O nisi uso na ola aʻe i aganuu e manatu faatauvaa ai tamāloloa i fafine. O se faaaʻoaʻoga, ua faapea mai Hans, o se ovasia matagaluega i Polivia: “O nisi tane na ola aʻe i aganuu e faalaeiauina ai le gaoioi o tamāloloa i se auala faasausili. E manatu nei tamāloloa e sili atu i latou nai lo o fafine, ma e feutagaʻi ma i latou i se auala lē faaaloalo.” Ua faapea mai Shengxian, o se toeaina i Taiwan: “I le vaipanoa ou te nofo ai, e manatu le toʻatele o tamāloloa e lē tatau ona faaali manatu o fafine i a latou mea e fai. Pe a taʻua e se tamāloa le manatu o se fafine i se mataupu, e ono vaai maulalo isi tamāloloa iā te ia.” E iai foʻi auala iloagatā e faaalia ai e tamāloloa le faailoga tagata faasaga i fafine. O se faaaʻoaʻoga, e latou te faia tala tausua lē faaaloalo e faatatau i fafine.

O le mea e faafetai ai, e mafai lava e se tamāloa ona faia se suiga e tusa po o le ā le aganuu na ola aʻe ai. E mafai ona ia liaʻiese le manatu, e sili atu tamāloloa nai lo o fafine. (Efe. 4:​22-24) E mafai ona faia faapea, e ala i le faaaʻoaʻo iā Ieova. O le a talanoaina i lenei mataupu le auala e feutagaʻi ai Ieova ma fafine, le auala e feutagaʻi ai uso ma tuafāfine e pei ona faia e Ieova, ma le auala e tausolomua ai toeaina e faaalia le faaaloalo i tuafāfine.

AUALA E FEUTAGAʻI AI IEOVA MA FAFINE

Ua faataatia e Ieova le faaaʻoaʻoga sili i le auala e feutagaʻi ai ma fafine. E na te faaalia le alofa i lona aiga faaletagata, ona o ia o se Tamā e tigā alofa. (Ioa. 3:16) E pei tuafāfine faamaoni o ni afafine pele iā te ia. Seʻi mātau nisi o auala ua faamamaluina ai e Ieova fafine.

E feutagaʻi o ia ma fafine i se auala tonu. Na foafoa e Ieova tamāloloa ma fafine i lona faatusa. (Kene. 1:27) E na te leʻi foafoaina tamāloloa  ina ia sili atu ona atamamai nai lo o fafine, pe sili atu foʻi ona tāua iā te ia tamāloloa nai lo o fafine. (2 No. 19:7) E tutusa le tomai na ia foaʻi i tamāloloa ma fafine ina ia malamalama ai i upu moni o le Tusi Paia, ma faaaʻoaʻo i ona uiga matagofie. E tautele iā Ieova tane ma fafine uma e faatuatua iā te ia, e tusa pe e faamoemoe e ola e faavavau i le lalolagi parataiso pe auauna o ni tupu ma ositaulaga i le lagi. (2 Pete. 1:​1, fpl.) E manino mai, e feutagaʻi Ieova ma fafine i se auala tonu.

E faafofoga mai o ia iā i latou. E tāua iā Ieova faalogona ma popolega o fafine. O se faaaʻoaʻoga, na ia faafofoga ma tali mai i tatalo a Rasela ma Hana. (Kene. 30:22; 1 Samu. 1:​10, 11, 19, 20) Na faagaeeina foʻi e Ieova ē na tusia le Tusi Paia, ina ia tusia tala e faatatau i tamāloloa na faalogo atu i fafine. O se faataʻitaʻiga, na usitaʻi Aperaamo i le faatonuga a Ieova e faalogo i lana avā o Sara. (Kene. 21:​12-14) Na faalogo le tupu o Tavita iā Apikaila, ma na ia manatu o Ieova na auina mai Apikaila e talanoa atu iā te ia. (1 Samu. 25:​32-35) Na faaatagia atoatoa mai e Iesu uiga o lona Tamā, ae na ia faalogo atu foʻi iā Maria lona tinā. (Ioa. 2:​3-10) Ua faamatilatila mai i nei faaaʻoaʻoga se tasi o auala e faaalia ai e Ieova le faaaloalo i fafine, o le faafofoga mai lea iā i latou.

E na te maufaatuatuaina i latou. O se faaaʻoaʻoga, na maufaatuatuaina e Ieova Eva e fesoasoani i le tausia o le lalolagi atoa. (Kene. 1:28) O le faia faapea, e iloa ai e leʻi manatu Ieova e faatauvaa atu Eva nai lo o lana tane o Atamu. Peitaʻi, o ia o se fesoasoani mo lana tane. Na maufaatuatuaina foʻi e Ieova perofeta fafine o Tepora ma Ulata e avatu fautuaga i ona tagata, e aofia ai se faamasino ma se tupu. (Faama. 4:​4-9; 2 Tu. 22:​14-20) I aso nei, ua maufaatuatuaina e Ieova tuafāfine Kerisiano e faia lana galuega. O loo auauna nei tuafāfine faamaoni o ni tagata talaʻi, paeonia, ma misionare. O loo latou fesoasoani i le tusia o ata, fausiaina, ma le tausia o Maota mo Sauniga ma ofisa o lālā. O loo auauna nisi i Peteli, ae o isi o loo auauna i ofisa faaliliu. E pei nei tuafāfine o se ʻautau toʻatele o loo faaaogā e Ieova e faataunuu lona finagalo. (Sala. 68:11) E manino mai, e lē silasila Ieova i tuafāfine o ni ē e faatauvaa pe e lē aogā.

AUALA E FEUTAGAʻI AI USO MA TUAFĀFINE E PEI ONA FAIA E IEOVA

Uso e, ina ia iloa po o tatou feutagaʻi ma tuafāfine Kerisiano e pei ona faia e Ieova, e manaʻomia ona faia se iloiloga faamaoni o o tatou manatu ma gaoioiga. E tatou te manaʻomia le fesoasoani e faia ai lenā mea. E pei ona aogā se faata e iloa ai ni faalētonu i le fatu o se tagata, e faapena foʻi ona fesoasoani se uō faamaoni ma le Afioga a le Atua e iloa ai ni o tatou manatu lē lelei e faatatau i fafine, lea atonu ua mauaa iā i tatou. E faapefea ona tatou maua lenā fesoasoani?

Ia fesili i se uō faamaoni. (Faata. 18:17) E mafai ona tatou fesili atu i se uō maufaatuatuaina e agalelei ma magafagafa: “O le ā sou manatu i le auala ou te feutagaʻi ai ma tuafāfine? Pe e latou te lagona ou te faaaloalo iā i latou? Pe e iai se itu e faaleleia ai le auala ou te feagai ai ma i latou?” Pe a faailoa atu e lau uō vala e mafai ona e galue ai, ia ʻalofia le faia o faamolemolega. Ae ia lotomalie e faia suiga e manaʻomia.

Ia suʻesuʻe le Afioga a le Atua. O le auala sili e iloa ai po o tatou feutagaʻi ma tuafāfine i se auala lelei, o le faaaogā lea o le Afioga a le Atua e iloilo ai o tatou manatu ma gaoioiga. (Epe. 4:12) A o suʻesuʻeina le Tusi Paia, o le a tatou iloa ai tane na feutagaʻi ma fafine i se auala lelei faapea tane na feutagaʻi ma fafine i se auala lē lelei. E mafai ona faatusatusa a latou faaaʻoaʻoga ma a tatou gaoioiga. O le faatusatusa foʻi o mau o le Tusi Paia, e ʻalofia ai lo tatou faauiga sesē o se mau ina ia lagolago ai so tatou manatu lē saʻo e faatatau i fafine. O se faataʻitaʻiga, ua faapea mai le 1 Peteru 3:​7, o le avā “e pei o se ipu e sili ona vaivai.” b Po o lona uiga la e faatauvaa ma vaivai o ia nai lo o le tane? E leai. Ia faatusatusa upu a Peteru ma le Kalatia 3:​26-29, lea e taʻua ai ua filifilia e Ieova fafine ma tane e pule faatasi ma Iesu i le lagi. O le  suʻesuʻe o le Afioga a le Atua ma fesili i se uō faamaoni mo sona manatu i le auala o loo tatou feutagaʻi ai ma fafine, o le a tatou iloa ai le auala talafeagai e faaalia ai le faaaloalo i o tatou tuafāfine.

AUALA E FAAALIA AI E TOEAINA LE FAAALOALO I TUAFĀFINE

E mafai foʻi e uso i le faapotopotoga ona faaalia le faaaloalo i tuafāfine, e ala i le mulimuli i le faaaʻoaʻoga a toeaina alolofa. E faapefea ona tausolomua toeaina i le faaalia o le faaaloalo i tuafāfine? Seʻi mātau nisi o auala patino.

E latou te faamālō i tuafāfine. Na faataatia e le aposetolo o Paulo se faaaʻoaʻoga lelei mo toeaina. Na ia avatu le faamālō i le toʻatele o tuafāfine i lana tusi i le faapotopotoga i Roma. (Roma 16:12) Pe e mafai ona e faaata le olioli o na tuafāfine ina ua faitau le tusi a Paulo i le faapotopotoga? E fiafia foʻi toeaina e faamālō atu i tuafāfine mo o latou uiga lelei ma galuega o loo latou faia mo Ieova. O le faia faapea, e iloa ai e tuafāfine le matuā faaaloalogia ma le talisapaia o i latou. O upu faalaeiau a se toeaina, atonu o le mea tonu lenā o loo manaʻomia e nei tuafāfine, ina ia faaauau ai la latou auaunaga faamaoni iā Ieova.—Faata. 15:23.

Pe a faamālō atu i tuafāfine, e ao i toeaina ona avatu se faamālō moni ma ia patino. Aiseā? Ua faapea mai le tuafafine o Jessica: “E ese le manaia pe a faapea mai uso, ʻmalo lava.’ Peitaʻi, e sili atu ona matou talisapaia pe a faamālō mai uso i se mea patino, e pei o le aʻoaʻo o a matou fanau ina ia nonofo filemu i le sauniga, po o le faia o se taumafaiga fitā e fesoasoani i se tagata suʻesuʻe e auai mai i le sauniga.” Pe a faamālō atu toeaina i tuafāfine i se mea patino, o le a lagona ai e tuafāfine le tāua o i latou i le faapotopotoga.

E latou te faalogologo lelei i tuafāfine. E iloa e toeaina lotomaulalo, e lē na o i latou e iai ni  manatu lelei. E fesili atu na toeaina i tuafāfine mo ni o latou manatu, ma faalogologo lelei pe a latou talanoa mai. O lenā auala e faalaeiauina ai e toeaina tuafāfine, ma maua ai e toeaina aogā. E faapefea? Ua faapea mai Gerardo, o se toeaina o loo auauna i le Peteli: “Ua ou iloa o le fesili i tuafāfine mo ni o latou manatu, e aogā foʻi mo aʻu i le auala e faia ai aʻu galuega. O le tulaga masani, ua umi atu ona faia e tuafāfine na galuega nai lo o le toʻatele o uso.” O le toʻatele o tuafāfine e auauna o ni paeonia i le faapotopotoga. O lea, e latou te iloa lelei ai le toʻatele o tagata i le oganuu. Ua faapea mai se toeaina e igoa iā Bryan: “E tele mea e aogā ai tuafāfine i le faalapotopotoga. O lea, ia taumafai e maua aogā mai i a latou faaaʻoaʻoga lelei.”

O toeaina e iai le tofā mamao, e lē vave ona latou teena manatu o tuafāfine. Aiseā? Ua faapea mai se toeaina e igoa iā Edward: “O manatu ma tomai o se tuafafine, e fesoasoani i se uso e malamalama ai i le atoaga o se mataupu, ma malamalama lelei ai i faalogona o isi.” (Faata. 1:5) E tusa pe e lē faaaogā e se toeaina le fautuaga a se tuafafine, ae e mafai ona ia faafetai ma faamālō atu mo ona manatu.

E latou te toleniina tuafāfine. E saʻili e toeaina faautauta auala e toleni ai tuafāfine. O se faaaʻoaʻoga, e latou te aʻoaʻoina tuafāfine i le auala e faia ai faatasiga mo talaʻiga i taimi e lē avanoa ai se uso papatiso. E mafai foʻi ona latou toleniina tuafāfine i le faaaogāina o masini po o meafaigaluega, ina ia latou fesoasoani ai i galuega faufale a le faalapotopotoga. I le Peteli, e toleni e ovasia tuafāfine i le auala e faaleleia ai mea, faia o faatau, vaaia o tupe, galuega tau komepiuta, ma isi lava galuega. O le toleni e toeaina o tuafāfine, e faailoa atu ai lo latou amanaʻia ma le maufaatuatuaina o tuafāfine.

E faaaogā e le toʻatele o tuafāfine toleniga mai i toeaina ina ia fesoasoani ai i isi. O se faaaʻoaʻoga, e faaaogā e nisi tuafāfine toleniga mai i faugāfale, e fesoasoani ai i isi e toe fausia o latou fale pe a uma se mala faalenatura. E faaaogā e isi tuafāfine o latou tomai i talaʻiga i nofoaga faitele, e toleni ai isi tuafāfine i lenei vala o le faiva. O ā lagona o tuafāfine e faatatau i toeaina na toleniina i latou? Ua faapea mai le tuafafine o Jennifer: “A o oʻu galue i le fausiaina o se Maota mo Sauniga, na faaalu e le ovasia le taimi e toleni ai aʻu. Na ia mātauina galuega na ou faia ma faamālō mai. Na ou fiafia e galue faatasi ma ia, ona na ou lagona ai le maufaatuatuaina ma e iai loʻu aogā.”

O AOGĀ O LE FEUTAGAʻI MA TUAFĀFINE I SE AUALA LELEI

E pei o Ieova, e tatou te alolofa foʻi i o tatou tuafāfine faamaoni. O lea, e tatou te feutagaʻi ma i latou e pei o ni sui o lo tatou aiga. (1 Timo. 5:​1, 2) E tatou te faatāuaina i latou ma fiafia e galulue faatasi ma i latou. E tatou te fiafia foʻi pe a latou iloa e tatou te alolofa ma lagolagoina i latou. Ua faapea mai le tuafafine o Vanessa: “Ou te matuā lotofaafetai iā Ieova i le avea o aʻu ma vaega o lana faalapotopotoga, lea e iai se ʻauuso e faalaeiau mai iā te aʻu.” Ua faapea mai se tuafafine i Taiwan: “Ou te matuā lotofaafetai iā Ieova ma lana faalapotopotoga, ona o le matuā faatāuaina o fafine ma o latou faalogona. O lenei mea e faamalosia ai loʻu faatuatua, ma atili ai ona ou talisapaia le faaeaga o le iai i le faalapotopotoga a Ieova.”

Maʻeu le mitamita o Ieova i le silasila mai i tane Kerisiano faamaoni, o loo naunau e faaaʻoaʻo iā te ia i le faamamaluina ma le faaalia o le faaaloalo i fafine! (Faata. 27:11) Ua faapea mai Benjamin, o se toeaina i Sikotilani: “O le toʻatele o tamāloloa i le lalolagi i aso nei, e lē faaaloalo i fafine. O lea, pe a ō mai fafine i le Maota mo Sauniga, e matou te mananaʻo ia latou iloa le eseesega.” Tau ina ia tatou faia le mea sili e faaaʻoaʻo ai iā Ieova, e ala i le faaalia o le alofa ma le faaaloalo i o tatou tuafāfine pele!—Roma 12:10.