1-2. O ā faafitauli o loo fesagaʻia e auauna faamaoni a Ieova?

 E MAFAI ona suia faafuaseʻi o tatou olaga pe a feagai ma faafitauli ogaoga. O se faataʻitaʻiga, na aafia se uso faamaoni e igoa iā Luis a i se kanesa e matuā leaga lava. Na taʻu atu e le fomaʻi iā te ia, e lē o toe tele ni masina e ola ai. Na pisi Monika ma lana tane i mea faaleagaga. Ae i se tasi aso, na iloa ai e Monika na faia faananā e lana tane o se toeaina le agasala mo le tele o tausaga. Na tatau ona tuua e Olivia, o se tuafafine nofofua lona fale ona o se afā e matuā malosi. E toe foʻi ane o ia, ua faaleagaina lona fale i le afā. Na suia faafuaseʻi olaga o i latou uma nei i se taimi puupuu. Pe na tupu se tulaga faapena iā te oe na suia faafuaseʻi ai lou olaga?

² E ui e tatou te auauna faamaoni iā Ieova, ae e tatou te aafia uma i faafitauli ma maʻi o loo aafia ai foʻi isi tagata. E manaʻomia foʻi ona tatou onosaia teteega po o sauāga mai i fili o tagata o le Atua. E ui e lē puipuia e Ieova i tatou mai i na faafitauli, ae ua ia folafola mai e fesoasoani iā i tatou. (Isa. 41:10) O lana fesoasoani e mafai ona faatumau ai lo tatou olioli, faia filifiliga lelei, ma tumau faamaoni e oo lava i tulaga e sili ona faigatā. O le a iloiloina i lenei mataupu auala e fā e fesoasoani mai ai Ieova iā i tatou i taimi faigatā. O le a tatou iloiloina foʻi mea e manaʻomia ona tatou faia, ina ia maua ai aogā mai i le fesoasoani ua ia saunia mai.

 O LE A LEOLEOINA OE E IEOVA

3. Pe a tatou feagai ma se faafitauli ogaoga, o le ā e ono faigatā ona tatou faia?

³ Le luʻi. Pe a tatou feagai ma faafitauli ogaoga, e ono faigatā ona tatou mafaufau lelei ma faia filifiliga. Aiseā? E matuā mafatia o tatou loto ma lofitūina i tatou i le popole. E tai pei ai ua pogisa la tatou vaai ma lē mautonu i le mea e agaʻi i ai. O faamatalaga nei a tuafāfine e toʻalua na taʻua i le amataga. Ua faapea mai Olivia: “Ina ua faaleagaina loʻu fale i le afā, na ou lagona le matuā atuatuvale ma le lē mautonu.” O le faamatalaga lenei a Monika e faatatau i le lē faamaoni o lana tane: “Na ou lagona le matuā faanoanoa, ma e tai pei ua tutui aʻu e se isi. Ua faigatā ona ou toe faia mea na masani ai. Ou te leʻi mafaufauina e tupu lenei mea iā te aʻu.” E faapefea ona fesoasoani mai Ieova pe a lofitūina i tatou i mafatiaga?

4. O le ā ua folafola mai e le Atua i le Filipi 4:​6, 7?

⁴ O le ā e faia e Ieova? Ua ia folafola mai e na te foaʻi mai “le filemu mai i le Atua.” (Faitau le Filipi 4:​6, 7.) O lenā filemu e faasino atu i le toʻafilemu o le loto ma le mafaufau, ona o le iai o se faiā vavalalata ma Ieova. O lenei foʻi filemu “e silisili i mea uma lava e tatou te malamalama ai.” O lona uiga, e sili atu i so o se mea lava e tatou te mafaufau i ai. Pe na iai se taimi na e lagona ai le toʻafilemu ina ua uma ona e tatalo faatauanau iā Ieova? O lenā faalogona, o “le filemu mai i le Atua.”

5. E faapefea ona leoleoina o tatou loto ma mafaufau i le filemu mai i le Atua?

⁵ Ua taʻua i le mau lava lenā, o le filemu mai i le Atua e “leoleoina” pe puipuia ai “o outou loto ma mafaufau.” O le upu i le uluaʻi gagana mo le “leoleoina,” o se upu sa faaaogā e vaegaʻau. Sa faasino atu i fitafita e leoleoina se aai mai i osofaʻiga. Na momoe saogalemu tagata o le aai ona na latou iloa o loo leoleo e fitafita faitotoʻa o le aai. I se tulaga talitutusa, pe a leoleoina o tatou loto ma mafaufau i le filemu mai i le Atua, o le a tatou lagona le toʻafilemu ma le malupuipuia. (Sala. 4:8) E pei o Hana, e tusa pe e lē suia faafuaseʻi o tatou tulaga, ae e tatou te lagona lava le toʻafilemu. (1 Samu. 1:​16-18) Pe a tatou lagona foʻi le toʻafilemu, e faigofie ona tatou mafaufau lelei ma faia filifiliga atamai.

6. O le ā e ao ona tatou faia ina ia maua ai le filemu mai i le Atua? (Tagaʻi foʻi i le ata.)

⁶ O le ā e tatou te faia? Pe a tatou aafia i faafitauli, ia valaau atu i leoleo i se uiga faafaatusa. E faapefea? Ia tatalo seʻia oo ina tatou lagona le filemu mai i le Atua.  (Luka 11:9; 1 Tesa. 5:17) Na faamatala e Luis lea na taʻua muamua, mea na fesoasoani iā te ia ma lana avā o Ana, ina ua iloa e lē o toe tele ni masina e ola ai. Ua ia faapea mai: “I taimi faapenei, e matuā faigatā lava ona faia ni filifiliga e faatatau i togafitiga ma isi mataupu. Ae o le tatalo na mafai ai ona ma maua le filemu i lea taimi faigatā.” Na faapea mai Luis ma lana avā, sa la tatalo faatauanau e lē aunoa iā Ieova e foaʻi mai le filemu o le loto ma le mafaufau, faapea le atamai e faia ai filifiliga lelei, ma na la tofo i lana fesoasoani. Pe a e feagai ma se faafitauli, ia finafinau i le tatalo, ona e maua lea o le filemu o Ieova lea e leoleoina ai lou loto ma le mafaufau.—Roma 12:12.

O IEOVA E TE SAOGALEMU AI

7. O ā o tatou faalogona pe a tatou aafia i se tofotofoga faigatā?

⁷ Le luʻi. Pe a tatou aafia i se tofotofoga faigatā, atonu o le a suia o tatou faalogona, mafaufauga, ma le auala e tatou te gaoioi ai. E mafai ona faatusa o tatou faalogona lē mautonu i se vaa o loo felafoaʻi solo e peau sousou o le sami. Ua faapea mai Ana lea na taʻua muamua, na femoumouaʻi ona faalogona ina ua maliu Luis. Ua ia faapea mai: “Pe a oo mai faalogona o le lē taulau, ou te lagona le lotovaivai. Ou te lagona foʻi le ita ona ua lē toe iai o ia.” E lagona foʻi e Ana le tuua toʻatasi ma le lē fiafia, pe a ia faia faaiʻuga i mataupu sa lelei ona taulima e Luis. E iai foʻi taimi e oo ai iā te ia faalogona e pei o loo iai i se sami sousou. E faapefea ona fesoasoani mai Ieova pe a lofitūina i tatou i faalogona faapena?

8. O le ā ua faamautinoa mai e Ieova i le Isaia 33:6?

⁸ O le ā e faia e Ieova? Ua ia faamautinoa mai o ia e tatou te saogalemu ai. (Faitau le Isaia 33:6.) Pe a afātia se vaa, atonu o le a fetāaʻi solo i lea itu ma lea itu. O le tele o vaa e iai vaega i autafa e tai pei o ni ʻapaʻapa. O nei vaega e faaitiitia ai le fetāaʻi solo o le vaa, ma e saogalemu ai le pasese ma latou onosaia ai le sou o le vasa. Peitaʻi, o le tele o nei vaega e pei o ni ʻapaʻapa, e faatoʻā aogā pe afai o loo alu i luma le vaa. I se tulaga talitutusa, o Ieova e tatou te saogalemu ai pe afai e tatou te auauna pea ma le faamaoni iā te ia i taimi faigatā.

9. E faapefea i a tatou meafaigaluega mo saʻiliʻiliga ona fesoasoani iā i tatou e maua ai le toʻafilemu? (Tagaʻi foʻi i le ata.)

⁹ O le ā e tatou te faia? Pe a lofitūina oe i faalogona mafatia, ia e taumafai e faia le mea sili e tausisi ai pea i lau faasologa faaleagaga. E ui atonu e lē o toe tele ni mea e  mafai ona e faia e pei o le taimi muamua, ae ia manatua, e magafagafa Ieova. (Faatusatusa i le Luka 21:​1-4.) Ia faaaofia i lau faasologa faaleagaga se taimi e faia ai au lava suʻesuʻega ma manatunatu loloto i ai. Aiseā? Ua saunia e Ieova e ala mai i lana faalapotopotoga, manatu faale-Tusi Paia aogā ina ia fesoasoani iā te oe e faatumauina ai se vaaiga paleni. Ina ia maua na faamatalaga, e mafai ona faaaogā meafaigaluega mo saʻiliʻiliga e pei o le JW Library^® ma le Tusi Taʻiala mo Saʻiliʻiliga a Molimau a Ieova. Na faapea mai Monika lea na taʻua muamua, na ia faaaogā na meafaigaluega e saʻili ai mo ni fautuaga ina ua lofitūina o ia i faalogona mafatia. O se faaaʻoaʻoga, na ia tā i totonu le upu “ita,” ma i nisi taimi o le upu “faalata” po o le “faamaoni.” Ona ia faitau lea i ai seʻia oo ina toʻafilemu ona faalogona. Na ia faapea mai: “Sa ou lagona le matuā popole ina ua amata aʻu saʻiliʻiliga, ae e uma ane e pei o loo opo aʻu e Ieova. Na ou iloa ai e malamalama Ieova i oʻu faalogona, ma na ia fesoasoani iā te aʻu.” O lenā fesoasoani mai iā Ieova, e mafai foʻi ona faatumauina ai se vaaiga paleni seʻia oo ina toe lagona le toʻafilemu.—Sala. 119:​143, 144.

O LE A LAGOLAGOINA OE E IEOVA

10. O ā o tatou faalogona pe a tatou aafia i se faafitauli ogaoga?

¹⁰ Le luʻi. Pe a tatou aafia i se faafitauli ogaoga, e iai taimi e tatou te lagona ai le lotovaivai ma le vaivai o le tino. Atonu e pei o tatou faalogona o se tagata taalo ua lavea, sa masani ona tamoʻe saoasaoa ae o lea ua setusetu. Ua faigatā ona tatou faia mea sa faigofie ona fai, po ua leai se uunaʻiga e fai ai mea sa tatou fiafia i ai. E pei o Elia, atonu e faigatā ona tatou tutū i luga, ma e pau le mea e tatou te mananaʻo ai o le mālōlō. (1 Tu. 19:​5-7) O le ā ua folafola mai e Ieova e na te faia pe a tatou lagona le vaivai?

11. O le ā se isi auala e fesoasoani mai ai Ieova iā i tatou? (Salamo 94:18)

¹¹ O le ā e faia e Ieova? Ua ia folafola mai e na te lagolagoina i tatou. (Faitau le Salamo 94:18.) E pei ona manaʻomia e le tagata taalo ua lavea le fesoasoani ina ia gaoioi ai pea, e tatou te manaʻomia foʻi le fesoasoani ina ia faaauau ai pea i le auaunaga iā Ieova. I taimi faapena, ua faamautinoa mai ai e Ieova: “O aʻu o Ieova lou Atua, o loo uuina lou lima taumatau, o Lē e fai atu iā te oe, ʻAua e te fefe. O le a ou fesoasoani iā te oe.’”  (Isa. 41:13) Na maua foʻi e le tupu o Tavita lenā fesoasoani, ina ua ia fetaiaʻi ma tofotofoga faapea ona fili. Na ia faapea atu iā Ieova: “O lou lima taumatau e lagolagoina ai aʻu.” (Sala. 18:35) Ae e faapefea ona lagolagoina i tatou e Ieova?

12. O ai e faaaogā e Ieova e fesoasoani mai pe a tatou lagona le vaivai?

¹² E masani ona lagolagoina e Ieova i tatou e ala i le uunaʻia o isi e fesoasoani mai. O se faataʻitaʻiga, ina ua lagona e Tavita le vaivai, na asiasi atu lana uō o Ionatana e faamalosi ma faalaeiau iā te ia. (1 Samu. 23:​16, 17) Na faaaogā foʻi e Ieova Elisaia e fesoasoani iā Elia. (1 Tu. 19:​16, 21; 2 Tu. 2:2) I aso nei, atonu e faaaogā foʻi e Ieova o tatou aiga, uō, po o toeaina e lagolagoina i tatou. Peitaʻi, pe a tatou mafatia, o se faalogona masani le mananaʻo e faaesea i tatou lava ma tuua na o i tatou. O le ā e tatou te faia ina ia maua ai le lagolagosua a Ieova?

13. O le ā e manaʻomia ona tatou faia ina ia maua ai aogā mai i le lagolagosua a Ieova? (Tagaʻi foʻi i le ata.)

¹³ O le ā e tatou te faia? Ia taumafai e ʻalofia le faaesea o i tatou lava. Pe a faaesea i tatou lava, e pau le mea o le a uaʻi i ai o i tatou lava ma o tatou faafitauli. O na ituaiga mafaufauga e mafai ona aafia ai a tatou filifiliga. (Faata. 18:1) E moni e manaʻomia se taimi mo na o i tatou lava, aemaise pe a tatou aafia i faafitauli ogaoga. Peitaʻi, pe a faaesea i tatou lava mo se taimi umi, o le a tatou teena ai le auala o loo faaaogā e Ieova e lagolagoina ai i tatou. O lea, e tusa po o le ā le ogaoga o se faafitauli, ae ia talia le fesoasoani mai i aiga, uō, ma toeaina. Ia vaai iā i latou o le auala lenā ua faaaogā e Ieova e lagolagoina ai oe.—Faata. 17:17; Isa. 32:​1, 2.

O LE A FAAMĀFANAFANAINA OE E IEOVA

14. O ā tulaga faigatā e tatou te lagona ai le fefe?

¹⁴ Le luʻi. Atonu e iai taimi e tatou te lagona ai le fefe. O loo taʻua foʻi i le Tusi Paia auauna faamaoni a le Atua sa lagona le atuatuvale ma le gatete, ona o o latou fili po o isi tulaga faigatā. (Sala. 18:4; 55:​1, 5) I se tulaga talitutusa, e tatou te feagai foʻi ma teteega i aʻoga, galuega, tauaiga, po o faigāmalo. E tatou te fefefe foʻi neʻi o tatou feoti pe a aafia i se maʻi tugā. I taimi faapena, e ono pei o tatou lagona o se tamaitiiti laʻitiiti ua leai se fesoasoani. E faapefea ona fesoasoani  mai Ieova pe a feagai ma tulaga faapena?

15. O le ā ua faamautinoa mai i le Salamo 94:19?

¹⁵ O le ā e faia e Ieova? E na te faamāfanafana ma faatoʻafilemu i tatou. (Faitau le Salamo 94:19.) O lenei mau e tatou te mafaufau ai i se teineitiiti ua fefe ma lē mafai ona moe ona o le pā leotele o se faititili. Seʻi faaata ua alu atu lona tamā ma fusi o ia seʻia oo ina toe moe. E ui o loo pāpā pea faititili, ae o le opoina o ia e lona tamā ua ia lagona ai le saogalemu. Pe a tatou feagai ma tofotofoga faigatā, e tatou te mananaʻo e opo i tatou e lo tatou Tamā i le lagi i se uiga faafaatusa, seʻia oo ina toʻafilemu o tatou faalogona. E faapefea ona tatou maua faamāfanafanaga mai iā Ieova?

16. E faapefea ona tatou maua faamāfanafanaga mai iā Ieova? (Tagaʻi foʻi i le ata.)

¹⁶ O le ā e tatou te faia? Ia faaalu le taimi e talanoa ai iā Ieova e ala i le tatalo ma faitau i lana Afioga. (Sala. 77:​1, 12-14) O le taimi lava la e te lagona ai le popole, o le gaoioiga muamua e te faia o le liliu atu i lou Tamā i le lagi. Ia sasaa atu iā Ieova ou popolega ma mea o loo e atuatuvale ai, ona ia talanoa mai lea ma faamāfanafanaina oe e ala i le Tusi Paia. (Sala. 119:28) O le a e maua ai se mau patino e mafai ona faamāfanafana ai oe pe a e popole. O se faaaʻoaʻoga, e te ono maua faalaeiauga i tusi o Iopu, Salamo, ma le Faataoto, faapea fetalaiga a Iesu o loo i le Mataio mataupu e 6. O le a e maua faamāfanafanaga mai iā Ieova, pe a e tatalo atu iā te ia ma faitau i lana Afioga.

17. O le ā ua tatou mautinoa i ai?

¹⁷ E tatou te mautinoa e faatasi Ieova ma i tatou i taimi faigatā o o tatou olaga. E lē tuulafoaʻia i tatou e Ieova. (Sala. 23:4; 94:14) Ua ia folafola mai e na te leoleoina, lagolagoina, ma faamāfanafanaina i tatou, ma o ia foʻi e tatou te saogalemu ai. Ua faapea mai le Isaia 26:3 e faatatau iā Ieova: “O le a e leoleoina i latou ua faalagolago atoatoa iā te oe, o le a e avatu iā i latou le filemu e faaauau pea, auā e latou te faatuatuaina oe.” O lea, ia maufaatuatuaina Ieova ma talia auala ua ia saunia mai e fesoasoani ai iā te oe. O le faia faapea, o le a e maua ai pea le malosi e tusa pe e te feagai ma taimi faigatā.