. Pe a “taunuu mai” Iesu a o faagasolo le puapuaga tele, o le a ia aoaoina i le lagi “ē ua filifilia” o loo totoe i le lalolagi, ma o le taimi lenā o le a muta ai le faamanatuina o le Faamanatuga.​—1 Kori. 11:26; Mata. 24:31.

¹⁹ E tusa pe e lē toe faia le Faamanatuga, ae e tatou te mautinoa o le a manatua pea e tagata o Ieova lenei talisuaga faigofie, o se faailoga silisili lea o le lotomaulalo, lototele, ma le alofa ua faaalia e se tagata. E mautinoa o le a faamatala atu e i latou sa faamanatuina le Faamanatuga i ē o le a ola i le lalolagi fou, ina ia mafai foʻi ona latou maua ai aogā. Ae ina ia tatou maua aogā i lenei taimi, e tatau ona tatou maumauaʻi e faaaʻoaʻo i le lotomaulalo, lototele, ma le alofa o Iesu. O le faia faapea, o le a mafai ai ona tatou maua lo tatou taui mai iā Ieova.​—2 Pete. 1:10, 11.