1-2. Aiseā e tatou te auai ai i le Faamanatuga i tausaga taʻitasi?

 PE TUSA ma le 2,000 tausaga ua mavae, na foaʻi mai ai e Iesu lona ola mo i tatou, lea ua tatou maua ai le avanoa e ola e faavavau. I le pō a o lumanaʻi lona maliu, na ia poloaʻia ai ona soo ina ia latou faamanatuina lenei gaoioiga alofa na ia faia, e ala i le faia o se sauniga faigofie e faaaogā ai le areto ma le uaina.​—1 Kori. 11:23-26.

² E tatou te usitaʻia le poloaʻiga a Iesu ona e tatou te matuā alolofa iā te ia. (Ioa. 14:15) I tausaga taʻitasi i le vaitaimi o le Faamanatuga, e faaalia lo tatou lototalisapaia mo le gaoioiga na faia e Iesu, e ala i le faaalu o se taimi e manatunatu loloto ai i le tāua o lona maliu mo i tatou. E tatou te fiafia foʻi e faatele so tatou sao i le talaʻiga, ma faalaeiau le toʻatele e mafai ai ina ia tatou auai faatasi i lenei sauniga faapitoa. Ioe, e tatou te maumauaʻi e aua neʻi faatagaina so o se mea e taofia ai i tatou mai i le auai i le Faamanatuga.

3. O le ā o le a tatou talanoaina i lenei mataupu?

³ O le a tatou talanoaina i lenei mataupu auala e tolu o loo faia ai e tagata o Ieova le mea sili e faamanatu ai le maliu o Iesu: (1) mulimuli i le faaaʻoaʻoga na faataatia e Iesu, (2) valaaulia o isi i le Faamanatuga, ma le (3) faamanatuina o le Faamanatuga e ui i tulaga faigatā.

4. O ā upu moni e talanoaina i le Faamanatuga i tausaga taʻitasi, ma aiseā e tatau ai ona tatou matuā faatāuaina na upu moni? (Luka 22:19, 20)

⁴ I le Faamanatuga i tausaga taʻitasi, e faia ai se lauga faale-Tusi Paia lea e aumaia ai tali manino i le tele o fesili. E tatou te aʻoaʻoina ai le māfuaaga e manaʻomia ai e tagata se togiola, ma pe faapefea i le maliu o le tagata e toʻatasi ona magalo ai agasala a le toʻatele. E faamanatu mai ai foʻi iā i tatou mea o loo faaata mai e le areto ma le uaina, ma po o ai i latou e tatau ona tagofia. (Faitau le Luka 22:19, 20.) E tatou te manatunatu foʻi i faamanuiaga o le a maua e i latou e faamoemoe e ola e faavavau i le lalolagi. (Isa. 35:5, 6; 65:17, 21-23) E tatau ona tatou matuā faatāuaina na upu moni. E faitau piliona tagata e lē malamalama i na upu moni, ma e latou te lē talisapaia le tāua o le taulaga a Iesu. E latou te lē mulimuli foʻi i le auala na faataatia e Iesu e faia ai le Faamanatuga. Aiseā?

5. Ina ua maliliu le toʻatele o le ʻauaposetolo, o le ā le auala na faamanatuina ai e tagata le maliu o Iesu?

⁵ E leʻi umi talu ona maliliu le toʻatele o aposetolo o Iesu, ae amata ona aliaʻe mai Kerisiano faatagāfai i totonu o le faapotopotoga. (Mata. 13:24-27, 37-39) Na latou “faauiga sesē mea, ina ia taaʻina ese ai soo e mulimuli atu iā i latou.” (Galu. 20:29, 30) O se tasi o aʻoaʻoga na “faauiga sesē” e na Kerisiano, e leʻi “faatasi” ona ofoina atu e Iesu lona ola o se taulaga “ina ia tauaveina ai agasala a le toʻatele,” ae o se mea e tatau ona faia e lē aunoa. (Epe. 9:27, 28) E toʻatele tagata i aso nei e talitonu i lenā aʻoaʻoga sesē. E latou te ō i lotu i vaiaso taʻitasi, ae i nisi taimi i aso taʻitasi, e faamanatu le maliu o Iesu lea e latou te taʻua o le “Taulaga Paia o le Misasā.” b Ae o isi lotu e lē o taimi uma e latou te faamanatuina ai le maliu o Iesu, ma o le toʻatele o i latou e lē malamalama i le tāua o le taulaga a Iesu. E tuufesili nisi, ʻPe e mafai moni lava i le maliu o Iesu ona faamagalo ai aʻu agasala?’ Aiseā ua latou fesili ai faapea? Talu ai ua taaʻina o latou manatu e tagata e lē talitonu, e mafai e le taulaga a Iesu ona faamagaloina agasala. Ua faapefea ona taulima e soo moni o Iesu lenei mataupu?

6. E oo ane i le 1872, o le ā le malamalamaga ua iai i tagata aʻoga o le Tusi Paia?

⁶ I le 1870, na taʻimua ai Charles Taze Russell i tagata aʻoga o le Tusi Paia na faia saʻiliʻiliga māeʻaeʻa o le Tusi Paia. Na latou fia iloa le mea moni e faatatau i le tāua o le taulaga a Iesu, faapea le auala e faamanatuina ai lona maliu. E oo ane i le 1872, ua latou malamalama mai i a latou saʻiliʻiliga i le Tusi Paia, na saunia e Iesu le togiola mo tagata uma. Na latou faalauiloa atu mea na latou aʻoaʻoina e ala i tusi, nusipepa, ma mekasini. E leʻi umi ae latou faataʻitaʻi i Kerisiano i le uluaʻi senituri, e ala i le faatasi i le tausaga ona potopoto e faamanatuina le Faamanatuga.

7. Ua faapefea ona aogā iā i tatou saʻiliʻiliga a tagata aʻoga o le Tusi Paia i le taimi ua teʻa?

⁷ Ua tatou maua aogā i aso nei mai i saʻiliʻiliga māeʻaeʻa na faia e na Kerisiano faamaoni. E faapefea? O le faamanuia a Ieova ua tatou malamalama ai i le mea moni e faatatau i le taulaga a Iesu, ma mea ua faataunuuina ona o lenā taulaga. (1 Ioa. 2:1, 2) Ua tatou aʻoaʻoina ai foʻi faamoemoe e lua  ua folafola mai i le Tusi Paia mo i latou e faafiafiaina le Atua: o le a maua e nisi le ola e lē mafai ona oti i le lagi, ae o le a ola e faavavau i le lalolagi le faitau miliona. E tatou te matuā vavalalata atu iā Ieova, pe a mātau le tele o lona alofa mo i tatou ma aogā o le taulaga a Iesu mo tagata taʻitoʻatasi. (1 Pete. 3:18; 1 Ioa. 4:9) I le pei o tatou uso faamaoni i taimi ua teʻa, e tatou te valaaulia foʻi isi ina ia tatou auai faatasi i le Faamanatuga ma mulimuli i le faaaʻoaʻoga na faataatia e Iesu.

8. O ā taumafaiga ua faia e tagata o Ieova e valaaulia ai isi i le Faamanatuga? (Tagaʻi i le ata.)

⁸ Ua tele tausaga o valaaulia e tagata o Ieova isi tagata i le Faamanatuga. I le 1881, na valaaulia ai uso ma tuafāfine i le Iunaite Setete e faapotopoto faatasi i le fale o se uso i Allegheny i Pennsylvania, mo lea sauniga faapitoa. Mulimuli ane, na faia e faapotopotoga taʻitasi a latou lava Faamanatuga. Iā Mati i le 1940, na faailoa atu i tagata talaʻi e mafai ona latou valaaulia so o se tasi i le oganuu na faaalia le fiafia. I le 1960, na saunia ai e le Peteli mo le uluaʻi taimi ni valaaulia na lolomiina mo faapotopotoga. Talu mai lenā tausaga, ua silia ma le piliona valaaulia mo le Faamanatuga ua tufatufaina. Aiseā e tatou te faaalu ai le tele o le taimi ma taumafaiga e valaaulia isi?

9-10. O ai e mauaina aogā mai i a tatou taumafaiga e valaaulia isi i le Faamanatuga? (Ioane 3:16)

⁹ O se tasi o māfuaaga e tatou te valaaulia ai isi ina ia tatou auai faatasi i le Faamanatuga, ona e tatou te mananaʻo e latou te aʻoaʻoina e faatatau i mea ua faia e Ieova ma  Iesu mo i tatou uma. (Faitau le Ioane 3:16.) E tatou te faamoemoe o mea e latou te vāai ma faalogo i ai, o le a uunaʻia ai i latou e aʻoaʻo atili e faatatau iā Ieova ma avea ma ana auauna. Ae e iai foʻi isi e latou te maua aogā mai i le Faamanatuga.

¹⁰ E tatou te valaaulia foʻi i latou e lē o toe talaʻi ma auai i sauniga, ina ia faamanatu atu ai o loo alofa pea Ieova iā i latou. E talia e le toʻatele la tatou valaaulia, ma e tatou te matuā fiafia pe a latou auai mai. O lo latou auai i le Faamanatuga, e latou te manatua ai taimi fiafia i la latou auaunaga iā Ieova. Mātau le faaaʻoaʻoga a Monica. c Na amata ona toe talaʻi i le taimi o le KOVITI-19. Ina ua ia auai i le Faamanatuga i le 2021, na ia faapea mai: “O se Faamanatuga sili lea ona tāua iā te aʻu. O le taimi muamua lea i le 20 tausaga, ua mafai ai ona ou talaʻi ma valaaulia tagata i le Faamanatuga. Na ou faia le mea e sili ona ou te matuā lotofaafetai i mea ua faia e Ieova ma Iesu mo aʻu.” (Sala. 103:1-4) E tusa pe e talia e tagata la tatou valaaulia pe leai, ae e tatou te faia taumafaiga uma e valaaulia ai i latou i le Faamanatuga, i le iloaina e talisapaia e Ieova a tatou taumafaiga.

11. Ua faapefea ona faamanuia e Ieova a tatou taumafaiga e valaaulia tagata i le Faamanatuga? (Hakai 2:7)

¹¹ Ua matuā faamanuia e Ieova a tatou taumafaiga e valaaulia tagata i le Faamanatuga. I le 2021, e ui lava i faasāsāaga ona o le KOVITI-19, ae na tatou ausia se matatiʻa e 21,367,603 o i latou na auai i le Faamanatuga. Ua toetoe faaluaina ma le ʻafa le fuainumera e sili atu ai i le aofaʻi o Molimau a Ieova i le lalolagi aoao. O le mea moni, e lē tāua iā Ieova po o le ā le toʻatele e auai i le Faamanatuga, ae e tāua iā te ia tagata taʻitoʻatasi. (Luka 15:7; 1 Timo. 2:3, 4) E tatou te mautinoa pe a tatou valaaulia isi, o lenā ua fesoasoani Ieova iā i tatou ina ia maua tagata lotofaamaoni.​—Faitau le Hakai 2:7.

12. O ā tulaga e ono faigatā ai mo i tatou ona faamanatuina le maliu o Iesu? (Tagaʻi i le ata.)

¹² Na valoia e Iesu a o faagasolo aso e gata ai, o le a tatou fesagaʻia so o se tulaga faigatā, e pei o teteega mai i aiga, sauāga, taua, faamaʻi, ma le tele o isi mea. (Mata. 10:36; Mare. 13:9; Luka 21:10, 11) Ona o na tulaga, e iai taimi e faigatā ai ona tatou faamanatuina le maliu o Iesu. Ua faapefea ona manumalo o tatou uso ma tuafāfine mai i na luʻi, ma ua faapefea ona fesoasoani Ieova iā i latou?

13. A o iai Artem i le falepuipui, na faapefea ona faamanuia e Ieova lona lototele ma le maumauaʻi e faamanatu le maliu o Iesu?

¹³ Faafalepuipui. E faia taumafaiga uma a o tatou uso o loo faafalepuipui ona o lo latou faatuatua, e faamanatu ai le maliu o Iesu. Mātau le faaaʻoaʻoga a Artem. I le Faamanatuga i le 2020, na lokaina ai o ia i se sela e 17 mita faatafafā (183 futu faatafafā) le telē, ma o isi taimi e oo atu i le toʻalima pagota e iai i lenā sela. E ui i lea, na ia faaaogā mea na mafai ona ia maua e saunia ai le areto ma le uaina mo le Faamanatuga, ma na ia fuafua foʻi e faia le lauga o le Faamanatuga mo ia lava. Ae e tele ina ulaula ma tautatala i gagana masoā pagota na latou iai faatasi. O le ā na faia e Artem? Na ia talosaga i ai pe e mafai ona taofi le ulaula ma le tautatala i gagana masoā mo le itula. Ae na faateʻia  Artem ina ua latou malilie e faia faapea i le taimi atoa o le Faamanatuga. Ua faapea mai Artem, “Na ou manaʻo e faamatala iā i latou le Faamanatuga.” E ui lava e latou te leʻi fia faalogo i le taimi muamua, ae na latou fia iloa atili ina ua latou vāai ma faalogo i mea na faia e Artem i le taimi o le Faamanatuga.

14. I le taimi o le KOVITI-19, o ā taumafaiga na faia e tagata o Ieova ina ia faamanatuina le Faamanatuga?

¹⁴ KOVITI-19. Ina ua pipisi lenei faamaʻi, e leʻi mafai ona toe potopoto faatasi tagata o Ieova mo le Faamanatuga. Ae e leʻi taofia ai i latou mai i le faamanatuina o le Faamanatuga. d Na faamanatuina e isi faapotopotoga le Faamanatuga e faaaogā ai le Initaneti. Ae e faapefea le faitau miliona e lē o maua le Initaneti? I nisi atunuu, na faia fuafuaga e faasalalau le lauga i le televise po o le leitiō. E lē gata i lea, e silia ma le 500 gagana na puʻeina ai e lālā le lauga, ina ia mafai e uso i vaega maotua ona faamanatuina le Faamanatuga. Na faaoo atu e uso faamaoni na lauga i le ʻauuso na nonofo i vaega maotua.

15. O le ā ua e aʻoaʻoina mai i le faaaʻoaʻoga a Sue?

 ¹⁵ Teteega mai i aiga. O se tasi o luʻi e sili ona faigatā ai mo nisi ona faamanatuina le Faamanatuga, o teteega mai i aiga. Mātau le mea na tupu i se tagata suʻesuʻe e igoa iā Sue. I le 2021 i le aso a o leʻi faia le Faamanatuga, na fai ai Sue i lona faiaʻoga e lē mafai ona ia auai i le Faamanatuga, ona o teteega mai i lona aiga. Na faitau atu e lona faiaʻoga le Luka 22:44 ma faapea atu, pe a tatou feagai ma faigatā, e tatau ona tatou faaaʻoaʻo iā Iesu e ala i le tatalo iā Ieova ma maufaatuatuaina atoatoa o Ia. I le aso na sosoo ai, na saunia ai e Sue le areto ma le uaina ma matamata le polokalame faapitoa o le Tapuaʻiga o le Taeao i le jw.org. A o iai na o ia i lona potu i lenā afiafi, na ia faalogologo ai i le Faamanatuga e faaaogā ai le telefoni. Mulimuli ane, na tusi atu Sue i lona faiaʻoga: “O au upu faalaeiau ananafi na matuā faamalosia ai aʻu. Na ou faia taumafaiga uma e auai ai i le Faamanatuga, ma na fesoasoani mai Ieova. E lē mafai e upu ona faamatala loʻu fiafia ma loʻu lotofaafetai!” Pe e te manatu e mafai ona fesoasoani Ieova iā te oe pe a e feagai ma se tulaga faapena?

16. Aiseā e tatou te mautinoa ai o le a faamanuia e Ieova a tatou taumafaiga ina ia auai i le Faamanatuga? (Roma 8:31, 32)

¹⁶ E matuā talisapaia e Ieova a tatou taumafaiga e faamanatu le maliu o Iesu. E tatou te mautinoa o le a ia faamanuia mai, pe a tatou faaalia le lotofaafetai mo mea ua ia faia mo i tatou. (Faitau le Roma 8:31, 32.) O lea, ia tatou faia taumafaiga uma e auai ai i le Faamanatuga i lenei tausaga, ma faia le mea sili e faateleina ai so tatou sao i galuega faaleagaga i le vaitaimi o le Faamanatuga.