1. Aiseā e avea ai le Faamanatuga o le aso e sili ona tāua o le tausaga? (Luka 22:​19, 20)

 O LE aso e sili ona tāua mo tagata o Ieova, o le Faamanatuga o le maliu o Keriso. E na o le pau lea o le aso na faatonuina patino e Iesu ona soo e faamanatu. (Faitau le Luka 22:​19, 20.) E tele māfuaaga e tatou te tulimataʻia ai le Faamanatuga. Seʻi o tatou iloiloina nisi o na māfuaaga.

2. O ā nisi o māfuaaga e tatou te tulimataʻia ai le Faamanatuga?

² Ua fesoasoani le Faamanatuga iā i tatou e manatunatu ai i le tāua o le togiola. E faamanatu mai ai auala e tatou te faaalia ai le talisapaia o le taulaga a Iesu. (2 Kori. 5:​14, 15) E tatou te maua foʻi le avanoa e “fefaalaeiauaʻi” ai ma o tatou uso ma tuafāfine. (Roma 1:12) I tausaga taʻitasi, e auai ai i le Faamanatuga le toʻatele o i latou e leʻi toe auai i ni sauniga. E uunaʻia isi e toe foʻi iā Ieova, ona o le auala māfana e faafeiloaʻia ai i latou i le Faamanatuga. E uunaʻia foʻi le toʻatele o tagata fiafia e amata ona suʻesuʻe le Tusi Paia, ona o mea e latou te vāai ma faalogo i ai i lenā sauniga. E lētioa avea le Faamanatuga o se sauniga e faapitoa iā i tatou.

3. E faapefea i le Faamanatuga ona autasia ai le ʻauuso i le lalolagi aoao? (Tagaʻi foʻi i le ata.)

³ Seʻi mafaufau i le auala ua autasia ai le ʻauuso i le lalolagi  aoao ona o le Faamanatuga. E potopoto Molimau a Ieova i le lalolagi aoao mo le Faamanatuga a o goto mālie ifo le lā. E tatou te faalogologo ai i se lauga e faamatilatila mai ai le tāua o le togiola. E tatou te usu ai ni pese o viiga se lua, tufaina ai le areto ma le uaina, ma tatou faapea atu ma le lotoatoa “amene” i tatalo e fā. E faia uma e faapotopotoga i le lalolagi aoao na vala i totonu o le 24 itula. Seʻi faaata le matuā fiafia o Ieova ma Iesu pe a la silasila mai o loo tatou autasi ma faamamaluina i laʻua i lenā auala.

4. O ā manatu o le a talanoaina i lenei mataupu?

⁴ O le a talanoaina i lenei mataupu fesili nei: E faapefea ona sauniunia o tatou loto mo le Faamanatuga? E faapefea ona tatou fesoasoani i isi ina ia latou maua mai ai aogā? E faapefea ona tatou fesoasoani iā i latou e leʻi toe auai i ni sauniga? O tali i nei fesili e mafai ona sauniunia ai i tatou mo lenei sauniga faapitoa.

E FAAPEFEA ONA SAUNIUNIA O TATOU LOTO MO LE FAAMANATUGA?

5. (a) Aiseā e tatau ai ona tatou manatunatu i le tāua o le togiola? (Salamo 49:​7, 8) (e) O le ā e te aʻoaʻoina mai i le vitiō Aiseā na Maliu ai Iesu?

⁵ O se tasi o auala tāua e sauniunia ai o tatou loto mo le Faamanatuga, o le manatunatu i le tāua o le taulaga togiola a Iesu Keriso. E lē mafai ona tatou laveaʻia i tatou lava mai i le agasala ma le oti. (Faitau le Salamo 49:​7, 8; tagaʻi foʻi i le vitiō Aiseā na Maliu ai Iesu?) a O lea, na foaʻi mai ai e Ieova lona Alo pele e maliu ina ia laveaʻia i tatou. O le mea moni, e telē le faataulaga na faia e Ieova ma Iesu. (Roma 6:23) O le tele e tatou te manatunatu ai i le faataulaga na faia e Ieova ma Iesu mo i tatou, o le loloto foʻi lenā o lo tatou talisapaia o le togiola. O le a tatou iloiloina nisi o mea na faataulaga e Ieova ma Iesu. Ae seʻi iloilo muamua po o ā mea na aofia ai i le togiola.

6. O ā mea na aofia ai i le togiola?

⁶ O le togiola o le tau lea e totogi ina ia toe faatau mai ai se mea. Na lelei atoatoa le uluaʻi tagata o Atamu i le taimi na foafoaina ai o ia. Ae ina ua agasala, na ia melea ai mo ia ma lana fanau le avanoa e ola ai e faavavau. Ina ia toe maua mai le mea na melea e Atamu, na ofoina mai ai e Iesu lona ola lelei atoatoa e fai ai le taulaga. I le soifuaga atoa o Iesu i le lalolagi, “e leʻi faia e ia se agasala, e leʻi tautala foʻi lona fofoga i ni upu taufaasesē.” (1 Pete. 2:22) Ina ua maliu Iesu, na talafeagai lelei lona ola lelei atoatoa e sui ai le ola lea na melea e Atamu.—1 Kori. 15:45; 1 Timo. 2:6.

7. O ā nisi o tofotofoga na fesagaʻia e Iesu a o iai i le lalolagi?

⁷ Na usiusitaʻi atoatoa Iesu i lona Tamā i le lagi, e ui i le tele o tofotofoga na ia fesagaʻia a o iai i le lalolagi. A o laʻitiiti Iesu, na gauaʻi o ia i le taʻitaʻiga a ona mātua lē lelei atoatoa e ui e lelei atoatoa o ia. (Luka 2:51) A o talavou o ia, na manaʻomia ona ia teena faaosoosoga mai i isi ina ia lē usiusitaʻi pe lē faamaoni. Ina ua avea o ia ma tagata matua, na manaʻomia ona ia teena faaosoosoga a Satani le Tiapolo, e aofia ai osofaʻiga tuusaʻo ina ia lē faamaoni i le Atua. (Mata. 4:​1-11) Na maumauaʻi Satani ina ia faia e Iesu se agasala ma lē mafai ai ona ia faataunuu le togiola.

8. O ā isi tofotofoga na onosaia e Iesu?

⁸ Na feagai Iesu ma isi tofotofoga, a o faagasolo lana faiva i le lalolagi. Na sauāina o ia e ona fili ma taumafai e fasioti o ia. (Luka 4:​28, 29; 13:31) Na ia onosaia foʻi vaivaiga o ona soo. (Mare. 9:​33, 34) I lona faamasinoga,  na sauāina ma ulagia o ia, ona fasiotia lea o ia i se auala e sili ona tigā ma faalumaina. (Epe. 12:​1-3) Na manaʻomia foʻi ona ia onosaia tigā i ona toe taimi, e aunoa ma le fesoasoani a Ieova. b—Mata. 27:46.

9. O ā o tatou lagona e faatatau i le taulaga a Iesu? (1 Peteru 1:8)

⁹ O le mea moni, e tele mafatiaga na feagai ma Iesu ina ia saunia ai le togiola. Pe e lē faalolotoina ai ea lo tatou alofa mo Iesu, pe a manatunatu i le tele o faataulaga na ia faia mo i tatou?—Faitau le 1 Peteru 1:8.

10. O le ā le faataulaga na faia e Ieova ina ia saunia ai le togiola?

¹⁰ Ae e faapefea Ieova? O le ā le faataulaga na ia faia ina ia saunia ai e Iesu le togiola? O le faiā a Ieova ma Iesu, o le faiā lea e sili ona māfana i le vā o se tamā ma se atalii. (Faata. 8:30) Seʻi mafaufau i faalogona o Ieova a o silasila mai i le tele o faigatā na feagai ma Iesu a o iai i le lalolagi. E mautinoa na matuā tigā Ieova, a o silasila mai o faileagaina, teena, ma mafatia lona Alo.

11. Aumai se faataʻitaʻiga e iloa ai faalogona o Ieova ina ua fasiotia Iesu.

¹¹ E malamalama lelei ni mātua ua oti se la tama, i faalogona mafatia pe a oti se tamaitiiti. E ui e malosi lo tatou faatuatua i le toetū, ae e lē aveesea ai faalogona mafatia pe a maliu sē e pele iā i tatou. O lenā faaaʻoaʻoga e tatou te malamalama ai i faalogona o Ieova, a o silasila mai i le mafatia ma le maliu o lona Alo pele i le 33 T.A. c—Mata. 3:17.

12. O le ā e mafai ona tatou faia a o leʻi oo i le Faamanatuga?

¹² A o leʻi oo i le Faamanatuga, aiseā e lē faia ai ni au lava suʻesuʻega po o se Tapuaʻiga a le Aiga e faatatau i le togiola? Ia faaaogā le Tusi Taʻiala mo Saʻiliʻiliga a Molimau a Ieova, po o isi lomiga e maua ai faamatalaga atili e faatatau i lenā mataupu. d Ia faamautinoa foʻi e fai le faitauga Tusi Paia o le Faamanatuga, lea e maua i La Tatou Faiva ma le Olaga Faa-Kerisiano—Polokalame mo le Sauniga. I le aso o le Faamanatuga, aua neʻi galo ona matamata le polokalame faapitoa o le Tapuaʻiga o  le Taeao. Pe a sauniunia o tatou loto mo le Faamanatuga, o le a mafai ona tatou fesoasoani i isi ina ia latou maua ai foʻi aogā.—Esera 7:10.

FESOASOANI I ISI E MAUA AOGĀ MAI I LE FAAMANATUGA

13. O le ā le auala muamua e tatou te fesoasoani ai i isi ina ia maua aogā mai i le Faamanatuga?

¹³ E faapefea ona tatou fesoasoani i isi ina ia latou maua aogā mai i le Faamanatuga? O le auala muamua, o le valaaulia o i latou. E ese mai i ē e tatou te feiloaʻi ai i le talaʻiga, ia faia se lisi o tagata e tatou te mananaʻo e valaaulia. E aofia ai o tatou tauaiga, o ē e tatou te faigaluega ma aʻoʻoga faatasi, ma isi. Pe a lē lava kopi lolomi o le valaaulia, e mafai ona lafo atu se kopi o le valaaulia i a latou masini faaonapōnei. E ono faateʻia i tatou i le toʻatele o le a auai mai.—Fai. 11:6.

14. Aumai se faaaʻoaʻoga o le tāua o le valaaulia tuusaʻo o se tagata.

¹⁴ Aua le manatu māmā i le tāua o le valaaulia tuusaʻo o se tagata. E iai se tuafafine e ese le tapuaʻiga a lana tane. I se tasi aso, na faateʻia o ia ina ua faapea atu ma le fiafia lana tane e fia auai i le Faamanatuga, ona e tele taimi na ia valaaulia ai lana tane ae e leʻi auai. Aiseā ua suia ai le mafaufau o le tane i lenei taimi? Na ia taʻua, na maua atu sana valaaulia mai i se toeaina o le faapotopotoga e masani ai. Na auai le tane i le Faamanatuga i lenā tausaga ma isi tausaga mulimuli ane ai.

15. O le ā e ao ona tatou manatua pe a valaaulia tagata i le Faamanatuga?

¹⁵ Ia manatua, atonu e iai fesili a i latou na tatou valaauliaina, aemaise i latou e leʻi auai muamua i a tatou sauniga. O lea, ia mafaufau i fesili e latou te ono lāgā, ma sauniuni i le auala e tali ai. (Kolo. 4:6) O se faataʻitaʻiga, e ono fesili mai nisi: ʻO ā mea o le a faia i lenā faatasiga?’ ʻO le ā le umi e faia ai?’ ʻO ā ituaiga ofu e fai ai?’ ʻPe e totogi se tupe e ulufale ai?’ ʻPe e aoina ni peleti?’ Pe a valaaulia se tasi i le Faamanatuga, ia fai i ai pe e iai ni ana fesili, ona taumafai lea e tali. E mafai foʻi ona faaaogā le vitiō Faamanatuga o le Maliu o  Iesu ma le O ā Mea o Loo Faia i se Maota mo Sauniga?, e fesoasoani i tagata ina ia malamalama i le auala e faia ai a tatou sauniga. O loo iai foʻi i le lesona 28 o le tusi Se Olaga Fiafia e Faavavau!, le tele o manatu lelei e mafai ona faasoa ai.

16. O ā nisi o fesili a i latou e auai i le Faamanatuga?

¹⁶ Pe a māeʻa le Faamanatuga, atonu e iai nisi fesili a tagata fiafia e auai mai. E latou te ono fesili i le māfuaaga e toʻalāiti pe e leai ai nisi e tagofia le areto ma le uaina. E latou te fia iloa foʻi pe e faafia ona tatou faia le Faamanatuga i le tausaga. Atonu e latou te fesili foʻi po o le auala lava lea e faia ai sauniga uma a Molimau a Ieova. E ui o le tele o nei manatu e talanoaina i le lauga o le Faamanatuga, ae e ono manaʻomia e le tagata fiafia nisi faamatalaga. E mafai ona taliina nisi o na fesili i le mataupu o loo i le jw.org, “Aiseā e Ese ai le Auala e Faamanatu ai e Molimau a Ieova le Talisuaga a le Alii Mai i Isi Lotu?” A o leʻi amata, a o faagasolo, ma pe a māeʻa le Faamanatuga, ia tatou faia le mea sili e fesoasoani ai i “ē ua saunia o latou loto” ina ia maua aogā mai i lenei sauniga.—Galu. 13:48.

FESOASOANI I Ē E LĒ O TOE AUAI I SAUNIGA

17. E faapefea ona fesoasoani toeaina i ē e lē o toe auai i sauniga? (Esekielu 34:​12, 16)

¹⁷ I le vaitaimi o le Faamanatuga, e faapefea ona fesoasoani toeaina iā i latou e lē o toe auai i sauniga? Ia faaalia le naunau moni iā i latou. (Faitau le Esekielu 34:​12, 16.) A o leʻi faia le Faamanatuga, ia taumafai e faafesootaʻi le toʻatele e mafai ai. Ia faamautinoa i ai e te manatu mamafa iā i latou, ma e te manaʻo e fesoasoani atu i so o se auala. Ia valaaulia i latou i le Faamanatuga, ma pe a latou auai, ia faafeiloaʻi ma le māfana i latou. Pe a māeʻa le Faamanatuga, ia fesootaʻi pea ma nei uso ma tuafāfine pele, ma avatu so o se fesoasoani faaleagaga e latou te manaʻomia ina ia toe foʻi mai ai iā Ieova.—1 Pete. 2:25.

18. E faapefea ona tatou fesoasoani i ē e lē o toe auai i sauniga? (Roma 12:10)

¹⁸ E mafai e sui uma o le faapotopotoga ona  fesoasoani i ē e lē o toe auai i sauniga pe a auai mai i le Faamanatuga. E faapefea? E ala i le feutagaʻi ma i latou i se auala alofa, agalelei, ma faaaloalo. (Faitau le Roma 12:10.) Ia manatua, atonu ua faatalatū nei mamoe pele e toe auai mai i se sauniga. E latou te ono popole ina neʻi lē talia lelei i latou e le faapotopotoga. e O lea, ia ʻalofia fesili e latou te māsiasi ai po o faamatalaga e faatigā ai iā i latou. (1 Tesa. 5:11) O i latou o o tatou uso talitonu, ma e tatou te fiafia e toe tapuaʻi faatasi ma i latou.—Sala. 119:176; Galu. 20:35.

19. O ā aogā o le faamanatuina o le maliu o Iesu?

¹⁹ Ua tatou iloa nei le tāua o le poloaʻiga a Iesu ina ia faamanatuina lona maliu i tausaga taʻitasi. O le faia faapea, o le a tatou maua faatasi ai ma isi le tele o aogā. (Isa. 48:​17, 18) E faamalosia ai lo tatou alofa mo Ieova ma Iesu. E faailoa atu ai lo tatou matuā talisapaia o mea ua la faia mo i tatou. E faamalosia ai la tatou faiā ma o tatou uso tapuaʻi. O le a tatou fesoasoani ai foʻi i isi e iloa auala e maua ai faamanuiaga ona o le togiola. O lea, seʻi o tatou faia taumafaiga uma e sauniuni ai mo le Faamanatuga o lenei tausaga, o le aso lea e sili ona tāua o le tausaga.