O LE upu i le uluaʻi gagana ua faaliliuina “kariota” i le Faaliliuga a le Lalolagi Fou, e mafai ona faasino atu i so o se ituaiga o kariota. (Galu. 8:​28, 29, 38) Peitaʻi, e foliga mai o le kariota na tiʻetiʻe ai le Aitiope, e telē atu nai lo o kariota e faaaogā i taua ma tuuga. O nisi nei o faamaoniga o lenā manatu:

O le Aitiope o se tagata aloaʻia na malaga i se mea mamao. O ia “o se tagata maualuga i le pulega a Kanake, le tupu tamaʻitaʻi o Aitiope, ma e vaaia e ia ana oloa uma.” (Galu. 8:27) O Aitiope anamua e aofia ai Sudan i aso nei, ma le tele o le vaega i saute o Aikupito i aso nei. E ui e lē tasi se kariota na faaaogā e le tamāloa mo le malaga atoa, ae e mautinoa e tele ana mea na ave mo lenei malaga umi. O nisi o kariota na faaaogā i le uluaʻi senituri T.A. e feaveaʻi ai tagata, o ni kariota e fā uili ma e iai le fale. Ua taʻua i le tusi Acts—An Exegetical Commentary, “o na kariota e tele mea e mafai ona ave ai, e sili atu ona lelei mo faigāmalaga, ma e mafai ona malaga ai tagata i nofoaga mamao.”

Na faalatalata atu Filipo a o faitau e le Aitiope se tusi. Ua taʻua i le Galuega 8:​30, ʻua tamoʻe atu Filipo i tafatafa o le kariota, ma faalogo atu o loo faitau leotele e le eunuka le tusi a le perofeta o Isaia.’ O kariota na faaaogā e feaveaʻi ai tagata, e lē o ni kariota saoasaoa. O le telegese o nei kariota na mafai ai e le eunuka ona faitau le tusi a Isaia, ma mafai ai e Filipo ona tamoʻe atu ma maua le kariota.

Na ʻaiʻoi le Aitiope iā Filipo, “ina ia oso atu i luga e la te nonofo faatasi.” (Galu. 8:31) E tutū tagata e faaaogāina kariota tutuu. Peitaʻi, o kariota e feaveaʻi ai tagata, sa iai le mea na nonofo ai Filipo ma le eunuka.

E tusa ai ma faamatalaga i le Galuega mataupu e 8 ma faamaoniga o le talafaasolopito, ua faaalia ai i a tatou lomiga talu ai nei, le tiʻetiʻe o le eunuka Aitiope i se kariota e telē atu nai lo o kariota e faaaogā i taua ma tuuga.